Lliteratura

La xornada primera de la Xunta d’Escritores pesllóse con una comunicación non prevista d’Ánxel Nava y la presentación de los númberos 4 y 5 de la revista N’AST. Cartafueyos d’Ensayu, a cargu del director Daniel Cueli; rematando la xornada na torre de Villa Madalena, cola celebración del centenariu de Miguel de la Guardia (Hontaneda 1859 – Uviéu 1910), arquitectu del edificiu.

La Xunta d’Escritores Asturianos 2010, coordinada por Xaviel Vilareyo, entama güei llunes en Villa Madalena, Uviéu embaxo’l títulu “Lliteratura asturiana, identidá y nación”. Esta nueva edición va celebrase hasta esti miércoles, 13 de xineru, con actividaes destinaes tanto a escritores como al públicu en xeneral, con un ciclu de conferencies, alderiques, presentaciones de llibros, etc.

La Xunta va entamar cola presentación del Llibru d’Actes del anterior aconceyamientu que lleva por títulu “Lliteratura asturiana y compromisu”, a cargu d’Esther Prieto, de la Editorial Trabe. Esti volume recueye les más de les ponencies que se lleeron a lo llargo d’aquellos díes, a cargu de Xaviel Vilareyo, Carlos Rubiera, Bertu Ordiales, Helena Trexu, Xosé Lluis Campal, Xurde Morán, Baristo C. Martínez-Radío y Begoña Fernández Fernandez, Inaciu Galán, Ángel Guinda y Pablo Luque Pinilla. Completen el llibru una amuesa poética y delles fotografíes de quien asistieron a los distintos actos.

Güei mesmo, a les 17,30 hores Javier Cubero va dar llectura a “Llingües, clases y nacionalismos”, siguiendo a les 18,30 hores la conferencia “L’idioma asturianu na Asturias de Santiyana”, por Xaviel Vilareyo.

La xornada va pesallase cola presentación de los númberos 4 y 5 de la revista N’AST. Cartafueyos d’Ensayu, a cargu del director Daniel Cueli; y a les ocho y media la tarde, cola celebración del centenariu de Miguel de la Guardia (Hontaneda 1859 – Uviéu 1910), arquitectu de Villa Madalena.

El martes, 12 de xineru, siguen les actividaes cola conferencia “De cómo una llingua s’enfrenta a la muerte”, por Pablo Martínez Testa; “Nación y llingua”, d’Helena Trexu. La presentación, a les seis, del llibru “Abismos, adicciones y papeles azules”, de Xuan Carlos Crespos; siguiendo, a les 18,30 hores, la conferencia “Crónica del rei Fruela II d’Asturies (910-925)” por Xaviel Vilareyo.

La xornada del martes sigue cola conferencia “El procesu creativu”, de Dorita García y la presentación de la so obra narrativa. Pesllando a les 19,30 hores cola presentación del númberu 6 de la revista Formientu, na que van participar el director, Inaciu Galán, miembros del conseyu de redacción, autores y l’editor de La Cruz de Grau, César García. Darréu, autores como Pablo X. Suárez, Alejandra Sirvent, Abel Martínez, Frantxu Melero, Rubén Rey y Jorge Fernández García, ente otros, van celebrar un recital de lliteratura moza, nel que se van entregar los premios del I Certame de Microrrellatos Mozos «FORMIENTU».

La xornada cabera de la Xunta, va celebrase’l miércoles, a partir de les cinco la tarde, entamando cola presentación del númberu 72 de la revista LA SIDRA por Llucía Fernández Marqués. A les 17,30 hores Xaviel Vilareyo va falar de “La lliteratura dialectal de los escritores de Santiyana”.

El presentador del programa Al Aldu na TPA, y redactor d’ASTURNEWS, Inaciu Galán va falar, a partir de les 18,30 hores de los problemes y les cuestiones a la hora de facer “periodismu nuna llingua minorizada”.

Remátase la Xunta con una antoloxía de la nomada “Xeneración del Compromisu (1967-1982)” y la presentación, a partir de les ocho, del llibru “Historia del Cine Asturianu”, de Xaviel Vilareyo, a cargu del médicu y militante nacionalista Marcos Abel Fernández.

Ta acabante inaugurar la Xunta d’Escritores Asturianos cola presentación del llibru que recueye les ponencies de la Xunta anterior per parte d’Esther Prieto, d’Edicionesa Trabe. Entamóse un alderique sobre delles cuestiones xeneracionales comentando Prieto la falta de conexón cola llingua oral, pola falta d’espacios naturales pa usala. Esther Prieto camienta que la norma podría ser más simple.

La editorial Universos vieno acabante espublizar el segundu númberu de la revista lliteraria esTandoriu dedicáu esta vegada al mundu lliterariu asturianu en xeneral.

El nuevu númberu entama con un artículu d’Ismael María González «Dende les terraces de Mieres», empobináu a evocar l’ambiente lliterariu en llingua asturiana de mediaos de los 70, y deles obres poétiques d’autores como de Vanessa Gutiérrez y Xuan Santori. La prosa vien de la mano de Miguel Rojo, Ánxel Álvarez Llano, Xavier Frías Conde o Xabiero Cayarga.

