Lliteratura

Un exerciciu de “streptease lliterariu”. Asina describe l’escritor Pablo Rodríguez Medina el so poemariu ‘El color de l’ausencia’, ganador del premiu ‘Fernán Coronas’ y que güei presenta n’Uviéu como recorríu peles alcordances de la mocedá y guía pa encarar ausencies. L’autor entreguín destaca’l puxu de la poesía n’asturianu ya interprétalu como un signu d’anormalidá de la lliteratura fecha n’Asturies.

A lo llargo de trescientos versos, los últimos qu’escribió hasta agora Rodríguez Medina, l’autor torna los güeyos p’hacia lo que s’acumula na so propia memoria y redescribe episodios íntimos, como “cuando diba a bañame en pelota picada al ríu nel saltu d’El Condáu y volvía xintando cirueles, y too yera enormemente sensitivo”.

A esi repasu de les vivencies propies dedica Rodríguez Medina la primer parte’l llibru, faciendo repasu d’una mocedá evocada al traviés del golor y el tastu freses, prunos y arándanos, y perdida depués cola llegada de les primeres ausencies. La busca de cómo ‘xestionar’ eses faltes ocupa la segunda metá’l poemariu del autor entreguín, marcáu tres d’escucha-yos cantar a los habitantes d’un asilu una tonada cuya lletra entrugaba “ónde pueo dir”.

Creador de poesía, pero tamién d’una bayurosa obra en prosa pesie a la so mocedá -Pablo Rodríguez Medina nació en 1978-, l’escritor eloxa’l puxu del xéneru poéticu dientro la lliteratura en llingua asturiana ya interpreta nesi fechu una seña de qu’esa lliteratura “tovía nun ta normalizada, yá que la poesía suel ser xéneru minoritariu frente a , por exemplu, la narrativa”.

Pablo Rodríguez Medina, qu’intervino na Xunta d’Escritores cellebrada el pasáu fin de selmana en Llanes pa pedir que los autores n’asturianu salgan a la gueta del llector y cuiden con más procuru el mercáu, presentará ‘El color de l’ausencia’ (Trabe) a les 20 hores nel chigre Naranco, na cai San Xosé d’Uviéu.

Más atención pa la lliteratura n’asturianu nes biblioteques y mayor implicación del Principáu na dignificación de la figura’l creador. La Xunta d’Escritores peslló ayeri les sos puertes en Llanes con eses demandes, nuna asamblea qu’amás reconoció’l llabor de Conceyu Bable, dio-yos la bienllegada a los autores más mozos y reclamó la coficialidá de la llingua asturiana.

Asina culminó un alcuentru de tres díes cuyu coordinador, Xuan Bello, calificó de “éxitu”, y qu’aconceyó a cincuenta representantes de les tres xeneraciones d’escritores n’asturianu. La más reciente d’elles protagonizó la xornada de pieslle, nun alderique centráu na necesidá de promocionar les obres énte’l públicu y evitar, en términos del xoven autor Pablo Rodríguez Medina, “escribir pa teatros vacíos y estanteríes llenes”.

Esti mesmu autor proclamó la necesidá que, al so xuiciu, esiste de que la lliteratura asturiana se normalice dafechu -y, poro, haiga tamién novela ‘rosa’ o narraciones d’aventures en llingua asturiana-, y llamó a los sos compañeros d’oficiu a “buscar al llector envede buscanos a nosotros mesmos”. Les pallabres de Rodríguez Medina, y d’otros integrantes de la so xeneración, suscitaron un alderique qu’acabó dividiendo a los escritores énte la oportunidá d’abri-y mercáu a la lliteratura n’asturianu.

Ausencia d’autoridaes

La primer xuntanza de creadores lliterarios en llingua asturiana que se cellebraba depués de seis años d’ausencia d’alcuentros d’autores culminó, mesmo qu’empezara el pasáu vienres, ensin presencia d’altes autoridaes polítiques del Principáu, pesie a que la Xunta taba espresamente auspiciada pola Conseyería de Cultura, Comunicación Social y Turismu: Si a la ceremonia d’apertura namás asistieron el responsable de la Oficina de Política Llingüística, Ramón D’Andrés, y una representante del Ayuntamientu de Llanes -cuando taben previstes les intervenciones de l’alcaldesa y del director xeneral de Política Llingüística, Carlos Madera-, el pieslle realizóse ayeri ensin embaxada institucional dala.

