Lliteratura

Esti 30 d’ochobre preséntase en La Bañeza, Lleón, el llibru “Se lo dije a la noche”. Sedrá de magar les ocho la tarde na Biblioteca Pública del Conceyu, nel 19 de la cai Padre Miguélez.

Tres l’obligáu parón branizu, el proyectu poéticu-llingüísticu ibéricu “Se lo dije a la noche”, obra del poeta Juan Carlos García Hoyuelos, retoma na estrenada seronda’l so percorríu a lo llargo de la xeografía ibérica, siendo la ciudá lleonesa de La Bañeza la primera en ser visitada.

Al igual qu’asocediera con otres presentaciones, el poeta va tar acompañáu por dellos collaboradores del poemariu, como son la escritora Ara Antón, que va recitar en castellán, ente que na variedá lleonesa del asturianu van ser Charo Martínez Domínguez, escritora y Presidenta de l’Asociación “L’Alderique pal estudiu y desendolque la Llingua Llïonesa”, y Alicia Valmaseda Merín, coordinadora de ComunidadLeonesa.es

Amenizará la velada’l grupu folk Tarna, que participó nel dvd qu’acompaña al poemariu “Dicir a la nueche” col cantar “Creciénonnos tantu las alas”.

Pola mor del centenariu del ñacimientu de la filóloga y escritora María Xosefa Canellada, el Conceyu de Cabranes, en collaboración col Seminariu de Filoloxía Asturiana de la Universidá d’Uviéu, organiza unes conferencies na Casa la Cultura-Centru de Llectura de Santolaya (Cabranes).

Esti vienres, 26 d’ochobre a les 19,30 hores, el profesor de la Universidá d’Uviéu, Ramón d’Andrés dará llectura a la conferencia “Lo que pensaba María Xosefa Canellada de la normalización del asturianu”.

Les xornaes van rematar el miércoles 31 d’ochobre a les 19,30 hores con “Obra lliteraria de María Xosefa Canellada: la ética nel canon lliterariu”, por Pilar Fernández, profesora del Institutu “Pérez de Ayala” d’Uviéu.

La entrada a toes elles ye llibre.

El dia 25 d’ochobre, a les 19.00 hores, va tener llugar nel Atenéu de Turón un Alcuentru col escritor Xulio Arbesú, que vien a falar de la so novela “Potestas”.

Pueden presentase orixinales a esti concursu hasta’l 24 d’ochobre de 2012. El concursu tien dos categoríes, microrrellatos y haikus, pudiendo presentase obres n’asturianu o en castellán. Les bases completes pueden consultase na páxina web de la Conceyalía de Cultura de Xixón.

Bases completes del concursu

Pola mor del centenariu del ñacimientu de la filóloga y escritora María Xosefa Canellada, el Conceyu de Cabranes, en collaboración col Seminariu de Filoloxía Asturiana de la Universidá d’Uviéu, organiza unes conferencies na Casa la Cultura-Centru de Llectura de Santolaya (Cabranes).

Xulio Viejo Fernández, profesor de la Universidá d’Uviéu y miembru del Seminariu de Filoloxía Asturiana va falar esti vienres día 19 d’ochobre a les 19,30 hores de l’autora, na conferencia titulada “María Xosefa Canellada: investigación y compromisu”.

El vienres que vien, 26 d’ochobre a les 19,30 hores, el profesor de la Universidá d’Uviéu, Ramón d’Andrés dará llectura a la conferencia “Lo que pensaba María Xosefa Canellada de la normalización del asturianu”.

Les xornaes van rematar el miércoles 31 d’ochobre a les 19,30 hores con “Obra lliteraria de María Xosefa Canellada: la ética nel canon lliterariu”, por Pilar Fernández, profesora del Institutu “Pérez de Ayala” d’Uviéu.

La entrada a toes elles ye llibre.

Acaba de convocase’l Premio Xeira de narracióis curtias en gallego-asturiano na so XXII edición. El premiu al rellatu ganador ye de 600 euros. Xeira, como siempres, fai un llamáu a participar a tola xente interesao na construcción de la lliteratura en gallego-asturianu. El plazu pa presentase acaba’l día 26 d’ochobre del 2012. El tema ye llibre, teniendo que s’axustar los rellatos a les Normas ortográficas del gallego-asturiano (2007).

Xeira va espublizar el rellatu ganador, asina como otros que-y paezan d’interés al xuráu. Los rellatos han mandase con cuatro copies a Xeira (Apartáu de Correos 5, A Caridá – El Franco), nun sobre ensin remite. Dientro del sobre ha dir otru, zarráu, coles señes del autor.

La cabeza del conceyu d’El Franco, A Caridá, va acoyer los díes 19 y 20 d’ochobre les Terceiras Sesióis d’Estudio del Occidente, un alcuentru pa falar de la llingua y lliteratura d’Entrambasaguas, dende estremaos campos d’estudiu: la música, les nueves tecnoloxíes, la etnografía, la filoloxía… L’entamu va ser el vienres 19 a les cinco y media la tarde, cuntando con José A. Fernández Vior pa falar d’“A composición como mecanismo expresivo”, Ángel Fernández pa falar de molinos y otros inxenios hidráulicos n’El Franco, Ricardo Saavedra pa falar de la lliteratura na música n’eonaviegu, Xosé Antón González Riaño pa comentar delles cuestiones alredor de la escolarización da fala nesta fastera d’Asturies, rematando con una mesa redonda dedicada a la “Normalización socieducativa da fala eonaviega” moderada por Iván Iglesias “Cazarón”.

