Música

L’Asociación Cultural Esbilla, xunta la Escuela Municipal de Música de Nava, la Taberna Cuévano, en Siero, l’Asociación Escontra’l Raigañu y Chigre El Cafetón, d’Avilés vienen acabantes de convocar palos prósimos sábados díes 15 y 22 de marzu del 2014, en Nava y Llaranes, dos cursino de bandurria asturiana empobinaos pol músicu Dani García de la Cuesta, y dos alcuentros simultáneos de bandurrieros.

Los alcuentros tán despiesllaos a la llibre participación de músicos venceyaos a la bandurria, el rabel y la gaita rabil. La xente interesao puede contautar anantes cola organización o averase dafechu al llugar.

El coste de matrícula del cursín ye de 15 euros. AL TANTU, col enfotu d’atender lo meyor posible a les persones participantes, ufiértense SEIS PLACES pa cada cursín, si hubiere más xente interesao la organización intentará entamar otros cursinos en feches prósimes. Aquelles persones que nun tengan instrumentu, tendrán de comunicalo nel intre d’apautase, pa, na midía les posibilidaes de la organización, apurri-yos ún.

Los cursinos tán despesllaos a tolos niveles y nun fai falta tener conocimientos previos. Tendrán esti horariu, de 10,30 a 14 hores y de 16 a 20, y desendolcaránse como vien darréu:

-Sábadu día 15, Nava, nos locales del Centru Sociocultural LLagar de Sorribes, LLagar de Lolina, c/ Sorribes. L’Alcuentru de bandurrieros, celebraráse na Taberna Cuévano, de Pola Siero, na Plaza Les Campes, a partir de les 21,30.

-Sábadu día 22, LLaranes, nos locales del Aula de Cultura Popular, Centru Municipal d’Asociaciones, tercer pisu, Plaza Mayor de LLaranes. L’Alcuentru de bandurrieros, celebraráse nel chigre El Cafetón, c/ Sol 8, Avilés, a partir de les 21,30.

Les persones interesaes pueden contautar cola organización nes señes que vienen darréu, onde facilitaráse tola información complementaria sobre esti eventu nel Facebook del músicu Dani García de la Cuesta: www.facebook.com/dani.garciadelacuesta.

Los bandurrieros y bandurrieres son músicos que toquen un vieyu instrumentu qu’aportó hasta nos dende la dómina medieval y que se conservó, sobre tou, nel oriente d’Asturies y nel occidente de Cantabria.

Páxina en facebook del músicu Dani García de la Cuesta

Mañana vienres, día 7 a les 11,30 horas, la Casa d’Alcuentru de les Muyeres de L.lena celebrará el ‘Día de la Muyer’. A esti actu asistirá l’alcalde, Ramón Argüelles, y la conceyala delegada del área, Ángeles López.

Ente otres actividaes, ta prevista la actuación de Mapi Quintana.

Les 10.000 entraes que se sacaren a la venta pal conciertu de Víctor Manuel ’50 años no es nada’, que va desenvolvese esti 12 de setiembre n’Uviéu, nes Fiestes de San Mateo, escosáronse en seis díes, según informó esti llunes la organización del eventu.

Sigún eses informaciones hai acutaes un cientu entraes separtaes pa los paquetes promocionales de ‘localidá + hotel’, que pueden adquirise na web, pero les demás escosaronse dafechu.

El Teatru de Llaboral Ciudá de la Cultura (Xixón) va acoyer el vienres 14 de marzu a les 19.30 hores la Gala d’entrega del VIII «Premiu al Meyor Cantar» en llingua asturiana o gallego-asturianu. Nel trescursu d’esti actu, y depués de l’actuación en directu de los cuatro finalistes, un xuráu formáu por espertos en música y llingua asturiana va escoyer el cantar ganador de la presente edición del premiu, al qu’opten 4 finalistes Rafa Lorenzo, Vriende, la BG el Trasno y Silvia Quesada.

