Lliteratura

L’escritor cangués Xabiero Cayarga algamó’l Premiu Críticu de les Lletres Asturianes, na estaya de narrativa, pola obra “El sol negru de Wewelsburg” qu’espublizó Ediciones Trabe, dientro de la colección Incla interior. El xuráu que taba formáu por Eloy Antuña, Pablo Suárez y Inaciu Llope alcordó, por unanimidá, conceder el premiu a esta obra de la que descaten l’usu depuráu del llinguaxe y l’equilibriu de la so prosa. Nestos mesmo premios, Cayarga fízose col primer premiu na estaya de poesía pol llibru La ñeve del cuquiellu, que foi tamién Meyor Llibru n’Asturianu del Añu, según la Tertulia lliteraria Malory.

N’El sol negru de Wewelsburg, Cayarga introduz al llector, dende la perspectiva d’un emigrante asturianu, nel contestu de les derivaciones neonazis de la clase obrera alemana, que lleven al protagonista a implicase nun grupúsculu d’activistes violentos y apoderaos de la mística ocultista al rodiu de la supuesta raza aria.

Xabiero Cayarga (Cangues d’Onís, 1967) ye llicenciáu en Filoloxía Inglesa y anguaño trabaya como profesor d’español n’Alemaña. Estrénase nel mundu de les lletres en 1994 cola novela El boleru de Xabel -Premiu de Narraciones de l’Academia de la Llingua Asturiana- y ye autor de dellos llibros de cuentos: Les gatileres del cielu (1994), Güelgues sobre’l llagu (1996) y A flor de piel (2000). Nel añu 2000 publica el so primer poemariu El deliriu d’esclavu, y tres d’él, Pequeña Europa, conxuntu de poemes col qu’algama’l X Premiu Teodoro Cuesta. Cinco años más tarde va ganar el prestixosu Premiu Xuan María Acebal col poemariu Les llingües de la Hidra, al que sigue, yá nel 2006, la novela Trastes de Bufanda. Nel añu 2011 publica dos obres: el poemariu La ñeve del cuquiellu, Premiu Críticu de les Lletres Asturianes de poesía y Meyor Llibru n’Asturianu del Añu -concedíu pola Tertulia lliteraria Malory-; y la novela El sol negru de Wewelsburg, ganadora del Premiu Críticu de les Lletres Asturianes. Estos Premios que convoca la Xunta pola Defensa de la Llingua Asturiana quieren valir pa reconocer y reivindicar el bon facer de los y les escritores n’asturianu y gallego-asturianu, asina como la calidá de les sos obres, y son una reacción positiva a la decisión de l’Asociación d’Escritores d’Asturies de nun convocar anguaño nos sos premios les categoríes pa los idiomes autóctonos.

La entrega de Premios va facese’l vienres 30 de payares, a les 19:30 hores, na galería d’arte Texu, na cai el Postigo 13 d’Uviéu. Tres la entrega de gallardones, va convidase a los presentes a vinu de Cangas L.lumés y quesu afuega’l pitu Cá Sanchu.

Esti sábadu, a les ocho la tarde, nel chigre IPA la cerverceria del millón d’Ibus (asitiada nel 7 de la cai Rufo Rendueles, El Muro, de Xixón), Iniciativa pol Asturianu organiza la presentación de “Se lo dije a la noche / Díxi-ylo a la nueche”. Un llibru-dvd del escritor castellanu Juan Carlos García Hoyuelos, con poemes tornaos a toles llingües de la Península. Nel actu van participar escritores y artistes asturianos y lleoneses, cuntando tamién cola actuación de la cantadora de tonada Anabel Santiago.

Ente les persones participantes nel actu, que va cuntar con llectura de poesíes del llibru y una amuesa de los audiovisuales del dvd que lu acompaña, Javier Cayado, Roberto González-Quevedo, María Díaz Suárez, Alex Ordiales, Vítor Suárez, Denis Soria, Charo Martínez Domínguez, Javier Cubero, Alicia Valmaseda Merino o Rubén d’Areñes.

Dalgunos de los paticipantes van venir d’otres zones del dominiu llingüísticu del asturianu o asturlleonés, conviertiendo l’actu nun alcuentru de xermandía ente falantes d’una mesma llingua a un llau y otru del Cordal.

