Música

El cantante de tonada Fernando Valle Roso va actuar esta nueche nel Auditoriu Teodoro Cuesta de Mieres del Camín. Un conciertu organizáu con motivu de la Selmana de les Lletres Asturianes y onde van poder sentise los temes del so discu últimu “Camín d’Ayures”. Sedrá a partir de les ocho la tarde, con una entrada de cinco euros.

El tradiciónal conciertu/folixa del primeru de mayu que fai Fusoa vuelve a celebrase na cuenca minera’l Nalón, cola collaboración del Centru Social Autoxestionáu La Semiente. Sedrá’l sábadu 4 de mayu, nel Cine Ideal de Ciañu (Llangréu). Cinco grupos asturianos van actuar nesta XI Folixa 1u mayu “con ambiente festivu sí, pero tamién reivindicativu”, espliquen los organizadores.

“Dixebra”, con más de 25 años sobre les tables, “Skontra” col so potente punk-folk, “Zigua” mozu grupu xixonés de ska-punk, “IRA” dende Llangreu y Noreña faciendo HxC y el blimeín “Arma X” cola so rima comprometía, “van dar caña sonora” dende les siete la tarde.

Les entraes van tener un preciu de 10 euros n’anticipao y 12 euros na puerta, amás d’una fila cero con bonos a 2 euros, pa que la xente que nun quiera/pueda dir al conciertu, pueda collaborar cola recaudación, que dirá dirixida como siempres a la ayuda y al pagu de gastos xudiciales y multes de distintos conflictos obreros y represivos n’Asturies.

Puntos de venta:

-Xixón: Trisquel, Tienda de comerciu xustu “Picu Rabicu”, llocales de la C.S.I., Sidrería Canteli (acutense plazes pal bus 5€) y C.S. Sestaferia. – Uvieu: L’Esperteyu (plazes pal bus d’Uvieu 5€) – Llaviana : Serinsa Llaviana Informática – L’Entregu : C.S La Semiente y Chigre Ochobre. – Ciañu: La Folixa – Sama: Cervecería La Industria – La Felguera: Matteria – La Pola – Siero: El Judá y El Diañu.

Esti sábadu 27 d’abril, a les 19.30 hores, nel C.S.O.A La Madreña d’Uviéu, Xunta Moza tien organizao’l Preconciertu pola Oficialidá, actividá que va servir como presentación del XXV Conciertu pola Oficialidá. Concidiendo cola celebración del cuartu de sieglu d’esti actu, la Xunta Moza y la Xunta pola Defensa de la Llingua Asturiana entamen varies celebraciones pa festexar la reivindicación de la llucha pola oficialidá dende la música.

La fiesta, que se va facer na sala de conciertos del espaciu ocupáu del 26 de Xeneral Elorza d’Uviéu, va contar con un cartelu que va atender a gustos bien diferentes. El primer artista que va xubir al escenariu va ser Alfredo González, el cantautor en llingua asturiana más reconocíu fuera de les fronteres d’Asturies. De siguío, La Curuxa va ufiertar un repertoriu de música tradicional enfocada al baille, acorde col cursu d’iniciación a la danza qu’entamó Xunta Moza va unos díes nel mesmu C.S.O.A. La Madreña. La nueche va pesllala I.R.A., grupu de hardcore qu’ocupa yá la mayoría de los cartelos d’esti xéneru n’Asturies.

Esti conciertu, aparte de la so función reivindicativa y folixera, va ser uno de los pilares de la financiación del XXV Conciertu pola Oficialidá, que se va celebrar en Xixón el día 8 de xunu. Ye por esto que se va cobrar una entrada simbólica pol módicu preciu de 3 euros.

Dende Xunta Moza, asociación que llucha polos derechos de los asturianofalantes, anímase a tol mundu a la participación nesti actu, así como nel restu d’actividaes que se proponen dende los diferentes colectivos de reivindicación llingüística pa poder algamar la dignidá y el estatus social y políticu que la llingua asturiana merez.

Esti vienres 5 d’abril, de magar les diez de la nueche, la sala The Class de Xixón acueye la presentación del so discu “Vintage Club”, qu’inclúi trece cantares ente’l swing, el ragtime, el cabaret y el music-hall. La entrada cuesta ocho euros, quince si ye con discu.

El tríu ta formáu por Emilio Huerta, Javi Monge y Claudio Vasquez.

L’Asociación d’Intérpretes de Cantación Asturiana (AICA) escoyó esti vienres pasáu nueva directiva pa los cuatro años vinientes. Al puestu de presidente presentábense dos llistes encabezaes por Francisco Fernández Gómez y Aquilino Fernández González. 123 socios particparon, 70 con votu presencial.

