Música

Skontra publiquen en llibre descarga ‘Foguera’, el cuartu trabayu d’esta banda que ye referencial na escena punk-folk asturiana. Un discu, que se va presentar en directo esta fin de selmana, y qu’inclúi trece cantares que tresmiten un mensaxe de llucha con un soníu más ellaboráu. Tres cinco años de silenciu, los asturianos regresen con un discu autoeditáu caracterizáu poles ganes de superase, unes composiciones mui cuidaes y unes lletres que llamen a la resistencia; too ello con destacaes collaboraciones.

La ‘Foguera’ prendióse. Dende güei pue descargase llibremente al traviés d’Internet la cuarta referencia del grupo¡u punk-folk Skontra. El trabayu va presentase esti fin de selmana en Xixón, Uviéu y el Beltane Fest de Cantabria.

‘Foguera’ ye un cantu a la resistencia, una llamada a que les batalles se pueden ganar, un reconocimiento a quienes lluchen. Grabao nos estudios ACME d’Avilés cola producción de Miguel Herrero, musicalmente ta cuidao al detalle, con once cantares –más dos bonus track- que son como’l fueu cuando s’aviva; van de menos a más intensidá pasando pel punk, folk, rock y reggae que guía a esta banda a lo llargo los sos quince años de camín.

Otra de les característiques del discu ye’l so calter colectivu. La voz de Fernando Madina (Reincidentes); el violín, guitarres y curdión d’Ana Caballero, Juan Villamil (Adizión Etílika, Spanta la Xente), Ramiro (40 Barrotes) y Igor Sala (The Potes); y les voces en gallegu, catalán y vascu de David Boo (Bastards on Parade), Nuria Martí, Sala ‘Strummer’ e Ibi (The Potes); dan calor a una entrega na que tamién hai espaciu pa homenaxes: versionen ‘El 34’, del desapaecíu grupu folk Xéliba y ‘Condenado’ n’alcordanza del va poco fináu Yul RIP.

El vienres 29 van tocar na sala Sir Laurens d’Uviéu xunto a Rat-zinger dientro’l ciclu Glayíos/Oihuak y el sábado 30 nel Beltane Fest de Comillas con Habeas Corpus, Desakato, Rat-zinger, Los Chikos del Maíz, Misiva y Karne Kruda.

Enantes d’esos conciertos, el Centru Social Sestaferia de Xixón va acoyer una presentación al públicu esti xueves 28. Ellí van tar Skontra pa pinchar el CD, vender les 100 primeres copies disponibles, firmar discos y tocar la versión acústica del tema ‘La Foguera’. Amás, va haber pinchéu y bébores asturianes a precios populares nun ambiente folixeru y de cellebración.

El próximu sábadu 23 de mayu a les 20 hores va tener llugar na Escuela Municipal de Música Tradicional de Llanes un Conciertu del Grupu Aire Quintetu, dientru de los ciclos de Folk de Cámara 2015 entamaos nesa Escuela Municipal de Música tradicional, que tres el exito del pasáu añu continúen con importantes músicos y grupos del folk y de la música tradicional asturiana ya internacional. Esta formación so la dirección del Maestru Jacobo de Miguel afonda na tradición asturiana dende la perspectiva de cantares y melodias instrumentales d’acordión diatónicu, dotándoles d’una harmonía actual , que-y da un nuevu sabor con ciertu calter improvisatoriu.

Aire Quintetu trata de xuntar les conocencies y esperiencia musical de los mesmos miembros en diversos campos. Parte de la esencia tradicional del acordión diatónicu de Xuan Nel Expósito, xuntu col Bouzouki de Elias García. Dambos provenientes de la música tradicional y Folk de grupos como Felpeyu, Llan de Cubel o Tuenda. A ellos xunese la maestría del percusionista Fernando Arias y l’amplia y esperimentada carrera dientro del Jazz de la mano de la contrabaxista Mapi Quintana. Xuniendo finalmente l’aire fresco de l’harmonía y el virtuosismu del pianista Jacobo de Miguel. Presentando asina un nuevu conceutu jazz-folk.

La idea d’esta formación , naz pola grabación que se realizó del discu “ Enrite” a finales del añu 2012, trabayu que se vio reconocíu por crítica y públicu , quedando finalista a “ meyor cantar n’asturianu 2012” y llogrando por reconocencia popular el Premiu AMES 2012 a meyor discu folk del añu.

