Música

La banda de rock avilesina Dixebra foi escoyida pa participar nun trabayu discográficu internacional denomináu 33 RPM: voices of the revolution, entamáu por cuatro organizaciones musicales independientes: Un-Convention (Reinu Xuníu), Nomadic Wax (Estaos Xuníos), Fora Do Eixo (Brasil) y Tiuna El Fuerte (Venezuela); amás de tar apoyáu pol proyectu académicu In Place of War, de la Universidá de Manchester, que tien como oxetivu la investigación de la creatividá en llugares de conflictu armáu, guerra o crisis humanitaria. Trátase d’un trabayu discográficu nel que s’inclúin temes de trenta y trés artistes y grupos de tol mundu, onde tán presentes los más variaos estilos y tendencies: dende’l hip hop africanu, l’indi-rock afganu, el reggae neozelandés o’l folk chilenu, hasta artistes como’l raperu irlandés Jun Tzu, l’ex neñu soldáu sudanés Emmanuel Jal, la voz de la primavera árabe Omar Offendum, la gran dama del hip hop palestín Shadia Mansour o los venezolanos Bituaya, ente otros munchos.

En palabres de los coordinadores d’esti trabayu: «A pesar de ser distintes, les comunidaes presentes aporten les sos voces pa contar les sos hestories y realidaes de conflictu, guerra, opresión, resistencia y revolución. Los artistes, qu’utilicen la so música como mediu pa espresar la esperanza, mieu o l’enfotu de les sos comunidaes, tán na vanguardia. Como exemplos d’estes situaciones podemos referinos al llevantamientu árabe actual, la guerra civil en Siria, la busca de la democracia n’África, la llucha contra la discriminación llingüística n’Asturies o les reformes de derechos de tierra na India».

L’álbum va poder descargase gratuitamente a partir del próximu llunes 14 d’ochobre al traviés de la páxina web 33rpmvoices.wordpress.com, onde tamién pue alcontrase tola información sobre esti proyectu, la so finalidá y los artistes participantes. Pa Dixebra supón un pasu más na internacionalización del conflictu llingüísticu que se vive n’Asturies, que queda reflexáu col tema escoyíu, «La danza», ún de los más conocíos del grupu. Como datu llamativu hai que reseñar que’l nome del país, Asturies, apaez na carátula d’esti discu al llau del de los otros presentes nél, casu de Kenia, Exiptu, Somalia, Palestina, Colombia, México, Venezuela, Cuba, Chile, India, España o Irán, ente bien d’otros.

Na presentación d’esti trabayu discográficu de calter internacional dizse que «va dedicáu pa tolos músicos que collaboren nel proyectu, pa tolos pueblos del mundu que s’alcuentren en contra de la so voluntá nuna situación de conflictu, represión, discriminación o inxusticia y pa tolos lluchadores revolucionarios: respetu y solidaridá»

L’últimu capítulu de la primer temporada del programa El Club Musical (TPA, domingu 11:30 h.) ta protagonizáu pol tríu DRD, con diez años de vida yá a recostines y un trabayu de renovación de la música tradicional asturiana bultable y novedosu. Creaos pa participar nun ciclu de conciertos tituláu Folk de cámara, deciden siguir como grupu estable y empiecen a estudiar la tradición musical asturiana y a investigar les sos posibilidaes nun llinguaxe sonoru más contemporáneu.

DRD ya foi protagonista d’otros espacios en llingua asturiana en temporaes pasáes, como asocedió cola so apaición nel espaciu “Nós”.

Con dos trabayos discográficos publicaos DRD gocia d’un gran prestixu na escena folk, mostrándose como unos grandes instrumentistes, compositores y arreglistes de los ritmos y estilos de la tradición sonora del país, de la qu’ellos tienen una conocencia fonda. Rubén Bada (buzuqui), Dolfu R. Fernández (violín y voz) y Borja Baragaño (flauta) lleven la música asturiana a una dimensión nueva, faciéndola atractiva y moderna.