A lo llargo de tres díes, los cincuenta escritores aconceyaos nel Oriente analizaron la identidá de ca una de les xeneraciones d’autores, recuperaron l’alderique sobro la idoneidá d’una ambientación rural o urbana pa les narraciones ya intercambiaron opiniones al rodiu de la producción lliteraria n’asturianu.

Archivu. La ruptura ente les distintes xeneraciones d’autores centra’l debate na Xunta d’Escritores

Los escritores n’asturianu de los ochenta foron “insumisos” respecto a la xeneración anterior incluso nel estándar llingüísticu. A esa conclusión llegaron esta mañana los cincuenta autores de tres xeneraciones que participen na Xunta d’Escritores de Llanes, un alcuentru que nes sos primeres sesiones discutió tópicos xeneracionales y repasó la dualidá ente lliteratura rural y urbana.

Nun alderique que “al empiezu foi de guante blancu y terminó repartiendo guantazos”, según ironizó Adolfo Camilo Díaz, ún de los participantes, los autores aconceyaos en Llanes sorrayaron esta mañana l’alloñamientu de la nomada xeneración de los ochenta respecto a los escritores del Surdimientu, un procesu que Xandru Fernández definió en términos de dixebra familiar: “Taben el padre Arias -Xosé Lluis García Arias- y el tíu Xuan Xosé -Sánchez Vicente-“, y a partir d’ehí los nuevos creadores tomaron posición en calidá de respectivos “cuñaos o insumisos”.

Miembros de la xeneración intermedia de les tres qu’anguaño se cuenten na lliteratura n’asturianu precisaron amás que nin siquiera se siguió l’exemplu, con calter xeneral, del modelu llingüísticu propuestu polos sos antecesores “porque nun nos convencía; necesitábemos una ferramienta afayadiza puesta al día”, resumió Camilo Díaz. Y esa toma de distancia prollongóse tamién na dixebra ente creación y militancia política, dos conceptos ximelgos nel casu de los autores del Surdimientu pero independientes nos escritores de los ochenta.

Los primeros alderiques de la Xunta d’Escritores, qu’ayeri entamó en Llanes coles ausencies del director xeneral de Promoción Cultural y Política Llingüística y de l’alcaldesa del conceyu, cuyos nomes figuraben nel programa, repasaron amás la reivindicación del mundu campesín na lliteratura d’Asturies y la so oposición frente a les narraciones ‘urbanites’, depués d’una conferencia del poeta José Luis Piquero qu’ayeri analizó tradición y futuru de les lletres asturianes.

La Xunta d’Escritores continúa güei con un alderique sobro la primer promoción del Surdimientu y finará al mediudía de mañana, domingu, xornada na que tendrán presencia los autores más mozos. Un recital de poesía rematará l’alcuentru.

Los escritores en llingua asturiana realcuéntrense depués de seis años. Cincuenta autores de tres xeneraciones lliteraries participen a partir de güei en Llanes nuna xunta que quier abrir una nueva etapa na lliteratura fecha n’Asturies y qu’echa a andar con una conferencia del poeta José Luis Piquero y un recital poéticu.

Nesa llectura de testos poéticos participarán los autores Esther Prieto, Lourdes Álvarez, Pablo Antón Marín Estrada, Marta Mori y Miguel Rojo, prolegómenu d’un conceyu que continuará na xornada’l sábadu con sendos alderiques sobro les xeneraciones del Surdimientu y de los años ochenta dirixíos, respectivamente, por Berta Piñán ya Ignaciu Llope.

Asinamesmo, l’autor Xosé Bolado disertará a media tarde sobro lliteratura ya identidá y la poesía volverá pesllar la xornada, xunta un recital musical a cargu de Carlos Rubiera. La Xunta d’Escritores Asturianos rematará el domingu con una intervención d’Ismael María González Arias, un alderique en tornu al papel y el llabor de los autores asturianos nel cambiu de sieglu y una tercera llectura poética, nesta ocasión protagonizada por representantes de la xeneración más moza de creadores: Vanessa Gutiérrez, Susana Rodríguez Cela, Pablo Texón y Henrique Facuriella.