El 30% de les ventes del llibru demientres l’actu van ser donaes pa l’actividá d’Iniciativa pol Asturianu. La organización convida a dir y “tomar cerveza etiquetao n’asturianu y a esfrutar de la música y la lliteratura, a partir de les ocho la tarde”. Habrá un puestu informativu d’Iniciativa pol Asturianu.

L’hestoriador xixonés Pablo Rodríguez Alonso algamó’l Premiu Críticu de les Lletres Asturianes na categoría d’ensayu pola obra «De totalitarios a demócrates. Franquismu, fascismu y nazismu na II Guerra Mundial al traviés del diariu xixonés Voluntad» qu’espublizara nel 2011 Zahorí Ediciones. Esta obra, que yá algamara’l XII Premiu d’ investigación y divulgación «Rosario de Acuña», estudia cómo’l diariu xixonés Voluntad, creáu en 1937 como mediu d’espresión de Falanxe, empondera’l totalitarismu nazi y fascista y, per otra parte, denuncia les democracies y les llibertaes. Sicasí, el periódicu xixonés va dir cambiando esti discursu al empar que cambia l’escenariu internacional, marcáu pola derrota d’Alemaña, Italia y Xapón na Segunda Guerra Mundial. Asina, Pablo Rodríguez Alonso fai un analís pormenorizáu del posicionamientu ideolóxicu de Voluntad ente los años 1938 y 1946 y de cómo quixeron pasar de «totalitarios» a «demócrates».

El xuráu del Premiu, formáu por Rafael R. Valdés, Antón García y Xuan Xosé Sánchez Vicente, decidió por unanimidá conceder el premiu a esta obra pola so contribución a los estudios históricos, de la que destacaron el rigor nel tratamientu de la información y el so bon facer metodolóxicu, abordando cuestiones históriques internacionales al traviés del estudiu de lo local.

Pablo Rodríguez Alonso (Xixón, 1979), ye llicenciáu n’Historia pola Universidá d’Uviéu. Tien publicao los artículos «El nacionalismo bretón desde 1945 a la actualidad» na obra recopilatoria de les I Xornaes d’Historia Contemporánea y «La nacionalización llingüística nos Estaos-nación: l’exemplu español» nel llibru Teoría e historia de los nacionalismos contemporáneos, dambos editaos pola Facultá d’Historia de la universidá asturiana. Asinamesmo tien editáu’l poemariu La lluz del Nordés (Trabe, 2006), ganador del XV Premiu Teodoro Cuesta de Poesía.

Estos Premios que convoca la Xunta pola Defensa de la Llingua Asturiana quieren valir pa reconocer y reivindicar el bon facer de los y les escritores n’asturianu y gallego-asturianu, asina como la calidá de les sos obres, y son una reacción positiva a la decisión de l’Asociación d’Escritores d’Asturies de nun convocar anguaño nos sos premios les categoríes pa los idiomes autóctonos.

La entrega de Premios va facese’l vienres 30 de payares, a les 19:30 hores, na galería d’arte Texu, na cai el Postigo 13 d’Uviéu. Tres la entrega de gallardones, va convidase a los presentes a vinu de Cangas L.lumés y quesu afuega’l pitu Ca Sanchu.

La obra La ñeve del cuquiellu de Xabiero Cayarga, espublizáu pola editorial Trabe en 2011, algama’l primer premiu na categoría de poesía de los Premios Críticos de les Lletres Asturianes. El xuráu, formáu por Xosé Miguel Suárez Fernández, Xuan Santori y Pablo Texón Castañón, decidió por unanimidá concede-y el premiu a esta obra llírica de calter européu, de rasgos intimistes y formalmente brillante. La obra yá fuere premiada apocayá pola Tertulia Reciella Malory como’l meyor llibru del añu.

