Música

Dixebra va echar el piesllu a la temporada d’esti añu 2012 con un conciertu na sala Tribeca d’Uviéu’l próximu domingu día 23 d’avientu (21:00 hores), con entrada de 10 euros anticipada y 12 en taquilla. Hai más de dos años que la banda avilesina nun actúa na capital asturiana, colo que s’espera un mui bon ambiente, el repertoriu que van interpretar a lo llargo de cerca de dos hores inclúi temes de toles sos époques y estilos, dándose la circunstancia de que dellos de los cantares que lu formen van desapaecer d’él, polo que probablemente va ser la última vez de poder disfrutar en vivo con ellos.

La razón nun ye otra que la renovación que van facer del «set list» pa la temporada viniente, onde van dir enxertanto pieces inédites que van formar parte del so discu nuevu, que tien prevista la salida a lo llargo del 2013.

Esti añu que ta a piques d’acabar representó pa Dixebra ún de los más granibles de la so carrera, asina empezaba cola publicación del trabayu discográficu especial tituláu XXV. 1987-2012, por cuenta del so venticinco aniversariu. Tamién foi’l tiempu del so reconocimientu y valoración como una de les bandes más importantes del panorama musical asturianu, como queda afitao col recibimientu del Premiu Amás d’Honor, la Gaita d’Oru de la Banda de Gaites L’Alborecer de Castrillón, el gallardón Acción Cultural de La Voz de Avilés, el Pegollu de los Premios Andrés Solar o la distinción de la Banda de Gaites Villaviciosa.

Amás de too ello la revista Rock Estatal escoyía a la formación como una de les cien más influyentes nel Estáu español, al llau de nomes perconocíos de la escena rockera. Por últimu, esta selmana presentábase’l llibru Un país llamáu Dixebra (Ediciones Seronda), onde’l periodista y escritor Francisco Álvarez fai un repasu pola hestoria y les lletres de la banda.

El prósimu xueves día 27 d’avientu, a les 20 h., na Sala Loreto, en Colunga, celebraráse un conciertu de villancicos, aguilandos y cantares ñavidiegos usaos na tradición asturiana y acompangaos con instrumentos como panderos, gaita, vigulín, bandurria, gaita rabil, sonaxes, xiblates y voces. Nesti actu, amás, presentaráse la recuperación d’un villancicu asturianu del añu 1721 y podremos ver imáxenes de dalgunes mascaraes d’iviernu.

Pa ello, contarase cola presencia de tres músicos asturianos, Pedro P. Sanjurjo, Laura Fernández y Dani García de la Cuesta, que tienen esperiencia abondo na recuperación del patrimoniu astur y que trabayen en diferentes formaciones o escueles de música.

Por cuenta de la celebración del Día Internacional de los Drechos Humanos, los Conseyos de Mocedá d’Uviéu y Asturies y Amnistía Internacional, entamen un Festival Hip Hop polos Drechos Humanos’ el 20 d’avientu a les 19 hores, na sala Tribeca d’Uviéu (Plaza de Riego). Van Actuar Dark la Eme, Matiz & Tesis, amás de dellos DJ’s. L’accesu ye llibre y de baldre.

El volume del Anuariu de la Música Asturiana correspondiente al presente añu 2012 yá ta na cai de la mano de Goxe Producciones, con él son trece los númberos consecutivos editaos d’esta publicación nacida nel 2000. Nel «Entamu» d’esta entrega nueva los responsables manifiesten el so enfotu de volver al orixe d’ella y recuperar los oxetivos colos que nació, amás d’afirmar que siguen «creyendo firmemente na necesidá d’un proyectu como ésti, no imprescindible de que la música del país tenga un órganu d’espresión, un escaparate onde amosar los sos llogros y esmoliciones, que dea una visión de conxuntu, que la refuerce interna y esternamente».

Tocántenes a los conteníos, nes sos 94 páxines, apaecen entrevistes a La Tarrancha, al grupu astur-chilenu de folk Ta Fechu o al músicu Pablo Canalís; un estudiu sobre polítiques musicales y alministración autonómica; reseñes sobre los intérpretes desapaecíos Concha’i Tresmonte y Puru; cróniques del I Sol Celta d’Avilés, el I Festival Arcu Atlánticu de Xixón, el XVI Festival Intercéltico d’Occidente de Tapia y el I Refaciendo Tradiciones de Caldones (Xixón); reportaxes fotográficos del conciertu conmemorativu del venticinco aniversariu de Dixebra y de la sesta edición del Premiu al Meyor Cantar n’Asturianu; un informe sobre la baxada de conciertos y la so repercusión ente los grupos del país; comentarios sobre los discos nuevos de Mariluz Cristóbal Caunedo, Toli Morilla o Soncai System; un diariu sobre’l procesu de creación, grabación y presentación del trabayu Llume de Xera; artículos d’opinión o sobre los músicos tradicionales nel conceyu de Salas; amás de la sección «Anuncies» con reseñes de lo más destacao nel panorama musical asturianu del añu. Too ello vien coles firmes de persones perconocíes nesta estaya de la cultura asturiana, como pueden ser Xosé Ámbas, Xandru Martino, Adolfo Camilo Díaz, Ignaciu Llope, Xicu Ariza, Alberto Álvarez Peña o Llorián García.

