Música

Flutedog, Nordés, El Capitán Cucuruchu, Mnemusine y Oveya Negra, son los grupos musicales que presentaren en conciertu los trabayos realizaos nos Talleres de Producción Musical llevaos a cabu a lo llargo de 2014 nel Taller de Músicos de la Fundación Municipal de Cultura, Educación y Universidá Popular. Los conciertos tuvieron llugar nel Centru de Cultura Antiguu Institutu’l llunes 19 y el martes 20 de xineru a les 20.00 hores y sirvieron pa que’l Taller de Músicos abriere’l plazu d’inscripciones nos Talleres de Producción Musical 2015.

El departamentu de Promoción de les Artes de la Fundación Municipal de Cultura de Xixón presentaba los Talleres de Producción Musical como continuación del programa formativu y d’espardimientu Ayudes a la Creación Musical, actividá que dexó la realización de centenares de proyectos musicales que facilitaron que munchos artistes y grupos de música d’Asturies, atoparen un buecu nel panorama musical actual..

L’oxetivu d’esta propuesta ye que los músicos participantes familiarizaranse colos medios y técniques propies del trabayu n’estudiu, dende la pre-producción a la masterización pasando por tomar de soníu, grabación y amiestu. Pa ello, fuera realizándose una maqueta nel estudiu de grabación del Taller de Músicos, tutorada por un profesional espertu que va faer les vegaes de técnicu d’estudiu y asesor nos aspeutos creativos.

Con ello preténdese arreyar a los participantes en tol procesu, por que nun se llinden a una función d’instrumentistes sinón que conozan en tou momentu qué se ta faciendo y porqué, amás d’afayar distintes maneres d’algamar la resultancia quería.

Abiertos a cualquier enclín o estilu, los Talleres de Producción Musical nun vienen sustituyir el trabayu d’un estudiu profesional, sinón a ufiertar a los comenenciudos la posibilidá d’esperimentar y adquirir la formación básica necesaria pa realizar grabaciones solventes, de la mano de músicos especialistes nel usu d’equipos y técniques más actualizaes de creación sonoru-musical.

Les condiciones de realización pasen por un máximu d’obres a grabar de 4 temes ó 16 minutos en total y un tiempu de realización de 20-30 hores, en función al tipu de proyectu a realizar.

L’almisión de solicitúes entamó ya a partir del llunes 12 de xineru de 2015.

El plazu de realización: de común alcuerdu, ente’l 26 de xineru y el 18 d’avientu de 2015. Y la inscripción ye de 46 €.

Web del Taller de Músicos de la FMC de Xixón

La sala Acapulco va acoyer per primer vegada un conciertu de Dixebra. el 10 de xineru pa abrir la xira 2015, na que’l grupu va siguir espardiendo los temes del so trabayu últimu, ‘Tiempos modernos’. Dixebra yá presentó esti discu, asoleyáu en payares del 2013, y desenvolvió darréu una xira l’añu pasáu per Asturies y otres places de fuera del país, ecomo nel Festival Interceltique de Lorient.

Pa esti conciertu en Xixón, lDixebra va tener l’acompañamientu de Dani Antistailo. Les actuaciones van principiar a les 21.30 y les entraes yá tan a la venta a un preciu de 10 euros nos llugares siguientes: Trisquel y Llibrería Paradiso, en Xixón; L’Esperteyu y El Último Mono, n’Uviéu; y El Cafetón, n’Avilés.

L’Asociación Cultural Alameda, con sede nel Franco (co. El Franco), convoca hasta el próximo 15 de febreiro de 2015 a participar a tod@s @s interesaos / -adas nel II Concurso de diseño y dibuxos coa vista posta na celebración da XXXI Noite Celta de Porcía el prósimo sábado 29 d’agosto de 2015.

Nun é un concurso de carteles. Poden participar todas as personas interesadas que quiran fer chegar el sou diseño ou dibuxo al Asociación Cultural Alameda, col fin de poder ser usaos por esta asociación nos sous productos conmemorativos da XXXII Noite Celta de Porcía, ou como ésta determine.

A temática dos diseños presentaos ha a ser “XXXII Noite Celta de Porcía”. Os diseños ou dibuxos que se presenten nun van poder tar xa usaos pra outra cousa ou con outro fin qu’este concurso.

Os diseños gráficos ou dibuxos poderán mandarse por correo ellectrónico á dirección noiteceltaporcia@gmail.com ou á seguinte dirección postal, tendo qu’aparecer, neste caso, el nome y apellidos da persona que participa, D.N.I., teléfono y correo ellectrónico:A.C. Alameda/ El Armayor, s/n, 33746 – El Franco (co. El Franco).

