Mocedá

La escuela d’animación Brinco va dar un Cursu de Monitor de Tiempu Llibre que va entamar el 23 d’avientu n’Uviéu, faciendo una parte de les hores de manera intensiva demientres les vacaciones de Navidá. El cursu va estendese hasta febreru pa la carga llectiva y hasta Selmana Santa pa la realización de les práctiques. El preciu del cursu son 100 euros, teniendo que se mandar un corréu a youropia@gmail.com p’apuntase.

Más información

El programa “Espaciu Xoven”, promovíu pol Conceyu de Llanes, abrió de nuevu les sos puertes nel tercer pisu del Casinu de Llanes, hasta’l mes de xunu de 2011. Esti programa ufre un espaciu d’alcuentru, xunta y desenvolvimientu d’actividaes pa moces ente 14 y 25 años toles tarde-nueches de los vienres, sábados y domingos.

Los vienres y sábados a partir de los siete de la tarde desenvuélvense talleres: pulseres d’argolles, aniellos de lates, cocina, tornéu de ping-pong, pintura, llaveros con abalorios… etc. y los domingos, cine.

Pa más información pue llamase a la Oficina d’Información Xuvenil de Llanes, nel teléfonu 985 400 991, o escribir a oijllanes@concejosdeloriente.com

Una resolución del Conseyu de la Mocedá del Principáu d’Asturies (CMPA), presentada por Fai!, organización d’esquierda independentista, foi aprobada, declarándose’l CMPA como antitaurín y poro, “d’equí n’alantre, entidá que sofite toles actividaes que se desendolquen p’algamar una Asturies llibre de tortura animal en toles estayes”, afirmen dende Fai!.

Dende Fai! feliciten a l’Asamblea del Conseyu de la Mocedá por da-y’l preste a la so propuesta, que vien énte una votación que va desendolcase nel Parllamentu Asturianu pa facer d’Asturies “un país ensin tortures a los animales nin imposición cultural españolista”.

Testu íntegru de la resolución:

Propuesta de Resolución sobre la defensa de los drechos de los animales

Los animales foron consideraos, fasta agora, como oxetos y xuguetes, negándo-yos cualesquier asemeyu con nós. Esto débese al nuesu “facismu” d’especie, qu’entiende al ser humanu en guerra permanente d’esplotación y esterminiu sobro’l restu de los seres vivos, tornándolos n’inferiores a nós y representándolos como seres que nun carecen dolor y sufrimientu.

Los seres vivos que nos acompanguen na nuesa aventura, nel planeta Tierra, tienen drechu a esistir y a facelo dignamente. La crisis ecolóxica amosónos hasta qué nivel la coesistencia solidaria de toles especies ye un requisitu fundamental pa la nuesa sobrevivencia propia, n’armonía. Ye la separtación radical ente seres humanos y animales lo que nos llevó a la cai ensin salida del cambéu climáticu, la estinción masiva d’especies o la destrucción xabaz de biesques y espacios naturales.

Asturies ye un espaciu privilexáu na península onde’l ser humanu tuvo ciertu respetu pa colos animales. La ganadería foi símbolu de riqueza, na que los/es ganaderos/es siempre tuvieron especial curiáu colos animales, formando parte de la cultura ya identidá del nuesu País.

La gran diferencia qu’introduz el reconocimientu de los drechos de los animales, respeuto a la llucha común polos drechos humanos, ye qu’amplía la nuesa comunidá moral y xenera una nueva fraternidá, diendo más alló de les llendes de la nuesa especie. Esti ye’l retu nuevu que debemos encarar.

Una nueva fraternidá ye necesaria p’abordar los retos de la sociedá del futuru. Y, nesa nueva fraternidá globalizao, el respetu y reconocimientu de los drechos de los animales ha xugar un papel central. La introducción de los seres vivos na comunidá moral de los drechos supón un signu más de civilización, siguiendo la tendencia a espandir el núcleu orixinal de los drechos. Munchos nun atalanten esta propuesta, pero tamién munchos nun pescancien a los abolicionistes de la esclavitú, o a les sufraxistes del movimientu feminista.

Tanto n’Asturies y como nel Estáu español, el vacíu llegal nel reconocimientu de los drechos de los animales ye tan ampliu como’l conxuntu de práutiques rituales ya industriales qu’impliquen muerte, tortura o maltratu animal.

Poro, l’Asamblea del CMPA alcuerda:

−Desixir al Gobiernu Asturianu que se promuevan los cambéos llexislativos precisos a nivel d’Asturies pa declarar a Asturies como país antitaurín: asina mesmo pa dexar de considerar como oxetos o xuguetes a los animales n’espectáculos, circos o otros actos nos que s’humilde o discrimine al animal.

−Que dende’l CMPA se sofite y se participe activamente nes actividaes y/o plataformes promocionaes pola sociedá civil que tenga como oxetivos algamar los cambéos presentaos nel puntu anterior.

El cursu ta dirixíu a mozos polo xeneral, trabayadores nel ámbitu de mocedá y llíderes d’asociaciones xuveniles que tengan interés en desenrrollar proyectos dientro del programa “Mocedá n’Acción”.

