Lliteratura

El matemáticu colombianu Fernando Zalamea, doctor en Lóxica Matemática pola Universidá de Massachussets y docente na Universidá Nacional de Colombia, recibe esta tarde en Xixón el ‘Premio Internacional de Ensayo Jovellanos’, qu’esti añu algama so décima edición y que, concedíu pola ‘Fundación Foro Jovellanos’ de Xixón, tá dotáu con 18.000 euros y l’espublizamientu de la obra.

L’actu d’entrega del galardón cellebraráse a partir de les 20 hores nel salón d’actos del Antiguu Institutu Xovellanos de Xixón, y contará cola presencia de l’alcaldesa de la ciudá, Paz Fernández Felgueroso.

Nel so fallu, emitíu a finales del pasáu mes de xineru, el xuráu valoró la capacidá del profesor colombianu pa descomponer y volver construyir los estremaos métodos d’análisis predominantes nel sieglu XX -ente ellos la relativización, la indeterminación y la particularización- pa entender los complicaos procesos de mestizaxe que viven les sociedaes d’anguañu, llamuerga na que se somorguia la obra ganadora, “Ariadna y Penélope. Redes y Mixturas en el Mundo Contemporáneo”.

A la décima edición del ‘Jovellanos’ d’Ensayu concurríen 90 obres orixinales, procedentes d’España, Estaos Xuníos, Chile, Colombia, Uruguay, Arxentina, Brasil, Perú, Cuba, Kenia y Austria.

Na anterior convocatoria’l premiu, resultara ganador el caderalgu de Filosofía de la Universidá Autónoma de Madrid Félix Duque, cola obra “Los buenos europeos. Hacia una filosofía de la Europa contemporánea”.

Web personal de Fernando Zalamea

El VII Salón del Llibru Iberoamericanu tranca les sos puertes. Depués de cinco xornaes d’intensa actividá con centru nel Antiguu Institutu Xovellanos de Xixón, los cincuenta autores y les 47 cases editores que tomaron parte del certame despídinse d’Asturies con un programa qu’inclúi un homenaxe al poeta chilenu Pablo Neruda y la presentación de sendos llibros de les escritores Susana Fortes y Marta Mori.

La pública reconocencia a Neruda ta prevista pal mediudía, al traviés d’un alderique nel que tán llamaos a participar los autores Miguel Rojas Mix, Claude Couffon, Gerardo Caetano y Luis Sepúlveda, esti últimu director amás del Salón.

La otra guinda de remate pa la última xornada del certame tien dos cares y dos escenarios: La Llibrería Central acoyerá a les 11,30 la presentación de la obra finalista del últimu Premiu Planeta, ‘El amante albanés’, de Susana Fortes. Pocu depués, a les 13 hores, Marta Mori presentará na Casa’l Llibru el so poemariu ‘Pórticu’, ganador del Premiu Teodoro Cuesta.

La clausura oficial del sétimu Salón del Llibru Iberoamericanu ta prevista pa les 18 hores nel patiu del Antiguu Institutu, pero los puestos de venta de llibros allugaos nesi mesmu edificu permanecerán abiertos hasta les 19,30.

Un pregón a cargu l’escritor Pepe Monteserín abrirá a les 19 hores de mañana, xueves, el certame LlangréuLlibru na so edición de 2004, que na so primer xornada tien programada amás una llectura pública de testos de lliteratura minera na Casa Cultura de La Felguera, una hora depués, a cargu d’Elías García Domínguez y Benigno Delmiro Coto.

Coincidiendo cola cellebración en Xixón del VII Salón del Llibru Iberoamericanu, la feria de Llangréu nutriráse de dalgunos autores participantes nel eventu xixonés, empezando pol propiu director del Salón, Luis Sepúlveda, cuyu llargumetraxe ‘Historia de una Gaviota y el Gato que la Enseñó a Volar’ va abrir el calendariu d’actos, a les 10,30 hores, nel Nuevu Teatru de La Felguera.

