Lliteratura

L’ésitu de la llectura poética que xuntó nel Auditoriu d’Uviéu a varios autores en llingua asturiana xunta’l Nóbel irlandés Seamus Heaney na celebración de les Lletres del añu pasáu puede repetise el prósimu 21 de marzu cola programación del Día Mundial de la Poesía. La Fundación Príncipe d’Asturies y la UNESCO organicen esti eventu que va xuntar na ciudá del carbayón a los Nóbel Derek Walcott y Wole Soyinka, xunta autores del país como Xuan Bello y Berta Piñán.

Otros poetes que van lleer los sos versos en públicu son los Premios Príncipe Pablo García Baena, Ángel González y Carlos Bousoño, asina como un numerosu grupu d’autores de tol estáu como Pere Gimferrer, Antonio Gala, Antonio Colinas, Carlos Marzal y Andrés Trapiello. El recital inxértase dientro los actos organizaos pola Fundación que dirixe Graciano García pa remembrar los venti años de la creación de los premios que lleven el so nome. Nel Día Mundial de la Poesía va entamase tamién un homenaxe al Nóbel senegalés Leopol Sedar Sengol cola participación de tres poetes d’esi país.

Cristina Muñiz Martín presenta esti xueves 16 n’Uviéu la so primer obra publicada de narrativa: “Onde pisen poques güelles”, un conxuntu de relatos nel que l’autora apuesta pol realismu como vía pa escarabicar nos llendes de la propia esperiencia peñerada pola voz cómpliz de la lliteratura. El tamién narrador Xulio Vixil ye l’encargáu de glosar esta ópera prima d’una escritora que llega al panorama de les lletres n’asturiano con rixu nuevu.

Muñiz Martín llega al mundu de la lliteratura con fuerza y con verdadera pasión por contar. Nesta primer obra publicada amuesa un gran dominiu de la técnica narrativa y del llinguaxe. La mirada aceda, cuando irónica, cuando descarnada, qu’a­dop­ta la voz narrativa nos diecinueve cuentos que componen esti volume, posa nos personaxes con un daqué de tenrura inevitable. Una voz, acaso, resignada a la esperanza.

Onde pisen poques güelles abre una nueva vía na narrativa asturiana, dando por bonu’l principiu de que «la realidá supera a la ficción»: con un realismu secu, salpicáu de pingarates estremes d’irrealidá, l’autora traza una visión certera de la vida d’anguaño, reflexándola en tola so crudeza, averándose con valentía a los problemes tanto individuales como colectivos que la sociedá de güei va poniendo nel camín.

Cristina Muñiz Martín, tamién creadora de monólogos, aficionada al teatru y escritora de voz personal y fuerza narrativa hasta agora desconocida, vien a sumase a la nómina de muyeres narradores que pasín a pasu van enanchando el yá bien afitáu mundu de la narrativa asturiana.

Esti martes 14 de febreru, el día lœs enamoraœs, a les 8h la tarde, nel chigre de la Xunta pola Defensa de la Llingua Asturiana(La Casa Posafuelles, cai La Cuesta La Vega d’Uviéu) preséntase otra vuelta la última novela de Xulio vixil, “L’INMORAL”, con Pablo Rodríguez Medina como l’encargáu de la presentación y un vinu asturiano como postre. Esti mesmu día de los namoraos, l’inxenieru de telecomunicaciones y escritor Rubén Sánchez Antuña (Sotrondio 1973) presenta tamién la so primer novela “Dos estrelles nel firmamentu infinitu” que ta acabante espublizar con VTP, a les 8 de la tarde na Casa de Cultura de La Pola Siero.

La investigadora María del Carmen García García ye la responsable de la edición del volume “Literatura de tradición oral en Presno (Castropol)”, un llibru que recueye cuentos, romances, lleendes, cantares y cosadielles en gallego-asturiano y que va presentase el prósimu sábadu 18 en Castropol.

