Lliteratura

‘Palabres de payaso’, el primer llibru de poemes que publica Miguel Allende amuesa la voz d’un autor novedosu y poco corriente dientro de les sensibilidaes hasta agora conocíes nel panorama lliterariu en llingua asturiana. Escritor secretu dende la so adolescencia, afronta la edición d’esti primer volume de versos como un retu pa la difusión de la so obra nun campu, como’l de la poesía, que’l propiu autor califica de ‘círculu cerráu y minoritariu nel que son los propios poetes los que lleen a los otros poetes’.

Miguel Allende (Llaviana, 1960) ye escépticu dica la repercusión que pueda tener el so llibru, un conxuntu de poemes nel que recueye testos de diferentes époques de la so vida y qu’axunta agora embaxo un títulu tan sorpresivu como ‘Palabres de payasu’, según desplica l’autor: “por quita-y trescendencia a la propia poesía, una forma lliteraria qu’entiendo ensin l’arniu máxicu qu’alcuando se-y suel colocar enriba”.

Allende considera que’l de la poesía ye un “círculu cerráu, mui minoritariu, non namás n’asturianu, en cualquier llingua, casi nun hai llectores y son los propios poetes los que lleen a otros poetes”. Agora cola publicación del so primer volume tamién Allende entra nesi círculu con unos poemes qu’él mesmu define como “sueltos, dispersos y a la vez tramaos nun llabor cuasi d’artesania”.

‘Palabres de payaso’, editáu por Trabe, preséntase esti xueves 10 a les 19,30 de la tarde na Casa Cultura de La Pola Llaviana.

La poeta Ana Vanessa Gutiérrez define’l so llibru ‘La danza de la yedra’ como “un llugar de búsqueda más que d’alcuentros, de búsqueda de la propia voz poética, tamién de los caminos andaos y de los caminos por andar na vida”. El poemariu, premiáu en 2003 col Teodoro Cuesta, ye le esperada segunda entrega de la so obra en marcha, una de les más novedoses y atractives del panorama lliterariu actual en llingua asturiana. “La danza de la yedra” recueye alrodiu una treintena de poemes nos que la busca de la propia identidá, los envises del deséu, la presencia de la muerte y la destrucción son los temes argumentales.

Ana Vanessa Gutiérrez (Urbiés, 1980) ye dende l’aparición en 2003 del so primer llibru de poemes “Onde seca l’agua” una referencia imprescindible ente los autores de la tercera xeneración lliteraria del Surdimientu. Nesi mesmu añu coincidiendo nel tiempu cola publicación del so volume d’estrena recibió’l prestixosu premiu Teodoro Cuesta que concede l’Ayuntamientu de Mieres por “La danza de la yedra”(Trabe). Pa Gutiérrez la concesión del premiu supunxo “dame a conocer quiciabes más de lo que cabía esperar de la recién publicación del primer llibru y la coincidencia nel tiempu col premiu ayudó a que tuviere mayor difusión la mio obra, a la vez, nun terrén más personal, foi un soplu d’aliendu, una recarga anímica, si siguí escribiendo dende entós foi en bona parte gracies a esa inyección d’ánimu”.

Consciente del interés qu’empiecen a suscitar ente los llectores más atentos los nuevos autores de la última xeneración del Surdimientu, l’autora de “La danza de la yedra” considérase a ella mesma: “una pieza pequeña y de les últimes d’esa promoción xeneracional que cuenta con nomes ya bien afitaos como los de Martín López-Vega, Chechu García o Xandru Fernández”. Tocante a los posibles rasgos propios d’esa tercer xeneración, Ana Vanessa Gutierrez resalta que “parten casi toos de los caminos emprendíos polos poetes de la segunda xeneración y nos autores nuevos veo un mayor atrevimientu, quiciabes, una manera de dicir más desenfadada”.

“La danza la yedra” ufierta una manera d’afrontar eses nueves visiones poétiques de la xeneración más moza del Surdimientu: la fidelidá a los oríxenes y a la propia identidá de muyer, les derrotes del tiempu y la muerte, los envises traicioniegos o prestosos del deséu, son los temes alrodiu los que constrúi Ana Vanessa Gutiérrez los sos poemes.