Aparte d’estos y otros conteníos l’A.M.A. 2012 recueye, como ye vezu, toles producciones discográfiques, bibliográfiques y audiovisuales que tienen a la música tradicional asturiana o cantada n’asturianu como protagonista y que s’editaron nos años 2011 y 2012. Nesta ocasión la sección llamada «Collecha» ye doble pola ausencia d’ella nel volume del añu pasáu, del que nun foi responsable nin Goxe Producciones nin el so director, Xune Elipe.

Otra cuestión importante ye la recuperación del discu col que s’acompañó dellos años, asina xunto cola revista regálase un cedé tituláu Esbilla sonora 2011-2012 conteniendo ventidós temes repartíos por estilos (tonada, tradicional, banda de gaites, folk, canción d’autor, rock y jazz), onde se repasen les grabaciones más importantes d’esi periodu, con grupos y artistes como Mariluz Cristóbal Caunedo, Anabel Santiago, les bandes de gaites Camín de Fierro y Llariegu, Tuenda, Pandereteres de Fitoria, Asturiana Mining Company, Tejedor, Ta Fechu, Toli Morilla, Alfredo González, Soncai System, La Tarrancha, Fala Non Caduca, Dixebra o la Big Band de Xixón.

L’Anuariu de la Música Asturiana 2012 tien un preciu de 5 euros (revista más discu) y pue adquirise nos puntos de venta oficiales: Uviéu (L’Esperteyu), Xixón (Trisquel, Llibrería Paradiso y C. S. Sestaferia), Avilés (El Cafetón y El Cabanón), Mieres (L’Abellugu, Habana y Musical Miler), Siero (El Cuévano), Tinéu (Llibrería Asturias), Villaviciosa (La Esbilla), Nava (La Naveta), Santu Adrianu (El Sabil) y La Pola Llaviana (Caparina).

Con esta entrega nueva Discos L’Aguañaz, agora integrada nun proyectu más ampliu llamáu Goxe Producciones, recupera la cabecera d’esta publicación yá tradicional nel panorama musical asturianu d’estes feches y asoleya’l so compromisu con esti sector y tolos sos integrantes.

El grupu asturianu Vinagre de sidra quier tocar nel viniente festival Viña Rock, que se celebra n’Albacete y suma yá diecisiete ediciones. Esti añu los organizadores entamen un concursu na rede pa escoyer a dellos grupos de forma popular. Los grupos que consigan 200 votos nesta primer fase van pasar a la final y podrán optar a tar en Viña Rock 2013.

Vota pol grupu Vinagre de sidra equí

Esti xueves 13 a a les 20.30 hores nel Teatru Cine Carmen de Morea (Ayer), Marisa Valle Roso va siguir cola so xira “De lo fondero l’alma”. La entrada ye de seis euros. L’eventu organízalu A Mansalva Producciones y encuádrase dientro de la xira promocional de presentación del primer discu en solitariu de la cantadora de tonada.

Esti vienres 7, a les 20:30 hores, l’auditoriu de Tapia acueye’l conciertu de los grupos Mestura y Tuenda, dientro d l’actividá “Conceyo de cantares en Tapia”.

Mestura, formao por Marisa López Diz y Luis Suárez ye un conocíu dúu n’Asturies qu’ufre abondos conciertos en tola xeografía y tien editaos yá cuatro discos.

Tuenda, formáu por Elías García, Pepín de Muñalén y Xosé Antón Fernández, Ambás, ye un popular grupu de folk bien conocíu en tol país y na TPA, gracies a programes como Camín o Camín de Cantares, nos que Tuenda pon la so sintonía y de los que’l propiu Ambás ye presentador.