La pasada selmana, el coordinador del alcuentru, Xuan Bello, presentó la xuntanza como una cita que nun quier ser un muru de llamentaciones, sinón un puntu de partida p’abrir un tiempu nuevu na lliteratura asturiana. A Llanes acudirá una representación de 50 autores, depués d’una “esbilla traumática”, en pallabres de Bello, por razones d’aloxamientu y operatividá.

La última xunta d’escritores cellebróse na llocalidá de Lluanco nel añu 1998, depués d’alcuentros asemeyaos en Villaviciosa, Lluarca y tamién en Llanes, ésti caberu a finales de los años ochenta. L’asamblea que güei comienza cuenta col auspiciu de la Conceyería de Cultura, Comunicación Social y Turismu.

Archivu. Los escritores axuntaránse en Llanes cola vocación d’abrir una etapa nueva na lliteratura asturiana

Diez mil exemplares de ‘El Quijote’ con sellu autóctonu, a un preciu popular de menos de 6 euros. El Principáu asoleyará en comuña cola Real Academia de la Lengua Española una edición especial de la obra de Miguel de Cervantes pa conmemorar el cuartu centenariu de la novela considerada como la obra narrativa de referencia en llingua castellana.

El presidente asturianu, Vicente Álvarez Areces, robló esta mañana n’Uviéu un conveniu col director de la Real Academia, Víctor García de la Concha, que compromete a l’Alministración autonómica a alitar una meyor conocencia de ‘El Quijote’ col asoleyamientu de la edición especial, que va incluyir una presentación institucional y l’escudu del Principáu.

El volume auspiciáu pol Gobiernu asturianu sedrá un llibru de tapa dura, con 1.300 fueyes illustraes con grabaos facsimilares del sieglu XVIII y collaboraciones, ente otros autores, de Mario Vargas Llosa, Francisco Ayala, Martín de Riquer, Guillermo Rojo, José Antonio Pascual y Margit Frenk.

Según precisó el presidente autonómicu, la edición estraordinaria va empobinada especialmente a la mocedá y pretende ser un preséu accesible pa que tanto los siguidores de la obra cervantina como los llectores noveles s’averen a ‘El Quijote’.

Una narración coral ente la vida y la muerte relatada, ente la crudeza y l’humor, por una vaca y un calamar fritu. El xixonés Quique Faes, redactor d’Asturnews, presenta esta tarde n’Uviéu la so tercer novela, ‘L’agobiante imperfección de les coses’, una obra que la editorial Trabe cataloga como “esperanzada y devastadora al empar, con personaxes siempres al borde de dalgún abismu”.

Na so nueva incursión na narrativa, el periodista xixonés retoma la borrinosa llende ente la realidá y la ficción yá presente na so anterior novela, ‘Malena fecha de sol y de fresa’, y faila inesistente nuna acción collectiva na que personaxes vivos y muertos -toos abocaos a protagonizar una mesma trama- lloren soledaes, semen amores nuevos y traten con una realidá implacable.

El relatu, prologáu pol redactor del diariu ‘El Comercio’ Francisco Álvarez, inclúi amás, en pallabres del prologuista, un “axuste de cuentes col periodismu oficial, una incruenta revancha que yo cuido xusta y necesaria” personificada nuna fotógrafa de prensa atormentada pola desproporcionáu y dacuando inverosímil instintu periodísticu del so respectivu redactor xefe.

La presentación de la novela de Quique Faes cellebraráse a les 20 hores nel chigre El Naranco d’Uviéu, na cai San Xosé, dientro d’una selmana na que la editorial Trabe vien de presentar otres dos novedaes -‘Caleyes con oficiu’, de Montserrat Garnacho, y una reproducción facsimilar de les páxines de Conceyu Bable na revista ‘Asturias Semanal’- y prevé pesllar cola promoción el sábadu, en San Xuan de Beleño, d’una guía de rutes per Ponga ellaborada por Arancha Losa y José Carlos Mori.