La Conseyería de Cultura ta acabante convocar les subvenciones pal fomentu de la creación lliteraria en llingua asturiana o gallegu-asturianu. Les ayudes empobínense a obres de cualquier xeneru y la cuantía másima pa cada proyectu nun habrá pasar de los 3.000 euros. Al empar la Dirección Xeneral de Promoción Cultural y Política Llingüística comprométese a mercar exemplares de les obres subvencionaes que se publiquen por editoriales privaes nun plazu non superior a los ocho meses dende la entrega de la obra.

La primer acción n’executase del Plan pa la Normalización Social del Asturianu 2005-2007 acaba d’emprimase cola publicación nel BOPA (28/02/2005)de la convocatoria de subvenciones dedicaes al fomentu de la creación lliteraria. L’oxetu d’estes ayudes a los escritores tien por fin, según se recueye nes bases, el de “incentivar el so esfuerzu personal, de meyorar les sos posibilidaes práctiques de dedición a l’actividá creativa y de fomentar, en definitiva, la creación lliteraria n’asturianu o gallegu-asturianu” en cualquier xéneru: poesía, narrativa, teatru y ensayu.

Una Comisión de Valoración, designada pola conseyera de Cultura, va encargase de desaminar les solicitues, entrevistase colos solicitantes y evaluar los proyectos presentaos. La comisión va tar presidida pol Director Xeneral de Promoción Cultural y Política Llingüística y integrada por un mínimu de tres y un másimu de cinco persones relacionaes col ámbitu oxetu de la convocatoria, procurando la participación nella de representantes d’instituciones culutruales como l’Academia de la Llingua y la Universidá d’Uviéu. Esta comisión valorará los proyectos colos criterios de mayor interés pal desarrollu de la lliteratura n’asturianu o gallegu asturianu, y tamien les garantíes de calidá del trabayu presentáu, xunto cola trayectoria y solvencia como creador de la persona solicitante.

El plazu establecíu pa presentar proyectos pa la concesión de les ayudes a la creación lliteraria ye d’un mes dende’l día siguiente a la publicación de la convocatoria nel BOPA y el plazu másimu d’entrega de los proyectos aprebaos remata’l 12 de payares.

El director del Aula de les Metáfores de Grao, Leopoldo Sánchez Torre, presentó na sé de la Conseyería de Cultura, les actividaes programaes por esti espaciu creáu por iniciativa del escritor Fernando Beltrán pa difundir l’interés pola poesía. Les actividaes inaugúrense el 16 de marzu con una llectura de poemes d’Antonio Gamoneda, a la que va siguir el ciclu cinematográficu “Los poetes van al cine” y un taller de creación poética.

El ciclu de películes va tar coordinaú por Vicente Domínguez, responsable de los cursos Universo Media del Festival de Cine de Xixón y nél van proyectase los filmes: ‘Sylvia’ (2003, Cristinne Jeffs), ‘Antes que anochezca’ (2000, Julian Schnabel), ‘Cravan vs. Cravan’ (2002, Isaki Lacuesta), ‘El desencanto’ (1976, Jaime Chávarri) y ‘Tom y Viv’ (1994, Brian Gilbert.

Otra de les actividaes del Aula ye l’empiezu el 6 d’abril d’un taller de creación poética coordináu pol poeta Fernando Menéndez embaxo’l títulu “La poesía más allá de la poesía”. El día 29 d’abril, dientro’l marcu de la celebración de la Selmana de les Lletres va proyectase la miniserie de televisión na que cinco realizadores del nuevu cine asturianu:Juan Luis Ruíz, Jorge Rivero, Ramón Lluis Bande, Sergio Sánchez y José Braña ponen imáxenes a poemes de Berta Piñán, Roberto González-Quevedo, Ana Vanessa Gutiérrez, Xuan Bello y Pablo Antón Marín Estrada.

