Música

Esti sábadu 27 d’ochobre, a les nueve la nueche, Anabel Santiago y David Varela actúen nel chigre BilboBeer, na llocalidá vasca, onde van llevar la música astuiana, a una nueche de música y cena.

El BilboBeer ta asitiáu na cai Amistá, 4.

Esti sábadu 20 d’ochobre, el Nuevu Teatru La Felguera va acoyer un conciertu de l’Asturiana Mining Company. La entrada ye de baldre y el conciertu, que va empezar a les 20:15 hores, enmárcase dientro la xira qu’esti grupu vien faciendo como ganador del Premiu al Meyor Cantar 2012 col tema Si nun conoces Val.louta.

L’Asturiana Mining Company fai un apueste continuu pola fiesta y pol sentir popular y ye ún d’esos grupos que siempre consiguen conectar col públicu y ponelo en pie. Col cantar Si nun conoces Val.louta, del álbum Sones por Berto Velasco, esti grupu consiguió’l Premiu al Meyor Cantar 2012 convocáu pola Conseyería d’Educación, Cultura y Deporte. El “Premiu al Meyor Cantar” nació nel añu 2007 como reconocimientu del Gobiernu del Principáu d’Asturies a la creación musical en llingua asturiana o gallego-asturianu y los ganadores clasifiquen pa participar nel concursu européu de la canción en llingües minoritaries “Liet International”.

Esti concursu –que cuenta con sofitu del Conseyu d’Europa- va celebrase, per vez primera, na Península Ibérica: l’eventu sedrá’l sábadu 1 d’avientu de 2012 nel teatru de Llaboral Ciudá de la Cultura (Xixón). En definitiva, una gran oportunidá pa disfrutar en Llangréu del potente directu d’esta banda’l próximu sábadu 20 d’ochobre a les 20:15 hores y con entrada de baldre.

El próximu xueves 18 d’ochobre, a les siete y media la tarde, el Salón d’Actos del Atenéu de la Calzada de Xixón va vistir de gala p’acoyer a Anabel Santiago y Mariluz Cristóbal Caunedo; xuníes, esta vegada, pa dar una vuelta de tuerca a la tonada asturiana. Va Ser cola representación de “De xuru”, un espectáculu qu’axunta la pallabra recitada por Carla Menéndez y la voz “a capela” de dos de les muyeres más conocíes del panorama de la música tradicional d’Asturies.

Los testos, creaos pa la ocasión, son orixinales de Xosé Lluis Remis. La entrada va ser llibre hasta enllenar l’aforu.

Alfredo González tará esta nueche nel C.C. Vieyu Institutu de Xixón a les 22.30h nun conciertu enmarcáu nos XXX Alcuentros Internacionales de la Mocedá Cabueñes 2012. La entrada ye llibre hasta enllenar l’aforu.

Dempués de trés años y dos discos con bien de premios, ente ellos, el Premiu al Meyor Cantar por “La nada y tu”, el cantautor Alfredo González torna a la escena discográfica con “Dobleces”, un discu doble con diez cantares en castellán y diez n’asturianu. El discu ta producíu por Sergio Rodríguez y cunta con convidaos del nivel de Quique González, voz en “Wikileaks”, cantando per primer vegada n’asturianu, o Fabián, voz en “Todos llevan disfraz”.

El próximu día 13 d’Ochobre, sábadu a les 18:30 desendolcaráse el Primer Festival de Bandes de Gaites Villa de Ribadesella. Memorial David Mateos “Puru”, qu’entama el Conceyu Ribeseya, col gabitu de la BGRibeseya. A les 18:30, les cuatro Bandes participantes (LaKadarma -Nava-, Xácara -Uviéu-, Candás y Ribeseya) fadrán un pasucáis per toles cais del centru urbanu de Ribeseya. Saliendo caúna d’un llugar diferente, pa dise a alcontrar a La Plaza Nueva. Darréu, habrá un conciertu de toles Bandes, que cuntará cola colaboración de Músicos del Grupu Corquiéu y otros músicos asturianos. N’acabando’l conciertu. Les Bandes participantes desfilarán hasta’l Chigre El Corquiéu, pa rendir homenaxe a Puru, y entregar ellí un recuerdu.

La Xunta pola Defensa de la Llingua Asturiana (XDLA) dio anuncia del so contactu tanto cola conceyala de Servicios Sociales, Festexos y SOF, Belén Fernández Acevedo, como col director de la SOF, Javier Batalla, pa face-yos llegar la so esmolición porque “nes fiestes de la capital d’Asturies recién acabaes nun actuara nengún grupu de los que tienen l’asturianu como vehículu d’espresión nes sos lletres”, mientres que n’ediciones anteriores de San Mateo “actuaren otros y con gran ésitu de públicu”, espliquen.