La banda asturiana de fusión La Tarrancha, asoleya un vidiuclip pa despidir l’añu. El vidioclip foi realizáu íntegramente con grabaciones feches con teléfonos móviles demientres so Xira Mezillingües na primavera y el branu d’esti 2014 qu’agora termina. El vidiu, quier ser “un chisgu a la música en directu y a tolo que la arrodia, y n’especial a esta xira, a los festivales, la xente que ta detrás d’ellos, les collaboraciones con otros músicos, les bandes coles que coincidieron, el publico qu’esfrutó de los directos, los nuevos amigos que se fixeron nel camín, los que siempres tán ehí, les hores de prueba de soníu, les hores muertes, les comíes colectives, les hores de volante, de suañu, de rises, de xuegos, de fiesta, de paisaxes, de nuevos llugares…”

Eso ye lo que quixeron resaltar d’él, onde por problemes de metraxe y del material con que cuntaben nos teléfonos, solo salen retrataos 6 de los más de 18 conciertos que dieron mientres esta xira per tierres de Asturies, Galiza, Llión, Euskal Herria, Castilla y La Rioja. El cantar conductor del videoclip ye “De Tazones a Candás”, tema compuestu por dellos cantares de chigre iguaos y reellaboraos por La Tarrancha y qu’apaez nel compilatoriu “Cantares de Chigre” (Algamar Producciones) y nel últimu discu de la banda, Mezillingües.

El discu taba compuestu por temes propios de la banda en toles llingües de la península ibérica y que cuntaba cola collaboración de 19 artistes de distintes procedencies.

La banda lleva yá dos meses ensin pisar los escenarios, preparando lo que va ser el so próximu discu y la so nueva xira, ye por eso, esti videoclip “nun solo ye una despidida d’añu y de xira, sinón tamién la celebración d’un añu nuevu, d’un discu nuevu y de una xira nueva, nuevos llugares, con nuevos amigos , xunto colos yá amigos de siempre”.

Su Ta Gar, los padres del heavy metal n’euskera, van descargar 27 años de trayectoria col so conciertu del 19 d’avientu a les 21 hores na sala que’l colectivu cultural Lata de Zinc tien nel barriu uvieín d’Otero. El conciertu ta entamáu por Ixuxú Asturies-Euskal Herria elkartea -asociación d’asturianos emigraos al País Vascu que fai de ponte sociocultural ente los dos pueblos- y les entraes yá se pueden mercar por 8 euros en dellos bares de la zona central asturiana. Na puerta van costar 10 euros.

El conciertu asítiase dientro de la xira de presentación de “Bizirik Gaude”, un trabayu que va del heavy más clásicu a ritmos enllenos de brenga. Pente medies, matices acústicos, una balada y hasta dalgún toque de hit radiofónicu col single ‘Zure Baitan’. Diez cantares nes que la reivindicación ta presente otra vegada y onde la llucha s’enfoca en clave más amplia: ye la llucha pola vida, la llucha de los sentimientos, la mirada a l’alma propia.

El conciertu ta entamáu por Ixuxú Asturies-Euskal Herria elkartea, l’asociación d’asturianos emigraos al País Vascu que fai de ponte sociocultural ente los dos pueblos.

Eventu en facebook

“Música en movimientu, pueblos moviéndose”. Esi ye’l llema col que va entamar el 31 del mes de xineru Glayíos/Oihuak, una iniciativa d’Ixuxú Asturies, Euskal Herria Elkartea y el Colectivu Xuvenil Glayíos pa sofitar a bandes asturianes y vasques lloñe de la so tierra, ente les que s’alcuentra Skama la Rede. Acullá de la música, ye un proyectu que-y da puxu a un modelu nuevu de xestión cultural basáu na cooperación, l’autoxestión y la tresmisión de principios.

El 31 de xineru arranca’l ciclu. Ye la primera puesta n’escena d’una iniciativa que va axuntar diez grupos destacaos (cinco asturianos, cinco vascos) y los intercambiará p’aprovechar la relevancia que cadún tien dientro del so territoriu. Los cinco conciertos que se van facer n’Asturies -toos na Sala Whippoorwill d’Uviéuapuesten por xenerar un circuitu estable de música en directo. Too ello con un preciu afayadizu: les entraes anticipaes van costar 5 euros y na puerta 8 euros.