L’escritor Javier Cubero abrirá con una conferencia inaugural la Xunta d’Escritores Asturianos 2010 el próximu llunes 11 de xineru nel Palaciu Villa Madalena d’Uviéu a partir de les 17,30 que tratará sobre’l tema central de los alcuentros qu’esti añu céntrase nes rellaciones ente nacionalismu y lliteratura y llevará de títulu: Llingües, clases y nacionalismos.

Javier Cubero de Vicente (Xixón, 1986) recibió’l Premiu Federico Fierro 2009 d’ensayu. Estudió Historia na Universidá d’Uviéu. Anguaño estudia na UNED y lleva alantre un gran llabor cultural, presidiendo l’Atenéu Cultural Xuan María Acebal, participando de l’asociación La brisa de Xapón y collaborando con revistes como “N’Ast. Cartafueyos d’ensayu”, “Erada. Revista d’historia contemporánea d’Asturies” o “Formientu”. Amás, trabaya nel campu de la normalización del asturianu dientro de la Universidá, siendo vicepresidente del Conceyu Universitariu pol Asturianu (CUPA) dende la so fundación. Como articulista ye collaborador habitual de los diarios dixitales Infoasturies y Asturnews, onde publicó recientemente interesantes ensayos como’l tituláu “Apuntes sobre provincialidá y nacionalidá n’Asturies”.

La Xunta d’Escritores Asturianos 2010 falará del nacionalismu asturianu y de les relaciones ente la lliteratura, la identidá y la nación nel casu asturianu. La relación ente nación y lliteratura ye un vieyu tema presente en tola historiografía lliteraria y paña especial relieve nel casu de les lliteratures de llingües menores y en procesu de construcción como ye’l casu de la lliteratura asturiana, que ta escrita nun llingua inda non oficial. Esta nueva edición del 2010 tendrá llugar n’Uviéu los díes 11, 12 y 13 de xineru. Les actividaes tán destinaes tanto a escritores como al públicu en xeneral yá que l’asistencia ye gratuíta y consisten nun ciclu de conferencies, debates, alderiques, presentaciones de llibros, amás tolos asistentes recibirán como regalu reproducciones de mapes históricos d’Asturies. Nesta edición el lema de les xornaes falará de cómo los aspectos identitarios afecten al fechu d’escribir nuna llingua minorizada y non oficial como l’asturiana frente a otres de más prestixu institucional y los medios pa superar cola lliteratura esta situación de desventaya, asina como les relaciones esistentes ente identidá y lliteratura, cara al futuru de los nuevos escritores, ente otros temes. La Xunta d’Escritores Asturianos tendrá llugar n’Uviéu nel palaciu de Villa Madalena, situáu nel antigu Paséu de la Siella del Rei. Na Xunta presentaráse’l Llibru d’Actes del anterior aconceyamientu que lleva por títulu “Lliteratura asturiana y compromisu”, a cargu d’Esther Prieto. El programa cuntará amás con conferencies y presentaciones de Javier Cubero, Xaviel Vilareyo, Daniel Cueli, Pablo Martínez, Helena Trexu, Xuan Carlos Crespos, Dorita García, Inaciu Galán, Laura Marcos, Benxa Pérez, César García, Llucía Fernández y Marcos Abel Fernández. Esta edición del 2010 quier recordar tamién los centenarios de Fruela II y del arquitectu asturianu Miguel de la Guardia.

LLUNES 11 XINERU: – 17h. Presentación del llibru Lliteratura asturiana y compromisu, actes de la Xunta d’Escritores Asturianos 2008. Presenta: Esther Prieto. – 17,30h. Llingües, clases y nacionalismos. Javier Cubero. – 18,30h. L’idioma asturianu na Asturias de Santiyana. Xaviel Vilareyo. – 19,30h. Presentación de los númberos 4 y 5 de la revista N’AST. Daniel Cueli. – 20,30h. Centenariu de Miguel de la Guardia (Hontaneda 1859 – Uviéu 1910), arquitectu de Villa Madalena. MARTES 12 XINERU: – 17h. De cómo una llingua s’enfrenta a la muerte. Pablo Martínez Testa. – 17,30h. Nación y llingua. Helena Trexu. – 18h. Presentación del llibru Abismos, adicciones y papeles azules, de Xuan Carlos Crespos. – 18,30h. Crónica del rei Fruela II d’Asturies (910-925) Xaviel Vilareyo. – 19h. El procesu creativu. Dorita García. Presentación de la so obra narrativa. – 19,30h. Presentación del númb. 6 de la revista Formientu.Inaciu Galán, Laura Marcos, Benxa Pérez y César García. – 20h. Recital de nueva poesía asturiana. MIÉRCOLES 13 XINERU: – 17h. Presentación del númberu 72 de la revista LA SIDRA. Llucía Fernández Marqués. – 17,30. La lliteratura dialectal de los escritores de Santiyana. Xaviel Vilareyo. – 18,30. El periodismu nuna llingua minorizada. Inaciu Galán. – 19,30. Antoloxía poética de la Xeneración del Compromisu (1967-1982) – 20h. Presentación del llibru Historia del Cine Asturianu, de Xaviel Vilareyo.Presenta: Marcos Abel Fernández.