Con esti capítulu llégase al final de la primer temporada d’El Club Musical (en total foron trece), per onde pasaron dellos de los grupos y intérpretes más emblemáticos del panorama musical asturianu: Blues & Decker, Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Doctor Explosion, Pauline en la Playa, Patrulla Dixie, Delagua, Misiva y DRD, qu’abarquen estilos como’l rock, pop, punk, jazz, canción d’autor, indie o folk, cantaos n’asturianu, castellanu y inglés. Dende los responsables del proyectu, Goxe Producciones, manifiesten el so enfotu en que, dada la mui bona acoyida ente’l públicu y los músicos, la TPA decida siguir cola emisión d’esti espaciu nun futuru próximu. Amás d’ello, quieren agradecer a tol equipu involucráu nel programa la so profesionalidá y la disponibilidá y apoyo de la escena musical del país.

El Septeto Santiaguero, una formación cubana de Santiago, va ser el protagonista de la fin de Selmana en Castrillón cola so actuación esti sábadu 5 d’Ochobre a les 8 la tardi nel Centru Cultural Valley. La gran puxanza a escala internacional que vien algamandó’l nuevu discu del Septeto Santiaguero, a quien munchos llamen el Dream Team del Son Cubanu, nun ye d’estrañar tdepués de que grandes estrelles del Mueyu Caribeñu y Neoyorquinu decidieren xunir les sos voces al recién álbum llanzáu “Vamos pa’ la fiesta”. Rubén Blades (Llárimes Negres), Cheo Feliciano (Un mizcu del to amor) y José Alberto “El Canariu” (Amor montés), nun duldaron en collaborar, porque la calidá d’esta formación compuesta por siete virtuosos ye incuestionable y amás nel escenariu como valor añedíu lo cual forma parte del calter y humor cubano allanten al públicu con coreografíes que tán siendo asonsañaes por orquestes de Mueyu dende Colombia hasta Miami.

El Septetu Santiaguero ye una de los cumes de la música tradicional nel Santiago de Cuba actual. Tien un directu arrollador y naide atrever a cuestionar la so hexemonía nos escenarios del Mundu. Cuenta cola ventaya de llevar na so formación a trés cantantes solistes lo que-y dexa una gran variedá de recursos vocales. La mayoría de los miembros componen, de cuenta que’l repertoriu ta formáu en gran parte por material propio. El so fuerte ye la guaracha, siempres allegre, un pocu picante y con unos montunos que la faen irresistible al baille.

El so directu ye impresionante, en cada actuación faen gala de la so calidá a prueba de suxetividaes, les sos entregues, entá defendiendo la cubanía a estazón, son sobre la base del respetu al bon gustu universal. Tienen el méritu insuperable de llograr crear una empatía n’estremu templada col públicu en toos y cada unu de los escenarios nos que se presentaron.

El so repertoriu ye un percorríu por distintes aguaes de la música popular cubana, con énfasis no tradicional. Trabayen dende un sentíu bien personal obres d’autores clásicos de la música cubana como Miguel Matamoros y Ñico Fardelín, lo mesmo que de contemporaneos ente los que s’inclúin integrantes de l’agrupación.

El capítulu númberu 12 d’El Club Musical, que s’emite esti domingu en TPA a les 23:30 hores, tien nesta ocasión como banda protagonista a Misiva, procedente de Grau, fundada nel añu 2007 y que practiquen un estilu hardcore melódicu mui característicu. Sobre esa base musical van incorporando otres influencies como’l metal y el punk más clásicu, onde primen la contundencia sonora y rítmica, con unos riffs guitarreros qu’exercen de protagonistes.

Ún de los aspectos distintivos d’esti cuartetu ye la utilización d’un billingüismu asturianu-castellanu simétricu, así toles sos composiciones tán interpretaes neses dos llingües, nes que canten temes reivindicativos o de denuncia, amás d’otros más introspectivos y personales.

