Portada Lliteratura Los Nóbel de Lliteratura Wole Soyinka y Derek Walkott van tar n’Uviéu nel Día Mundial de la Poesía

Los Nóbel de Lliteratura Wole Soyinka y Derek Walkott van tar n’Uviéu nel Día Mundial de la Poesía

by asturnet

L’ésitu de la llectura poética que xuntó nel Auditoriu d’Uviéu a varios autores en llingua asturiana xunta’l Nóbel irlandés Seamus Heaney na celebración de les Lletres del añu pasáu puede repetise el prósimu 21 de marzu cola programación del Día Mundial de la Poesía. La Fundación Príncipe d’Asturies y la UNESCO organicen esti eventu que va xuntar na ciudá del carbayón a los Nóbel Derek Walcott y Wole Soyinka, xunta autores del país como Xuan Bello y Berta Piñán.

Otros poetes que van lleer los sos versos en públicu son los Premios Príncipe Pablo García Baena, Ángel González y Carlos Bousoño, asina como un numerosu grupu d’autores de tol estáu como Pere Gimferrer, Antonio Gala, Antonio Colinas, Carlos Marzal y Andrés Trapiello. El recital inxértase dientro los actos organizaos pola Fundación que dirixe Graciano García pa remembrar los venti años de la creación de los premios que lleven el so nome. Nel Día Mundial de la Poesía va entamase tamién un homenaxe al Nóbel senegalés Leopol Sedar Sengol cola participación de tres poetes d’esi país.

Tamién te podria gustar