Esti conciertu forma parte de Los ciclos de Folk de Cámara 2015 entamaos na Escuela Municipal de Música tradicional de Llanes, que tres el exito del pasáu añu continúenn con importantes músicos y grupos del folk y de la música tradicional asturiana ya internacional. Estos ciclos formen parte del conxuntu de más de cincuenta actividaes que fuera del cursu ordinariu entama la Escuela Llacín, La Banda Gaites Llacín y el Conceyu de Llanes pa 2015.

Fuxida, el grupu asturxaponés afincáu en Nueva York, da un conciertu en formatu dúu esti xueves n’Uviéu, cola participación del gaiteru y saxofonista uvieín Carlos Casado y el cantante y guitarrista xaponés Tatsuo Teraoka, que van actuar nel chigre L’Esperteyu a les 21.30 hores. Cantares tradicionales como Chalaneru, Carcarosa o Santa Bárbara Bendita van sonar esti xueves 14 nel chigre L’Esperteyu d’Uviéu.

Nada taría fora de lo común si nun fuera porque van tar cantaes por un xaponés y porque van sonar ente un repertoriu que tamién recueye pieces populares del país nipón. Dos componentes de Fuxida –la banda neoyorkina qu’entemez estos dos cultures- tán n’Asturies y van aprovechar la ocasión pa presentar la so música.

Fuxida ye l’alcuentru ente los soníos tradicionales asturianos y xaponeses. Una banda formada en Nueva York va un añu por cinco músicos orixinarios de Asturies, Xapón y Cataluña que da como resultáu un amiestu orixinal y rompedor de folk, jazz, pop, rock y ritmos llatinos. El so divertíu y cercanu directu consiguió nun dexar indiferente a naide en nenguna sala, teatru y cai de la Gran Mazana. Agora lleguen a Asturies en formatu amenorgáu.

Tres un primer conciertu’l pasáu vienres nel Llar La Llegra d’Uviéu –actuación que, pesie al so calter improvisáu, consiguió enllenar el local y encandilar al públicu-, Carlos Casado (saxu sopranu y gaita) y Tatsuo Teraoka (voz y guitarra), van repitir espectáculo antes del so regresu a Nueva York. Va ser a les 21.30 hores d’esti xueves 14 en L’Esperteyu (calle Calleja la Ciega 2, esquina Azcárraga), con entrada gratuita y va cuntar cola collaboración de dellos miembros de la Banda Gaites Ciudá d’Uviéu, formación na que Casado foi gaiteru.

Próximu discu

Esta visita en formatu amenorgáu ye la primera que realicen dos componentes de Fuxida. La intención yera promocionar el so primer discu estos díes n’Asturies pero, por problemes de tiempu, la grabación tuvo que retrasase; de vuelta a Nueva York, van retomar el proyectu. Amás Carlos Casado va siguir al mandu de la Banda de Gaites de Nueva York, primer banda asturiana d’Estaos Xuníos que fundó esti músicu uvieín tres la so emigración y que ta formada por miembros de siete países distintes.

El Conceyu Bimenes vieno acabante de convocar una nueva edición del so concursu de gaita. El requisitu imprescindible pa poder participar nel mesmu ye ser menor de 21 años a fecha 30 de xunu de 2015 y el plazu p’apuntase, apurriendo la documentación afayadiza al Ayuntamientu Bimenes, acaba’l 19 de xunu a les 12’00 hores.

El concursu tendrá, si’l númberu de participantes ye mayor de quince y asina lo decide’l xuráu a comuña cola organización del certame, una fase semifinal que se cellebrará na Casa la Cultura de Santuyano’l domingu 28 de xunu.

La final cellebraráse una selmana dempués, domingu 5 de xunetu, nun llugar entá por afitar.

Repartiránse 600 € en premios, pa los trés primeros clasificaos, asina como dellos trofeos. Tola información necesaria pa poder participar nel certame recuéyese nes bases del concursu, que s’apurren nel PDF que pue descargase dende l’enllaz.

Esti Sábadu 2 de mayu en Xixón, a partir de les 19 hores na Sala Acapulco-Casinu d’Asturies, celebrarase’l tracional Conciertu pola Oficialidá organizáu pola Xunta pola defensa de la LLingua que va incluyir una grabación en directo pal CD que s’editará depués. Nel conciertu d’esti añu participen Alienda, K-Nalón, Felpeyu, Dixebra, Adizión Etílica y Dj Antistailo.

