Lliteratura

Del 27 de marzu al 12 d’abril va celebrase na Biblioteca Municipal de Miranda del Douro, una esposición sobre la “Bíblia Sagrada” tornada a la variedá asturlleonesa d’esta comarca portuguesa por Domingos Augusto Ferreira.

Domingos Ferreira esplica en mirandés lo que’l visitante pue atopar nesta amuesa que “yê cumpuôsta de seis blumes: cinco de l Biêlho i um de l Nuôbo Testamento. La sue scrita fui feita com tinta parker com caneta de tinta permanente i outras çmilares. L papel usado fui de formato A4, registo de 80 grs. L tipo de la letra precurei que fussa na caligrafiê, cuorpo entre 10-12.L númaro de ls capitlos stân grabados a ouro, bien cumo las restectibas einicials. Las ancadernaçones stân todas trabalhadas na pél curtida de canhono ou de chibo. Nas cuôstas de cada blume de l Biêlho testamento stãn grabados ls respectibos lhibros que l cuômponam, pus que, cuomo hábeis de recordar prefazam 46 lhibros que ajuntando-le ls 27 que cuômponam l Nuôbo dan um total de 73. Todas eilhas grabadas a sferográfica”.

El 29 d’abril entamarán los actos de la que ye yá la XXIV Selmana de les Lletres Asturianes y la Conseyería de Cultura ta acabante anunciar que la escritora Nené Losada va ser la lliterata a la que se faiga homenaxe nesta ocasión. Un llibru sobre la so vida y obra va regalase nes llibreríes, como cada añu, el Día del Llibru Asturianu, que sedrá nesta ocasión el 3 de mayu. Amás, ente los planes, un gran actu poéticu y musical nel Centru Niemeyer, el martes 30 d’abril, y la puesta n’escena de les obres del Ier Certame de Teatru escolar n’asturianu, l’8 de mayu, en La Llaboral.

Nené Losada, la que fuera decana de les Lletres Asturianes.

La escritora valdesana Nené Losada Rico, dexóno n’abril de 2009, a la edá d’87 años. Nes cuasi nueve décades de vida que tuvo, la escritora, considerada nel momentu de la so muerte decana de les lletres asturianes, dedicó bien de tiempu a escribir n’asturianu, siendo una firma defensora de la oficialidá del idioma.

Ñació en L.luarca’l 10 de payares de 1921. Tres años depués, al morrer la madre, llévenla a Sanfliz de Trevías, pa cola güela. Ellí diba vivir hasta que, con diecinueve años, casa y torna pa L.luarca, onde sigue viviendo. De formación autodidacta, amuésase como una temprana escritora de relatos y poemes en castellán. Tiempu más tarde, empezará a facelo na llingua del so llugar, utilizando formes poétiques mui cercanes a les de la poesía oral popular. En 1992 recoyó bona parte de la so obra en versu nel volume Cantares valdesanos, n’edición de Consuelo Vega, que se completa col nuevu llibru poéticu apaecíu en 1997 col títulu de Entre apigarcios, dende entós espublizó tamién la so obra en castellán nun volume completu.

L’autora recibió numberosos homenaxes y premios. Col so nome convócase cada añu un premiu de poesía. Nel añu 2000 recibió l’Urogallo de Bronce, entregáu pol Centru Asturianu de Madrid, al que nel 2005 se-y sumó la medaya de plata del Principáu d’Asturies. En 2007 recibió’l Premiu Timón que concede l’Arribada, pola mor de la so trayectoria lliteraria, y en 2008 foi nomada Fía Predilecta del Conceyu de Valdés, amás de poder ver colgáu un retratu de so na Casa Conceyu.

Cola muerte de Nené Losada Rico la lliteratura asturiana perdió una de les sos voces hestóriques, una de les últimes figures de la nomada Xeneración de la Posguerra, que nos últimos años dexó tamién nel camín a escritores como Mánfer de la Llera o Eva González. Agora Asturies va facer l’homenaxe que merez.

