Música

El domingu 19 de xunu, a les 21 hores, l’auditoriu del Centru Niemeyer d’Avilés acueye una actuación del grupu folk asturianu Tejedor, onde van presentar el so discu nuevu “Positivu”, cuatru trabayu de la banda. El preciu de la entrada ye de 12 euros.

“Positivu” contién 12 temes, de los que diez son nueves composiciones. Los otros dos son un set de xotes tradicionales y ún de los cantares populares asturianos que más-yos presta a los hermanos d’Avilés «El veleta».

El xueves 26 de mayu a les 20:30 hores Bisbal va repasar los sos ésitos nel Xovellanos. David Bisbal presenta la primer xira acústica de la so carrera nos teatros y auditorios más emblemáticos de tol estáu: Gran Teatre del Liceu de Barcelona, el Teatru Coliseum de Madrid, el Palau de la Música de Valencia o’l Palaciu Euskalduna de Bilbao, ente otros.

Lo meyor del so repertoriu en vivu con nueves igües que ponen de relieve una dimensión inédita de los sos cantares nun formatu con un soníu puru y una atmósfera bien íntima. Sobre l’escenariu, la voz de David Bisbal ta arropada pola so banda de músicos formada por guitarres acústiques y clásiques, un pianu de cola, contrabaxu, instrumentos de vientu y percusión.

Va diez años, l’artista andaluz entamó la so carrera en solitariu. Mientres esti tiempu, publicó cuatro álbumes, Corazón Latino, Bulería, Premonición y Sin mirar atrás, colos que supera los 4,5 millones de discos vendíos, y realizó cuatro grandes xires mundiales. Namás nel últimu añu ufiertó un cientu de conciertos y foi númberu 1 en países como Estaos Xuníos, L’Arxentina o México. El so brillante palmarés estatal ya internacional, con más de 50 premios otorgaos pola industria musical en tol mundu, ente los que destaquen un Grammy Llatinu, dos Premios Ondes y dellos Billboard Llatinu, conságrenlu como l’artista estatal más internacional de la última década.

El Grupu Folclóricu Xiringüelu de Xixón, fai un llamamientu p’ampliar el númberu de componentes. Búsquense mozos y moces de cualesquier edá a quien-yos pruya baillar y deprender el Folclore Asturianu. Precisen tamién xente pa la sección de cantar y panderetes, y al empar tán preparando una banda de Gaites tradicional.

L’únicu requisitu pa participar ye l’abonu de la cuota de Sociu. Si dalguna persona ta interesada puede ponese en contactu col grupu nel teléfonu: 607 423 829 -Ramón- o bien allegando a los ensayos los martes y los xueves de 20:00 a 21,30 hores nel Colexu Públicu Laviada de Xixón.

Esti sábadu 21 de mayu de magar les diez y media la nueche, El Judá, en Les Campes, La Pola Siero, acueye un conciertu d’ARMA X, acompañáu d’un actu del colectivu poéticu “Timba poétika”, nel que van participar David González, tou un referente de la poética underground asturiana; Sergio Sánchez Taboada, que dende Aviles presentará’l so espectáculu terrorista-musical ‘La Vidub’, nel que lu acompaña’l DJ Dani Antistylo; Pablo X. Suárez, representando a ritmu d’electro ‘Pop Retórika’ y ‘El sistema débeme una chocolatina’; David Fueyo, que vendrá colos testos de la so última canana, ‘Onírica’; Miguel Allende. que trairá coles sos ‘Pallabres de Payasu’ el ritmu beatnik de Llaviana; la pintora-poeta Lara Ríos, “y les últimes sorpreses timberes de la kuenka’l Nalón, La Turka y Erizuka”, anuncien los organizadores.