Ritmu desigual y colapsu a fin d’añu. La edición de llibros en llingua asturiana, con una actividá discreta nel primer semestre de 2004, concentra la producción editorial nos últimos meses del añu y enllena el mercáu de novedaes por mor de la xustificación de les subvenciones concedíes pol Principáu, que siguen determinando decisivamente la velocidá y el momentu de publicación de les obres.

Convocaes n’abril y resueltes de forma oficial en setiembre pasáu, les ayudes públiques otorgaes pola Conseyería de Cultura, Comunicación Social y Turismu a la edición de llibros n’asturianu teníen como condición la entrega, por parte de les editoriales, de 25 exemplares de cada obra subvencionada antes del sábadu pasáu, un plazu que calcó l’acelerador de la producción editorial y que saca al mercáu, de forma más o menos simultánea, los 74 llibros subvencionaos esti añu.

Nesi contestu, y pa evitar un colapsu que baxe les ventes de ciertes obres nun mercáu yá de por sigo discretu na compra d’exemplares, dalgunos editores opten por dar tolos llibros a la estampa, pa poder asina xustificar a tiempu l’ayuda del Principáu, y retener darréu la distribución de parte d’ellos durante unes selmanes.

El Gobiernu autonómicu repartió esti añu un total de 184.000 euros n’ayudes económiques pal asoleyamientu de llibros n’asturianu ente seis cases editoriales: Trabe (68.600 euros pa publicar 28 llibros), KRK (11.400 euros, 5 llibros), Llibros del Pexe (5.900 euros, 3 obres), Madu Ediciones (6.500 euros, 3 títulos), Vtp (40.300 euros p’asoleyar 12 llibros) y Publicaciones Ámbitu (51.300 euros, 23 obres).

La Oficina de Política Llingüítica del Principáu unvió-yos una carta a los editores pa consensuar nueves víes d’ayuda qu’eviten les “inercies” propies del mercáu tradicional del llibru en llingua asturiana.

Archivu. El Principáu estudia implantar un nuevu sistema de beques de creación pa escritores n’asturianu

Una exhumación de lletres. La editorial Trabe presenta mañana, nel mesmu día en que se cumplen 30 años de la fundación de Conceyu Bable, una reproducción facsimilar de los primeros testos del hestóricu collectivu, publicaos na revista ‘Asturias Semanal’ ente 1974 y 1977. La obra inagura una serie concebida pa rescatar el pasáu inmediatu d’Asturies y ta prologada por Pablo San Martín y Xulio Viejo.

A lo llargo de más de 300 páxines y a un preciu de venta de 20 euros, el volume ‘Conceyu Bable n’Asturias Semanal’ reproduz los escritos que’l grupu referencial del Surdimientu asoleyó nesa publicación dende la fundación del collectivu hasta xunu de 1977, nuna obra que la casa editora quier apurrir como material d’estudiu o como entretenimientu pa quien quiera averase a un “intensu, apasionáu y apasionante periodu de la nuesa historia más reciente”.

Magar que la revista ‘Asturias Semanal’, dirixida por Graciano García, publicó nes sos fueyes abondos editoriales, artículos y cartes de los llectores al rodiu l’emerxente movimientu asturianista, el llibru qu’agora s’asoleya céntrase en recuperar les páxines propies que Conceyu Bable publicaba con periodicidá, baxo la coordinación de Lluis Xabel Álvarez, Xosé Lluis García Arias y Xuan Xosé Sánchez Vicente.

La presentación del llibru realizaráse a les 18,30 hores de mañana, martes, na Llibrería Asturiana de la cai Buenaventura de Paredes, n’Uviéu, dientro d’una selmana de conmemoraciones del 30 aniversariu de Conceyu Bable qu’arranca güei con un alcuentru d’artistes plásticos nel Atenéu Obreru de Xixón y l’apertura de la esposición ‘Pegatines que falen’ na biblioteca d’El Fontán, n’Uviéu.