Dempués de la bona acoyida l’añu pasáu, l’Asociación Xuvenil Naurenia, de Noreña, entama la segunda edición Concursu de rellatu curtiu “Cenciella”, que va destináu a la mocedá d’ente 16 y 30 años. Les dos modalidaes del concursu permiten presentar rellatos en papel, con un máximu de trés fueyes d’estensión o presentar rellatos d’un máximu de trés tuits al traviés de la rede social Twitter, escritos n’asturianu o en castellán.

Los premios en dambes categoríes son de 250 euros, y sedrán donaos pola Conceyalía de Cultura de Noreña y pola propia asociación moza. El concursu presentóse nel conceyu condal de manes de la conceyala de cultura Alicia Muñiz, y de los miembros de l’asociación Pelayo Suárez y Hugo Córdoba. El plazu pa presentar trabayos rematará’l 30 de xunu d’esti añu.

En 2012 resultaron ganadores Íñigo Arza (Barakaldo, 1985) cola obra “Click” na modalidá tradicional, mientres que Vítor Suárez (Uviéu, 1988), blogueru y activista, vicepresidente d’Iniciativa pol Asturianu ganó’l gallardón na categoría de rellatu vía Twitter.

El Conceyu de Llaviana y la Oficina d’Información a la Mocedá, en collaboración col Institutu Asturianu de la Mocedá, convoquen la novena edición del concursu “Ello yera una vez…”, con dos categoríes pa mozos de 14 a 35 años. Al concursu pueden presentase un máximu de trés obres, n’asturianu o castellán.

El plazu de presentación de los rellatos finará’l vienres 22 de marzu de 2013, quedando fuera del concursu cualesquier obra recibida en pasando esta fecha.

Bases completes del concursu

El próximu vienres 15 de marzu, a les 20:15 hores, presentar na Biblioteca “Miguel Teijeiro” d’As Figueiras, conceyu de Castripol, la novela “Vida Maleva”, d’Arturo Álvarez Fernández “Tangueiro”, publicada pola editorial asturiana Suburbia Ediciones. Na presentación va participar Iván de Cazarón y n’ella va podese sentir l’actuación del grupu musical “Os Folgazáis”. “Vida Maleva” ye una novela hestórica sobre la figura del “Gallego Julio”, un asturianu de Castropol que foi’l delincuente más importante na década de los años venti en l’Arxentina. La novela ta escrita na llingua del Navia-Eo.

Sobre esti personaxe filmóse nel añu 1953 la película “Del otro lado del puente”, del director Carlos Rinaldi, y apaez como personaxe secundariu na novela “Frontera Sur” de Horacio Vázquez Rial (1995) y na posterior película (1998) protagonizada por José Coronado y Maribel Verdú. Tamién protagonizó dellos cómics nos años 70, dientro de la colección arxentina “Crónicas de un porteño Viejo”. Mientres la so vida en Bonos Aires dedicóse al “escolaso” (apuestes illegales de naipes, carreres de caballos, etc.) y a la esplotación d’hasta trés mil muyeres nos chamizos de la so propiedá. Calcúlase que nació hacia 1890 y morrió asesináu pel costazu nos esteriores del Hipódromu de Palermo en Bonos Aires, el domingu 16 de febreru del añu 1930, mientres vía correr al so caballu “Invernizo”.

Nesti llibru fálase de la emigración de el españoles n’Arxentina y la situación política, tantu nel estáu español como nel país americanu mientres los primeros trenta años del sieglu pasáu. Tamién apaecen personaxes famosos colos que se rellacionó’l protagonista (Gardel, el presidentes Alvear y Yrigoyen, La Asturianita, etc.) y fálase de la corrupción xeneralizada de los políticos y autoridaes mientres esa dómina en dambos países.

