Lliteratura

La 1er Selmana Ribeseyana de les Lletres cuntó ayeri cola presencia del presentador de la TPA, Inaciu Galán, que dio llectura a la conferencia “Televisión en llingua asturiana: Reinvindicación y presencia (1974-2008), na que fizo un repás a la presencia del asturianu na televisión, dende’l primer programa prsentáu por Carlos Rubiera, hasta les emisiones n’asturianu del programa infantil de la TPA “Presta Asgaya”.

Darréu de la conferencia, los asistentes al actu participaron nun alderique sobre la presencia y futuru del asturianu na televisión.

Xandru Martino presenta a Inaciu Galán

L’entamu de la conferencia

Otru momentu de la conferencia d’Inaciu Galán

L’escritor avilesín Xosé Nel Riesgo, convirtióse nel primer ganador del Premiu Arbidel de Cuentos Eróticos en llingua asturiana, convocáu pol Ayuntamientu de Ribeseya y que va entregase mañana miércoles en Ribeseya dientro del marcu de la 1er Selmana Ribeseyana de les Lletres.

La obra que llevó a Riesgo a llograr los 1.000 euros colos que se dotó esti gallardón titúlase “De bandera”, en referencia a la típica espresión sidrera a la hora d’aludir a un bon “culín”. L’autor, qu’amás ye vicepresidente de l’Asociación Cultural l’Arribada, confesó que-y facía muncha ilusión ganar esti certame “por ser la primer edición y por tratase d’un palu que nunca nun tocara como narrador, polo que pa min yera un retu personal mui especial”.

Según Riesgo, ésti ye un relatu que xuega coles ambigüedaes y que narra la obsesión d’un médicu que nun pue beber sidra porque-y produz foria, pero que por embargu, “bébela por ver cómo la echa una nueva camarera de la que ta prendáu”- “Un ritu que-y da pie a milenta pantasíes sexuales”, añadió. L’escritor recoyerá’l so premiu’l miércoles viniente nun actu públicu que se cellebrará na Casa Cultura de Ribeseya y nel marcu de la I Selmana Ribeseyana de les Lletres.

Tendrá de lleer en público’l so relatu y fadrálo “ensin ningún tipu de pudor al pesar de que la temperatura del protagonista va xubiendo pasu a pasu hasta algamar niveles X y con claridá espositiva”, aseguró.

El segundu premio, dotáu con 300 euros, foi pal xixonés afincáu en Candanal (Villaviciosa), David Rivas, pola obra titulada Boedica y doña Nuria. Trátase d’una historia ambientada na época del reináu d’Alfonso XII que tien como protagonista a un rapaz que s’anicia nel sexu cola marquesa pa la que trabaya. Nun falten tampoco les relaciones luxurioses de la aristócrata col so maríu o les que tien el marqués na clandestinidá. Un rellatu onde’l narrador, que ye miembru de la directiva de l’Arribada, fai un prestosa incursión na narrativa erótica.

Según pudo conocer la redacción d’Asturnews, la celebración de la Xunta d’Escritores en gallego-asturianu, que fuere anunciada pola Conseyería de Cultura pal mes de xunu que vien va ser retrasada, hasta dempués del branu, probablemente “pal mes d’ochobre”, según fontes cercanes a la organización. Les razones del retrasu paecen responder “al escasu tiempu col que se cuntó pa preparar los actos”.

La Xunta va suponer el primer alcuentru de los escritores de la fastera eonaviega y tien como coordinadora a la escritora Aurora García Rivas.

Ente güei, día 5, y l’8 de mayu, coincidiendo cola celebración institucional de la Selmana de les Lletres Asturianes, la Conceyalía de Cultura de Ribeseya va entamar la so 1er Selmana Ribeseyana de les Lletres, una selmana de conferencies onde van participar Xuan Xosé Sánchez Vicente, Inaciu Galán y Marta Mori d’Arriba, y onde amás, van conocese los ganadores de la primer edición del concursu de lliteratura erótica “Arbidel”. Tolos actos van celebrase na Casa Cultura de Ribeseya a les siete la tarde.

La selmana va entamar el llunes a les siete la tarde con una conferencia de Xuan Xosé Sánchez Vicente sobre la obra de María Teresa González, autora a la que se-y dedica la Selmana de les Lletres Asturianes esti añu.

El martes, la conferencia del día va tar al cargu del presentador del programa de la TPA “Al aldu: Xente de casa”, Inaciu Galán y González, que va falar precisamente de los medios de comunicación n’asturianu y de la so hestoria dende los años setenta hasta anguaño.

El miércoles va entregase’l Premiu Arbidel, un certame lliterariu convocáu pol Conceyu de Ribeseya y que tenía como motivu la lliteratura erótica en prosa. Nel actu van lleese les obres premiaes nesti concursu, que ye’l primeru n’asturianu que se convoca nesti conceyu del oriente.

