Lliteratura

L’Academia de la Llingua Asturiana ta acabante publicar na so colección Escolín el volume tituláu ‘Ensin párpagos’ del escritor Pepe Monteserín. El llibru, ilustráu pol dibuxante Antonio Acebal, presentose esti martes nuna llibrería d’Uviéu.

Los locales de El Búho Lector acoyeron a les 18.30 de la tarde del martes la presentación del llibru ‘Ensin párpagos”. L’actu cuntó cola presencia del propiu autor, el narrador pravianu Pepe Monteserín, d’Antonio Acebal, autor de les ilustraciones y de Roberto González-Quevedo de l’Academia de la Llingua Asturiana.

Un total d’once orixinales son los qu’opten al Premiu de Narraciones convocáu pola editorial uvieína Trabe y que va fallase en xineru del añu qu’entra. El galardón -remanecíu en 2005 pola editorial tres dellos años ensin convocase- ta dotáu con 3.000 euros y la publicación de la obra ganadora.

Al pieslle de la convocatoria de presentación d’orixinales hai presentaes al Premiu Trabe cinco noveles y seis llibros de cuentos. Los orixinales llegaron de sitios bien dispares: ocho d’Asturies, dos del restu del estáu y 1 del continente americanu.

El xuráu va tar formáu por un representante de la Oficina de Política Llingüística del Principáu, el profesor Xulio Viejo, y los escritores Esther Prieto, José Luis Fernández y Consuelo Vega. El ganador amás de los 3.000 euros en conceptu de derechos d’autor y la publicación de la obra, va recibir una escultura orixinal de María Jesús Rodríguez aviada a costafecha pal premiu.

Pablo X. Suárez acaba de publicar ‘Asturiana Beat’, un primer llibru de poemes qu’empobina de la esperimentación del llinguaxe a la provocación testual. El volume editáu por Trabe supón la entrada nel nuevu panorama lliterariu en llingua asturiana d’un autor nacíu en Siero nel añu 1981 y supuestamente fallecíu n’estrañes circunstancies a la edá de venticuatro años.

Les referencies a la Xeneración Beat americana son constantes y alcuando insistentes nes páxines del volume firmáu por Pablo X. Suárez. Nos sos poemes hai influencies de los beatniks y un aporfiáu procuru por provocar al llector desafiándolu con un llinguaxe cercanu a la oralidá y a lo espontáneo. En xunto son más de mediu centenar de poemes colos que Suárez xunta la so voz a les d’otros nuevos autores asturianos que dieron a conocer les sos primeres obres nos últimos años.

L’escritor Vicente García Oliva algamó’l premiu al meyor microrrelatu n’asturianu del concursu Manuel Nevado Madrid de lliteratura minera entamáu pola Fundación Juan Muñiz Zapico de Comisiones Obreres. Gregorio Andrés Echevarría fue’l ganador del certame en castellano.

El cuentu ‘Carta de Cuba’ de García Oliva y ‘Marionetas’ d’Echeverría fueron los escoyíos pol xuráu del concursu de microrrelatos de la Fundación Muñiz Zapico aconceyáu el pasáu 21 de payares n’Uviéu y del que se conoció el fallu esti domingu 4, festividá de Santa Bárbara.

Tamién resultaron seleccionaos los microrrelatos ‘Na playa’ d’Elisabeth Felgueroso, na categoría de llingua asturiana y ‘Tu niña valiente’ d’Irma Fernández na categoría moza. La obra ‘Mineras’, de la que ye autor Roberto Rodríguez Gutiérrez, y “La sirena”, de Jesús Manzano Cano, recibieron menciones especiales y na categoría de testimonio hestóricu, l’accésit fue pa Andrea d’Atri por ‘A ver si se saca el sombrero señor…’ y la mención especial pa ‘Carta abierta a un minero’ de María Begoña Herrero.

p>La editorial Asturtoons acaba de poner en marcha una colección de llibros infantiles illustraos n’asturianu nomada ‘Llingua de trasgu’ cola que pretende cubrir un espaciu destináu a los llectores más mozos. Los primeros títulos de la colección fírmenlos Enrique Carballeira, Miguel Rojo y Ana Belén Iglesias.

