Lliteratura

La Casa Cultura de Tinéu va acoyer güei a les ocho la tarde la presentación del llibru, cola presencia del alcalde del conceyu, Marcelino Marcos Líndez, y de Manuel Fernández de la Cera. El llibru asoléyalu Septem Ediciones y recueye una esbilla d’artículos espublizaos por Luis Arias nos últimos siete años en dellos medios de comunicación.

Lleida, en Cataluña, va convertise esta selmana na capital de la poesía, cola celebración del festival Mahalta, un certame coordináu por Pere Pena y Txema Martínez que regresa dempués d’un añu ensin celebrase y que, nesta ocasión, va dedicar especial atención a tradiciones poétiques como la occitana, la gallega o l’asturiana, amás de cuntar con Adam Zagajewki, un referente de la poesía en Polonia.

La presencia asturiana va llegar nel pieslle del mesmu, de la mano d’Antón García, que’l vienres 6, va participar nun espectáculu poéticu nel Auditori Enric Granados, xunto con, ente otros, Adam Zagajewki, Patrizia Valduga, Antonio Cabrera, la gallega Yolanda Castaño, Xavier Macià y Màrius Sampere.

Xosé Lluis Campal ta acabante d’espublizar el cuadernu “Llibretina de tornes”, un poemariu de traducciones qu’asoleya “Apenas Livros”, editorial de Lisboa.

Nel cuadernu axunta tornes al asturianu de poemes de Fernando Pessoa, Fedro, Fernando Arrabal y Luis Miguel Rabanal a Salvador Rueda, Ferran Fernández, Alfonso Pascal Ros o Marcial, ente otros.

El poemariu pue mercase na rede por dalgo menos de trés euros.

Merca’l llibru na rede

La Fundación Cultural Benéfica Fernández Lema, reconocida ya inscrita por Orde del Ministeriu de Cultura de 20-10-1994 (B.O.E. del 15-11), creada por acio de la iniciativa y xenerosidá de Doña Dolores Fernández Lema y que tien, como fin principal, la concesión de premios literarios de calter anual, pa obra lliteraria breve, vieno acabante convocar los premios de 2009 dotaos con 7000 euros pa llingua castellana y 3500 pa llingua asturiana.