El Teatru Xovellanos y la Sociedá Filarmónica de Xixón presenten al Cuartetu Enesco en conciertu’l miércoles 18 de mayu a les 20:00 hores. El Cuartetu fundóse en 1979, escoyendo’l nome Enesco n’honor a la memoria del pernomáu compositor rumanu Georges Enesco (1881-1955). Al entamu de la so carrera influyó d’una forma importante’l so alcuentru colos famosos músicos Sandor Vegh y Sergiu Celibidache.

El so repertoriu toma un gran númberu d’obres qu’entienden páxines clásiques y romántiques de los sieglos XVIII y XIX, según la música del sieglu XX, qu’ocupa un llugar importante nos sos programes. Interpretó numberoses obres contemporanees pa cuartetu compuestes por Philippe Hersant, Serge Nigg, Henri Sauguet, Jean-Jacques Werner, Pierre-Max Dubois, Jesús Guridi, Montsalvatge, José Peris, Carmelo Bernaola, Josep Soler, y José García Román. Dellos d’es¡tos compositores escribieron obres especialmente pal Cuartetu Enesco.

Participa nos más importantes Festivales de Música: Besançon, Prades, La Chaise-Dieu, Montpellier, Paris, Cannes, Barcelona, Santander, Granada, Basilea, Festival Georges Enesco de Bucuresti, Festival Ivry Gitlis de Francia, Koblenz Festival d’Alemaña, Festival Xalapa de México. Nel Festival Kuhmo de Finlandia la so interpretación foi escoyida pa figurar nel CD que se grabó en directu pol Festival.

El grupu ta formáu por Constantin Bogdanas y Florin Szigeti a los vigulinos, Vladimir Mendelssohn, na viola; y Dorel Fodoreanu col violoncello.

Programa:

Cuartetu en Re menor op. 76 númb. 2 (Hob. III. 76) “Les Quintes” – J. HAYDN

Cuartetu númb. 11 en Fa menor, op. 95 “Serioso” – L.V. BEETHOVEN

“La muerte y la doncella”, cuartetu en Re menor D. 810 “obra póstuma” – F. SCHUBERT

El Conceyu Bimenes ta acabante de convocar una nueva edición del Concursu de Gaiteros y Gaiteres Mozos. El requisitu imprescindible pa poder participar nel mesmu ye ser menor de 21 años a fecha 30 de xunu de 2011. El plazu p’apuntase, apurriendo la documentación afayadiza al Ayuntamientu Bimenes, acaba’l 20 de xunu a les 12’00 hores.

El concursu tendrá, si el númberu de participantes ye mayor de diez, una fase semifinal que se cellebrará na Casa la Cultura de Santuyano’l sábado 25 de xunu. La final tendrá llugar nel mesmu sitiu, una selmana dempués (sábadu 2 de xunetu). Repartiránse 600 € en premios, pa los tres primeros clasificaos, asina como dellos trofeos.

El Conceyu Bimenes tien abiertu’l plazu pa presentase a una nueva edición del Concursu de Gaiteros y Gaiteres Mozos. El requisitu imprescindible pa poder participar nel mesmu ye ser menor de 21 años a fecha 30 de xunu de 2011. El plazu p’apuntase, apurriendo la documentación afayadiza al Ayuntamientu Bimenes, acaba’l 20 de xunu a les 12’00 hores.

El concursu tendrá, si el númberu de participantes ye mayor de diez, una fase semifinal que se cellebrará na Casa la Cultura de Santuyano’l sábado 25 de xunu. La final tendrá llugar nel mesmu sitiu, una selmana dempués (sábadu 2 de xunetu). Repartiránse 600 € en premios, pa los tres primeros clasificaos, asina como dellos trofeos.

La Conseyería de Cultura del Gobiernu d’Asturies asoleyó, coincidiendo cola Selmana de les Lletres Asturianes, un discu tituláu “13 X Mánfer”, que tien como oxetivu recuperar parte de la obra poética del escritor llangreanu Manuel d’Andrés Fernández, “Mánfer de la Llera”. La discográfica Ámbitu-L’Aguañaz preparó esta edición na que participen trece grupos y artistes adaptando poemes del autor de Ciañu.