L’actu de presentación de la esbilla oral recopilada por María del Carmen García va entamar al meudía na Casa de Cultura de la capital del conceyu eo-naviegu y va cuntar cola presencia del alcalde del conceyu, José Ángel Pérez y del xefe de la oficina de política llingüística del Principáu, Ramón d’Andrés Díaz, amás de la propia autora. L’actu va pesllase cola actuación de la Banda de Gaites “Marino-Tapiega”.

Xuan Carlos Crespos Lanchas acaba de publicar el so primer volumen de versos embaxo’l títulu ‘Poemes raros (de sangre seco)’ col qu’algamó en 2004 el premiu de poesía Nené Losada Rico. El llibru va presentase esti viernes 10 en Xixón cola presencia del autor y de la escritora Ana Vanessa Gutiérrez.

L’autor de ‘Poemes raros (de sangre seco)’, acabante editar por Trabe, recueye nel volume un conxuntu de trenta testos nos que la voz personal d’un escritor que busca una manera de dicir poética a propósitu de los temes universales de la lliteratura:el deséu y la realidá, les pasiones, los escaezos y les destrucciones.

Xuan Carlos Crespos Lanchas nació en Xixón en 1970. Collaborador avezáu de diverses publicaciones como La Ratonera, Reciella Malory, Lliteratura o Lletres Asturianes, tien nel so haber dellos premios de narrativa n’asturiano y castellano. En 2004 algamó el premiu Nené Losada Rico con esti llibru que se presenta na Llibrería Ítaca de Xixón a les 20,00 hores.

L’escritor Xandru Fernández algamó’l Premiu Trabe de Narrativa cola so novela ‘La banda sonora del paraísu”, una crónica xeneracional que sigue’l cursu de la vida na cuenca minera a un personaxe nacíu nel mesmu añu que l’autor, en 1970. Fernández ye un de los autores asturianos más prolíficos y ún de los más esforzaos en trazar un perfil lliterariu real de la memoria del país.

Fueron 11 (once) los orixinales qu¹opten al Premiu de Narraciones Trabe 2005. Presentáronse cinco noveles y seis llibros de cuentos. Los orixinales llegaron de sitios bien dispares: ocho d’Asturies, dos del restu d’España y unu del continente americanu. Destaca l¹alta participación y el nivel de calidá de les obres presentaes, que fairá riñíu¹l fallu del xuráu.

Esti premiu ye¹l segundu concursu de narrativa asturiana meyor dotáu (depués del de novela «Xosefa de Xovellanos» que convoca la Conseyería de Cultura, Comunicación Social y Turismu) y el primeru que convoca una empresa editorial privada. Ediciones Trabe quier convocar esti premiu con carácter bienal (cada dos años), alternándolu cola convocatoria d¹otru premiu pa lliteratura infantil y xuvenil, del que se dará cuenta a lo llargo d¹esti añu 2006.

La revista dixital Lliteratu acaba de colgar na rede el so últimu númberu dedicáu a repasar l’actualidá y l’alcordanza de les nuestres lletres. El profesor y escritor Xosé Lluis García Arias protagoniza xunto a Xosé Nel Riesgo y Enrique Carballeira nesta quinta entrega que dedica a Xovellanos y al Padre Galo otros de los sos conteníos.

La publicación de les obres completes del ilustráu xixonés pol Centru d’Estudios del Sieglu XVIII Padre Feijoo y la editorial KRK ye’l tema del reportaxe del últimu númberu de Lliteratu. Fernán Coronas centra la sección dedicada a remembrar un personaxe de la hestoria cultural asturiana. Xunta estos conteníos, la publicación dixital ufierta les sos sesiones avezaes de noticies, reseñes y colaboraciones lliteraries.