La editorial, afincada nel conceyu de Piloña, abre la so colección n’asturianu con ‘Los viaxes de Kiki’ d’Ana Belén Iglesias, a la que van siguir ‘Menudu elementu’ de Miguel Rojo y ‘Ana y los animales’ d’Enrique Carballeira. Les ilustraciones de los llibros cuerren a cargu tamién de Carballeira.

El conceyu de Cabranes va remembrar el 25 aniversariu de la publicación de ‘Montesín’, el relatu infantil de María Xosefa Canellada que ye la primer obra destinada pa neños de la lliteratura asturiana contemporánea. La Casa Cultura y Biblioteca que lleva’l nome de la escritora y académica de la Llingua en Santolaya de Cabranes ye la sé d’esta xornada que va entamase’l prósimu viernes 16 d’avientu.

La xornada va escomenzar con una convivencia ente los escolinos del Centru Rural Agrupáu La Coroña pa siguir después con una actuación de la compañía de teatru Kamante sobre’l testu de Canellada y llectures de ‘Montesín’ per alumnos y profesores del conceyu. Un actu institucional presidíu pola conseyera de Cultura, Ana Rosa Migoya, va rendir homenaxe a la figura de la ilustre filóloga y escritora cabraniega y darréu inauguraráse la nueva Casa Cultura que lleva’l so nome.

Pela tarde va facese una llectura pública de ‘Montesín’ cola participación d’autoridaes y vecinos. Dos comunicaciones del profesor Xuan Busto y de Severino Antuña sobre la obra de María Xosefa Canellada van presentase enantes de la celebración d’una mesa redonda alrodiu de la so figura, que va cuntar cola presencia del responsable de Política Llingüística del Principáu, Ramón d’Andrés. Los actos van rematase cola proyección a les 20.00 hores d’un audiovisual sobre la vida y la personalidá de l’autora de ‘Montesín’.

La xornada de remembranza del 25 aniversariu de la publicación del relatu de María Xosefa Canellada ye una iniciativa de la Oficina de Normalización de la Mancomunidá de la Sidra, el conceyu de Cabranes, la Conseyería de Cultura y la Editorial Trabe. Al empar hasta’l 23 d’avientu va haber na Casa la Cultura de Santolaya de Cabranes una esposición coles ilustraciones de la primer edición de ‘Montesín’ n’Ayalga y de la segunda en Trabe.

L’antoloxía ‘Palabres clares’ de José Luis García Martín preséntase esta tarde n’Uviéu nun actu que van cuntar cola participación de dalgunos de los autores seleccionaos, que habrán lleer los sos poemes. La esbilla respuende a un encargu fechu al críticu y profesor de la Universidá d’Uviéu con motivu de la última Selmana de les Lletres dedicada a la poesía contemporánea.

El Club de Prensa Asturiana ye’l sitiu escoyíu pola editorial Trabe pa presentar l’antoloxía ‘Palabres clares’. La primer presentación del volume de García Martín féxose en mayu d’esti añu nel Aula Magna de la antigua Universidá, enmarcada dientro los actos de conmemoranza de les Lletres. Esti viernes 2 a les 20.00 de la tarde l’antólogu, acompañáu de dalgunos de los autores seleccionaos, va repasar la poesía contemporánea en llingua asturiana y los criterios d’escoyeta siguíos nel so llabor. Darréu los poetes presentes na antoloxía van lleer dellos de los sos testos. ‘Palabres clares’ recueye la obra d’autores nacíos dende 1960 hasta los años ochenta: escomienza con Antón García y remata con Ana Vanessa Gutiérrez.