L’Aula de les Metáfores tien como oxetivos la consolidación d’esti espaciu como biblioteca de poesíay centru d’información y documentación poética, abiertu al públicu, asina coo la programación d’actividaes dedicaes al fomentu de la poesía al través de llectures, proyecciones, esposiciones, visites educatives y la incentivación de la creatividá lliteraria.

La conceyalía de Cultura del Ayuntamientu de Mieres va aprovechar la entrega del Premiu Teodoro Cuesta de Poesía pa xuntar nuna tertulia pública a cinco escritores de la cuenca del Caudal apocayá reconocíos con importantes premios. Fulgencio Argüelles, Xandru Fernández, Miguel Barrero, Ana Vanessa Gutiérrez y José Luis Piquero falen de les sos esperiencies lliteraries nun actu presidíu pol alcalde Luis María García y nel que van recibir el so premiu los ganadores de la última convocatoria del Teodoro Cuesta: Marta Mori y Anxelu G.Morán.

La cita que va convertir el salón de plenos del Ayuntamientu de Mieres nun Café Lliterariu ye esti miércoles a les 12,30 y con ella pretende reconocese ‘l trabayu de cinco autores de la Cuenca del Caudal qu’amás del so orixe tienen en común l’haber algamao apocayá prestixosos galardones lliterarios. Los responsables de Cultura del conceyu del Camín con esta iniciativa quieren despertar l’interés del públicu pola obra d’unos escritores que tienen trescendío l’ámbitu local pa consiguir la reconocencia del so llabor tanto n’Asturies como nel restu l’estáu.

Los escritores Fulgencio Argüelles (Premiu de Novela Café Gijón), José Luis Piquero (Premiu Ojo Crítico de Poesía de RNE), Miguel Barrero (Premiu Asturias Joven de Narrativa), Ana Vanessa Gutiérrez (ganadora del anterior premiu de Poesía Teodoro Cuesta), y el tamién poeta turonés Xandru Fernández (premiu Acebal de Poesía), desenvuelven la so obra en llingua asturiana o en llingua castellana, nel terrén de la narrativa o la poesía y proceden de distintes xeneraciones.

Agora xúntense por primer vez pa falar de tolo que-yos tien aportao el reconocimientu de los sos premios y de cómo entiende cadún el so llabor creativu. Los organizadores del alcuentru cuenten da-y continuidá en futures ocasiones pa xuntar en Mieres a otros autores vinculaos col conceyu.

Archivu. Marta Mori y Xosé Ánxelu Gutiérrez algamen el premiu de poesía ‘Teodoro Cuesta’

Una partida de 35.000 euros pa estimular la creación lliteraria en castellán, 5.000 más qu’en 2004. La Conseyería de Cultura, Comunicación Social y Turismu acuta esa cantidá pa becar con hasta 3.000 euros por obra a autores asturianos de narraciones, poemarios, ensayos o testos dramáticos. Les ayudes a la formación y promoción d’artistes xunifíquense y dismunúin de 48.000 a 40.000 euros respecto a la convocatoria del añu pasáu.

Según asoleya’l Boletín Oficial del Principáu d’Asturies (BOPA) na so edición de güei, el Principáu acuta un total de 35.000 euros p’alitar la creación lliteraria en castellán en tolos sos xéneros, dientro d’un programa d’ayudes económiques que medra respecto a los 30.000 euros consignaos l’añu pasáu pa fomentar la vitalidá de la lliteratura asturiana, pero que mantién les calterístiques principales d’ediciones anteriores.

Asina, cada proyectu subvencionáu podrá optar a una ayuda másima de 3.000 euros, y les solicitúes habrán tramitase énte la conseyería de Cultura nun plazu d’un mes natural a contar a partir de mañana, miércoles, hasta’l prósimu 24 de marzu. Los autores que reciban sofitu económicu’l Principáu quedarán comprometíos a rematar la obra subvencionada antes del 21 de payares.

Nel casu de les ayudes económiques pa que persones o grupos non profesionales de teatru lleven alantre los sos proyectos escénicos -convocatoria que tamién s’asoleya nel BOPA de güei-, el presupuestu determináu pol Principáu medra de los 24.000 euros de 2004 hasta los 27.000, mesmo que les subvenciones pa realizadores de cine y video -de 30.000 a 35.000 euros-.