Xabiero Cayarga (Cangues d’Onís, 1967) ye ún de los escritores que se formaron al abellugu de la xeneración del Surdimientu y forma parte de la segunda etapa de poetes contemponáneos qu’escriben en llingua asturiana. Dio’l saltu a la lliterautura en 1994 con El boleru de Xabel, novela que ganó’l Premiu de Narraciones de l’Academia de la Llingua Asturiana y ye l’autor de los llibros de cuentos Les gatileres del cielu, Güelgues sobre’l llagu y A flor de piel. Aparte d’esto, la so prosa apaez recoyida na Antoloxía del cuentu asturianu contemporaneu d’Ánxel Álvarez Llano y en Muestra de nuevos narradores, de Ramón Lluís Bande. En 2006 publicó Trastes de bufarda y en 2011 El sol negru de Wewelsburg.

La ñeve del cuquiellu ye un llibru denfiníu pol xuráu de los Premios Críticos de les Lletres Asturianes como “impecable no llingüístico y perfectu no formal” y tamién destacó la claridá de les sensaciones con un ciertu aporte clásicu que se plasma na obra en forma de poesía. Asina, el xuráu calificó al escritor premiáu con “ún de los pocos poetes asturianos que tien too aquello que se-y pide a un escritor universal: usa la llingua asturiana col respetu que se-y tien lo heredao de casa y da-y un aire centroeuropéu y cosmopolita poco usual dientro del panorama poéticu n’asturianu”. La ñeve del cuquiellu yá nel añu 2010 algamó’l premiu Teodoro Cuesta de poesía.

La Xunta pola Defensa de la Llingua Asturiana convocó estos Premios Críticos de les Lletres Asturianes pola decisión de l’Asociación d’Escritores d’Asturies d’eliminar nos sos premios les categoríes n’asturianu y gallego-asturianu.

La entrega de premios va facese’l próximu vienres 30 de payares, a les 19:30 hores, na galeria d’arte El Texu (El Postigo, Uviéu), nun actu públicu.

L’escritor Milio Rodríguez Cueto consiguió la quinta edición del Premiu María Josefa Canellada de lliteratura infantil y xuvenil en llingua asturiana, otorgáu pola Conseyería d’Educación, Cultura y Deporte d’Asturies y dotáu con 4.000 euros, dempués de la baxa a menos de la metá nos presupuestos d’esti a ñu. El xuráu que concedió esti galardón tuvo presidíu pola directora xeneral de Política Llingüística, Ana María Fueyo.

El xuráu aconceyó esta selmana pasda na Casa Cultura María Josefa Canellada, en Santolaya, Cabranes, cola participación del alcalde de Cabranes, Alejandro Vega, y de los escritores y especialistes en lliteratura infantil y xuvenil Severino Antuña y Mariluz Pontón.

Cuntó amás cola participación d’Alonso Zamora Canellada, fíu de la escritora María Josefa Canellada, que da nome al gallardón.

Al premiu, dotáu con 4.000 euros, optaron en total seis trabayos. Ente les obres presentaes, el xuráu decidió por unanimidá conceder el premiu al testu “Carne de melandru”, al valorar que se trata d’una novela de gran fondura narrativa y bien resuelta, que recupera la memoria hestórica d’una manera afayadiza a la edá a la que va empobinada y abre caminos nuevos na lliteratura xuvenil n’asturianu.

El testu presentóse embaxo’l nomatu Stephan Dedalus.

Milio Rodríguez Cueto, autor de noveles, rellatos y ensayos, ganó dellos premios lliterarios como’l Fuertes Acevedo d’ensayu (en 1992 y 1999) o’l Xuan María Acebal de Poesía. Tornó al asturianu a autores universales como Shakespeare, Stevenson, Oscar Wilde o Sade. Anguaño escribe nel blogue Escureceres.

La editorial Trabe acaba de poner en marcha una campaña promocional. Espliquen qu’estes Navidaes van poder regalasellibros “a precios bien asequibles” col envís “d’arreblagar penriba la crisis económica y ayudate a facer el regalu más bonu al preciu más baxu”.

Al preciu de namás 9’95 vas poder atopar na so web y nes llibreríes: Caleyes con oficiu, de Montserrat Garnacho Escayo; Odisea. Versión asturiana de Xosé Gago; y los monumentales Diccionariu castellanu-asturianu, y Diccionariu asturianu-castellanu, de Xuan Xosé Sánchez Vicente.