La 1er Selmana Ribeseyana termina’l xueves con una conferencia de l’académica de la Llingua, Marta Mori d’Arriba, que va lleer la ponencia “L’asturianu güei: la situación d’una llingua”.

La editorial Espulizastur reedita meyoráu l’esitosu recetariu “Con tastu a sidra” de Lluis Nel Estrada, un llibru dedicáu a la cocina con sidra. La edición del llibru de Lluis Nel Estrada Álvarez , ta fechu nun formatu que los editores califiquen “cuasi de lluxu y a tou color”.

“Con tastu a sidra”, ta asoleyáu en billingüe asturianu/castellán, foi la primer obra d’esti reconocíu cocineru, allá pel añu 1995. En 2004 publica’l so segundu llibru “Cocina Tradicional asturiana en Cuatro estaciones” y a finales d’abril de 2006 espubliza la so tercer obra “Cuarenta Quesos, Cuarenta Platos. Los Quesos Asturianos y sus recetas”.

Lluis Nel Estrada ye director de concines de la perconocida sidrería Tierra Astur y foi gallardoáu en 2006 col “Queseru Mayor d’Asturies”.

L’actu inaugural de la Selmana de les Lletres Asturianes va celebrase güei llunes, a les doce la mañana nel Centru Municipal Integráu d’El Coto, en Xixón y va consistir na presentación de les ediciones conmemoratives de la 29 Selmana de les Lletres Asturianes: “Por si dixerais el mio nome…”, compuesta por artículos sobre l’autora y l’Antoloxía lliteraria, que recueye la obra de l’autora xixonesa homenaxeada.

Amás, nesi mesmu actu va inaugurase la esposición “La mar. Un viaxe per Tere González”, que va tar abierta al públicu hasta’l vienres 16 de mayu n’horariu de 10.00 a 13.30 y de 17.00 a 21.00 hores con entrada llibre. La esposición va pasar darréu a circular peles Cases de Cultura d’Asturies.

Mañana miércoles los actos van tener un calter institucional, y ye que va celebrase, per cuarta vegada, y a la una la tarde, la yá tradicional llectura pública institucional de testos n’asturianu nel Salón Europa de Xeneral del Principáu d’Asturies, n’Uviéu. El parllamentu asturianu va volver a acoyer asina, una llectura que-y dea visibilidá pública a la lliteratura asturiana.

L’Asociación Cultural l’Arribada convocó va delles selmanes la segunda edición del Premiu Timón, un certame que convoca esti añu “col envís de facer reconocencia d’una trayectoria lliteraria y/o’l llabor de promoción de la lliteratura asturiana”. El premiu quier convertise nuna referencia na reconocencia de la carrera lliteraria de los autores más veteranos de la lliteratura asturiana y l’añu pasáu recibiólu la escritora Nene Losada.

El premiu entregase cada añu na Arribada, la “vagamar lliteraria” qu’enllena Xixón de lliteratura asturiana al travies d’actividaes abiertes al públicu asturianu a lo llargo de más de diez díes cada mes de setiembre.

Les candidatures van poder presentase por una persona o per aciu d’un coleutivu al correu lletrónicu arribada_sectec@yahoo.es . Pa esta edición opten al premiu los/es escritores y/o promotores de la lliteratura n’asturianu que nacieren nel añu 1958 o enantes.

La candidatura constará d’un informe de l’activida lliteraria del autor lo más completu posible y una xustificación de les razones de la presentación de candidatura y el plazu pa presentar candidatures va tar abiertu hasta l’1 de setiembre de 2008.

Al efeutu de fallar el premiu, l’Asociación Cultural l’Arribada aconceyará un xuráu integráu por persones venceyaes a la cultura del país. El fallu nun va poder recurrise y la entrega del mesmu va ser en Xixón demientres la celebración de l’ARRIBADA 2008 y va constar d’una escultura diseñada a costafecha por un artista asturianu.

Una nueva edición de la Selmana de les Lletres Asturianes, y van ventinueve, va entamar esti llunes en Xixón dedicada a la figura de la escritora María Teresa González, que morrió prematuramente va trece años dexando una importante obra poética y narrativa, con llibros como “Collaciu de la nueche” o “La casa y otros cuentos”, el primer volume de narrativa non infantil o xuvenil espublizáu por una autora del Surdimientu. Los actos d’esta fiesta añal de les lletres van celebrase na so mayor parte en Xixón, anque tamién Uviéu y L’Entregu van acoyer delles actividaes.

L’actu inaugural de la Selmana de les Lletres Asturianes va celebrase esti llunes a les 12.00 hores nel Centru Municipal Integráu d’El Coto, en Xixón y va consistir na presentación de la 29 Selmana de les Lletres Asturianes, les ediciones conmemoratives: “Por si dixerais el mio nome…”, compuesta por artículos sobre l’autora, l’Antoloxía lliteraria, que recueye la obra de l’autora xixonesa homenaxeada.