Tienen publicaos hasta’l momentu dos discos, l’últimu d’apaición mui recién (salía al mercáu esta mesma selmana), tituláu Gran mentira, nel que se muestren como un grupu consolidáu, seguru y fieles a la so filosofía musical y ideolóxica. Precisamente van facer la presentación d’esti trabayu discográficu nuevu nel programa, interpretando dellos de los temes que lu componen y falando d’él na entrevista.

El Grupu de Baille San Félix de Candás entama un nuevu cursu na so Escuela de Baille Tradicional, con clases pa rapacinos/es (a partir de 5 años), d’una hora de llargor, que van facese los sábados a les 11 hores la mañana nel llar de l’asociación en La Baragaña (Candás). La sesion inaugural y la matrícula sedrán el sábadu 12 d’ochobre a les 11 hores la mañana. El cursu dura un añu enteru y tien un preciu de 10 euros al mes.

Les clases p’adultos, d’hora y media de llargor, van facese los miércoles a les 19:30 hores nel llar de l’asociación en La Baragaña (Candás). La sesion inaugural y la matrícula sedrán el miércoles 16 d’ochobre a les 19:30 hores. El cursu dura hasta’l mes de mayu y tien un preciu de 20 euros al cuatrimestre.

Baxo’l títulu “Hai una lletra cantada” la Casona del Bravial de Blimea acueye a partir del próximu llunes 23 de setiembre una muestra na que se recueye la trayeutoria de dalgunos de los principales representantes de la canción asturiana nel conceyu de Samartín del Rei Aurelio, dende les voces más veteranes como les de Silvino Antuña, Graciano Fernández o Gerardo Orviz, a les voces de cantantes xóvenes como Emi Fanjul o Andrés Collado, ente otros. Les persones que visiten la esposición van poder amás escuchar la voz de munchos d’estos cantantes interpretando temes tan conocíos como “Hai una llinia trazada”, “Pasé’l puertu Payares” o “Viva la xente minero”, ente otros munchos.

Xunto con esta esposición, y gracies a la collaboración de l’Asociación de la Canción y el Folclor Valle del Nalón, va incluyise amás una muestra de distintos instrumentos musicales tradicionales fabricaos artesanalmente, ente los que s’incluyen gaites, bandurries, rabeles, castañueles o carraques.

La esposición va poder visitase hasta’l vienres 25 d’ochobre n’horariu de 9 a 13 h. de llunes a vienres.

Dende Paraíso Local Creativu proponen un conciertu de música esperimental del coleutivu gallegu Plastic Crowds que coordina Manuel Martínez Torres, un conciertu sinfónicu coles seiciones de la orquesta disllocáes, espardíes per delles ciudaes, emitiéndose dende’l museu Marco de Vigo a puntos de recepción en museos yu centros musicales d’España, Holanda y Turquía.

N’Uviéu va poder vese na Caja Negra, cai Xesús 12, y nel Conservatoriu de Música. En Xixón nel Taller de músicos del Antiguu Institutu. El direutor, Manuel Martínez Álvarez-Nava y el téunicu de soníu Miguel Fernández son músicos asturianos. A les 19,30 hores va facese conexón via streaming pa la proyeición y audio.

El capítulu númberu 11 del programa El Club Musical de TPA (domingu, 23:30 h.) tien como grupu convidáu a los uviedinos Delagua, una formación na que les hermanes Silvia y Gema Fernández son les cabezaleres.

Rellacionaes col mundu de la música dende edaes mui tempranes hai yá unos cuantos años decidieron dar forma a les sos composiciones al traviés d’esta banda, cola que se dieron a conocer y ganaron dellos concursos. L’estilu de Delagua ye dificil de clasificar pola bayura d’influencies qu’acueye: dende’l pop-rock y el ska-reggae hasta la rumba, el swing o’l blues.

Otru aspectu importante na so propuesta son les lletres, con un tratamientu nel que nun son simplemente un complementu de la música, algamando un calter lliterariu bultable. Hasta’l momentu tienen publicaos dos discos, de los qu’escueyen el repertoriu que van interpretar nel programa.

La recomendación bibliográfica qu’esta selmana se comenta ye una publicación titulada Cómic y Rock, de Juan Puchades, onde s’analicen les rellaciones ente estes dos artes.