La barra tendrá los precios de siempre y les entraes anticipaes costarán 8€ y na Puerta 10€.

La banda asturiana punk-folk Skontra vieno acabante entamar a grabar ‘Foguera’, la que va ser la so cuarta referencia discográfica, que van autoeditar en mayu y va tener trece temes: Va incluyir collaboraciones destacaes y preséntase como’l más ellaboráu del grupu cinco años dempués de la so cabera esperiencia discográfica.

Los estudios ACME y la producción de Miguel Herrero (Desakato, Helltrip, Alto Volto…) tán yá rexistrando lo que va ser el cuartu trabayu de Skontra. A finales de mayu van llanzar los once nuevos cantares –más dos bonus track especiales- que van formar ‘Foguera’, un trabayu que da un saltu compositivu no qu’esta banda referencial de la escena asturiana fixera hasta agora.

“Ye’l que más tiempu nos llevó preparar y col que tamos enfotaos en que recuye lo meyor de nós”. Skontra falen asina d’un discu que va siguir la so llínia musical punk-folk influenciada pol hardcore, ska, reggae y rock; pero qu’a la par va incluyir más gaita, temes más ellaboraos y unes lletres reivindicatives más directes. La llingua asturiana tamién va tener mayor protagonismu nunos testos que vuelven tar n’asturianu y castellanu.

Amás, ‘Foguera’ –que va tar una vegada más autoxestionáu dafechu pola banda- va ser un discu con collaboraciones destacaes y delles sorpreses. El grupu nun fixo públicu entá tolos detalles, pero pel momentu yá avanzó que van cuntar cola voz de Fernando Madina (Reincidentes) y les guitarres de Ramiro (40 Barrotes) y Juan G. Villamil (Adizión Etílika, Spanta la Xente…). Los bonus track que van pesllar el CD van ser dos sorpreses abondo especiales.

Formaos en 2001, los sos trabayos anteriores -‘Semeya de la rabia’ (2006); ‘Cantares pa dempués d’una guerra’ (2008) y ‘Mazcando miseries’ (2010)–, convirtieron a Skontra nuna de les bandes de rock n’asturianu más destacaes dientro y fuera de la so tierra. Les dos xires per Holanda y Alemania y la presencia en festivales como’l Aupa Lumbreiras, Hatortxu Rock, EHZ o Baitu Rock aválen-yos. Con ‘Foguera’ darán un ambiciosu y importante pasu na so trayectoria.

Mala Reputación fai n’Uviéu la siguiente parada de la xira de presentación del so nuevu trabayu “Eternes Promeses”, un CD col que la banda vuelve a los escenarios tres cuatro año de silenciu dende’l so últimu discu, “Calter” (2011). La cita va ser el xueves 26 de marzu a les 23:00h. nel Pub Plaza (Plaza del Riego s/n). Depués dirá a Santander, Salamanca y Cáceres, pa volver a Asturies el 25 d’Abril na Fiesta Vidiago Rock, en conceyu Llanes.

Esti 17 de febreru Rock Estatal Records llanzaba ‘Eternes Promeses’, séptimu trabayu de Mala Reputación. Los asturianos tornaben con diez temes musicalmente ambiciosos y llenos d’emotividá. “Que La Tierra…” yera l’adelantu del discu que nun mes entamaba a presentase en directu. Mala Reputación son unu de los nomes más respetaos de la escena rock asturiana y estatal.

Hai casi dos décades que la banda empezó a esplegar altes dosis de punk-rock, una propuesta que foi maureciendo colos años escontra un estilu cada vez más personal ya inconfundible. Ensin fondiase na repetición de fórmules y cola valentía de dar total llibertá a les sos moliciones musicales, roblen agora la so séptima referencia.

Depués d’unos díes de que saliera a la cai “Eternes Promeses”, la banda llanzaba tamién el single “Que La Tierra…”, un “rock ellaboráu, melódicu, sentíu… ” sigún la promoción que la so discográfica vieno faciendo estos díes. Amás, los asturianos yá tienen cerraes les diez primeres feches de la xira 2015. La fuerza del so directu va faer escala en sales de tola Península y en festivales como la Viña Rock.