La Casa Posafuelles de la Xunta presenta dos llibros d’Héctor Blanco y Pablo X. Suárez

La Casa Posafuelles de la Xunta pola Defensa de la Llingua Asturiana, n’Uviéu, va acoyer esti martes 31 la presentación de los dos primeros llibros de poesía d’Héctor Blanco y Pablo X. Suárez. “Nortiando” de Blanco y “Asturiana Beat” de Suárez amuesen la calidá y diversidá de l’actual lliteratura na nuestra llingua al través de dos voces estremaes.

Los dos llibros que publica la editorial Trabe y que van presentase esta tarde a les 20.30 na sé de la Xunta n’Uviéu representen entrambes aportaciones singulares de la nueva poesía asturiana. Héctor Blanco ufierta en “Nortiando” un conxuntu de poemes na tradición de la lliteratura confidencial de llinia racional y clara, versos posaos y serenos d’una voz avezada a beber nes tradiciones de la lliteratura y la cultura modernes, ensin refugar les enseñances del universu pop. Pablo X. Suárez busca en “Asturiana Beat” una manera provocatible y tresgresora de reafirmase como poeta dende l’apueste por un llinguaxe radical, sensible a les reacciones viscerales del propiu protagonista poéticu de los testos.

En xunto los dos poemarios que se presenten na Casa Posafuelles dicen abondo del interés que tán cobrando les nuestres lletres nes xeneraciones más moces ensin refugar el camín andáu polos autores de promociones anteriores.