Lliteratura

El Conceyu de Llaviana y la Oficina d’Información a la Mocedá convoca la sesta edición del concursu “Ello yera una vez.”, nel que puen tomar parte tolos/es mozos/es de 14 a 35 años, con cuentos en castellán o asturianu de non más de 10 folios.

El tema a desendolcar sedrá llibre valorándose la orixinalidá y los temas rellacionaos colos intereses, inquietúes y esmmoliciones de la mocedá. Afítanse dos categorías con un premiu caún. Pa mozos de 14 a 18 años, 150 euros b. Pa mozos de 19 a 35 años,.500 euros. El plazu de presentación de los rellatos fina’l vienres 3 d’abril.

Les obres unviaránse a la Oficina d’Información a la Mocedá, asitiada nel Edificiu CIDAN, na C/ Joaquín Iglesias e./n. 33980 La Pola Llaviana. Pa duldes pue llamase al 985 602 525.

Suburbia Ediciones edita nesti entamar de 2009 “El combate melancólicu”, l’esperáu llibru de poemes de Ignaciu Llope dempués de diez años de silenciu editorial.

Comprometíu ya irreverente, Ignaciu Llope explora en El combate melancólicu los mitos y les zunes, los suaños y les frustraciones de toa una xeneración. Nos sos versos, herederos cuando de la poesía vanguardista d’entreguerres, cuando de la llírica tradicional del Arcu Atlánticu, pero recorríos por una personalidá inconfundible, danse cita figures y fechos hestóricos (Andreu Nin, Ulrike Meinhof, la revolución irlandesa…) coles esperiencies privaes, glayaes en público, d’un militante de lo contemporáneo.

Ignaciu Llope, nacíu en Cuideiru nel añu 1961, ye poeta y ensayista. Nel añu 89 publica De les coses del mundu, artículos y ensayos que vinieran la lluz en delles publicaciones: La Voz d’Avilés, Hojas universitarias, Ámbitu, Lletres Asturianes, L’Esperteyu, asina como otros trabayos inéditos.

Nel añu 1992 sal al mercáu’l poemariu Xeografía del augua. En 1999 algamó’l premiu de poesía Fernán Coronas col llibru El llugar del sol (Trabe, 2000).

Amás de les revistes citaes a propósitu de los artículos de De les coses del mundu, Llope publicó poesía en diverses revistes como Adréi y Lúnula. Ye tamien conocíu como lletrista del grupu folk Llan de Cubel. Fue ún de los traductores de los dos episodios de Les aventures de Tintín al asturiano.

Ye miembru del conseyu editorial de la revista Lliteratura de l’Academia de la Llingua Asturiana.

Esti xueves tuvo llugar n’Uviéu la presentación d’un nuevu llibru d’ensayu de Xaviel Vilareyo que tien por títulu “Los ámbitos de la Nación Asturiana”. Esti llibru marcará, sigún l’autor, l’entamu d’una nueva visión d’Asturies, la reivindicación del so territoriu históricu. La presentación tuvo a cargu del escritor y políticu Humberto Gonzali, que resaltó la validez ya importancia del trabayu pa la recuperación de la historia nacional asturiana.

L’actu terminó con un conciertu de gaita de Pelayu Cuaya y tuvo presidíu poles banderes de les dos Asturies, la d’Uviéu y la de Santiyana.

Esta nueva aportación de Xaviel Vilareyo ye documentáu ensayu sobre l’asturianidá y sobre la historia del territoriu d’Asturies a lo llargo los sieglos y sobre la permanencia de los rasgos identitarios. Ye la historia la que lexitima’l conceptu de l’asturianidá a lo llargo del tiempu. Con esti interesante trabayu, Xaviel Vilareyo pon al algame de toos la verdadera historia tapecida d’Asturies, la historia d’una minoración física y la denuncia d’una usurpación y d’un olvidu colectivu. El fechu de que l’ámbitu espacial del país asturianu nun coincida coles llendes alministratives actuales nun significa que se tengan qu’asimilar éstes como l’únicu marcu posible de referencia.

La historia real ye imposible escaecela nin traicionala porque con esti llibru tará presente a partir d’agora nel nuesu pensamientu colectivu como asturianos. Un ellaboráu ensayu que pon al descubiertu les interesaes mentires que se ficieron alrodiu la historia de los asturianos.

Esti llibru dexa n’evidencia que la historia d’Asturies ye una manipulación interesada de los que pretendieron afitar un robu y un expoliu sobre la tierra asturiana. El llibru de Xaviel Vilareyo servirá p’abrir los güeyos a munchos asturianos sobre la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país.

Los Derechos Históricos d’Asturies son irrenunciables, sigún l’autor, porque sinón taríemos renunciando al nuesu propiu ser como pueblu. Esti llibru vien a recordánoslo con aciertu yá qu’olvidar la historia de los pueblos, nel casu d’Asturies pue ser sinónimu d’un suicidiu colectivu imperdonable. Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones.