Nun sedrá un “muru de llamentaciones”, sinón un alcuentru con “cierta vocación fundacional” que quier abrir una nueva etapa na lliteratura asturiana. L’escritor Xuan Bello, coordinador de la Xunta d’Escritores que se cellebrará en Llanes del 26 al 28 de payares, presentó güei con esa declaración d’intenciones l’asamblea d’autores, que por primer vegada agrupará a creadores de tres xeneraciones.

Nes sesiones del alcuentru analizaráse una lliteratura, la ellaborada en llingua asturiana, que n’opinión de Bello yá tien “posu y pesu importantes”, ye útil pa la sociedá y, depués de 30 años de camín, pue ufri-yos a los llectores “dalgo colos pies realmente nel suelu”. Como demostración de too ello, les cifres: Unos 6.000 llibros nel mercáu, según la estimación de Xuan Bello, y 400 autores movilizaos, de los que sólo una representación de 50 escritores tará presente en Llanes por razones d’infraestructures y operatividá.

Por primer vegada, una tercer xeneración de creadores lliterarios liderada, ente otros, por Vanessa Gutiérrez, Enrique Facuriella y Pablo Texón, participará nun alcuentru d’escritores xunta los miembros de les otres dos grandes xeneraciones. En representación de la primera, asistirán a Llanes autores como Manuel Asur, Lluis Xabel Álvarez y Roberto González-Quevedo, mientres qu’Esther Prieto, Dolfo Camilo Díaz y Berta Piñán encabezarán el grupu intermediu que vio afitase la lliteratura en llingua asturiana.

“Nun tán tolos que son”, reconoció Bello, pero yera inevitable facer “una esbilla traumática”. En cualquier casu, la embaxada d’escritores presente na Escuela de Música de Llanes falará d’una lliteratura cada vegada más reconocida, aseguró Bello, qu’atraviesa un periodu arriquecedor. Poro, l’escritor y coordinador de la Xunta d’Escritores fizo un llamáu a los llectores pa que consuman obres n’asturianu y “nun esperen a qu’haiga un reconocimientu fuera” d’eses obres.

Y eso pesie a que’l mercáu editorial en llingua asturiana ye “llimitáu” y vive inda mui pendiente de les ayudes públiques, reconoció Ramón D’Andrés, xefe de la Oficina de Política Llingüística del Principáu, que tamién participó güei na presentación de la Xunta al llau del director de Promoción Cultural, Carlos Madera, y del conceyal de Turismu de Llanes, José Balmori.

De forma paralela al alcuentru, el primeru que cellebren los escritores dende la so última xuntanza a finales de los años noventa en Lluanco, editaráse una antoloxía indicativa del camín recorríu hasta agora pola lliteratura asturiana.

Un testu escritu n’asturianu occidental impónse por primer vegada el Concursu de relatos curtios de Cangas de Narcea. El xixonés Ezequiel Cala ganó ayeri el premiu absolutu del certame cola narración ‘M.E.’, mientres que l’autor orixinariu de Cangas pero afincáu en Málaga Diego Rodríguez recibió’l galardón específicu na categoría d’asturianu occidental, cola obra ‘Pente neveiros’. Dambos premios tán dotaos con 600 euros.

El palmarés del concursu completóse depués de la xuntanza’l xuráu, qu’ayeri asoleyó el so fallu, con otros dos nomes: Los del xixonés Pablo Rodríguez Alonso, qu’algamó el segundu premiu (300 euros) cola narración ‘Un día de mayu’, y del periodista tamién afincáu en Xixón Naciu Varillas, que se fizo merecedor del tercer premiu (180 euros) pol cuentu ‘Branu eternu’.

Nuna nota asoleyada pol Ayuntamientu de Cangas de Narcea, los miembros del xuráu -presidíu pola conceyala de Cultura, Mónica Díaz, y del que formó parte el secretariu de l’Academia de la Llingua, Roberto González-Quevedo, ente otros- destacaron la mocedá de los participantes y l’altu númberu de relatos n’asturianu occidental presentaos a concursu.

Concebíu precisamente p’alitar la creación lliteraria nesa variedá llingüística, el certame de Cangas afítase como ún de los concursos yá habituales na temporada, xunta otres convocatories como los certámenes d’El Garrapiellu, l’asociación de vecinos de Sograndiu y l’Ayuntamientu de Bimenes.