El vienres pasarán pol certame llangreanu los escritores Mario Delgado, José Luis Piquero, Teresa Tuñón, Carmen Suárez y Xuan Bello, mientres que’l sábadu 15 de mayu el Coru Santiaguín pesllará la xornada darréu de la presentación de dos obres premiaes en prestixosos concursos: La novela ganadora del Prmeiu ‘Café Gijón’ 2003, ‘El palacio azul de los ingenieros belgas’, del allerán Fulgencio Argüelles; y el cuentu col que Ricardo Menéndez Salmón ganó el Premiu ‘Juan Rulfo’, convocáu en París.

La tarde’l domingu tará consagrada a un homenaxe públicu a los autores hispanoamericanos Julio Cortázar, Augusto Monterroso y Pablo Neruda, al que siguirá un recital de poemes vinculaos a la Cuenca’l Nalón, con música a cargu de Manolo Peñayos, integrante de ‘Nuberu’.

El VII Salón del Llibru Iberoamericanu arranca en Xixón col envís d’afitase como cita “ineludible” nel calendariu añal de la lliteratura hispanoamericana. El certame, qu’esti añu concentra les sos actividaes nel Antiguu Institutu Xovellanos, abre güei les sos puertes a la participación de 50 escritores de dambes orielles del Atlánticu, 40 editoriales y venti especialistes en torna lliteraria.

Asina, el Salón Iberoamericanu arrenuncia a la carpa qu’habitualmente allugaba na cai Tomás y Valiente, y failo, según el director del certame, l’escritor chilenu Luis Sepúlveda, por razones de seguridá y pa nun dispersar les actividaes del eventu, que van concentrase dafechu nel interior del Antiguu Institutu.

La sétima edición del Salón del Llibru Iberoamericanu, que se desendolca ente mañana y el sábadu 15 de mayu, reforzará amás la participación de les llibreríes xixoneses, qu’acoyerán estremaes presentaciones de llibros, y quier afitase na so condición d’importante alcuentru lliterariu al qu’autores y editores acuden antes de visitar otres feries d’envergadura n’Europa ya Iberoamérica.

Nesti sen, Sepúlveda sorrayó ayeri en declaraciones a Radio Nacional d’España el papel esencial de los lliteratos en hispanofalantes, yá que, a xuiciu’l director de la prestixosa Feria’l Llibru de Frankfurt (Alemania), si los autores en castellán fixeren una fuelga d’un añu, “la industria lliteraria mundial esbarrumbábase”.

Ente los actos programaos, el certame dirixíu por Luis Sepúlveda prevé cellebrar un recital poéticu y un taller lliterariu na cárcel de Villabona, y un homenaxe a Julio Cortázar nel que participarán, ente otros, los escritores Mempo Giardinelli, José Manuel Fajardo y Carmen Posadas.

Web oficial del Salón

El llibru como ferramienta de cultura que desanicia el fundamentalismu. El VII Salón del Llibru Iberoamericanu abrió les sos puertes en Xixón cola reivindicación central d’una lliteratura útil p’ameyorar el mundu y con una sentida alcordanza de les víctimes de los atentaos integristes que’l pasáu 11 de marzu acabaron cola vida de casi doscientes persones en cuatro trenes de cercaníes de Madrid.

Yeren “191 llectores o potenciales escritores que yá nun tán ente nosotros”, apuntó’l director del Salón, l’escritor chilenu Luis Sepúlveda, y precisamente p’amosar duelgu énte eses ausencies la organización del eventu decidió postergar un homenaxe collectivu al xéneru del cuentu que’l Salón preparaba na viéspora de los atentaos de Madrid con una reedición de la revista ‘Puro cuento’.

De fechu, el Salón del Llibru Iberoamericanu en pleno, que permanecerá abiertu hasta’l prósimu sábadu con epicentru nel Antiguu Institutu Xovellanos de Xixón, quier apurrir el llibru como una ferramienta clave pa combatir la xénesis del terrorismu, que’l presidente’l Principáu, Vicente Álvarez Areces, situó na probitú y na ignorancia. A xuiciu d’Areces, que destacó na so alocución el cambiu de Gobiernu productu de les elecciones del 14 de marzu pasáu, el desaniciu del integrismu pasa por semar cultura pa evitar que, como agora, “tres fortunes individuales equivalgan al Productu Interior Brutu de 48 países”.