Arturo Álvarez Fernández “Tangueiro”, nació n’As Riolas, conceyu de Castropol, en 1973. Tien publicaos los poemarios “Pedras Moles” y “Volta de camín” (Suburbia Ediciones). Dalgunos de los sos poemes tán incluyíos en “Unde lletras falan. Antoloxía da poesía en galego-asturiano.1891-2006”, de Xosé Miguel Suárez Fernández (Trabe); na Revista Eonaviega de Lliteratura “Trabatel” y na antoloxía “Na boca de todos. Retrato poética del occidente asturiano”, d’Aurora García Rivas, editáu pol Conceyu d’A Veiga. Tamién compunxo delles lletres del grupu musical “Os Folgazáis”.

Con motivu de la celebración de la XXXIV Selmana de les Lletres Asturianes, el Conceyu de Cangas del Narcea organiza’l V Concursu de cuentos n’asturianu Otilio Álvarez Rodríguez. El concursu va ser una de les actividaes principales d’esta selmana, que se celebrará como vien siendo vezu a principios del mes de mayu, y va tar dirixíu a neños y neñes del conceyu que tean cursando quintu y sestu de primaria.

Cada participante va poder presentar una obra namás: orixinal, inédita y escrita n’asturianu, siendo posible usar les variedaes occidentales y l’estándar de la llingua. Amás de participar nel concursu, les obres presentaes van formar parte d’una esposición y ser usaes en campañes de normalización llingüística. Les trés obres que presten más al xuráu van ser premiaes con un llote de llibros y material escolar y los autores van ver los sos testos publicaos na páxina web del Conceyu Cangas.

El Serviciu de Normalización L.lingüística, asitiáu na Casa la Cultura, ye’l destinatariu de les obres que los escolinos tienen d’entregar enantes del 22 d’abril. Esti mesmu departamentu alviertió tamién a tolos profesores y al alumnáu interesáu nel concursu sobre la posibilidá de facese con materiales y consultar cuestiones de tipu llingüísticu.

Bases completes del concursu

El Centru de Cultura Vieyu Institutu de Xixón acueye esti xueves 7 de marzu a les 20:30 hores, la presentación del llibru “Sentir, y nun sentir sentire”, obra de teatru del lleonés Fran Allegre.

El llibru, autoeditáu, titúlase “Sentir, y nun sentir sentire” y ye la so segunda obra, dempués del poemariu “Poemas pa nun ser lleidos”, que sacó Ediciones Filandón en 2008. Un vocabulariu cola torna al castellán de dellos términos acompanga al llibru.

El Club Xeitu convoca’l quintu Certame Lliterariu en Pal.luezu ‘Guzmán Álvarez’, col que se pretende la revitalización de la variedá del asturianu que se fala nesta zona del cordal occidental ástur-lleonés, “amás del fomentu de la creación lliteraria na mesma y la so divulgación”. El concursu, abiertu a cualquier persona interesada, ta dotáu con un premiu de 200 euros p’aquella obra en prosa o versu que resulte escoyida pol xuráu. Los rellaos van poder tener una estensión de 3 a 12 fueyes, y les poesíes nun van poder superar los 1.000 versos. Les obres han presentase embaxo nomatu enantes del 1 de mayu, faciéndose públicu’l fallu del xuráu a lo llargo del mes de xunu. El premiu dase cada añu nel “Recital de Patsuezu” que tien llugar la primer fin de selmana de agostu en La Casona de San Miguel de L.laciana, dientro de les actividaes del Mercau L.lacianiegu.

La obra gallardonada va publicase nel boletín añal de ‘Xeitu’, que’l Club edita cada branu con numberoses referencies de naturaleza, hestoria, lliteratura, arte, etnografía, etc. rellacionaes cola zona. Amás, el pasáu añu una compilación de les obres premiaes, tanto rellatos como poesíes, foi publicada pol Club Xeitu nun pequeñu volume específico, siendo la primer ocasión en que les obres de los trés autores premiaos hasta la fecha salíen a la lluz. Obres d’Irma González-Quevedo, Guadalupe Lorenzana y Francisco González-Banfi, quien a pesar d’escribir na variedá pal.lueza dende va años, nun vieren nenguna de les sos obres impreses.