La cantante bretona Lleuwen Steffan esti sábadu la final del Liet International 2012 col tema tituláu “Ar gouloù bev”, nuna gala qu’axuntó a numberosu públicu nel Teatru de La Llaboral, en Xixón. El grupu asturianu Asturiana Mining Company, pela so parte, fíxose col Premiu del Públicu y quedó en cuartu llugar na categoría xeneral. La gala, tresmitida pela TPA, tuvo enllena de momentos reivindicativos, col públicu glayando pola oficialidá del asturianu y delles amueses de solidaridá col idioma de los músicos sobre l’escenariu. L’actuación de Dixebra, nel momentu del alderique del xuráu, llevantó a gran parte del teatru de los asientos, baillando dellos de los sos temes.

Liet International ye un concursu de canciones en llingues minoritaries que ñació nel añu 2002 en Frisia (Países Baxos). Depués de les ediciones celebraes en Frisia, na zona del territoriu sami asentada en Suecia, Bretaña y Friul, Asturies foi llar del Liet International nesti añu 2012, y Xixón la primer ciudá de la Península Ibérica que lu acoyó. Por ser ún de los eventos más importantes pa la promoción de les llingües europees minoritaries y la música interpretada nun idioma rexonal, fue reconocíu pol Conseyu d’Europa, que lu patrocina dende 2008.

Nesti Festival Liet International, participaron once formaciones -que representaron a los idiomes gaélicu escocés, euskera, udmurtiu, bretón, baxu saxón, sami, frisiu, corsu, friulanu, catalán y asturianu- concursaron nuna final que se celebró’l 1 d’avientu en Llaboral Ciudá de la Cultura, en Xixón (Asturies).

Llistáu col resultáu final de les votaciones

1 Lleuwen Steffan (Bretaña) Ar Gouloù Bev (La lluz viva) 87

2 Dopu Cena (Córcega) Trasmetta (Tresmitir) 86

3 The Voodoolectric (Frisia oriental) Slickermuul (Dulce adicción) 76

4 Asturiana Mining Company (Asturies) Si nun conoces Vaḷḷouta 64

Premiu del públicu

5 C. Crabuzza & C. G. Sanna (L’Alguer) Ara (Agora) 64

5 Brian Ó hEadhra (Escocia) Fathainn (Rumores) 65

7 Yldau (Frisia) Fjoer (Fueu) 52

8 Enkore (País Vascu) Muxurik muxu (Besu a besu) 41

9 Ivan Belosludtsev & 4cp (Udmurtia) ТАУ ТЫНЫД (Gracies) 35

9 Inger Karoline Gaup (Samis) Oainnát go? (¿Ves?) 35

11 Jonokognos (Friulia Mai mai (Nunca nunca) 32

Michael Lee Wolfe funda Asturiana Mining Company nel añu 1998 con músicos mui conocíos de la escena folk, rock y jazz n’Asturies. La formación graba nel añu 2000 el primer discu, col títulu Patrimoniu. A últimos del 2011, Asturiana Mining Company edita otru discu: Sones por Berto Velasco, un trabayu onde destaquen la voz y la gaita del maestru Alberto Varillas, los arreglos vocales de Silvia Fernández y l’acordión zydeco de María Álvarez. Depués de 14 años dende la so creación, l’Asturiana Mining Company esperimentó dellos cambios y promete un directu con dalgunos de los cantares más aclamaos de la música folk asturiana xunto a otros de creación nueva pero de sabor tradicional, como ye’l casu de «Si nun conoces Val.louta», el tema col que ganaron el Premiu al Meyor Cantar y col que van representar a Asturies nel festival Liet International 2012 que se celebra esta nueche en La Llaboral de Xixón. La redacción d’Asturnews deseá-yos muncha suerte.

En 2007 inauguróse la presencia asturiana nel festival con Dixebra, que quedó en segundu puestu na ciudá lapona de Luleå. En 2009, hubo per primer vegada una escoyeta previa n’Asturies, el Premiu al Meyor Cantar. Escoyíu pa ello tuvo na ciudá frisia de Leeuwarden el cantautor turonés Alfredo González con “La nada y tu”, quedó novenu con cuarenta puntos.

En 2010, el cantar “Tierra”, del grupu Xera representó a Asturies na ciudá escocesa d’Aberdeen, quedando nun mui bon segundu puestu. Nel 2011, la ciudá italiana n’Udine, nel Friul, foi llar del festival, al qu’Asturies llevó al grupu ska-rock Skama la Rede, con ‘Condenáu’, que finalizó n’octava posición.

Lletra del tema que representa a Asturies esti añu:

SI NUN CONOCES VAL.LOUTA

Lletra: M. González

Música: Asturiana Mining Company

Si nun conoces Val.louta,

nun digas conozo’l mundu.

Si nunca quixisti a naide,

nun digas quiérote muncho.