Los costos del cursu (inscripción, material, mantención y agospiamientu) cuerren al cargu de “Mocedá n’Acción” y del Institutu Asturianu de la Mocedá. Los gastos de desplazamientu d’incorporación y regresu van correr al cargu de los participantes.

Va facese del 15 al 20 de payares na Residencia Xuvenil “Ramón Menéndez Pidal”, d’Uviéu, pudiendo inscribise los interesaos hasta’l 29 d’ochobre nel Institutu Asturianu de la Mocedá, nel corréu cursos@juventudasturias.org o nel teléfonu 985 10 67 44.

L’Asociación Abierto hasta el Amanecer (AHA) presentó la 19ª Edición del Programa d’Ociu Nocherniegu que va dar empiezu’l vienres 22 d’ochobre na so primer fase. El programa, que ta dirixíu a mozos ente 13 y 35 años, va llevar a cabu talleres culturales y torneos deportivos demientres ocho fines de selmana.

Demientres estos dos primeros meses, l’Asociación va abrir hasta quince instalaciones públiques distintes repartíes pelos barrios d’El Llano, L’Arena y La Calzada, ufiertando cuasi 100 actividaes distintes nes que participar de baldre. Dalgunes d’eses actividaes yá se convirtieron en clásicos como los talleres de cueru, guitarra, cocina o bailles, que se combinen con nueves alternatives como’l fitball, look Pin Up, cocina low cost, ensayamientu canín o defensa personal femenina, ente otres munches ufiertes.

Nesta ocasión, AHA trata de potenciar especialmente la práctica deportiva ente les moces al traviés del Programa Special-D, qu’ufierta actividaes como fútbol, balonmano o cuerda n’equipu, ente otros. La pasada edición, les actividaes deportives del Programa rexistraron 20.331 participantes de los qu’un 3,67 por cientu fueron muyeres, cifra ésta qu’agora se trata d’aumentar col citáu programa especial, impulsáu tamién pola Oficina de Polítiques d’Igualdá del Conceyu de Xixón.

Otra de les actividaes que se destacar na 19ª Edición del Programa d’Ociu Nocherniegu ye la celebración del VII Cursu gratuitu de dinamizadores que se lleva a cabu coles mires de dotar de ferramientes a moces de Xixón d’ente 16 y 21 años pa qu’intervengan na so comunidá col colectivu qu’ellos decidan.

Páxina d’Abierto hasta el Amanecer

El CMU organiza un cursu de llingua asturiana dientro del so V Plan Formativu, como continuación del so “apoyu a la difusión y normalización de la llingua asturiana” qu’afirmen “vien siendo una constante nel CMU dende la so creación”. Esti cursu básicu de llingua asturiana quier sirvir pa introducir rapazos nel conocimientu del idioma, pero tamién, pa dar a les entidaes y a la mocedá ferramientes y recursos pa que de motu proprio puean afondar nel conocimientu del asturianu. El cursu emprincipia’l martes 19 d’ochobre y acaba’l 23 de payares, con una duración de 20 hores; celebrándose martes y xueves de seis a ocho de la tarde.

El cursu va celebrase nel Conseyu de la Mocedá del Principáu d’Asturies, na Plaza’l Sol 4-6, Uviéu. Xunta Moza, Conseyu de la Mocedá del Principáu d’Asturies, Conceyu d’Uviéu, Cajastur y l’Institutu Asturianu de la Mocedá collaboren cola so realización.

La inscripción tien de facese nel Conseyu de la Mocedá d’Uviéu, asitiáu na Plaza Llagu Enol e/n de la capital del país; nel teléfonu 985 11 69 65, nel fax 985 28 05 14 o nel corréu lletrónicu coordinadora@cmu.as hasta’l día 14 d’ochobre, comunicándose’l día 15 d’ochobre la disponibilidá de plaza.

Dende Xuventú Asturianista, mocedá del Partíu Asturianista (PAS), aplauden “la perbona iniciativa celebrada la fin de selmana en Ribeseya, la “Primer Xuntanza de Músikos Ástures”

Xuventú Asturianista dio anuncia de la satisfacción pola celebración d’esti eventu que, declraron “esperamos que tenga continuidá nos próximos años, pola necesidá de producción de música asturiana”. Xuventú Asturianista sofita la creación d’esti tipu d’eventos “como muestra de la voluntá de la mocedá asturiana de desmarcáse de la voluntá antiasturiana del Gobiernu del PSOE-IU n’Asturies”.

“Énte la institucionalización del insultu y del despreciu escontra la cultura, la llingua y la música de la nuesa Patria qu’implicaba la programación gubernamental pal 8 de setiembre”, comenten “yera necesaria una respuesta ciudadana, y húbola, y precisamente dende la mocedá, que ye o tien de ser el sector más dinámicu y renovador de tou País qu’aspire a tener un futuru como tal”.