Pacificación vía cultura, meyora del planeta al traviés de la lliteratura y, amás, reivindicación del mestizaxe. L’alcaldesa de Xixón, Paz Fernández Felgueroso, sorrayó na apertura’l certame lo que’l Salón supón pa facer de Xixón “un referente del alcuentru y la cultura” y ensalzó l’eventu dirixíu por Sepúlveda como una cita cuyu glamour “ta na suma de toles persones que tienen que ver dalgo cola cadena de la pallabra”.

No propiamente lliterario, les banderes de 16 países llatinoamericanos dan-y yá collor a un Antiguu Institutu pol que nos prósimos díes van pasar primeres figures de la lliteratura n’idioma castellán, ente elles Mempo Giardinelli, Mauricio Electorat y Carmen Posadas. Cincuenta autores y 47 cases editores pondrán-y cara a los ‘stand’ de venta de llibros, que yá despachen al públicu allugaos nel patiu y na primer planta del Antiguu Institutu.

Web oficial del Salón

La boda real, vista dende ún de los pocos prismes que faltaben. L’autor Xuan d’Amandi estrénase como monologuista na obra ‘El casoriu de Letizia y otros fechos principales’, una obra que fai por amestar sátira y respetu nel repasu de la “babayonería” cola que se recibió n’España la noticia de la boda’l Príncipe Felipe cola periodista uvieína Letizia Ortiz.

Según la casa editorial Trabe, responsable de la publicación del llibru na so colección “Maestros del humor”, ‘El casoriu de Letizia’ echa mano del sentíu del humor más autóctonu pa poner n’evidencia el propiu anunciu’l casoriu, la ceremonia de pidida y “los patéticos resúmenes de la vida de la novia”, encarnaos en vieyes amigues, vecinos y familia.

Pa promocionar la salida del llibru al mercáu, Trabe entama un actu de presentación previstu pa les 12,30 hores de güei, sábadu, na Aula abierta de la Llibrería Asturiana, asitiada nel númberu 4 de la cai Buenaventura de Paredes, nel barriu uvieín de Pumarín.

Participarán nel actu, ente otros, l’ex presidente asturianu Pedro de Silva y los escritores Luis Arias Argüelles-Meres y Adolfo Camilo Díaz. Habrá amás una interpretación a cargu l’actor Toño Caamaño.

Casi mil quinientos llibros y cartafueyos. Eso fue lo qu’algamó a parir la industria editorial asturiana en 2003, cifra que tien una bona llectura porque supón doblar el volume d’obres asoleyaes nel añu anterior y qu’alluga a Asturies nuna bona posición nel conxuntu de les comunidaes autónomes, en niveles asemeyaos a Navarra y Aragón.

En total, les editoriales asturianes sacaron de los sos obradorios 1.414 nuevos títulos a lo llargo de tol añu pasáu, lo que se traduxo na salida al mercáu de 2,4 millones d’exemplares. Gran parte de dambes cifres correspondieron al asoleyamientu de llibros (1.170 llibros y 2,06 millones d’exemplares), mientres que les imprentes asturianes despacharon en 2003 un total de 244 cartafueyos, materializaos en 408 exemplares.

Son datos del Institutu Nacional d’Estadística (INE), qu’acaba asoleyar les cifres na so web y qu’amuesa a Asturies como una de les comunidaes autónomes proporcionalmente más actives na publicación editorial, mui per delantre de la vecina Cantabria (439 obres publicaes en 2003), Estremadura (513), les Islles Baleares (913), y Castiella La Mancha (969). Nel llau opuestu, Madrid y Cataluña despuntaron nes cifres como les comunidaes más actives editorialmente, con 23.000 y 22.000 títulos respectivamente.

Datos completos na web del INE

Dos novedaes editoriales pa saludar la inminente XXV Selmana de les Lletres Asturianes, qu’empieza el prósimu llunes. La casa Ámbitu acaba asoleyar la versión n’asturianu de ‘Historia universal de Paniceiros’, de Xuan Bello, y la obra de Ramón D’Andrés ‘Primeres Llecciones n’Asturianu’, un métodu didácticu pa facilitar el deprendizaxe de la llingua asturiana.

No que cinca a la narración de Bello, qu’algamó ampliu ecu de difusión y crítica na so versión en castellán -incluyíu’l Premiu ‘Ramón Gómez de la Serna’ del Ayuntamientu de Madrid-, los responsables de la edición de ‘Hestoria universal de Paniceiros’ destaquen la capacidá l’autor fa pacer partícipe al llector del so rellatu, dientro d’una crónica emocional d’un mundu camín del desapaecimientu.