El volume de narraciones reales ‘Pa nun escaeceme'(Trabe, 2002) de Paquita Suárez Coalla va traducise al español publicáu pola editorial Campana de Nueva York. L’autora, natural de Grullos de Candamo y anguaño profesora nel College York de la CUNY, escomenzó a escribir en llingua asturiana nos Estaos Uníos y ye autora d’otru volume asemeyáu: ‘La mio vida ye una novela’ tamién publicáu pola uvieína Trabe.En 2004 participó como ponente nes Xornaes d’Estudiu de l’Academia de la Llingua con una comunicación sobre la comparanza ente la creación n’asturianu y la creación n’español nos Estaos Unìos.

Suárez Coalla remanez nos sos llibros los testimonios orales de muyeres campesines del so llugar natal que tracen les sos esperiencies personales al través de la recodanza de les sos vides. En ‘La mio vida ye una novela’ reproduz testualmente los testimonios recoyíos y nel volume qu’agora va traducise al español en Nueva York ‘Pa nun escaeceme’ ye la propia autora la que pon voz a personaxes reales del so pueblu.

El llibru de Paquita Suárez Coalla va publicase n’español nel mes de mayu y va facelo xunta’l volume autobiográficu “Fragmentos de la memoria. Recuerdos de una experiencia carcelaria” de la ex prisionera política de la dictadura militar arxentina Margarita Drago. El sellu editorial Campana ta especializáu na difusión d’autores latinos nos Estaos Uníos y tien la so sé na ciudá de Nueva York.

L’escritor Jaume Subirana va ufiertar esti viernes 2 una llectura de poesía catalana de güei nel Aula de les Metáfores de Grao dientro de les actividaes qu’esti espaciu divulgativu entama a lo llargo del añu. Subirana ye un significativu autor de la lliteratura actual en llingua catalana y director de la Institució de les Lletres.

El fundador de l’Aula de les Metáfores y poeta Fernando Beltrán va ser l’encargáu de presentar al escritor catalán na Casa de la Cultura de Grao. Jaume Subirana (Barcelona, 1963) ye Doctor en Filoloxía Catalana y tien publicaos llibros de poesía, narrativa y ensayu, ente los que destaquen Adrada, En altres coses, Tota la veritat sobre els catalans, Suomenlinna (Premio de la Fundació Enciclopèdia Catala-na), Per a què serveix un escriptor? o Final de festa (Premio Carles Riba 1988). Na so bibliografía hai tamién volúmenes críticos sobre la obra d’autores catalanes contemporáneos y diverses traducciones. Ye miembru del Pen Club Internacional de Cataluña y dende setiembre de 2004 director de la Institució de les Lletres Catalanes.

La llectura de Jaume Subirana tien previsto escomenzar a les 19.00 hores na Sala Polivalente de la Casa de Cultura de Grao.

L’escritor Pedro de Silva va presntar la so última novela, “La mosca”, qu’inauguró la colección “Biblioteca d’Autores Asturianos”, esti llunes día 28 de payares a les siete y media la tarde na Llibrería Cervantes d’Uvieu.

La novela de Pedro de Silva inauguró la colección “Biblioteca de Autores Asturianos” que publica la editorial Laria dende’l pasáu mes de mayu, y que ta dirixida polos escritores Tino Pertierra y Saúl Fernández. Precisamente esti autor va ser l’encargáu de charrar con Pedro de Silva na presentación que va facer esta tarde na Llibrería Cervantes.

“La mosca” ye una novela corta estructurada en torno a la comida de dos pareyes nun mesón perdíu en Castiella. A lo llargo la conversación repásense asuntos como la vida lliteraria, les relaciones amoroses y sexuales, o la vitalidá de la convivencia en pareya.

Depues de “La mosca” la colección “Biblioteca d’Autores Asturianos” publicó los siguientes títulos: “Ancila en los fuegos”, de Carmen Gómez Ojea; “Amores que atan”, de Manuel García Rubio y “Las dos caras de Jano”, de Carmen Ruiz-Tilve.