Once orixinales aspiren al Premiu Trabe de narrativa que va fallase la prósima selmana n’Uviéu. Autores de diferentes procedencies unviaron al concursu cinco noveles y seis recopilaciones de cuentos, d’ellos ocho orixinales llegaron d’Asturies, dos del restu del estáu y ún dende’l continente americanu. El concursu goza d’un fondu prestixu dende la so primer convocatoria y ye’l primeru que organiza una empresa privada.

A lo llargo de la selmana del 6 de febreru va reunise¹l xuráu encargáu de fallar el Premiu de Narraciones Trabe 2005, al que se puen presentar obres de narrativa en llingua asturiana, yá seyan noveles, recopilaciones de cuentos o cualesquier otra forma posible de narración. Formen esti xuráu como vocales Esther Prieto (escritora, ganadora del «Xosefa de Xovellanos» de novela), José Luis Fernández (escritor y periodista), Xulio Viejo (narrador y profesor d¹asturianu na Universidá d¹Uviéu), Luis Casteleiro (filólogu de la Conseyería de Cultura) y Consuelo Vega (narradora, ganadora del «María Josefa Canellada» de narrativa). El secretariu del xuráu, con voz pero ensin votu, va ser Antón García.

Ediciones Trabe convocó nuna primer etapa, dende 1992 a 1995, cuatro ediciones d¹esti premiu con ésitu de participación, de crítica y de públicu. Los ganadores de les anteriores ediciones fueron Miguel Rojo en 1992 cola novela “Histories d’un seductor”, (Memories d’un babayu), Santi F. Ochoa en 1993 cola novela “Los párpagos de Buda”, Pablo Antón Marín Estrada en 1994 colos cuentos “Esa lluz que nadie nun mata” y Berta Piñán en 1995 col llibru de realatos “La tierra entero”.

Berto García ye l’autor de “Ensin otra sida”, un volume de versos nos que la voz personal d’esti escritor nacíu en Corvera en 1975 ábrese camín ente les nueves voces de la lliteratura asturiana más recién.

Los poemes conteníos en “Ensin otra sida”(Trabe, 2006) asítiense davezu cerca de lo popular, lo rura, y alcuando, na xera de fotografiar el tiempu, la tierra y les circunstancies, a les que s’avera aplicando formes prósimes al realismu social.

Berto García nació en Les Vegues (Corvera) en 1975. Ye mayestru d’Educación Infantil y Primaria y espertu en Llingua Asturiana. Anguaño pon clas per escueles de Castiella. Esti ye’l so primer llibru, anque tien yá bien d’obra espardío per delles de les revistes lliteraries del país, como Lletres Asturianes, El Canciu’l Cuélebre, Entellunu y Reciella Malory.

La Casa Posafuelles de la Xunta pola Defensa de la Llingua Asturiana, n’Uviéu, va acoyer esti martes 31 la presentación de los dos primeros llibros de poesía d’Héctor Blanco y Pablo X. Suárez. “Nortiando” de Blanco y “Asturiana Beat” de Suárez amuesen la calidá y diversidá de l’actual lliteratura na nuestra llingua al través de dos voces estremaes.

Los dos llibros que publica la editorial Trabe y que van presentase esta tarde a les 20.30 na sé de la Xunta n’Uviéu representen entrambes aportaciones singulares de la nueva poesía asturiana. Héctor Blanco ufierta en “Nortiando” un conxuntu de poemes na tradición de la lliteratura confidencial de llinia racional y clara, versos posaos y serenos d’una voz avezada a beber nes tradiciones de la lliteratura y la cultura modernes, ensin refugar les enseñances del universu pop. Pablo X. Suárez busca en “Asturiana Beat” una manera provocatible y tresgresora de reafirmase como poeta dende l’apueste por un llinguaxe radical, sensible a les reacciones viscerales del propiu protagonista poéticu de los testos.

En xunto los dos poemarios que se presenten na Casa Posafuelles dicen abondo del interés que tán cobrando les nuestres lletres nes xeneraciones más moces ensin refugar el camín andáu polos autores de promociones anteriores.