Mundu

Depués de dos xornaes de trabayu, y cola participación de les autoridaes de Derechos Humanos nacionales, provinciales y de la Ciudá de Bonos Aires de too el país, remató güei la XXI Xunta del Conseyu Federal de Derechos Humanos, realizada na ciudá de Salta Capital. El zarru de l’actividá tuvo a cargu del secretariu executivu del Conseyu Federal, Agustín Di Toffino, quien sostuvo que “tolo que llogremos nun depende d’un presidente, sinón de los 40 millones d’arxentinos. Esa ye la razón de ser por que podamos construyir ente toos esa cultura política de plena vixencia de los derechos humanos”.

Nesti sentíu amestó: “Nós dende acá apurrimos el nuesu granín d’arena, siempres con conciencia militante de que ye fundamental los derechos humanos pa consolidar los suaños de los 30 mil compañeros deteníos sumíos y tolos que dieron la so vida per un país meyor”.

La xornada inicial cuntara cola presencia del gobernador de la provincia de Salta, Juan Manuel Urtubey, quien aseguró que “esti eventu ye bien importante pa los salteños, p’aldericar polítiques públiques que vaigan más allá de la mirada parcial que podamos tener nel nuesu exerciciu cotidianu, tener una visión panorámica y alvertir qué tamos faciendo”. Coles mesmes espresó que: “En salta, esa tutela de los derechos humanos esenciales ta bien llueñe de tar concluyida. Por eso valoramos que tean güei acá, porque avancemos enforma nesta década, y güei l’estragal d’esixencia del ciudadanu ye cada vez más altu. Quier dicir que superemos valles qu’antes paecíen insuperables”.

“La puerta del ánxel” presenta testos, dibuxos y material audiovisual

L’artista blimeína Marián González Fanjul presenta una nueva esposición na Casona del Bravial de Blimea. Tres años dempués de les sos anteriores muestres “Puente sobre Estigia” y “El suañu del unicorniu”, llega “La puerta del ánxel”, una esposición na qu’a traviés d’una serie de testos, dibuxos y material audiovisual, vuelve a tresportanos a un mundu d’opuestos, onde la lluz y la escuridá y el bien y el mal s’entemecen pa facenos reflexonar sobre la nuestra propia esistencia.

El filu argumental d’esta muestra ye la historia d’un ánxel qu’abandona’l paraísu, plantegándonos asina d’un mou metafóricu les consecuencies que tienen na nuestra vida les decisiones equivocaes.

La esposición va poder visitase a partir del martes 14 de xunetu na Casona del Bravial de Blimea, de llunes a vienres n’horariu de 9 a 13 hores.

Sedrá del 17 al 19 d’esti mes de xunetu

Como cada branu, dende l’añu 1997, y del vienres 17 de xunetu al domingu 19 nesti 2015, vien entamándose el Festival de Gaites Villa de Candás, nel que miles de persones procedentes de toa Europa aconceyen pa ufrir al públicu candansín y asturianu lo qu’una variada representación de les meyores bandes de gaites de tol mundu celta presenta. Esti añu les bandes paryicipantes, amás de la convocante, van ser la Banda Gaites Villa de Xixón (Asturies), la Banda de Gaitas Xarabal (Galicia), la Banda Gaites Lakadarma (Asturies), la Bagad Sonerien Bro Dreger (Breizh), la Banda Gaites Candás (Asturies) y la Bandina d’ escolinos de la Banda Gaites Candás (Asturies). Xunta elles artistes como l’arpista Camile Levecque, N’Arba y Borja Baragaño Trío.

El Festival de Bandes de Gaites de la villa, fiesta declaráu d’interés turísticu rexonal, entamáu pela Banda de Gaites Candás, va xuntar esti 2015 bandes de gaites de Galicia, Asturies y Bretaña y acoyer el segundu concursu de pareyes de gaita y tambor Villa de Candás y el segundu concursu de cuerpos de percusión de Candás.

Dende’l vienres hasta’l domingu, va haber conciertos, actuaciones y pasacalles pola villa marinera y el sábadu tolos grupu van axuntase como fain cada añu nel Parque.

La Banda Gaites Candás naz nel añu 1989 dedicada al estudiu y promoción de la música y cultura asturianes, ta formada na actualidá por más de venti músicos, siendo Velu Muñiz el so director y Manuel Corderu’l responsable de la percusión. Cunta amás con una Escuela de Música Tradicional na que participen alredor de 50 escolinos, repartíos ente clases de gaita y percusión (caxa, bombu, tenores…). El repertoriu de la banda organizadora d’esti Festival componse d’adaptaciones armonizaes de temes tradicionales asturianos, incorporando tamién dalgunos d’otres cultures del Arcu Atlánticu, solos de percusión y composiciones orixinales.

Ente los invitaos ya invitaes d’esti añu destaca l’arpista Camile Levecque, Llicenciada en Música, cola mayor distinción na especialidá d’ arpa., que tien, amás, el títulu de Concertista de la Musikhochschule de Würzburg (Alemaña), que llogró dientro de la clase d’arpa de Gisèle Herbert, una de les más grandes embaxadores de la escuela francesa d’arpa.

Xunta ella va actuar N’arba, que surde nel añu 1997 y ye un de los grupos folk asturianos más potentes de tolos tiempos, con una propuesta de reellaboración de la música tradicional, faciendo mezcla de folk acústicu con otros soníos de distintu orixe. Anque anguaño’l grupu nun ta n’activu, suelen xuntase pa tocar de manera puntual, n’ocasiones especiales, como ye’l casu del Festival de Bandes de Gaites “Villa de Candás”.

Y pa finar, va tar la formación compuesta por Borja Baragaño, Rubén Bada y Dolfu R. qu’ufierta música folk variada y calidable basada nos temes del últimu trabayu de Baragaño, “Onde yo me pueda dir”, qu’entemez temes asturianos, irlandeses, bretones, suecos y búlgaros, asina como composiciones propies y nel que collaboraron grandes músicos asturianos.

Más información

La Caxa Rural d’Asturies va entamar esti sábadu 20 de xunu na Ilesia de San Antonio en L’Infiestu a les 20,30 hores un ciclu de conciertos de grupos corales asturianos que va desenvolveses hasta’l 4 del mes de xunetu en dellos otros conceyos d’Asturies como Llanes, Pravia y Navia cuntando cola participación d’una docena de Corales de tol país. El conciertu d’esti sábadu va cuntar col Coro Santa María de Lieres, el Errante de la Comarca de la Sidra y la Polifónica Piloñesa.

El siguiente conciertu va ser na Basílica de Santa María de Llanes el 2 de xunetu a les 20,15 hores cola participación del Coro Peña Santa de Cangues d’Onis, la Coral Cima de Parres y el Coro Reconquista.

la Coral Polifónica Santiago López de Pravia, el Coro Mixto San Pedro de Cuideiru y la Coran de Muyeres de San Esteban, conformen la programación del conciertu que va celebrase na Casa de la Cultura de Pravia’l 3 de xunetu a les 20 hores. Y al día siguiente, el 4 de xunetu, va pesllase’l ciclu a les 20,30 hores na Ilesia de la Barca en Navia cola Coral Villa de Boal, el Coro Villa de Navia y Iuvena Coro mozu del COAS.

Esti ciclu de conciertos corales prográmase en coincidiendo coles celebraciones del 50 aiversariu de la Caxa Rural d’Asturies.