Páxina d’Ediciones Trabe

La obra La mio hermana ye una mofeta de Berta Piñán, con ilustraciones de Francesca Assirelli, y espublizáu pola editorial Pintar-Pintar, algama’l primer premiu na categoría de lliteratura infantil y xuvenil de los Premios Críticos de les Lletres Asturianes. El xuráu formáu por Chechu García, Paula Pulgar y Eloy Antuña decidió, por unanimidá, concede-y el Premiu a esta obra que narra en primer persona los celos d’una neña énte’l nacimientu de la so hermana, a la qu’identifica con una mofeta.

Berta Piñán (Cangues d’Onís, 1963) ye una escritora de prestixu reconocíu dientro de la lliteratura asturiana y Miembru de Númberu de l’Academia de la Llingua Asturiana dende 2008. De magar qu’en 1985 ganara’l Premiu de Poesía de l’ALLA por Al abellu les besties, tien publicaes numberoses obres que van del ensayu de temática sociollingüística o femenista, a la narrativa, pasando pela poesía, xéneru nel que collechó la mayor parte de los premios, ente los que descaca’l Premiu de Poesía Teodoro Cuesta en 1991 por Vida Privada. Dientro de la lliteratura infantil y xuvenil tien publicao Lula, lulina en 1995, Les coses que-y presten a Fran (2005), L’estranxeru (2005) y Arroz, agua y maíz (2010), publicaes estes tres últimes en versión castellana y asturiana.

La mio hermana ye una mofeta (2011) ye un álbum infantil ilustráu, con edición cuidada y guapa, que yá se tradució al castellanu, y que va ser traducíu al al alemán pola Editorial Ellermann. La editorial asturiana Pinta-Pintar negocia anguaño con editoriales d’Arabia Saudí, Corea, Xapón, Italia y Estados Uníos alcuerdos asemeyaos pa la reedición d’esti llibru en dalgunos de los idiomes d’estos países.

La Xunta pola Defensa de la Llingua Asturiana convocó estos Premios Críticos de les Lletres Asturianes, pola decisión de l’Asociación d’Escritores d’Asturies d’eliminar nos sos premios, les categoríes n’asturianu y gallego-asturianu. La entrega de premios va facese’l prósimu vienres 30 de payares, a les 19:30 hores, na galeria d’arte El Texu d’Uviéu (El Postigo).

La obra “La mio hermana ye una mofeta” de Berta Piñán, con ilustraciones de Francesca Assirelli, y espublizáu pola editorial Pintar-Pintar, algama’l primer premiu na categoría de lliteratura infantil y xuvenil de los Premios Críticos de les Lletres Asturianes. El xuráu formáu por Chechu García, Paula Pulgar y Eloy Antuña decidió, por unanimidá, concede-y el Premiu a esta obra que narra en primer persona los celos d’una neña énte’l nacimientu de la so hermana, a la qu’identifica con una mofeta. Berta Piñán (Cangues d’Onís, 1963) ye una escritora de prestixu reconocíu dientro de la lliteratura asturiana y Miembru de Númberu de l’Academia de la Llingua Asturiana dende 2008. De magar qu’en 1985 ganara’l Premiu de Poesía de l’ALLA por Al abellu les besties, tien publicaes numberoses obres que van del ensayu de temática sociollingüística o femenista, a la narrativa, pasando pela poesía, xéneru nel que collechó la mayor parte de los premios, ente los que descaca’l Premiu de Poesía Teodoro Cuesta en 1991 por Vida Privada.

Dientro de la lliteratura infantil y xuvenil tien publicao Lula, lulina en 1995, Les coses que-y presten a Fran (2005), L’estranxeru (2005) y Arroz, agua y maíz (2010), publicaes estes tres últimes en versión castellana y asturiana.

La mio hermana ye una mofeta (2011) ye un álbum infantil ilustráu, con edición cuidada y guapa, que yá se tradució al castellanu, y que va ser traducíu al al alemán pola Editorial Ellermann. La editorial asturiana Pinta-Pintar negocia anguaño con editoriales d’Arabia Saudí, Corea, Xapón, Italia y Estados Uníos alcuerdos asemeyaos pa la reedición d’esti llibru en dalgunos de los idiomes d’estos países.