Opten al gallardon:

RAFA LORENZO, con Ente mazanos (lletra: Rafa Lorenzo)

Compositor de más de cuatrocientos cantares en castellán y asturianu, el cantautor Rafa Lorenzo Antón empecipió bien aína la so carrera musical. Tres de fundar el grupu Jekes cuando yera entá estudiante de Bachilleratu nel so Tinéu natal, en 1975 entama la so carrera como cantautor, percorriendo cola so voz y la so guitarra numberosos locales y sales d’Asturies, Llión, Galicia, Madrid… Tien publicaos siete trabayos discográficos, que fueron apaeciendo ente 1997 y 2013 de la mano de distintos sellos: «La otra Asturies» (FonoAstur, 1997); «A camín» (FonoAstur, 2011); «Sou vaqueiru» (Grabaciones Pola, 2003); «Pabirún, pabirún» (Trabe, 2005); «Primos hermanos» (Editora Discográfica del Principáu, 2007); «Voi pa la braña» (Editora del Principáu, 2010) y «A fierro y fueu», editáu nel 2013 y nel que ta incluyida la composición Ente mazanos, cola que va competir el 14 de marzu na final del Premiu al Meyor Cantar.

VRIENDEN, con Vivu en dalgún llugar (lletra: Xurde Fernández)

El cuartetu integráu por Juan Duarte, Xurde Fernández, Pedro Santiago y Nel Suárez conforma’l grupu Vrienden, una banda naveta formada en setiembre del 2010 y caracterizada por un estilu que los mesmos integrantes del grupu califiquen como folk fusión-alternativu, nel que’l folk celta vese arriquecíu con toa mena d’influyencies (funk, música clásica, rock, punk, música india, etc.).

Grupu llamáu a tener protagonismu na escena musical asturiana de los años vinientes, el so estilu particular, frescu y innovador fíxo-yos acreedores nel 2012 de la X edición del Concursu de música en directu «Abierto Hasta El Amanecer», dirixíu a grupos y solistes menores de 35 años. Van participar na final del «Premiu al Meyor Cantar» col tema Vivo en dalgún llugar, incluyíu nel so primer trabayu discográficu (Tierra Discos, 2013), y col que tamién consiguieron una nominación a los Premios Amas na categoría de «Meyor discu folk».

GRUPU DE GAITES “EL TRASNO”, con Volviche (lletra: Xosé Miguel Suárez)

Nel mes d’avientu del 2013 salió a la lluz Axeitín, el primer discu de la Banda de Gaites “El Trasno”, creada en 1999 na Escuela de Música Tradicional de Cuaña y integrada anguaño por 18 músicos baxo la dirección de Javier Texedor. Axeitín entemez pieces tradicionales asturianes con melodíes nueves compuestes pol mesmu Javier Texedor. Destaca la presencia nel discu de dos pieces cantaes: «La Capitana», del músicu xixonés Carlos Rubiera, n’asturianu; y «Volviche», con lletra en gallego-asturianu y cola qu’esti grupu del occidente asturianu va participar na final del «Premiu al Meyor Cantar».

SILVIA QUESADA, con La pena abierta (lletra: Alfredo González).

La cantante ya instrumentista asturiana Silvia Quesada cunta yá, magar la so mocedá, con una trayectoria musical destacada. Tres de cursar estudios de gaita y flauta trevesera, vinculó la so carrera a formaciones como la Banda de Gaites Cántara, el colectivu Muyeres o los grupos folk Gatos del Fornu y Blima, participando amás como cantante, gaitera o percusionista en trabayos de Celia González (Cantares yá bordones), Tejedor (Positivu) o Alfredo González (Dobleces). Nel 2013 da un pasu más na so carrera cola publicación del so primer discu en solitariu, La pena abierta, nel que s’incluyen diez creaciones de temática sentimental compuestes dende’l prisma de la decepción o la derrota. Silvia Quesada va participar na Gala final del «Premiu al Meyor Cantar» col tema «La pena abierta», visión señardosa del mitu de Penélope y Ulises.

La Gala va empezar a les 19.30 hores y la entrada ye llibre. L’espectáculu va cerrase cola actuación de Taranus, grupu vencedor na edición anterior d’esti premiu.

Tola información d’esta y de les ediciones anteriores del «Premiu al Meyor Cantar» ta disponible nel sitiu web del concursu, nel que s’incluyen noticies, fotografíes, información de los grupos y cantares finalistes. Amás d’ello, un reproductor dexa escuchar los temes que van competir na Gala.