L’Asociación del Cantar y el Folclor Abargane del Nalón entama una Gala d’Asturianía, Homenaxe al gaiteru Maximino García Costiella y a los intérpretes de cantar asturianu: Jeremías Cuello González y Graciano Fernández Velasco Cholín .Esti actu va tener llugar el próximu sábadu 21 de setiembre a partir de los siete de la tarde nel Teatru Municipal de Samartín del Rei Aurelio en Sotrondio.

L’Asociación del Cantar y el Folclor Abargane del Nalón quier d’esta manera faer pública reconocencia al llabor d’estos trés veteranos músicos como intérpretes y como promotores y difusores de la música tradicional asturiana.Pa ello axuntó a un gran númberu de cantantes y músicos de toa Asturies que van acompañar a Jeremías Pescuezu, Graciano Fernández y Maximino García nel escenariu.

Na Gala Homenaxe van actuar los cantantes: Hermógenes Fernández de Rondera ,Sama; Pilar Barreñada de Blimea, Mariceli Fernández de Tudela de Veguín, Laudelina Hortal d’Amieva, Juanjo Martínez de La Noal, L’Apurro; Raul Díaz de La Armendite, Alberto de Dios de Tablao, Siero;Carlos Ronderos de Sama, Arturo Cortina d’El Apurro, Damián Blanco de Blimea, Francisco Queipo de Mieres, Juan Luís Llobu de Nembra, Ayer; Lolo de Carcarosa, Turón, Aquilino Fernández de Rondera, Sama; José Manuel Collada de Aborboyar,Llanes y MªCarmen Vázquez de Mieres. Los gaiteros: Héctor Pescuezu d’El Apurro, Berto Banielles de Xixón, VicenteEl Pravianu de Viella, Siero; Liseo de Carabanzo, Daniel de Insierto, Mieres; Víctor Manuel Álvarez Popi de Xixón y Jorge Areces de Mieres.

Los Tamboriteros: Andresín de Insierto, Mieres y Joaquín Areces de Siero. Y l’acordionista Alejandro de Mieres.

La entrada al actu ye gratuita hasta completar aforu.

La Escuela de Música Tradicional La Quintana de Xixón entama’l cursu, tres más de 15 años poniendo clas en Xixón. Esti cursu 2013/14 La Quintana vuelva a cumplir a la so cita y esti martes 17 de septiembre echar andar el curso.

La Escuela La Quintana foi’l primer centru priváu de los soscaracterístiques cuando nació allá pel añu 98. A lo llargo d’estos años caltuvo la mesma filosofía d’ufiertar nun mesmu sitiu la posibilidá de deprender una bona riestra d’instrumentos tradicionales asturianos en clases individuales, dalgo que se repite anguaño ya que vamos poder deprender gaita, xiblata travesera, curdión diatónicu, percusión, curdión de tecla, zanfona, guitarra, vigulín, asturianada arriendes del necesariu solféu. La nómina de profesores de la escuela tien a varios nomes conocíos de la música asturiana, componentes dalgunos de grupos como DRD, Felpeyu o La Bandina. Asina tenemos a Borja Baragaño (gaita y xiblata travesera), Pedro Pérez (gaita), David Varela (curdión diatónicu), Juanjo Díaz (percusión), Marga Lorences (curdión de tecla), Merce Santos (zanfona), Moises Suárez (guitarra), Lisardo Prieto (solféu y vigulín) ya Ismael Tomas (asturianada).

Les clases entamen esti mesmu martes 17 de setiembre, a partir de les 18:00 hores, nel llugar onde la Escuela La Quintana llevan funcionando a lo llargo de los últimos 15 años, nos locales de la escuela pública Rey Pelayo de Xixón (Av de la Constitución, 57).

Pa conocer más de la escuela o entrugar pola matrícula puede visitase la so páxina web, de Facebbok, o ponese en contactu con ella al traviés del corréu laquintana@laquintana.as o nos teléfonos 649788293 o nel 687830702.