Amás, nesi mesmu actu va inaugurase la esposición “La mar. Un viaxe per Tere González”, que va tar abierta al públicu hasta’l vienres 16 de mayu n’horariu de 10.00 a 13.30 y de 17.00 a 21.00 hores con entrada llibre. La esposición va pasar darréu a circular peles Cases de Cultura d’Asturies.

Les actividaes d’esti primer día de la Selmana les Lletres van completase, a les cuatro y media la tarde, cola emisión pela Radio del Principáu d’Asturies (RPA), del programa especial “M.ª Teresa González: una muyer del Surdimientu”, dientro del programa “Nomes d’Asturies”, dirixíu por Chechu García y con formatu de radionovela.

El miércoles los actos van tener un calter institucional, y ye que va celebrase, per cuarta vegada, y a la una la tarde, la yá tradicional llectura pública institucional de testos n’asturianu nel Salón Europa de Xeneral del Principáu d’Asturies, n’Uviéu. El parllamentu asturianu va volver a acoyer asina, una llectura que-y dea visibilidá pública a la lliteratura asturiana.

El xueves, a les ocho la tarde, los actos treslládense a la Biblioteca d’Asturies “Ramón Pérez d’Ayala” d’Uviéu, onde va celebrase l’espectáculu “Ñacerán otres nueches como esta”. Nel actu van intervenir los músicos Xuan Nel Expósito, Rubén Bada, Andrea Joglar y Toli Morilla., les actrices: Isabel Friera, Carmen Gloria García, Marisa Vallejo y Luz María del Sol y los escritores: Sergio Gutiérrez Camblor, Alejandra Sirvent, Elisabeth Felgueroso y Pablo Rodríguez Alonso.

Yá l’últimu día de la Selmana, va dedicase un actu a los más mozos, col actu escolar institucional de celebración de la Selmana de les Lletres Asturianes nel Colexu Públicu de L’Infiestu, a les doce la mañana. Nel actu van intervenir les autoridaes responsables de la Selmana, va celebrase la entrega de los premios del “XII Concursu de Poesía y Dibuxu” y del “V Concursu de Cartelismu”, amás de cuntar con delles actuaciones.

Al mesmu tiempu, nel Parque “María Teresa González”, nel barriu de Tremañes, en Xixón, va facese una ofrenda floral en memoria de l’autora y a la una, yá nel Centru de Cultura Antiguu Institutu, va presentase la Obra completa de María Teresa González, editiada por Trabe.

Esi mesmu día, el vienres 9 de mayu, va celebrase como cada añu’l Día del Llibru n’asturianu, nel que nes llibreríes d’Asturies, y pola compra de llibros n’asturianu, van entregase un llibru y una flor a cada veceru.

A toes estes actividaes va sumase una esposición “M.ª Teresa González: una collacia ente nós”, una amuesa de testos y dibuxos sobre la vida y obra de la escritora fechos polos neños y neñes d’Educación Primaria de les escueles de Xixón. La esposición va poder vese de 10 a 13.30 y 17.00 a 20.00 hores nel Centru Municipal d’El Natahoyo (Xixón), ente’l 30 d’abril y el 9 de mayu. La esposición va poder visitase tamién más tarde nel Centru de Cultura Antiguu Institutu de Xixón, ente’l 9 y el 21 de xunu.

Programa completu de la XXIX Selmana de les Lletres Asturianes

El premiu de cartes d’amor del Coceyu d’Ayer, qu’esti añu tuvo un xuráu compuestu pol Conceyal de Mocedá Santos Fernández Fanjul, l’escritor Ánxel Álvarez Llano, la periodista de “Radio Langreo” Montse Martínez García, el direutor editorial Baristo Lorenzo Caballero y el responsable de la Oficina d’Información Xuvenil Lluis Gómez Benito, en calidá de secretariu, otorgó’l premiu a Trini Pestaña Yáñez, de Martos (Jaén), na modalidá castellana y a Daniel Estrada Gómez-Acebo, pola carta n’asturianu.

“Aires de Mudanza”, poemariu col que Pablo Rodríguez Medina algamó’l premiu Teodoro Cuesta de Mieres sal agora a la cai de la mano de la editorial Trabe. L’autor tien espublizaos notables trabayos como “Los paraísos perdíos”, “Nun blinquen ayalgues” y les noveles “Les vueltes toles vueltes” y “Los taraos”. Nel terren de la poesía asoleyó tamien “El color de l’ausencia”, “Nel dialectu del grisú”, “Tiempu d’esiliu y povisa ayeno”.

Ente los galardone de los que foi merecedor na so carrera destaquen el Xosefa Xovellanos de novela, na edición de 2001 con “L’arna de San Atanás”, y del Asturies Xoven de poesía con “Los desconocedores del agua”. En teatru ganó’l Asturies Xoven con “Martema. Historia de una guerra, retratu d’unes culpes” y el premiu de teatru de l’Academia de la Llingua Asturiana con “Orbaya”.