Nel otru platu de la balanza, el Gobiernu recurtia en 8.000 euros les ayudes económiques pa la formación y promoción d’artistes nes estayes de la música, el teatru, la dancia, el cine y les artes plástiques, que na edición del añu pasáu yeren de 48.000 euros y desdoblábense en dos convocatories distintes, una pa la formación y otra pa la promoción. Nesta edición de les subvenciones, dambos conceptos axúntense nuna única convocatoria.

Convocatoria íntegra pa la creación lliteraria

La revista de lliteratura y arte Lunula, editada pol Atenéu Obreru de Xixón, llega a la so entrega diecinueve con un númberu dedicáu a amosar les últimes creaciones d’autores como el David González, Sibisse Rodríguez, Alberto Linares, Rosana Popelka, Natalia Pastor, Alberto Amez, Juan Bosch, Antonio Bermejo. Escritores y artistes visuales xúntense nesta nueva entrega de la veterana revista editada pol Atenéu Obreru y dirixida por Jesús Rodríguez Castellano que va presentase’l miércoles 23 en Xixón.

L’actu va tar empobináu por dos de les collaboradores de la revista, Roxana Popelka, que va presentar l’apartáu fotográficu y Sibisse Rodríguez Sánchez, que se va ocupar del ámbitu lliterariu. La presentación va cuntar cola partipicación final del grupu de boleros Munglow. Ló nómina de collaboradores d’esti númberu 19 de la revista xixonesa ofrez una amuesa diversa y amplia de la creación lliteraria y artística tanto asturiana como del restu del estáu na que destaquen los trabayos de los dos collaboradores más mozos: Marina Valdés y Lucas L. Sosa, de siete años, que publiquen “Cartas y notas de amor de Marina Valdés”. La parte final de la revista ta dedicada a reseñes y comentarios de llibros.

L’actu de presentación del númberu 19 de Lunula ye esti miércoles a les 20,30 nos locales del Atenéu Obreru de Xixón

La Universidá d’Uviéu interésase menos polos llibros en llingua asturiana. La institución académica almacena en préstamu o depósitu 660 títulos de les principales editoriales n’asturianu, dos tercios de los poco más de mil llibros nesi idioma que tán editaos y que sí incorporen les biblioteques que rexenta’l Principáu.

Esa ye, a lo menos, la conclusión que s’estrái al comparar los datos d’obres lliteraries en llingua asturiana atesoraes nes biblioteques universitaries y nes de la rede autonómica, según los catálogos on-line que permiten llocalizar llibros por internet tanto na Universidá como nos centros del Principáu.

Por editores, la casa uvieína Trabe ye la que más títulos axunta nes estanteríes de les biblioteques autonómiques (351), siguida de Llibros del Pexe (267), Ámbitu (149), Editora del Norte (122) y Vtp (111), amás de 31 títulos asoleyaos por Alborá Llibros. En total, 1031 llibros de les seis principales editoriales qu’empleguen o emplegaron la llingua asturiana como idioma habitual nes sos publicaciones. Una cifra que se corresponde, aprosimadamente, col total d’obres n’asturianu espublizaes hasta agora.

Ensin embargu, esa cantidá baxa hasta los 660 títulos si los llibros n’asturianu se busquen nes estanteríes de les biblioteques de la Universidá, con una proporción asemeyada na presencia de les editoriales: 239 títulos de Trabe, 152 de Llibros del Pexe, 87 de Vtp, 85 d’Ámbitu y 72 d’Editora del Norte.

Según datos de l’Axencia española del ISBN, l’organismu ensertáu nel Ministeriu de Cultura que controla y sistematiza tola producción editorial estatal, asignándo-y un númberu a cada obra dientro d’un códigu d’aplicación mundial (l’International Standard Book Number, que da llugar al acrónimu ISBN), la lliteratura en llingua asturiana asoleya una media de cien llibros al añu.