Güei, xueves 5 de feberu, va tener llugar n’Uviéu la presentación d’un nuevu llibru d’ensayu de Xaviel Vilareyo, “Los ambitos de la Nación Asturiana”, qu’asoleya Espublizastur. La Biblioteca del Campu San Francisco va acoyer a les 6 de la tarde la presentación, que va correr a cargu del escritor y miembru del PP, Humberto Gonzali.

La espublización d’esti ensayu supón, según comenta l’autor “l’entamu d’una nueva visión d’Asturies, la reivindicación del so territoriu históricu”. L’ensayu recueye un estudiu fondu sobre l’asturianidá y la hestoria del territoriu d’Asturies a lo llargo los sieglos y sobre la permanencia de los rasgos identitarios.Pa Vilareyo “el fechu de que l’ámbitu espacial del país asturianu nun coincida coles llendes alministratives actuales nun significa que se tengan qu’asimilar éstes como l’únicu marcu posible de referencia”. Pa camudar esti marcu, Vilareyo “pon al descubiertu les interesaes mentires que se ficieron alrodiu la historia de los asturianos”. Lo que pal autor ye “una manipulación interesada de los que pretendieron afitar un robu y un expoliu sobre la tierra asturiana”. El llibru de Xaviel Vilareyo, comenten dende la editoral “servirá p’abrir los güeyos a munchos asturianos sobre “la estafa histórica que supunxo la provincialización n’Asturies, o meyor dicho, la imposición a la trágala de la provincia ovetense y la posterior desasturianización de tol país”.

Xaviel Vilareyo (Mieres del Camín, 1967) ye llicenciáu en Derechu pola Universidá d’Uviéu. Escritor, poeta y ensayista en llingua asturiana pertenez a la Tercer Xeneración del Surdimientu. Recibió los premios de lliteratura Vila de Sarria, Elvira Castañón, Valentín Andrés y Xeira de narraciones en gallego-asturianu, llingua na que tamién escribe.

L’escritor Henrique G. Facuriella presenta güei, xueves 5 de febreru’l so llibru “Intersticios. Estudiu pa una topografía de lo que nun ye”, asoleyáu por Publicaciones Ámbitu. L’actu va ser a les 20:00 hores na Llibrería Bertrand, allugada nel centru comercial Espaciu Buenavista d’Uviéu. Nel actu van participar Manuel García, arquitectu, y Rosario Hernández Catalán, filóloga, investigadora y docente. Nel mesmu espaciu pue vese, hasta’l 14 de febreru, la esposición «Estación Norte», con fotografíes del propiu autor.

Henrique G. Facuriella (Blimea, 1980) ye Director Comercial de Les Noticies, y tien espublizaos testos en revistes como Reciella Mallory, Lliteratura, Formientu o El Summum. Amás, nel añu 2007 espublizó la so primer novela “Los fieles de Malena”.

Según anunció estos díes la Conceyalía de Cultura de Ribeseya, la escritora Enriqueta González Rubín, a la que va dedicase la Selmana de les Lletres Asturianes d’esti añu, va da-y nome a una ruta que va salir, a falta de concretase definitivamente, de la so llocalidá natal, Santianes del Agua, siguiendo pelos caminos y llugares qu’apaecen nes so hestories.

”Queremos reconstruyir los paisaxes que va describiendo y confeccionar una ruta”, aseguró’l conceyal de Cultura, Juan González Martino. Un sienda que va inaugurase dientro de los actos oficiales la próxima Selmana de les Lletres Asturianes, según yá-y confirmó al Ayuntamientu la Directora Xeneral de Política Llingüística, Consuelo Vega.

La Conseyería de Cultura quier editar una semblanza de l’autora y una antoloxía lliteraria, amás d’un facsímil del llibru ‘El viaxe del Tíu Pacho el Sordu a Uviedo’, primer obra de narrativa publicada n’asturianu de manera autónoma, recientemente atopada en Llanes.

Amás, va facese una esposición sobre la so vida, que ta yá confencionándose, y pa la que va cuntase cola participación de dellos descendientes de la que ye la nuesa primer narradora.

L’Ayuntamientu de Llaviana y el Conseyu Municipal de la Muyer tán acabante convocar la décima edición del concursu de rellatos curtios escritos por muyeres. Una convocatoria na que puen participar les persones d’esti sexu que seyan mayores de 18 años, pudiendo redactar los rellatos n’asturianu o en castellán.

Los testos han mandase por triplicáu (orixinal y dos copies) mecanografiaos a doble espaciu, tamañu DIN-A4 y escritos per una llana namás. La estensión nun va poder pasar de les venti fueyes.

El tema ye llibre, valorándose de mou especial, amás de la calidá de la obra, l’empléu d’un llinguax non sexista y un tratamientu de los temes estremáu de los estereotipos femeninos y masculinos tradicionales.

Concederáse un primer premiu, na categoría xeneral de 1.200 euros; asina mesmo, daráse un accésit de 300 euros a la meyor obra fecha por una autora del Conceyu de Llaviana.

Les obres unviaránse al Centru Asesor de la Muyer de Llaviana asitiáu nel Edificiu CIDAN (C/Joaquín Inglesias, nu 1, 33980 Llaviana).