Otra clave ye la importancia de cómo se faen les coses. Glayíos/Oihuak surde de principios como los de fomentar la diversidá llingüística o dar un tratu igualitariu, tresparente y horizontal ente bandes y organizadores.Tamién destaca la so apuesta pol texíu productivu asturianu y la economía social: tolos patrocinadores y collaboradores son axentes colos que comparten principios de responsabilidá social pa col territoriu, condiciones llaborales dignes y defensa de la cultura.

La iniciativa qu’etama agora ye ensin dubies bien moza, poles persones que la promueven que tienen menos de 30 años, ensin calter llucrativu y na que va haber espaciu pa la solidaridá y la reivindicación gracies a la participación de dellos movimientos sociales.

A lo postrero, ye un proyectu anovador que, “en tiempos de crisis del sistema, nagua por da-y puxu a modelos de xestión cultural qu’amuesen que son vidables otres formes de construyir rellaciones sociales, económiques y culturales.

Los conciertos programaos pa entamar van ser los de los asturianos Skama la Rede y los donostiarres Skakeitan, que van abrir el ciclu a ritmu ska pa presentar los sos nuevos trabayos, ‘Avante’ y ‘Orekariak’. Van sigui-yos otros cuatro conciertos -en marzu, mayu, setiembre y payares- qu’ufrirán estilos tan estremaos como’l stoner rock, el punk, la fusión y la electrónica. En pasando la primavera, los grupos d’Asturies van tocar nel País Vascu con un formatu nel que la organización ta trabayando.

Esti sábadu 29 de payares a les 20 hores va tener llugar na nueva Escuela Municipal de Música Tradicional de Llanes el Conciertu del Grupu Folk LA BONTURNÉ. Esta formación foi creada na unión de trés músicos asturianos con una llarga trayectoria nel mundu de la música tradicional asturiana: Santi Caleya (gaita y saxo), Merce Santos (Zanfonía) y David Varela (Acordión diatónicu), los trés componentes de la mesma del Grupu asturianu “La Bandina”. El conciertu completase con una Master Class.

El repertoriu de LA BONTURNE ta basáu na música tradicional d’Asturies, asi como del restu del arcu Atlantico. Amás de presentar temes de composición propia. La entrada al conciertu ye gratuita, con capacidá hasta completar l’aforu de la Sala d’Audición y Grabación de la Escuela Municipal de Música Tradicional de Llanes.

Con tou ello, queda patente la calidá de les formaciones de música tradicional que tán participando nos Ciclos de Folk de Cámara entamaos pola Escuela Llacín y el Conceyu de Llanes na Escuela Municipal de Música tradicional, qu’empecipiándose anguaño, tán cuntando con grandes formaciones como los Belgues CAVEZ y MONTANARO, el Bretones LUDJAK TRIO y JEAN MICHEL VEILLON, los asturianos DRD, VRIENDEN, TEXEDOR, SEU y TUENDA, los Escoceses ALBASTUR, asi como’l famosu gaiteru Irlandés JOHN MCSHERRY.

El mesmu sábadu de 11:00 a 14:00 tamién va tener llugar nel mesmu Centro una MASTER-CLASS del luthier vascu JOSÉ MARI LÓPEZ sobre “La mecánica y funcionamientu del acordión diatónicu”. Amás d’otra sobre “L’acompañamientu de la gaita na Tonada” que va ser impartida por Santi Caleya a les 17:30 en La Sala d’Audición y Grabación del Centru.

Toos estos conciertos y master class son gratuitos y abiertos a tol públicu, formando parte de la mesma del conxuntu d’actividaes resultantes de les distintes FUNCIONES del Centru destinaes a potenciar la Música Tradicional: ESCUELA, ESTUDIU DE GRABACIÓN, AULA DIDÁCTICA, TALLER DE PRESEOS y la mesma de DINAMIZACIÓN y DIFUNSIÓN LA MÚSICA FOLK. Tando so la dirección de la ESCUELA y BANDA GAITES LLACÍN.

A Banda de Gaitas El Trasno, de Cuaña, vai dar un concerto nel Teatro Filarmónica d’Uviéu el venres 21 de novembre, ás 8.30 horas. Esta actuación pon el ramo á xira qu’amañóu a Conseyeiría d’Educación, Cultura y Deporte pra esta banda como ganadora da edición del ano 2013 del Premiu al Meyor Cantar cua cántiga «Volviche». A entrada al concerto é llibre hasta completar el aforo.