El ganador, con 120 votos, foi Francisco Fernández Gómez ‘Pachi’, recibiendo’l so contrincante 20 votos y unu en blancu en tola xunta.

La nueva xunta directiva cunta con José Facundo Fernández como vicepresidente, Lorena Corripio como secretaria; Fernando Ruiz como ayalgueru y los vocales Luzdivino Díaz ‘Pin de la Cotolla’, Narciso Fernández, Fernando Entrialgo y Vicente Prado ‘El Pravianu’.

Xune Elipe, cantante de Dixebra, ye una de les munches voces que collaboren nel discu nuevu de la conocida banda de hardcore/metal Habeas Corpus. Con esti trabayu, tituláu “20 Años de rabia. 20 Años de sueños”, publicáu apocayá, la formación madrilana quier conmemorar xustamente’l so venti aniversariu. Nel mesmu inclúinse un total de quince de les canciones más significatives de la so carrera, vueltes a grabar y actualizaes en cuantes a soníu y arreglos. Nelles apaecen bien de nomes conocíos de la escena rockera estatal que canten xunto a los componentes d’Habeas Corpus; son nada menos que 31 los intérpretes qu’empresten la so voz nesta celebración, ente ellos: César Strawberry (Def Con Dos), Fermín Muguruza, (Iñaki (Betagarri), Alex (Eina), Carlos Escobedo (Sober), Juan (Soziedad Alkohólika), Brigi (Koma), Juankar (Boikot), Placi (Segismundo Toxicómano), Kutxi (Marea), Feo (El Último Ke Zierre) o Fernando Madina (Reincidentes).

El tema onde collabora Xune ye’l tituláu «La rabia y los sueños», precisamente’l que-y da nome al discu y ún de los más identificativos de la banda madrilana. Orixinalmente apaecía nel álbum Otra vuelta de tuerca, del añu 2002, y na so versión nueva endurezse’l soníu, dando mayor presencia a les guitarres, amás de dase la circunstancia de que la llingua asturiana ta presente al traviés del componente de Dixebra, que fizo una lletra nueva nesti idioma.

Habeas Corpus ye una de les bandes más respetaes del Estáu pol so compromisu y coherencia ideolóxica, nestos venti años tienen publicao catorce trabayos discográficos onde prevalecen estilos como’l hardcore, punk, metalcore y rapcore.

La gala celebrada esti sábadu nel teatru de La Llaboral de Xixón, y retresmitida en diferío na TPA, cuntó con una asistencia baxa en comparanza cola rexistrada nel Festival Liet celebráu nel mesmu teatru a finales de 2012. La única incidencia xurdió cuando al salir la Directora Xeneral de Política Llingüística a dicir unes pallabres, el públicu entamó a pidir la oficialidá del asturianu, dexándo-y darréu terminar el so discursu. Cinco cantaraes competíen por esti Premiu al Meyor Cantar qu’acabó siendo pa Taranus por “Ensin ti”, con lletra de Diego Díaz Martino. Esti va ser por tantu’l representante nel Festival Liet de llingües minoritaries que va celebrase anguaño en Córcega.

Taranus

Col nome del dios celta preséntase esta banda xixonesa nacida nel 2009, pionera n’Asturies de la fusión del folk col metal; xustamente esa ye la so característica fundamental, la simbiosis ente los soníos seles de los instrumentos acústicos (gaita y flauta sobre manera) y los más duros. Vinieron a enllenar un furacu na escena musical asturiana, al ser los únicos representantes d’una tendencia que nel restu d’Europa tien bien de bandes, con nomes reconocíos polos sos siguidores.

Taranus define la so música como dark-folk, una especie de cruz ente Llan de Cubel y Manowar, onde nun falten los ritmos pesaos y duros con pasaxes calmos y tiempos medios. Depués d’estos años, grabaron el primer discu, de títulu homónimu, con once pieces mui representatives del so estilu, y onde sobresal la collaboración de la sopranu Susana Mortem, que-y da una dimensión nueva a la música que faen. Temáticamente, les lletres van de les cuestiones sociales a les de calter mitolóxicu.

