Berta Piñán gana’l Premiu Críticu de les Lletres Asturianes na categoría de lliteratura infantil y xuvenil

La obra “La mio hermana ye una mofeta” de Berta Piñán, con ilustraciones de Francesca Assirelli, y espublizáu pola editorial Pintar-Pintar, algama’l primer premiu na categoría de lliteratura infantil y xuvenil de los Premios Críticos de les Lletres Asturianes. El xuráu formáu por Chechu García, Paula Pulgar y Eloy Antuña decidió, por unanimidá, concede-y el Premiu a esta obra que narra en primer persona los celos d’una neña énte’l nacimientu de la so hermana, a la qu’identifica con una mofeta. Berta Piñán (Cangues d’Onís, 1963) ye una escritora de prestixu reconocíu dientro de la lliteratura asturiana y Miembru de Númberu de l’Academia de la Llingua Asturiana dende 2008. De magar qu’en 1985 ganara’l Premiu de Poesía de l’ALLA por Al abellu les besties, tien publicaes numberoses obres que van del ensayu de temática sociollingüística o femenista, a la narrativa, pasando pela poesía, xéneru nel que collechó la mayor parte de los premios, ente los que descaca’l Premiu de Poesía Teodoro Cuesta en 1991 por Vida Privada.

Dientro de la lliteratura infantil y xuvenil tien publicao Lula, lulina en 1995, Les coses que-y presten a Fran (2005), L’estranxeru (2005) y Arroz, agua y maíz (2010), publicaes estes tres últimes en versión castellana y asturiana.

La mio hermana ye una mofeta (2011) ye un álbum infantil ilustráu, con edición cuidada y guapa, que yá se tradució al castellanu, y que va ser traducíu al al alemán pola Editorial Ellermann. La editorial asturiana Pinta-Pintar negocia anguaño con editoriales d’Arabia Saudí, Corea, Xapón, Italia y Estados Uníos alcuerdos asemeyaos pa la reedición d’esti llibru en dalgunos de los idiomes d’estos países.

La Xunta pola Defensa de la Llingua Asturiana convocó estos Premios Críticos de les Lletres Asturianes, pola decisión de l’Asociación d’Escritores d’Asturies d’eliminar nos sos premios, les categoríes n’asturianu y gallego-asturianu.

La entrega de premios va facese’l prósimu vienres 30 de payares, a les 19:30 hores, na galeria d’arte El Texu d’Uviéu (El Postigo).