A banda cuañesa, acompañada por dalgús dos músicos que colaboraron na grabación del sou disco Axeitín, actuóu el 3 d’agosto nel Centro Niemeyer d’Avilés, el 17 d’agosto nel Festival Intercéltico d’Occidente en Tapia y el 7 de setembre en Candás, dentro das celebracióis institucionales del Día d’Asturias.

El grupu asturianu Cerezal asoleya en Payares el só segundu trabayu discográficu “Camín” (Algamar producciones). Grabáo y mezcláo en Tutu Studios por Sergio Rodríguez y Ruboh, y producíu pol grupu, el discu amuesa 12 cortes (+1 bonus track), con un altu porcentaxe de composiciones propies, confirmando l’estilu frescu y orixinal que ya demostrara cola só primer grabación (“Cerezal EP”, Autoproducción, Avientu 2013).

Nel discu, editáu por Algamar Producciones, reúnese la formación de la banda: Juanjo Díaz(percusiones y batería), David Mori (Flauta, whistle y gaita asturiana), Andrea Álvarez (voz), Juan Yagüe (guitarra, bouzuki y mandolina) y Gonzalo Pumares (vigulín y voz).

Amás, el grupu cuenta nesti trabayu con dos collaboradores de reconocíu prestixiu: Juan Carlos Vega Cabín al baxu, y la voz de Victor Manuel.

Primicia pa los primeros 500

Les primeres 500 copies tendran accesu en primicia a una montonera de material audiovisual. Fotos, lletres y vídeos, ente los que tá el videoclip del tema Nueche, grabáo en direuto y nel que la banda tá acompañada de invitáois como los hermanos Tejedor, Marco Antonio Guardado, Ruboh UnoMasUno, Vrienden, Rubén Alba o Fernando Oyagüez.

Cerezal entama col 2013, frutu de la xuntanza de distintes mentes inquietes dientro del panorama musical asturianu. La confluencia n’esti proyeuto de artistes con fonda trayectoria dientro de la música folk, el rock y el pop fáe del soníu de CEREZAL un elementu orixinal y enllenu matices.

Con una fuerte base folk, esta banda de dixebráes influencies avérase por momentos a estilos como el jazz y el blues, aunque el só soníu parez tar basáo n’estructures y armoníes más averáes al pop.

N’el só repertoriu, del todo orixinal, garren pesu les composiciones musicales y les lletres, bien propies o bien obteníes a partir del trabayu lliterariu d’ autores asturianos de güei. CEREZAL non escaéz los sós raigaños, faciendo revisiones ya igües de diferentes temes presentes na tradición oral d’Asturies.

El grupu algamó una fuerte repercusión nel só llanzamiento n’Asturies, con un seguimientu ablucante por parte de públicu y crítica. Namái un mes dempués del estrenu del so EP debut “Cerezal” (Autoproducíu – Avientu 2013), el tema Nueche fói nomináu a meyor canción folk de 2013 pol xuráo de los premios AMAS.

Nos meses siguientes, CEREZAL tuvo presente nos escenarios principales de dalgunos de los meyores festivales d’Asturies, como la Folixa na Primavera (Mieres), el festival Arcu Atlánticu (Xixón), la Nueche folk de Granda, el Festival Intercélticu d’Occidente, les Xornaes de música tradicional de Nava, o la XVIII muestra Tocando pelos Pueblos, nel mes d’ochobre de 2014.

Nel branu de 2014, vista la acoyida, el grupu entama la preproducción del so primer discu de llarga duración, que graben nos meses de setiembre y ochobre.

L’históricu grupu vascu de heavy metal Su Ta Gar va tar n’Uviéu dempués d’abondos años ensin tocar n’Asturies. Surdíos en 1987 y con 15 trabayaos espublizaos, van presentar n’Avientu y na sala Lata de Zinc el so últimu discu “Bizirik gaude” con un conciertu entamáu por Ixuxú Asturies-Euskal Herria elkartea, l’asociación d’asturianos emigraos al País Vascu que fai de ponte sociocultural ente los dos pueblos.

La sala LATA DE ZINC alcuéntrase n’Uviéu na cai julián cañedo, 3 y tien prevista pal 19 d’Avientu l’actuación con una entrada anticipada de 8 euros y de 10 euros na puerta. La venta anticipada [próximamente] sedrá en L’Esperteyu (uviéu) Sidrería Canteli (xixón) El Cafetón (avilés) El Judá (siero) Ochobre (l’entregu) La Escuela (cangues d’onís).