El sábadu abre les sesiones Xosé Lluis García Arias, falando de testos medievales de la fastera eonaviega. María José Fraga dedicará la so conferencia a falar de poesía eonaviega, mientres que Benxamín Méndez va dedicar la so ponencia a “Sistema d’Información Xeográfica y continuum llingüístico: úa proposta metodolóxica”.

Ruth González falará d’“A identidá eonaviega a través da súa lliteratura” y Marisa López Diz zarrará la mañana moderando una mesa sobre “Lliteratura y llingua”. Darréu va celebrase una visitada guiada al taller d’Herminio Álvarez.

Yá pela tarde Ágata García Castro va falar d’“A fala na rede”, mientres que Pablo Texón echará una güeyada a la poesía contemporánea n’eonaviegu. Aurora Bermúdez va facer un repás a la infantil y xuvenil. Zárrense les Sesióis con una mesa redonda sobre “A música na fala”, na que van participar músicos como Ambás, Marisa López Diz, Andrés Rodríguez Moteavaro y Ángel Berdiales. Les Sesióis acabarán con un conciertu de Mestura.

Programa completu d’actividaes de les Xornaes

El Club de Prensa de La Nueva España de Xixón, allugáu na plaza del Monte de Piedá númberu 2, va acoyer esti xueves 18 d’ochobre a les ocho la tarde la presentación de la torna al castellán de la obra cola que Javier Cubero algamó nel añu 2009 el Premiu Fierro Botas d’ensayu y trabayos d’investigación del Conceyu de Xixón: “Del Romanticismu al Rexonalismu. Escritores carlistes na lliteratura asturiana”. Nel actu van intervenir l’autor y l’hestoriador Faustino Zapico. El llibru asoléyalu la editorial Espublizastur.

«[…] (e)l repasu de Cubero al carlismu y al asturianismu (enllenu de datos y noticies nueves y de xuicios novedosos) tien nel llibru’l propósitu de pone-y marcu a un tema principal de calter lliterariu: trátase de reivindicar la pertenencia carlista –en graos estremaos de compromisu sigún época y persona– de cuatro conocíos escritores de les lletres asturianes, que son Xuan M.ª Acebal, Manuel Fernández de Castro, Enrique García-Rendueles y Fernán-Coronas, el padre Galo Fernández. […] El plantegamientu de Cubero tien muncho interés na medía en que sorraya n’Asturies el conteníu tradicional-rexonalista del carlismu a la escontra del tirón centraliegu lliberal –más allá de la llucha dinástica y de la cuestión relixosa– y amuesa les distintes postures énte’l mitu cuadonguista, que por mor d’un arcu llargu de motivaciones nun diba ser superáu hasta los tiempos de Conceyu Bable».

Javier Cubero de Vicente nació na ciudá de Xixón nel añu 1986. Siendo estudiante d’Hestoria foi representante d’alumnos na Comisión de Cultura de la Facultá de Xeografía y Historia d’Uviéu. Militante del movimientu de reivindicación llingüística dende l’añu 2004, anguaño ye presidente del Atenéu Cultural Xuan María Acebal y forma parte de la Xunta Directiva del Conceyu Universitariu Pol Asturianu (CUPA). Tamién ye directivu de l’Asociación Cultural La Brisa de Japón.

Pola mor del centenariu del ñacimientu de la filóloga y escritora María Xosefa Canellada, el Conceyu de Cabranes, en collaboración col Seminariu de Filoloxía Asturiana de la Universidá d’Uviéu, organiza unes conferencies na Casa la Cultura-Centru de Llectura de Santolaya (Cabranes). Los actovs van entamar el vienres 19 d’ochobre.

Xulio Viejo Fernández, profesor de la Universidá d’Uviéu y miembru del Seminariu de Filoloxía Asturiana va falar el vienres día 19 d’ochobre a les 19,30 hores de l’autora, na conferencia titulada “María Xosefa Canellada: investigación y compromisu”.

El vienres siguiente, 26 d’ochobre a les 19,30 hores, el profesor de la Universidá d’Uviéu, Ramón d’Andrés dará llectura a la conferencia “Lo que pensaba María Xosefa Canellada de la normalización del asturianu”.

Les xornaes van rematar el miércoles 31 d’ochobre a les 19,30 hores con “Obra lliteraria de María Xosefa Canellada: la ética nel canon lliterariu”, por Pilar Fernández, profesora del Institutu “Pérez de Ayala” d’Uviéu.

La entrada a toes elles ye llibre.

La Universidá d’Uviéu ta acabante poner en llínia la tesis doctoral de Xuan Santori Vázquez, titulada “El papel de los escritores del Surdimientu na recuperación del asturianu: la visión del escritor” y dirixida pol Dr. Ramón d’Andrés. Trátase d’una tesis redactada n’asturianu y que pudo facer tolos trámites dende l’aniciu y per primer vegada, dafechu n’asturianu, gracies al reglamentu nuevu de doctoráu. La calificación de la tesis doctoral foi de Sobresaliente “Cum Laude”.

La investigación de Xuan Santori Vázquez (filólogu y escritor) refierse a la influencia de los escritores n’asturianu nel movimientu lliterariu y sociocultural llamáu Surdimientu, qu’entamó nel añu 1974 y llega hasta güei. Esta influencia estúdiala Xuan Santori al traviés de la percepción de los propios escritores, gracies a los datos llograos nuna macroencuesta fecha a prácticamente tolos escritores n’asturianu. La gran cantidá de datos estadísticos permiten facer un retratu escepcional de les interioridaes y característiques del mundu lliterariu asturianu nos últimos 30 años.

Amás, la editorial Trabe prepara una edición en papel de la mesma.

Descargar la tesis de Santori