Esti certame promuévelu’l Club Xeitu cola collaboración del Institutu Lleonés de Cultura, y debe el so nome a Guzmán Álvarez, filólogu babianu autor del llibru ‘El habla de Babia y Laciana’, primer obra qu’estudió’l pal.luezu. La so figura y obra foi reconocida en 2010 al cumplise’l primer centenariu de la so nacencia, con distintes actividaes y publicaciones per parte del Club Xeitu.

Bases completes del concursu

El martes 12 de marzu los llocales de la Sociedá Cultural Xixonesa, allugaos na cai Balmonte de Miranda, 4, entlu. dcha., a les 19.00 hores, van acoyer un actu de presentación del númberu 32 de la revista “Asturies. Memoria encesa d’un país” de la Fundación Belenos.

La espublización recueye los trabayos que vienen darréu: “El mayéu Busián (L.lena): orixe d’una braña na Edá del Bronce” (Jorge Camino Mayor), “Los torques d’Argul (Pezós)” (Alberto Álvarez Peña y Alfonso Fanjul Peraza), “Les cases soportalaes d’Avilés y les sos «mirilles»” (Manuel Mallo Viesca), “Delles considerances alredor de Xosé Faes «capitán de los carlistes, resurrección de Pelayo»” (Javier Cubero de Vicente), “Peslleres, maniyes y picaportes. Artesanía del fierro nes puertes de les cases asturianes” (Inaciu Hevia Llavona y Alberto Álvarez Peña), “Don Pelayo, primer rei de los astures. Testimoniu d’una saga escaecida: la hermana de Don Pelayo” (Gausón Fernande Gutierri), “El potru, un elementu etnográficu escaecíu” (Daniel Cueli Canto), “Normes xenerales pal usu y disfrute de la sidra” (Inaciu Hevia Llavona) y “El Son d’Arriba y los Cantos de Ramos nel Val.le de Naviegu (Cangas del Narcea)” (Santos Nicolás Aparicio).

El númberu 11 de la revista de lliteratura “mui” moza, Formientu, ta yá fuera d’imprenta. La revista, dirixida por Inaciu Galán dende la so fundación en 2006, sigue apostando por ser cantera de nuevos autores en llingua asturiana, dándolos a conocer y apurriendo un espaciu pa los sos testos. Con esta nueva entrega ábrese una etapa nueva, pasando de dos a un solu númberu al añu, pero con más páxines, de 30 a más de 70, y con una edición más curiada.

Esti númberu cunta con testos de Denis Soria, Vítor Suárez, Cristina Menéndez, Belarmino Álvarez, Noemí Rodríguez, Alfredo Huergo, Blanca Fernández, Daniel Fernández, Abel Aparicio, Xurde Álvarez, Ismael Carmona, Félix Iglesias, Xosé B. Álvarez, Laura Marcos, Andrés Astur y una crítica lliteraria de Javier Cubero.

Amás estrénase la sección “Cuando… yera autor mozu” dedicada nesti casu a Pin de Pría. Na sección búscase dar la obra escrita por autores clásicos o contemporáneos, escrita demientres la so mocedá. El poema asoleyáu nesta ocasión ye “Llibertá”, asoleyáu por Pin de Pría con 23 años.

Les semeyes qu’ilustren la revista son d’Alejandro Ordiales, fotógrafu mozu llangreanu, y el diseñu y maquetación del moscón Andrés Alonso Moutas, como vien siendo vezu dende’l númberu 4 de la revista. Ye oxetivu de Formientu’l dar a conocer a artistes asturianos mozos y nesta nueva etapa va facer por dir dando a conocer a nuevos fotógrafos asturianos. Ta pesllándose’l calendariu de presentaciones pero yá pue confirmase una nel Club de Prensa de LNE en Xixón, pal 11 d’abril, asina como otres dos n’Uviéu y Corvera, que dirán anunciándose nes selmanes vinientes.