Esti xueves 29 de xineru a les 19:00 h. hai un nuevu alcuentru lliterariu nel Atenéu de Turón (Mieres): Xuan Bello comenta colos sos llectores “La cueva del olvidu”. L’actu entámalu’l Serviciu de Normalización Llingüística del Conceyu de Mieres.

Per estos “Alcuentros” pasaron yá Antón García, Xandru Fernández y Xosé Nel Riesgo.

Estos díes atrás fízose públicu’l fallu del “II Certame Lliterariu La Caleya 2008 Reinu de Llión”, convocáu pola asociación La Caleya y l’ayuntamientu d’Estorga. Na categoría de rellatos recibío’l primer premiu Jonatan Rodríguez pola obra “El castigu de San Juanicu” y na de poesía foi pa Milio Gancedo pol poemariu tituláu “Un país de vinu y lleiche”.

Esta ye la llista completa de ganadores:

RELLATU

1. El castigu de San Juanicu de Jonatan Rodríguez.
2. El prigueirín de Florentino Carbajo.
3. Lluna de Miguel Gelado.
4. García de León de Jesús Ángel González.
   Los maquis de Jose Antonio Falagán.
   Una sala ensin ventanes d’Abel Martínez.
   Dejà vu de Nicolás Bartolome.
   San Juan de María Jose Zurrón.

POESÍA

1. Un país de vinu y lleiche d’Emilio Gancedo.
2. Las palabras del monte de Ruben García.
3. Lu que m’avera de ti de Rosario Martínez.
4. Milenta orvallos d’Álvaro Perez.

Entregáronse n’Astorga los premios del I Certema de Rellatu Curtiu “La Caleya”

La Conseyería de Cultura va anunciar a non tardar la convocatoria d’un premiu lliterariu nuevu que va sumase a los tradicionales Xosefa Xovellanos de novela, Xuan María Acebal de poesía, Máximo Fuertes Acevedo d’ensayu y Enriqueta González Rubín de periodismu, amás del recién creáu María Josefa Canellada de lliteratura infantil. El premiu va convocase pa álbumes de cómic en llingua asturiana y va llevar el nome del dibuxante “Alfonso Iglesias”.

La dotación económica, a falta d’una convocatoria oficial, va ser de 7000 euros, permitiéndose hestories que sumen 46 fueyes, ensin ser una hestoria sola.

La iniciativa xurdió va dellos años d’un grupu de persones venceyaes al mundu del cómic y la llingua asturiana, llideráu pol escritor Chechu García, ente los que tán persones como Isaac del Rivero, Mari Luz Pontón, Enrique Carballeira, Inaciu Galán, Lluis Antón González, Ruma Barbero o Alfonso Zapico, ente otros. La petición d’esti grupu a l’Academia de la Llingua Asturiana, fizo que la insitución convocara esti añu, per primer vegada, un premiu dedicáu tamién a esti xéneru lliterariu.

Alfonso Iglesias López de Vívigo (Navia, 1910-Uviéu, 1988), conocíu como Alfonso, foi un dibuxante y pintor asturianu, creador de los personaxes de Pinón, Telva y Pinín. Como acuarelista, realizó esposiciones n’Asturies, Lleón, Madrid y México. Los sos primeros dibuxos apaecieron nos diarios Región y La Voz de Asturias y el selmanariu Carbón.

Tres la Guerra Civil collaboró en La Nueva España, onde creó en 1943 los personaxes de Pinón, Telva y Pinín, que tuvieron gran sonadía na Asturies de la Posguerra. Les sos histories axuntáronse en 1944 nun álbum tituláu Aventuras de Pinín, que de Pinón ye sobrín. Mas tarde, los mesmos personaxes llegaron a protagonizar cartelos, series de cromos, y tuvieron adautaciones al teatru (Pinón y Telva ), a la narrativa ( El Asthur-Kong y Pinín, 1979) y al cine (Las Aventuras de Pinín y sus amigos, 1979). Alfonso Iglesias foi ún de los impulsores de la Sociedá Uvieina de Festexos (Sociedad Ovetense de Festejos – SOF), a la que-y presentó en 1950 el proyeutu de celebrar el día d’América n’Asturies. Convirtióse en presidente de la organización d’esta fiesta hasta 1958, añu en que se treslladó a Madrid.

En Madrid collaboró como dibuxante en periódicos como El Alcázar, Arriba o Pueblo y na revista femenina Ama, pa la que creó la serie Amuca. A partir de 1962 entamó a trabayar en Televisión Española como dibuxante de programes pa neños, culturales y deportivos. Más tarde publicó nueves aventures de Pinín en Gente Menuda, el suplementu infantil del diariu ABC. En 1982 volvió a Asturies, y publicó los últimos chistes de Pinón y Telva en La Nueva España. En setiembre de 1986, él mesmu encargóse de descubrir un bustu que se–y llevantó por soscripción popular nel campu San Francisco. Añu y mediu mas tarde, el 23 de febreru de 1988, morría n’Uviéu.