Web del Premiu al Meyor Cantar

L’Asociación Folklórico-Musical “Villa y Condáu de Noreña” en collaboración col Ayuntamientu de Noreña a través de la Conceyalía de Cultura tien recién convocáu’l VI Certame de cantares en chigre “PROHIBIDO CANTAR… desentonáu” que va cellebrase en Noreña el dii 29 de Marzu de 2014.

Pa inscribise como ronda o chigre contautar por e-mail a afmvillaycondadodenorena@gmail.com o nel teléfonu 985 67 71 13. Pueden consultase les bases y más información na páxina de Facebook del eventu o nel blogue de l’Asociación.

La organización prevé la participación de toles sidreríes de la villa nun certame, empobináu a la recuperación de les rondes, manifestaciones populares espontánies qu’aconceyaben pa cantar nos aguilandos, fiestes, cortexos o simplemente p’alternar colos amigos y vecinos. Estes agrupaciones yeren un mediu pa les interacciones sociales, favorecién rellaciones amistoses y calteníen vivo la cultura popular.

Esti sábadu 15 de febreru, a les 23 hores, na sala Wippoorwhill d’Uviéu Dixebra va ufiertar el conciertu de la so nueva xira 2014, onde van presentar el so últimu trabayu discográficu, tituláu Tiempos Modernos. Un discu que fai’l númberu doce na so yá bien llarga carrera, apaecía a finales del añu 2013 con quince temes d’estilos distintos (rock, punk, reggae, ska, folk, funk, metal-rap…), como ye avezao nesta banda; al traviés de les pieces incluyíes nél faen un repasu de l’actualidá -asturiana y internacional-, con lletres crítiques y reflexives onde dan el so puntu de vista sobre asuntos como la crisis, la solidaridá, la represión, la resistencia o la perda de derechos.

“Tiempos Modernos” ta teniendo una acoyida mui bona ente públicu y crítica, asitiando a esti trabayu nuevu de Dixebra ente les sos meyores producciones. Con esti conciertu empiecen a defendelu en directo, nel que se mueven bien a gustu estos ocho músicos y que ye ún de los sos fuertes. Pa la ocasión van interpretar una decena de les canciones nueves más dellos de los sos himnos más conocíos y festexaos polos sos siguidores, too ello entemecío con samples preparaos pa la ocasión.

Con esti conciertu la banda principa la xira del 2014, que los va llevar a presentar la so obra nueva per bien de llugares d’Asturies y de fuera, asina la siguiente cita va ser el 21 d’esti mes en Madrid, onde dende hai unos años vien actuando con regularidá.

Esti sábadu 15 de febreru, a les 23 hores, na sala Wippoorwhill d’Uviéu (c/Matemático Pedrayes, 18)Dixebra va ufiertar un conciertu onde van presentar el so últimu trabayu discográficu, tituláu Tiempos Modernos. Un discu que fai’l númberu doce na so yá bien llarga carrera, apaecía a finales del añu 2013 con quince temes d’estilos distintos (rock, punk, reggae, ska, folk, funk, metal-rap…), como ye avezao nesta banda; al traviés de les pieces incluyíes nél faen un repasu de l’actualidá -asturiana y internacional-, con lletres crítiques y reflexives onde dan el so puntu de vista sobre asuntos como la crisis, la solidaridá, la represión, la resistencia o la perda de derechos.

“Tiempos Modernos” ta teniendo una acoyida mui bona ente públicu y crítica, asitiando a esti trabayu nuevu de Dixebra ente les sos meyores producciones. Con esti conciertu empiecen a defendelu en directo, nel que se mueven bien a gustu estos ocho músicos y que ye ún de los sos fuertes. Pa la ocasión van interpretar una decena de les canciones nueves más dellos de los sos himnos más conocíos y festexaos polos sos siguidores, too ello entemecío con samples preparaos pa la ocasión. Les previsiones son que’l públicu respuenda y que l’actuación tenga tola intensidá a la que Dixebra nos tien acostumaos cuando se xube a un escenariu. La nueche complétase cola presencia de Dani AntiStailo nos platos, que va protagonizar una sesión perespecial onde nun van faltar remezcles de temes de los propios Dixebra, amás d’otres bandes, que van calecer l’ambiente previu al conciertu.