Nun digas que tou en Babia,

que tou nel cantu de L.lena,

debaxo d’un mar d’estrel.les,

enriba d’un mar de tierra.

Tengo un pañuelu

roxu y azul

ya de Miranda

qué sabrás tu.

Tengo un pañuelu,

quiero otru más

pa dir más guapa

que les demás.

Miranda’l Dueru,

si vas a Miranda’l Dueru,

nun vuelvas ensin pañuelu.

Esti l.lugar de Val.louta

ta nel fondu de la mar

de la mar de la ñublina

nel nieiru la soledá.

Sigui la estrel.la del norte

que ta a la vera’l Carriel.lu,

onde los clavos de Cristu

saliéronse del maderu.

El Salón d’Actos de la Biblioteca de la Facultá de Filosofía y Lletres de la Universidá d’Uviéu recibió esta mañana una conferencia titulada “Les llingües minoritaries n’Europa. La música y la cultura como elementu recuperador”. Diferentes espertos llegaos de distintos países europeos aldericaron nuna ponencia qu’inauguró’l programa d’actos del Liet International 2012. Nel eventu participaron, xunto al director del Secretariáu de la Carta Europea pa les llingües rexonales y minoritaries del Conseyu d’Europa, Alexey Kozhemyakov que presentó la charra “La Carta Europea pa les Llingües Rexonales y Minoritaries 1992-2012. Venti años depués. Llogros y nuevos retos”; el director de Gaelic Arts & Cultura, Brian Ó hEadhra, con un analís sobre’l desarrollu del arte y la cultura gaélica n’Escocia.

“Normativización y normalización de la llingua asturiana” ye’l títulu de la intervención d’Ana Cano, presidenta de la Academia de la Llingua Asturiana y, tres d’ella, l’escritor y investigador del Friul Marco Stolfo, autor del llibru “Rock music in minority languages”, va falar sobre “Llingües que roncaroleen y músiques fuertes na Europa “unida na diversidá”. De siguío, el coordinador del Liet International Onno Falkena va esponer los diez años d’esti festival, pa dar pasu a la directora xeneral de Política Llingüística, Ana María Fueyo Llaneza que va desarrollar una esposición sobre “Evolución de la música n’asturianu nes últimes décades. Apoyu institucional y Liet International 2012”. Finalmente, el músicu Brian Ó hEadhra va ciarrar l’actu con una actuación musical.

Con esti actu na Facultá de Filosofía y Lletres da empiezu’l programa d’actividaes del Liet International Asturies 2012 que, a les 20.30 h., va siguir nel Valey Centru Cultural de Castrillón con un conciertu de los grupos Yldau, Lleuwen y Brian Ó hEadhra, finalistes del festival.

El programa que xira alrodiu a la celebración del Festival Liet International nel Teatru de Llaboral Ciudá de la Cultura, el sábadu día 1 a les 21.15 h, complétase cola presentación nel Paraninfu, a les 12.30, del documental “Linghe in Musica”, a cargu del so director, Marco d’Agostini. La celebración de la Copa Cantábrica de Liriu y una Conferencia-taller sobre’l proyectu HIAHOKA son otres de les actividaes que van tener llugar el sábadu nel recintu de Llaboral.

Liet International ye un concursu de canciones en llingues minoritaries que nació nel añu 2002 en Frisia (Baíses Baxos). Depués de les ediciones celebraes en Frisia, na zona del territoriu sami asentada en Suecia, Bretaña y Friul, Asturies va ser la sé del Liet International nesti añu 2012, y Xixón la primer ciudá de la Península Ibérica que lu acueye. Por ser ún de los eventos más importantes pa la promoción de les llingües europees minoritaries y la música interpretada nun idioma rexonal, fue reconocíu pol Conseyu d’Europa, que lu patrocina dende 2008. La Conseyería d’Educación, Cultura y Deporte del Principáu d’Asturies organiza un programa d’actividaes que se van celebrar concidiendo col certame.

L’actu central va ser el Festival Liet International, nel qu’once formaciones -que representen a los idiomes gaélicu escocés, euskera, udmurtiu, bretón, baxu saxón, sami, frisiu, corsu, friulanu, catalán y asturianu- van concursar nuna final que se va celebrar el 1 d’avientu en Llaboral Ciudá de la Cultura, en Xixón (Asturies), nuna gala que va cuntar tamién cola actuación del grupu asturianu Dixebra nel tiempu que duren les votaciones del públicu y les deliberaciones del xuráu. El festival, que va empezar a les 21.15 hores, va ser retresmitíu en directu per televisión y Internet al traviés de la Televisión del Principáu d’Asturies (TPA). La entra ye llibre hasta completar aforu.