Al respective de la política cultural del Gobiernu, señalen “qu’una vegada más se volvió a poner de manifiestu la esencia colonialista del PSOE: la eliminación, desfiguración y marxinación de tolos elementos que constituin la identidá nacional del pueblu asturianu”.

Dende Xuventú Asturianista, consideren que la revitalización de la “cultura y llingua nacionales ye insepartable de la rexeneración cultural y política d’Asturies, apostamos pola autoorganización de la mocedá asturiana como vía imprescindible pa la reconstrucción d’una autentica sociedá civil n’Asturies”. Nun quda otra pa la Xuventú qu’empecipiar “un procesu de reconstrucción nacional col oxetivu final d’una Asturies asturiana, asturfalante y reunificada, o sumímonos como pueblu, pa quedar amenorgaos como una simple colonia xestionada por caciques”.

Xuventú Asturianista (organización moza del Partíu Asturianista – PAS) anima a los asturianos “a mostrar la so nacionalidá colgando la bandera d’Asturies nes ventanes y balcones”. Amás llama “a la reflexión de la sociedá asturiana y n’especial a la de los más mozos pa que recapaciten y que sean conscientes de la importancia de qu’Asturies cuente con un partíu que represente Asturies, más cuando hai unes elecciones nes que podemos camudar la murnia situación política na que s’alcuentra Asturies”.

L’asturianismu ye pa XA “agora más necesariu que nunca y además en tolos aspectos tanto sociales, políticos, económicos y culturales”.

Dende Xuventú Asturianista animen a la xente “a amosar la so asturianidá, el día de la so patri-a, del so país, del so pueblu colgando banderes de les ventanes y balcones al igual que se fai n’otres ocasiones con otres banderes cuando un equipu gana un tornéu o una competición.

El colectivu mozu del PAS esixe la retirada de la “penosa programación antiasturiana”, que’l Gobiernu d’Asturies tien preparada pa les actividades institucionales del Día de la Nación Asturianista. XA camienta que los artistes programos “nun tienen nada que ver cola cultura d’Asturies”, y califiquen los conciertos como “una programación más típica pa una Feria d’Abril o pa cualquier pueblu d’Andalucía”.

Pa Xuventú Asturianista ye clara evidencia “la vocación españolista, flamenquista y la intención de lliquidar cualquier rastru d’apueste polos músicos y cantantes asturianos por parte d’esti Gobiernu de xenocides culturales”.

Asturies ye a día de güei, recuerdende dende XA- un fervedoriu de músicos y artistes (dende monologüistes, cantantes n’asturianu o castellán y gaiteros) “que nun se ta aprovechando, como ye habitual na política asturiana con otros aspectos”.

Ye por ello que esixen “una programación netamente asturiana pal Día d’Asturies y la potenciación de la cultura asturiana y los artistes asturianos”.

El paséu de la Playa Poniente ye’l llugar escoyíu pa la celebración de la Fiesta de les Asociaciones, qu’organiza’l Conseyu de Mocedá de Xixón.

Güei, vienres, entama’l día con talleres infantiles dende les doce la mañana. A la una, fállase na Fiesta’l Premiu Astragal 2010. De 17.30 a 18.30 hores, cuentacuentos de l’Asociación Xuvenil Esnala: y a les seis, doble actividá: gymkhana de xuegos tradicionales de Cruz Encarnada Mocedá; y una mesa redonda sobre L’Internacionalismu: Sah.ara – Colombia – Hondures. A les siete la tarde, exhibición de Caxón Flamencu de l’Asociación Xitana de Xixón, nel escenariu secundariu, y yá a partir de les ocho y media, conciertu de L.G.D.C y TONE; y a les diez y media, Latex Diamond.

El sábadu, 24 de xunetu, a les doce celébrase una caravana del reciclaxe de Cogersa y el xuegu “La Máquina del Reciclaxe”. A les cinco, desfile de perros ensin llar. Media hora más tarde, a les 17.30, sesión de cuentacuentos de l’Asociación Xuvenil Esnala, como cada xornada. A les siete, mesa redonda sobre los problemes de Gaza; y l’acción antimilitarista “Nun ye lo mesmo”, de la Coordinadora de ONGD d’Asturies. Pela nueche, conciertu de La Tarrancha y Dixebra.

La xornada cabera de la sesta Fiesta va entamar a la hora de siempres, con Animación Manumanué. A les 12.00 hores va celebrase un Tornéu de Liriu d’esquierda soberanista>fai! y pol CNL (Conceyu Nacional de Liriu) y d’Espor[a]. A la una, charra sobre la toponimia de Xunta Moza. A la una y media, repártense bollos preñaos y sidra.

Pela tarde vuelven los cuentacuentos d’Esnala 13.30, y de seis a ocho, Xuegos Tradicionales Asturianos d’El Garrapiellu. Na mesa redonda del día, que se celebra a les seis y media, va falase de Drechos Humanos “Los 5”. Cuba. Termina’l día y la sesta Fiesta, col espectáculo d’animación “L’Encantador de culiebres” por Manumanué, la entrega de premios de les actividaes deportives y una folixa cubana, a les ocho.