L’asociación cultural La Caleya entregó esti sábadu los gallardones del III Certamen Lliterariu Reinu de Lleón, nun actu que se celebrab a les seis de la tarde, na Biblioteca Municipal d’Estorga. El concursu de La Caleya convócase dende va trés años nes modalidaes de poesía y rellatu curtiu.

Nel actu d’entrega de premios, los gallardonaos lleeron fragmentos de les obres coles que participaron y hebo una actuación musical. El certame, que cunta col sofitu del Ayuntamientu d’Estorga, la Diputación y el Instituto Leonés de Cultura, cunta con 400 euros pa caún de los primeros clasificaos.

David Artime resultó ser l’autor de la novela “La bufanda”, qu’a xuiciu del xuráu del Premiu de Narraciones Trabe 2009, yera la meyor obra d’ente les presentaes al mesmu, dotáu con 3.000 euros y la espublización del llibru.

El xuráu, formáu por Esther Prieto, Antón García, Xuan Bello y María Antonia Pedregal, actuando de Presidente ensin voz nin votu Inaciu Iglesias, editor del sellu, destacó “la frescura de la propuesta de La bufanda, combinando’l bon facer lliterariu cola necesaria cordialidá colos llectores y tresformando l’anécdota en lliteratura”.

L’escritor David Artime ye de Candás y exerce’l periodismu. Amás algamó otros premios lliterarios como l’Arbidel de rellatos eróticos o’l de microrrellatos de La Voz de Asturias, ente otros.

Güei, llunes 21 d’avientu, a les 19.00 hores va celebrase la gala d’entrega de los premios lliterarios en llingua asturiana que convoca la Conseyería de Cultura y Turismu d’Asturies. L’actu va tar presidíu pola Conseyera, Mercedes Álvarez González, y nél van participar los galardonaos de los premios d’esta edición: Miguel Allende, Xulio Arbesú, Ruma Barbero, Ismael González Arias y Pablo Antón Marín Estrada.

El públicu interesáu pue participar del actu, que va celebrase nel patiu del Palaciu Inclán Leiguarda, na Plaza’l Sol, 8, d’Uviéu.

Anunciárese la so salida pal añu 2007, pero problemes de calter editorial retrasaron hasta agora la salida la mercáu de “Harry Potter y la piedra filosofal”, el primer volume de les hestories del magu inglés creáu por J. K. Rowling y tornáu agora al asturianu por Xesús González Rato. La editorial Trabe entama la promoción d’esti llibru permitiendo la descarga de baldre del capítulu primeru.

Harry Potter y la piedra filosofal ye la primera d’una serie de siete noveles trepidantes y enllenes d’aventures escrites por J. K. Rowling, la gran sorpresa de la lliteratura infantil y xuvenil del momentu. Con una prosa fluyida anque plagada de detalles, acapara l’atención de quien llee dende la primer páxina hasta la última, y permíte-y esfrutar d’un universu máxicu qu’a toos nos prestaría vivir. La editorial Trabe tien previsto asoleyar la colección completa, que yá terminó la multimillonaria autora de la saga.

Nesti primer volume Harry Potter ye un rapaz güérfanu que vive colos tíos nun barriu tranquilu. Pero un día vien por él un xigante de pelo prieto y enguedellao y cuénta-y que ¡ye un magu! Dende entós, va cursar los estudios nel Colexu Hogwarts de Maxa y Bruxería. Nesta escuela pa magos va conocer unos amigos insepartables anque tamién va ganar unos enemigos llercibles. Va treslladanos a un mundu fantásticu nel que Harry habrá xugar al quiddtich, va tener que s’enfrentar a un perru de tres cabeces, va convivir con bisarmes, centauros, dragones y munches otres criatures máxiques. Va tar obligáu a adentrase na Viesca Vetada, y lo peor de too, va tener que s’encariar col más grande de los magos escuros, somorguiándose nuna historia apasionante que tien como meta única la Piedra Filosofal, un oxetu que, al paecer, más d’ún nagua por poseyer.

Anuncia de la salida de Harry Potter, ente les novedaes de 2007

L’autor teberganu Celso Peyroux, qu’espublizó dellos llibros n’asturianu nos años ochenta, espubliza la so última novela en castellán “Lobos de Luna Negra”, que s’enxerta dientro de la colección “Novela histórica” de la editorial moscona. L’actu, que va cuntar cola presencia del autor y de César García Santiago, editor, va presentase güei, xueves 17 d’avientu, a les ocho la tarde nel Club de Prensa Asturiana de La Nueva España, n’Uviéu.