El segundu de los títulos qu’agora asoleya Ámbitu céntrase nel puru didactismu y ufre-y al públicu un nuevu métodu pa deprender llingua asturiana a un nivel básicu. Ensin arrenunciar a entretener al llector con datos curiosos y con claridá pedagóxica, el profesor Ramón D’Andrés -qu’amás ye director de la Oficina de Política Llingüística’l Principáu- firma un total de 112 páxines empobinaes a los que s’averes por primer vegada al idioma asturianu.

La editora Ámbitu, que ye responsable de la publicación del selmanariu Les Noticies, afita un preciu de 12 euros pa caún de los dos nuevos títulos.

Lliteratos, debuxantes y filólogos aconceyen el fin de selmana na llocalidá de Cangas del Narcea pa da-y vida al I Alcuentru d’Escritores n’asturianu occidental, entamáu pola Xunta Pola Defensa de la Llingua Asturiana col envís d’analizar l’estáu actual d’esa variedá llingüística y de poner enriba la mesa datos científicos del pasáu y previsiones de futuru.

L’alcuentru, que se cellebra a partir de la mañana de güei nel Teatru Conde Toreno, en Cangas, axuntará ente otros a lliteratos orixinarios del occidente como Xuan Bello, filólogos especialistes nel lleonés como Héctor Xil y autores gráficos como Ernesto García, Neto.

Los conteníos de les ponencies van de la situación en qu’anguaño se caltién la llingua asturiana nel occidente’l país a la hestoria reciente de la lliteratura n’asturianu occidental. Puntu central sedrá l’actu d’homenaxe previstu al desapaecíu militante asturianista Xosé Álvarez, ‘Pin’, cofundador del Conceyu d’Asturies en Madrid, autor lliterariu y fallecíu en xunetu de 2001 por mor d’una malura cardiaca.

Miles de llectores d’España y Llatinoamérica pasen cada mes por Llanera p’alquirir obres antigües o d’ocasión. La páxina web Iberlibro.com, xestionada dende un inmueble’l Parque Tecnolóxicu d’Asturies, afítase como’l principal buscador de llibros vieyos nel ámbitu hispanu: Recibe 20.000 visites diaries y despacha alredor de 10.000 pedidos al mes, a partir d’un catálogu integráu nel que figuren más de doscientes llibreríes ‘de vieyu’.

La estadística básica de la web complétase con a lo menos otres dos grandes cifres: Un millón y mediu de llibros a la venta y sesenta editoriales on-line, yá que la empresa asturiana nun descuida’l comerciu d’obres lliteraries nueves. La práctica totalidá de los llibreros y editores aconceyaos embaxo’l paragües difusor d’Iberlibro son españoles, portugueses o llatinoamericanos, pero nel catálogu hai sitiu tamién pa obres publicaes n’asturianu, catalán, inglés, francés o euskera.

Tala bayura, cultivada nos cuatro años qu’Iberlibro lleva na rede, acabó por convertir el buscador dixital nel referente pa universitarios, investigadores y coleccionistes, que llocalicen obres difíciles d’atopar cola sola ayuda d’una conesión a Internet y ensin coste adicional, yá que la web mantiénse gracies a una cuota mensual que paguen los llibreros y editores, en proporción al númberu de títulos que tienen a la venta nel catálogu.

Dicho d’otru mou, la páxina fai de meru intermediariu ente llector y llibreru, pero cubre importantes llamuergues, en cuantes que facilita al másimu la rapidez de la llocalización d’exemplares, elimina les barreres xeográfiques y acaba cola obligada consulta minuciosa de los volúmenes na propia llibrería hasta alcontrar -o non- el títulu deseáu.

Los responsables d’Iberlibro trabayen yá pa renovar la imaxe de la web nos prósimos meses, col envís d’aportar a más llibreríes de Portugal -onde l’usu d’Internet inda nun ta tan xeneralizáu como n’España- y d’integrar a más llibreros llatinoamericanos nel catálogu, yá que Chile y Arxentina son dos de los países d’onde salen la mayor parte de los pedíos.

Páxina web d’Iberlibro