Na so cabera xunta, el Patronatu de dicha Fundación vieno acabante convocar el «PREMIU DE RELATU CURTIU FERNÁNDEZ LEMA, AÑU 2009 MODALIDAES EN LLINGUA CASTELLANA Y LLINGUA ASTURIANA», de calter nacional, d’acuerdu coles siguientes bases: 1) Convócase’l «Premiu de Relatu Curtiu Fernández Lema, Añu 2009, Modalidaes en Llingua Castellana y Llingua Asturiana. 2) El Premiu al ganador pa la modalidá en llingua castellana va tar dotáu con siete mil euros. 3) El Premiu al ganador pa la modalidá en llingua asturiana va tar dotáu con tres mil quinientos euros. 4) Puen concurrir a los mesmos toles persones que, acordies coles Bases presentes, apurran un relatu curtiu inéditu, escritu na llingua correspondiente a la modalidá qu’escueyan. 5) A los efeutos anteriormente mentaos limítase la estensión de les obres a un máximu de 25 folios din-A4 mecanografiaos a una sola llana y con un tamañu mínimu de fonte de 10 puntos. 6) N’igualdá de circunstancies y méritos xenerales de los candidatos, ha de ser premiada la obra que, en sí mesma o pol so autor, s’estime con más vinculación, yá sía personal ou oxetivamente, con Asturies y de mena particular col Conceyu de Valdés. 2-PRESENTACIÓN DE RELATOS 1) Los participantes han de presentar les sos obres por sestuplicao, faciendo constar, según correspuenda, pa concursar al Premiu de Relatu Curtiu «Fernández Lema, Añu 2009, Modalidá en Llingua Castellana» o Premiu de Relatu Curtiu «Fernández Lema, Añu 2009, Modalidá en Llingua Asturiana». 2) Los relatos han de tener como elementu identificativu únicu un alcuñu. 3) Amás, han de dir acompañaos con un sobre zarráu nel que figure l’alcuñu enantes citáu. Nel interior de dichu sobre ha de figurar una declaración del autor na qu’ésti ha de facer constar: 3.1 El so nome, direición completa y teléfonu de contautu. 3.2 Declaración de que se trata d’una obra propia ya inédita. 3.3 En xeneral, compromisu d’aceptar tolo especificao nes presentes Bases, asina como tamién les decisiones que s’adopten pol Xuráu o’l Patronatu. 4) Almitiráse qu’un mesmu concursante pueda apurrir más d’una obra, o presentase a entrambes modalidaes. Sicasí, nun podrá superar, en total, un máximu de tres relatos. En cualquier casu cada obra ha de presentase de forma individual y cumpliendo tolo especificao nes Bases presentes. 5) Los relatos y demás decumentación han de remitise a les señes siguientes: Casa de Cultura de L.luarca-Valdés (Pa concursar al «Premiu de Relatu Curtiu Fernández Lema, Añu 2009, Modalidá en Llingua Castellana»), o (Pa concursar al «Premiu de Relatu Curtiu Fernández Lema, Añu 2009, Modalidá en Llingua Asturiana»). c/ Olavarrieta, 24 33700 L.luarca (Asturies) 6) Pa cualquier esclaración, los interesaos puen empobinase al teléf. de la Casa de Cultura de L.luarca-Valdés: 98 547 05 78. 7) La presentación pue realizase hasta’l 31 de Marzu de 2009, inclusive. 8) La entrega pue realizase personalmente na Casa de Cultura de L.luarca-Valdés, o por cualquiera de los medios afitaos nel artículu 38 de la Llei 30/ 1992, de 26 de Noviembre, del Réxime Xurídicu de les Alministraciones Públiques y del Procedimientu Alministrativu Común, acreditando siempre de forma fefaciente la fecha de presentación. 3-XURAOS 1) Pol Patronatu de la Fundación «Fernández Lema» han designase dos Xuraos, ún pa la modalidá en llingua castellana y otru pa la modalidá en llingua asturiana, nos qu’han figurar persones de prestixu rellacionaes col mundu del llibru y la lliteratura nes respectives llingües. 2) Ente los componentes de cada Xuráu ha de nomase un Presidente y un Secretariu. Cada Xuráu, na so primer reunión, ha d’establecer les sos normes de funcionamientu, siempre d’acuerdu colo dispuesto nes Bases presentes. 3) Nun esiste nenguna incompatibilidá pa la pertenencia simultánea a entrambos Xuraos, mesmamente cuando se desempeñe cualquiera de los cargos indicaos nel puntu anterior. 4) Los Xuraos tienen llibertá plena de decisión a la hora de discernir los Premios y d’apreciar les circunstances y méritos de los aspirantes. Tamién tienen potestá pa determinar si lo presentao s’axusta o non a les bases. 5) Les decisiones del Xuráu adóptense por mayoría simple. 6) Les delliberaciones de los Xuraos han de ser secretes, pero, caún ha de redactar acta de la so decisión de concesión del Premiu, indicando si ésta foi por unanimidá o mayoritaria. Amás, cada Xuráu pue facer constar en dicha acta cualquier circunstancia, consideración o posición particular qu’estime amañosa, pa conocencia del Patronatu, que pue facer usu de la mesma según el so criteriu. 7) Cada Xuráu ha de procurar, na midida de lo posible, conceder el Premiu correspondiente, y namás lu ha de declarar ermu en circunstancies especiales que s’han reflexar nel acta. 8) El Premiu, en caúna de les modalidaes, ye únicu ya indivisible. Sicasí, y esclusivamente a efeutos de lo especificao na Base 2 del Capítulu 4, caún de los Xuraos nun s’ha de limitar a designar una obra única, sinon qu’ha de señalar otres sustitutes clasificaes debidamente. 9) Les decisiones de los Xuraos son inapelables. 4-FALLU Y ENTREGA DE PREMIOS 1) El fallu de caún de los dos Xuraos tien que se producir enantes del día 1 de xunetu de 2009, na mañana del cual tienen que tar en poder del Patronatu les actes que se citen, na base 3.5. 2) A la vista de les Actes del Xuráu’l Patronatu ha d’ordenar l’apertura del sobre correspondiente y la comprobación de que l’autor cumplió lo especificao nes Bases presentes. De nun ser asina y nun se poder subsanar les carencies ou otros defeutos atopaos, según los criterios que determine’l Patronatu, ha de considerase d’idéntica manera al primer sustitutu, tal qu s’indica na Base 8 del Capítulu 3, recurriéndose nel so casu, pol so orde, a otros sustitutos. 3) Los Premios han de ser proclamaos y entregaos pol Patronatu na Casa de Cultura de L.luarca-Valdés el 4 de xunetu de 2009 a les 20,00 hores; nun actu públicu al que s’invitará a les autoridaes que correspuenda y, especialmente, al Escmu. Conceyu de Valdés, asina como a los miembros del Xuráu. 5-BASES DE CALTER XENERAL 1) Les situaciones non previstes nes Bases presentes, asina como toles aclaraciones ya interpretaciones de les mesmes, han de ser resueltes pol Xuráu correspondiente, na so esfera competencial, o bien pol Patronatu na de so, o por entrambos conxuntamente. 2) Los orixinales nun se van devolver, decidiendo’l Patronatu la destrucción de relatos y demás documentación d’autores non premiaos.