Con esti conciertu la banda principa la xira del 2014, que los va llevar a presentar la so obra nueva per bien de llugares d’Asturies y de fuera, asina la siguiente cita va ser el 21 d’esti mes en Madrid, onde dende hai unos años vien actuando con regularidá.

Mañana sábadu acaba l’aniversariu d’Ixuxú Asturies-Euskal Herria elkartea, al que se pon puntu y final con un conciertazu que va tener llugar a les 20,30 hores en La Madreña: l’actuación décimu aniversariu de Skama la Rede y la primer vegada que toquen n’Asturies los grupos vascos de ska-rock Skakeitan y rock ON!!!.

Formaos en 2003 alredor d’El Cabu Peñes, Skama la Rede ye ún de los grupos referenciales del nomáu rock ástur. El so estilu, combinación de ska con punk y folk asturianu, y les sos lletres comprometíes caracterícenlos. Los cantares de los sos trés discos d’estudiu –y cuartu en camín- cueyen más fuerza inda nel so directu arrollador y folixeru. Amás, esti 8 de febreru van cumplise 10 años dende la primer actuación en vivo de la formación.

Los donostiarras Skakeitan son una de les nueves promeses de la música vasca. La calidá del so ska-rock –heriedu de bandes mítiques como Skalariak y Betagarri- llevó-yos a triar los principales festivales vascos y a dar alredor de 30 conciertos en namás 3 meses. Con esta actuación, va sonar per primer vegada fora de Euskal Herria el so primer discu, “Ahots gabekoen ahotsa”.

Tamién va ser el primer conciertu n’Asturies d’ON, tríu formáu en 2012 por Itsaso Gutierrez, vieya conocida del euskal rock. El so estilu, un rock fondu y directu, ye complicáu de catalogar; asina lo amuesen los temes que formen el so discu debú homónimu. Un enérxicu directu ye lo que van presentar n’Uviéu.

Les entraes anticipaes van ser a 4 € y a5 € na puerta. Y los puntos de venta: El Cafeton / avilés – L’Esperteyu / uviéu – La Escuela / cangues d’onís – Judá / siero – Chigre Ochobre / l’entregu – Canteli Sidrería y C.S Sestaferia / xixón.

Páxina en Facebook d’Ixuxú

Una de les grandes noticies musicales del añu que recién entama tien Avilés como protagonista, porque son dos veteranos los que protagonicen el nuevu ciclu “Arte Sonoro” d’esa ciudá: el primeru, John Mayall, “lleenda viva del blues”, que recala na villa onde yá actuara en 2011 por cuenta de la xira que celebra so 80º cumpleaños. Va Ser el 2 de marzu nel teatru Palacio Valdés. El segundu, otru clásicu: Bob Dylan, que nun va tar presente n’Avilés, pero al que va dedicase-y una actuación mui lliteraria.

El ciclu “Arte Sonoro” va empezar el 15 de febreru con una tarde d’humor na Casa de Cultura al cargu d’Álex Clavero, Miguel Llagu y Alberto Rodríguez. Los díes 21 y 22 de mayu, va celebrase’l festival “Avilés ye un blues”, nel que participen dellos locales de la ciudá, que programen conciertos pa celebrar el 80º cumpleaños de Mayall. Van Participar bandes asturianes y nacionales, como Edu Manzanes & Whisky Tren.

Avilés celebra a la so manera’l cumpleaños de Dylan, nesti casu 73 años, coincidiendo, amás, colos 50 años del discu “The times they llabre a-changin'” (“Los tiempos tán camudando”). “Vamos da-y un toque lliterariu, que teníamos un pocu escaecíu. va presentase siquier un llibru d’un escritor español sobre Bob Dylan. Va Haber tamién conciertos na plaza d’España y un alcuentru na Casa de Cultura, con artistes entá por concretar. Van Ser d’Avilés y del restu d’Asturies y esperemos que tamién nacionales”, comentó Béznar Arias, director del ciclu y promotor musical. Va Ser el 23 de mayu.

L’albergue y restorán El Sabil, allugáu nel pueblu de Villanueva en conceyu Santo Adriano, vien entamando esti mes dellos conciertos nes sos cenes de los ábados con actuaciones peles que ya pasaron, ente otros. la cabera selmana David Varela y Anabel Santiago. Esti sábadu ufren una cena conciertu con Pablo Valdés, pudiendo cenar dende los 10 euros.