La XDLA reclama que nes fiestes de San Mateo se cuente colos grupos musicales qu’usen la llingua asturiana nes sos canciones. Paez-yos “que nun hai que dexar de llau, y menos nesti tiempu de crisis, a los grupos qu’apuesten por crear nuna llingua minorizada como la nuestra porque ellos tiénenlo tovía más difícil y les instituciones públiques tán obligaes a velar pol patrimoniu llingüísticu del que son vehículu”.

La Xunta quixo tamién facer notar que la presencia del nuestru idioma, en xeneral, en San Mateo 2012 “foi bien probetaya”. La organización denuncia que namás pue tenese en cuenta la representación de la obra “Les Llinguateres” nel Teatru Filarmónica, “y más nada. Nin s’usó en cartelería, nin nos programes, nin na publicidá”, denuncien.

El sábadu 13 d’ochobre, el polideportivu del Colexu Públicu Martimporra (Bimenes) va acoyer l’espectáculu de canción, baille y música tradicional“Bimenes en danza”, entamáu pola Asociación Folklórica y Cultural Los Yerbatos en collaboración cola Asociación Cultural El Corriellu La Pandorga, el Conceyu Bimenes y la Mancomunidá Comarca de la Sidra. L’espectáculu arranca a les 18’00 hores cola actuación de la cantante Anabel Santiago y de les escolines de canción asturiana de la Escuela de Música Tradicional Los Yerbatos.

Darréu, a les 18’30 hores, actuarán los grupos de baille “Los Yerbatos” y “Sarau Alcudienc”, que vien dende la islla de Mallorca dientro d’un intercambiu col grupu de Bimenes. Y, de magar les 20’30 hores, pondrán-y el ramu al espectáculu los músicos Ramsés Iglesias y Xosé Antón Fernández “Ambás”. “Bimenes en danza” conviértese, d’esta manera, nuna de les cites imprescindibles de la música tradicional asturiana pa esta seronda de 2012.

Ta acabante estrenase la páxina web de LaKadarma, un nuevu proyectu musical que “porfia pol desendolcu de la música tradicional asturiana apurriendo-y nueves sonoridaes y arreglos a la gaita asturiana recibiendo pa ello influencies de distintos estilos”. L’agrupación, que se forma en febreru de 2012 baxo la dirección musical de los hermanos Rodrigo y Andrea Joglar, compónse de músicos procedentes d’estremaes estayes de la música tradicional asturiana, tanto del mundu de les bandes de gaites, como de los grupos de música folk, amás de gaiteros solistes o escolinos de la Escuela Municipal de Música de Nava.

Nes sos actuaciones, LaKadarma trata d’ufrir un espectáculu desenfadáu, espontáneo y dinámicu, al traviés d’un repertoriu compuestu de pieces de composición tanto d’autores destacaos del panorama musical asturianu como de los propios direutores de la banda, amás de pieces tradicionales o adaptaciones de melodíes contemporánees.

Los sos ensayos allúguense nos llocales sociales que’l Conceyu de Nava tien nel Llagar de Sorribes, na capital naveta.

LaKadarma emplega gaites asturianes afinaes en do y caxes d’alta tensión, timbales y bombu, anque tamién usa otros instrumentos de percusión como’l caxón flamencu o’l tambor asturianu.

La nueva páxina web inclúi información del grupu, les sos actuaciones, semeyes y un espaciu pa mercar camisetes de la banda, ente otres estayes.

Páxina web de LaKadarma

L’artista pop Sethler, nome artísticu d’Hugo Martín Cuervo, músicu xixonés ñacíu en 1987, anímase nel so discu últimu “Batalla”, a grabar un tema n’asturianu. El tema titúlase “Non para de llover”. Nél caltién la llinia pop del so llabor, que tamién s’introduz nel cine, siendo’l director de curtiumetraxes más mozu nomináu a un premiu Goya con Final, nel 2009.

El tema pue sentise na so páxina web o n’Spotify.

Sentir el tema na rede

Nel Centru Cultural Valey, en Piedrasblancas, podrá visitase, del 5 al 31 d’ochobre, la esposición “1978-2008 Nuberu 30 años, yá llovió’, que recueye la hestoria visual y sonora del grupu dende la so creación hasta la so despidida, apocayá.