Asturies tará presente na edición 2009 de ‘Expolingua Lisboa’ que se celebra del 4 al 6 de marzu con un ‘stand’ lliterariu con 40 autores representaos nel que van participar diez editoriales asturianes.

La feria celebrase na capital portuguesa dende 1989 y empobinaes al estudiu de les llingües, cuntando esti añu con 18 metros cuadraos destinaos al stand asturianu nel que tarán representaos más de 40 autores.

La presencia d’Asturies na ‘Expolingua Lisboa’ anuncióse esti vienres nuna rueda de prensa na que participaron la directora xeneral de Política Llingüística, Consuelo Vega, el poeta y coordinador lliterariu Xuan BRoberto González Quevedo, y la presidenta del Gremiu d’Editores Asturianos, Marta Magadán.

El stand inauguraráse’l miércoles día 4 con un actu al que tán convidaes más de 1.500 persones que componen la comunidá española en Lisboa y presentará volumes de tou tipu, non sólo específicamente lliterarios, sinon tamién de temática turística, etnográfica o cultural.

L’agrupación d’Izquierda Xunida en Siero convoca una nueva edición del Concursu Valentín Palacio, al que se puen presentar rellatos en castellán o asturianu de non más de dos folios. El tema de los mesmos, que puen presentase hasta’l 6 de marzu, tien que rellacionase colo social o lo político.

Los rellatos han unviase a la Plaza de Les Campes, 19 – baxu 33510 La Pola (Siero).

El concursu ta dotáu con dos premios, de 600 y 300 €.

Bases completes del concursu

La Revista “La Sidra” y el portal lasidra.net convoquen el que va ser el primer concursu lliterariu de temática sidrera n’Asturies. Al concursu pueden presentase obres d’hasta 50 llinies, que van premiase con dos gallardones, un primeru de 500 eruos, más un llote de llibros, y un segundu de 300 euros con llote de llibros. Los trabayos, hasta trés por persona, pueden presentase dica’l 14 de mayu.

Asturnews ufre les bases completes del concursu:

Bases del Concursu:

1.- Podrán participar nesti concursu escritores de cualisquier nacionalidá y edá, siempres que les obres que presenten tean escrites en castellán o n’asturianu, seyan orixinales ya inedites y nun fueren premiaes enantes en dengún otru concursu. Presentaránse un másimu de tres microrrellatos por ca autor o autora.
2.- El conteníu tendrá d’aludir necesariametne a dalgún aspeutu rellacionáu col mundiu la sidre, ello ye: llagares, chigres, echaores, ect, no que se refier al so argumentu, ambientación o presonaxes.
3.- La estensión nun escederá les 50 llinies en lletra de cuerpu 12 y tipu Times New Roman, pudiendo acupar el microrrrellatu un másimu de dos páxines en formatu foliu o DINA-A4 per dambes cares. El microrrellatu tien de tener un entítulu y un autor asociáu, si nun ye asina, consideraráse comu non válidu.
4.- Les obres unviaránse per e-mail a esta direición de correu lletrónicu: microrrelatosidra@gmail.com
5.- La estensión de los archivos tien de ser, necesariametne, de dalgún de les siguientes tribes: .txt, .doc, .docx, .pdf
6.- El plazu d’almisión de los microrrellatos finará’l díi 14 de mayu de 2009.
7.- La organización designará’l xuráu competente que tará presidíu pol Direutor Comercial de la revista La Sidra, Don Jose Luis Acosta Fernández. El xuráu nun conocerá, en dengún casu, los nomes de los autores, namás l’entítulu y el nomatu.
8.- El fallu del xuráu, que sedrá inapelable, fadráse públicu’l 21 de mayu de 2009 nun actu d’entrega de premios na Parrilla Antonio I, asitiada na cai Roncal nº 1, en Xixón. Anunciaráse amás el tercer aniversariu de l’asociación “El Barrio de La Sidra”.
9.- Premios:

• Primer Premiu de 500 €, más un llote de llibros rellacionaos cola sidre.
• Segundu Premiu de 300 € más un llote de llibros rellacionaos cola sidre.