Ensin ti

Esti vienres 1 de marzu tendrá llugar la Gala d’entrega del VII Premiu al Meyor Cantar. L’escenariu sedrá’l Teatru de La Llaboral, en Xixón. L’actu entamará a les 20:30 hores y la entrada será llibre. Amás, será posible siguilu na TPA. Na Gala van actuar los cinco finalistes: ACD, con “La güela” (lletra: Adolfo Camilo Díaz); Aire, con “Enzo” (lletra: Ruma Barbero de Diego); Falanoncaduca, con “Escoyer el camín” (lletra: Adrián González Pérez); La Tarrancha, con “Qué faer!” (lletra: Delfín Valdés) y Taranus, con “Ensin ti” (lletra: Diego Díaz Martino).

L’espectáculu va zarrase cola actuación d’Asturiana Mining Company, grupu vencedor na edición anterior. Fundáu por Michael Lee Wolfe nel añu 1998 con músicos mui conocíos de la escena folk, rock y jazz n’Asturies, la formación grabó nel añu 2000 el so primer discu, col títulu Patrimoniu. A finales del 2011, Asturiana Mining Company editó un discu nuevu: Sones por Berto Velasco, un trabayu onde destaquen la voz y la gaita del maestru Alberto Varillas, los arreglos vocales de Silvia Fernández y l’acordión zydeco de María Álvarez. «Si nun conoces Val.louta» fue’l tema col que ganaron la sesta edición del Premiu al Meyor Cantar y col que concurrieron al Liet International 2012, que tuvo llugar en Xixón, nel mesmu teatru de la Llaboral, el pasáu 1 d’avientu, resultando ganadores del Premiu del Públicu.

El gallardón ye una escultura creada pola artista María Xesús Rodríguez, que lleva por títulu “El Pasco” (aluminiu, oleu y barniz. 18x18x4cm) y que tien un valor estimáu nel circuitu artísticu de más de dos mil euros.

Sienti los temes finalistes na web del Premiu al Meyor Cantar

Por cuenta de la Gala del Premiu al Meyor Cantar, que va desenvolvese esti vienres 1 de marzu nel Teatru de La Llaboral de Xixón, Radio del Principáu d’Asturies (RPA) va emitir una programación especial. Asina, van producise dos programes específicos dedicaos a esti premiu, el primeru d’ellos na madrugada del miércoles al vienres, de 00:00 a 01:00 hores, y el segundu na madrugada del xueves al vienres nel mesmu horariu.

Na primer entrega va falase de los motivos polos que se creó esti gallardón y de la so finalidá, asina como de la dinámica y funcionamientu del mesmu; va facese tamién un repasu de los ganadores de les seis ediciones anteriores y la última parte va dedicase a comentar el Festival de la Canción en Llingües Minoritaries d’Europa Liet International, al que va como representate oficial de la llingua asturiana’l grupu o artista que se fai con esti premiu.

El segundu programa va ocupar el tiempu en falar colos cinco finalistes del presente añu: Aire, ACD, Taranus, Fala Non Caduca y La Tarrancha, y sentir y comentar con ellos el tema col que participen. La dirección y presentación d’estos espacios especiales va tar al cargu de Xune Elipe, que dirixó a lo llargo de seis años na mesma emisora’l programa Rockmería. Nellos va presentase tamién la sintonía o banda sonora orixinal compuesta a costafecha pa esta séptima edición del Premiu al Meyor Cantar pol músicu y productor corverán Sergio Rodríguez, siendo precisamente ésta una de les novedaes que tien el premiu na edición d’anguaño.

La Gala d’Entrega del Premiu al Meyor Cantar va desarrollase’l vienres 1 de marzu, a partir de les 20:30 hores, nel Teatru de La Llaboral de Xixón, con entrada llibre. Na mesma, presentada por Sonia Fidalgo y Naciu Varillas, van participar los cinco finalistes cola interpretación en directo del tema nomináu y va incluir tamién l’actuación del grupu ganador del añu pasáu, Asturiana Minning Company.

Como novedá va regalase un discu esclusivu, coles canciones ganadores de les ediciones anteriores y les finalistes d’esti añu, amás de la sintonía del VII Premiu al Meyor Cantar; el cedé ye una producción especial que namás va poder consiguise asistiendo a esti actu nel que va sabese cuála foi la meyor composición musical n’asturianu del añu 2012.

fFinalistes del Premiu al Meyor Cantar

El salón d’actos del CMI Atenéu La Calzada acueye esti miércoles 20 de febreru, a les 19.30 hores, una espectáculu de l’Asociación d’Intérpretes de Canción Asturiana (AICA) con canción tradicional asturiana acompañada d’un gaiteru. Nesta ocasión van participar Andrés Cueli Robledo, Noemí Torrado Rodríguez y Faustino Braña Peláez, cola música del gaiteru Jesús Noriega Galguera. Les actuaciones preséntales Julio César Baragaño.