Accesu al catálogu colectivu’l Principáu

La escritora y periodista d’orixe tunecín Sophie Bessis, docente na Universidá parisina de La Sorbona, ye la nueva ganadora’l Premiu internacional ‘Xovellanos’ d’ensayu, qu’esti mediudía falló en Xixón la Fundación Foro Jovellanos. La obra vencedora, ‘Las emergencias del mundo. Economía, poder, alteridad’, ye un análisis de la llucha mundial contra la fame y la probitú.

Más de 120 oxixinales optaben al premiu, una cifra que marcó’l techu del certame, al que na edición anterior concurrieron 90 trabayos procedentes d’una decena de países, y amplió l’ámbitu xeográficu nel que despierta interés el concursu. Nesta ocasión, el xuráu hebio de valorar la calidá d’obres empobinaes dende una llarga llista de países na que figuren Uruguay, Colombia, Brasil, Arxentina, Ucrania, India y Suecia, ente otros.

A la última esbilla aportaron un total de quince ensayos ente los que’l testu de Bessis resultó elixíu depués del alderique final del xuráu, que tuvo integráu pol ex xefe de la Casa Real, Sabino Fernández Campo; el rector de la Universidá d’Uviéu, Juan Vázquez; l’escritor y ex presidente’l Principáu Pedro de Silva; el caderalgu Lluis Xabel Álvarez; el filósofu Jorge Fernández Bustillo, y l’abogáu Juan Luis Iglesias.

Na edición de 2004, el ganador foi’l matemáticu colombianu Fernando Zalamea pola obra “Ariadna y Penélope. Redes y Mixturas en el Mundo Contemporáneo”, un intentu de descomponer y volver construyir los estremaos métodos d’análisis predominantes nel sieglu XX -ente ellos la relativización, la indeterminación y la particularización- pa entender los complicaos procesos de mestizaxe que viven les sociedaes d’anguaño.

La cadena falla nos hipermercaos. Grandes centros comerciales con presencia nel Principáu refuguen o posterguen la venta de llibros n’asturianu nes sos instalaciones y frenen con ello una vía de salida idónea al mercáu pa la lliteratura en llingua asturiana. N’otres pallabres, piésllase una puerta esencial al normal consumu d’obres lliteraries n’asturianu.

Los grandes grupos empresariales que rexenten centros comerciales nel Principáu nun acaben de ver, en conxuntu, la lliteratura asturiana como negociu. Según fontes del sector editorial, mientres qu’entidaes como El Corte Inglés -con dos establecimientos n’Uviéu, ún en Xixón y otru n’Avilés- o la multinacional francesa Fnac -presente en Parque Principáu- acepten la venta d’obres n’asturianu nes sos llibreríes, otres grandes corporaciones amuésense roceanes a asitiar nes sos estanteríes llibros en llingua asturiana.

Siempre según fontes de los editores, la firma Eroski refugó espresamente distribuyir esos llibros nel so hipermercáu asturianu, y la gran entidá francesa Carrefour, la multinacional con más hipermercaos abiertos nel Principáu -dos en Xixón, ún en Llugones, ún en Corvera y un quintu n’Uviéu, toos ellos con 8,3 millones de clientes declaraos en 2003- “va dando llargues” a la presencia de llibros n’asturianu nos sos transitaos establecimientos.

Más de mil exemplares

Pesie al frenu que supón esa rocea empresarial, delles obres de monólogos y narrativa en llingua asturiana superen yá l’umbral de los mil exemplares vendíos, una cifra difícilmente algamable n’Asturies polos llibros comunes espublizaos en castellán, fuera de les obres poles que grandes grupos editoriales apuesten con masives campañes de promoción.

Títulos de Pin de Pría, Miguel Rojo, Tante Blanco o Antón García, o monografíes collectives, allúguense a la cabeza nes ventes d’una lliteratura cuyu espoxigue vese tamién torgáu pola falta de grandes compres institucionales d’obres n’asturianu por parte de les grandes empreses afincaes nel Principáu, qu’apuesten dafechu polos llibros en castellán. Según una encuesta de los gremios d’editores, sólo la mitá de los asturianos se declaren llectores asiduos.

La lliteratura en llingua asturiana instálase nel umbral de los cien llibros al añu