10.- El xuráu tará facultáu pa resolver toa custión de la so competencia que se suscite.
11.- Los rellatos premiaos, y aquellos que pol so interes se seleiciones ente los rellatos presentaos, sedrán editaos de la forma que considere más afayaiza la revista La Sidra (en formatu de prensa escrito o editorial) y pel portal www.lasidra.info (en formatu dixital) coordianores del eventu.
12.-El fechu de participar nesti certame implica l’aceptación dafechu de les presentes Bases.

L’escritor xixonés Vicente García Oliva, cola obra Fontenebrosa II: la rebelión de los homosaurios, resultó ser el ganador del Premiu Montesín de Narrativa Xuvenil, que convoca Ediciones Trabe en colaboración cola Conseyería de Cultura y Turismu. Resultaron finalistes les obres Repuelgos y La maldición de Llucescuria.

El xuráu tuvo presidíu pol maestru Severino Antuña y formáu por María Antonia Pedregal Montes, xefa del Serviciu de Política Llingüística; María Xosé Rodríguez, xefa de la Oficina Municipal de la Llingua de Xixón; Alejandro Vega, alcalde del Conceyu de Cabranes –d’onde yera la filóloga y escritora María Josefa Canellada, autora de Montesín, títulu de la obra xuvenil que da nome al premiu de Trabe–, y la escritora Esther Prieto Alonso. Fixo de secretariu l’editor Inaciu Iglesias Fernández.

El premiu consiste, amás d’una dotación económica de 3.000 euros, na entrega d’una escultura de María Jesús Rodríguez y la publicación de la obra nuna de les colecciones xuveniles d’Ediciones Trabe.

“Fontenebrosa II: la rebelión de los homosaurios” ye la continuación de Fontenebrosa: el reinu de los silentes, que publicara nesta mesma editorial García Oliva yá hai bien d’años y que fuera un éxitu de crítica y públicu.

La escritora n’asturianu y gallego-asturianu, Marisa López Diz, ta acabante espublizar un llibru nesta última llingua “Binoca”, una publicación infantil editada por Pintar Pintar en tapes dures y con ilustraciones de Tina García, que debuta como ilustradora profesional con esti trabayu.

La hestoria de Binaco ye la d’un neñu qu’atopa nun llibru vieyu a un personaxe máxicu que va llevalu a un mundu llenu d’aventures onde va descubrir lo importantes que puen llegar a ser l’amistá y la xenerosidá.

Marisa López Diz tien dellos títulos n’asturianu pal públicu infantil como Poemes de carambelu, que ta espublizáu tamién como discu, y en gallego-asturianu espublizó’l poemariu A terra esqueicida (Trabe, 2008), amás de ganar nuna ocasión el premiu Xeiras de narraciones curties nesta llingua. Sicasí, esta ye la primer publicación infantil en gallego-asturianu qu’asoleya esta polifacética autora, voz tamién, del grupu Mestura.

El Conceyu de Ribeseya convoca’l segundu premiu Arbidel de cuentos eróticos d’alcuerdu coles bases que vienen darréu: 1.- Los cuentos redactaránse dafechu en llingua asturiana, respetando les normes ortográfiques de la mesma. -2. El llargor de los cuentos (unu por persona) sedrá superior a ocho folios mecanografiaos a doble espaciu, escritos per una sola cara. -3. La temática sedrá de calter eróticu. -4. El plazu d’entrega de los trabayos tará abiertu hasta’l 15 d’abril del 2009. Tienen d’unviase a: Casa Conceyu de Ribeseya. “Conceyalía de Cultura”, Plaza Mª Cristina 1, 33560 Ribeseya, nun sobre nel que s’escribirá “Premiu Arbidel”. Dientro d’elli dirá l’orixinal del cuentu col títulu y trés copies, amás d’otru sobre cola plica del autor y el títulu del cuentu escritu per fuera, dientro, apaecerán los sos datos y un teléfonu de contautu. -5. El Conceyu Ribeseya nomará un xuráu debidamente cualificáu pa fallar estos premios; les sos decisiones nun podrán ser retrucaes. -6. La entrega de los premios comunicaráse personalmente a los ganadores y fadráse público nos medios de comunicación. -7. El ganador de la presente edición formará parte del xuráu del próximu concursu. -8. Los trabayos premiaos son propiedá, amás del autor, del Conceyu Ribeseya. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies non presentaes. -9. Los premios sedrán los que vienen darréu. Primer premiu: 1.200’00 € Segundu premiu: 500’00 € -10. A xuiciu del xuráu, estos premios podrán declarase ermos.