El trabayu ábrese con una sesión d’electrofolk a cargu de Sergio Rodríguez, onde pue sentise la voz del propiu Mánfer recitar el poema «Nueche d’insomniu»; sigue la voz d’Anabel Santiago faciendo una tonada del testu «Cuando»; ensin dexar la canción asturiana, anque nesti casu más llixera, los Hermanos Valle Roso, col acompañamientu del pianu, dialoguen vocalmente con «Silenciu».

Apaecen tmamién Xabel, del que se recupera’l tema «L’Asturies eterna» (aparecíu hai años nel so únicu discu, onde precisamente ponía música a dellos testos de Mánfer); Toli Morilla, del que tamién se rescata una pieza grabada enantes, «Nueche d’insomniu» (tema central del espectáculu del mesmu nome); Alfredo González, que pon el so estilu particular al serviciu de «Tracamundiu»; y Xel Pereda (miembru de Llan de Cubel y guitarrista de la banda qu’acompaña a Nacho Vegas), que firma una pieza titulada «Soledá».

Una formación hestórica que perteneció al movimientu del Nuevu Canciu Astur, Renacencia, que vuelven a xuntase pa grabar en clave de pop-rock sesenteru «Les hores muertes», incluyendo la voz del fíu de Mánfer, Efrén d’Andrés y la guitarra del so ñetu Oscar. Pela so parte les pandereteres d’Herbamora y el grupu d’intérpretes que les acompaña convierten nun ramu tradicional la poesía «Atetuyu ante la muerte».

La grabación sigue pelos soníos folk con Felpeyu y la so adaptación de «La carbonera». L’electrofolk vuelve con Xera y el poema «Yo quixera». «13 x Mánfer» piésllase con Dark la eMe y la so adaptación hiphopera d’«Asturies, patria querida», la primer grabación del raperu n’asturianu y Dixebra, que fai rock del poema «Contrastes».

El discu presentóse nel Teatru Nuevu de La Felguera, dientro de los actos de la 32 Selmana de les Lletres Asturianes.

El Conceyu de Ribeseya organiza un añu más la Selmana Ribeseyana de les Lletres, sumándose asina a la Selmana de les Lletres Asturianes con delles actividaes. El miércoles 4, a les seis y media la tarde, la Casa Cultura del conceyu acueye a los neños Colexu Públicu Manuel Fernández Junco, que fadrán un homenaxe al profesor y académicu de l’ALLA, Nacho Fonseca, que va interpretar dellos temes col so grupu Xentiquina, que lleva venti años llevando la música n’asturianu a los más pequeños baxo la so dirección.

Amás, el xueves 5 de mayu a las 19 hores, tamién na Casa Cultura van entregase los premios de la IV edición del Premiu Arbidel de Cuentos Eróticos, conociéndose esi mesmu día al ganador.

La cantante Anabel Santiago fízose col Premiu al Meyor Cantar n’Asturianu, de los Premios de la Música estatales, que cada añu otorga l’Academia de les Artes y les Ciencies de la Música. El cantar “Agora” del so discu homónimu, resultó ganador, siendo finalistes pa esta categoría Brandal, por “Chueve” y Corquiéu, por “I & C”. Dende la creación de la categoría de llingua asturiana ganaron el premiu Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008), Esther Fonseca con «Negra» (2009) y Dixebra con «Cantar de la redención» (2010).

En cuantes a les demás llingües minorizaes del estáu, el ganador del Meyor Cantar en Gallegu foi pal tema Alalá da noite, del grupu Berrogüetto; n’euskera, pa Bide Ertzea, pol tema Don Inorrez, mientres que’l meyor cantar en catalán/valencianu, foi pa La Dansa de la Primavera, de Maria del Mar Bonet. El vascu Kepa Junquera llevó’l premiu al Meyor Discu de mús ica tradicional por Herria.

Premios de la Música 2011