La Xunta pola Defensa de la Llingua Asturiana convocó estos Premios Críticos de les Lletres Asturianes, pola decisión de l’Asociación d’Escritores d’Asturies d’eliminar nos sos premios, les categoríes n’asturianu y gallego-asturianu.

La entrega de premios va facese’l prósimu vienres 30 de payares, a les 19:30 hores, na galeria d’arte El Texu d’Uviéu (El Postigo).

Tolos mayores de 16 años pueden participar nesti concursu y presentar una obra namás, n’asturianu estándar o na so variedá occidental. Va premiase aquella obra inédita qu’a xuiciu del xuráu seya d’un valir lliterariu mayor. La temática ye llibre y el rellatu ha tener una estensión de cinco fueyes como mínimu y venti a lo máximo, con una presentación en DIN A4 a espaciu doble y con cuatro copies.

Les obres nun se van volver a los autores, y el ganador va premiase con 400 euros pa cada categoría, la escrita colos rasgos de la variedá llocal y la escrita al mou estándar.

Los trabayos han presentase nel Serviciu de Normalización L.lingüística (La Plaza la Oliva, e/n, 33800, Cangas de Narcea), yá seya presencialmente o per corréu certificáu na mesma dirección, nun sobre ensin remite o embaxo nomatu, qu’axunte dientro la plica na que se dean a conocer los datos reales del autor, too ello enantes del 10 d’avientu.

El xuráu tará formáu por representantes de la Conceyalía de Cultura, un representante de la Rede de Normalización Llingüística nos Conceyos, maestros y escritores en llingua asturiana.

El Conceyu de Mieres, pente medies de la Casa de la Cultura “Teodoro Cuesta”, y col apoyu de la Conseyería de Cultura y Turismu d’Asturies, convoca la edición de 2012 del Premiu “Teodoro Cuesta” de Poesía, pal que puen presentase orixinales hasta’l 30 de payares. El Serviciu de Normalización Llingüística del Conceyu de Mieres punxo en conocimientu de los aspirantes al gallardón, que “tendrá estí añu una cuantía de 3.000 euros en vez de los 4.000 de convocatories anteriores”.

Nel prestixosu premiu puen toles persones que lo deseen con un poemariu inéditu, orixinal y escritu en llingua asturiana, entregando orixinal y cuatro copies. La entrega podrá facese per corréu certificáu o entregándolo en mano en: Casa de Cultura “Teodoro Cuesta”(secretaría). Manuel Llaneza 8, 33600, Mieres. Asturies.

Los poemarios han dir ensin firma, con alcuñu o lema y figurando’l so nome y les señes en sobre zarráu.

Concederáse un únicu premiu dotáu con 3.000 euros, contemplándose promover la so publicación. Sicasí, el xuráu podrá declarar desiertu’l premiu y el fallu va ser inapelable.

Pa más información pue acudise a la Casa de Cultura “Teodoro Cuesta” o llamar a los teléfonos 985 45 62 92 o 985 45 06 66, escribir a cultura@ayto-mieres.es ó llingua@ayto-mieres.es ó consultar la so web www.ayto-mieres.es/cultura

Llistáu de ganadores n’ediciones anteriores

91 Berta PIÑÁN

92 Lourdes ÁLVAREZ y Alfonso VELÁZQUEZ

93 Xuan BELLO

94 Lourdes ÁLVAREZ

95 Antón GARCÍA

96 Martín LÓPEZ-VEGA y Chechu GARCÍA

97 Pablo Antón MARÍN ESTRADA

98 Esther PRIETO

99 Xuan SANTORI

00 Xabiero CAYARGA

01 Ánxel ÁLVAREZ LLANO

02 Marta MORI D’ARRIBA

03 Vanesa GUTIÉRREZ

04 Marta MORI DE ARRIBA y Xelu GUTIÉRREZ MORÁN

05 Pablo RODRÍGUEZ ALONSO

06 Pablo TEXÓN y Pablo RODRÍGUEZ MEDINA

07 Miguel ALLENDE y Héctor PÉREZ

08 Xelu GUTIÉRREZ MORÁN

09 Ánxel NAVA

10 Xaviero CAYARGA

11 Elías VEIGA

Descarga les bases completes del Premiu