Lliteratura

Esti xueves, 11 de payares, de magar les ocho y media la tarde, nel Centru Polivalente La Baragaña, en Candás, Marián García y Xurde Fernández presenten el so llibru “Febreru, 29”, un conxuntu de rellatos dirixíos a estudiantes d’ESO qu’algamó accésit nel II Premiu Asturnews de lliteratur infantil y xuvenil. Nel actu va tar presente’l director de La Cruz de Grau, César García Santiago, qu’asoleyó’l llibru.

Un claru baxón nes vientes que bazcuya ente un 7% y un 34% pa delles editoriales, según fontes del sector, ta poniendo en peligru al sector de los llibreros nel Estáu según vienen espardiendo esta selmana fontes estremaes del sector editorial.

Les llibreríes foron les primeres en detectar el baxón de ventes va un añu, cuando cayeron un 10 por cientu de 945 millones facturaos en 2009 a 845 nel mesmu periodu de 2010, pero agora la siotuación ya ye aceutaqda xeneralmente.

El revés económicu tien relación directa cola cifra de les devoluciones de los llibros que les editoriales dexen en depósitu y qu’a los tres mese4s tienen de ser mercaos poles llibreríes si nun se-yos da salida. Los llibreros cunten con marxenes abondo importantes (d’un 30% nel casu de los establecimientos tradicionales) polo qu’arriesguen pocu. Y, asina, cuando vence’l plazu del depósitu, los comerciantes acaben mercando munches vegaes los exemplares pa dexalos definitivamente nel so fondu. Pero esti branu naide quixo arriesgar más de la cuenta y prodúxose una devolución masiva.

La escritora y académica de la llingua asturiana, acaba ser premiada col Xuan María Acebal de poesía, otorgáu pola Conseyería de Cultura y Turismu, pol poemariu “La mio voz”. Embaxo la presidencia de la Xefa del Serviciu de Política Llingüística, María Antonia Pedregal Montes, el xuráu taba formáu amás polos escritores Miguel Allende, Aurelio González Ovies y Esther Prieto.

El xuráu destacó que se trata d’un poemariu intimista y emocionante, perbién trabayáu estilística y formalmente, y nel que s’afilvanen imaxes que conformen un conxuntu de gran espresividá y riqueza.

Mori ye la decimosesta ganadora del premiu y la primer muyer en facese col prestixosu gallardón, dotáu con 7.000 euros.

Marta Mori d’Ariba nació en Xixón en 1965. Ye doctora en Filoloxía Hispánica pola Universidá d’Uviéu y miembru de l’Academia de la Llingua Asturiana. Anguaño, trabaya como profesora d’Enseñanza Secundaria. Autora d’artículos d’hestoria, crítica lliteraria y didáctica de la llingua, tien publicaes delles obres lliteraries: los poemarios Pórticu(2003); El tiempu de la espera (2005); y L’alcordanza (2010), asina como la colección de relatos Histories familiares (2008).

Esti llunes, 8 de payares, a les ocho la tarde, Xuan Xosé Sánchez Vicente presenta la so segunda novela en castellán, “Retrato de desposados con Panamá al frente”. L’actu va tener llugar nel Club de Prensa Asturiana de La Nueva España, cola presencia del autor, xunto al escritor Antón García y a la editora de Septem, Marta Magadán.

Esti vienres, 5 de payares, de magar les ocho la tarde, la Conseyería de Cultura d’Asturies va presentar les obres gallardonaes en 2009 colos sos premios. L’actu va facese nel Centru de referencia de la Cultura y la Llingua Asturiana Casa de los Alberti, en Ciañu, con mesa redonda de los autores coordinada por Chechu García.

Les obres premiaes son “Mientres cai la nueche”, de Pablo Antón Marín Estrada col Xosefa Xovellanos de novela; “Pastoral en sol mayor”, de Miguel Allende col premiu Xuan María Acebal de poesía; “El destín treshumanu” de Xulio Arbesú col premiu Máximo Fuertes Acevedo d’ensayu; ya Ismael María González Arias con “Les puertes del paraísu”, que se fizo col premiu Maria Xosefa Canellada de lliteratura infantil y xuvenil.

Nos meses caberos del añu ye vezu l’acumulación de fallos de los xuraos de premios lliterarios a obres escritres n’asturianu. Estos díes diose a conocer qu’Adolfo Camilo Díaz ganó’l Premiu de Rellatu Curtiu de Madrid Xosé Álvarez y Pablo Rodríguez Alonso’l Nené Losada Rico de poesía.

Alonso algamó’l premiu Nené Losada col poemariu “Palabres d’un tiempu”, con un xuráu conformáhu por José Luis Rendueles, qu’actuó como presidente; Xuan Santori, como secretariu; y Antón García, como vocal; y compitiendo con otros seis poemrios. La entrega del premiu va facese’l vienres 5 de payares, a les 19.30 hores, na Sala Álvaro Delgado de L.luarca.

Per otra banda, l’escritor Adolfo Camilo Díaz foi’l ganador del Premiu Xosé Álvarez del IX Concursu de Rellatu Curtiu en llingua asturiana que convoca’l Centru Asturianu de Madrid, col rellatu “La piel”. Lluis Portal algamó’l segundu premiu, que lleva’l nome de Xosé León Delestal “Historia d’Elé”.

El Cafetón d’Avilés acueye esti xueves, 4 de payares, de magar les ocho y media la tarde, la presentación de “Febreru, 29”, obra que de Xurde Fernández y Marián García que se fizo con un accésit del Premiu Asturnews de Lliteratura Infantil y Xuvenil en 2009. La obra espublizóla La Cruz de Grau en collaboración col diariu Asturnews. Na presentación va tar, amás de los autores, César García, editor.

El Garrapiellu acaba dar anuncia del resultáu de la XIX edición del so concursu de Cuentos Curtios. Esta selmana aconceyó’l xuráu pa fallar los gallardonaos d’esta edición y “dempués d’aldericar” llegóse al alcuerdu de declarar ganador al rellatu “…A la casa’l boticariu”, que resultó ser de Sergio Buelga. El primer premiu ta dotáu con 900 euros. Amás, el xuráu decidió dar un accésit de 300 euros al rellatu “El cantador de blues”, de Mª Xesús Rodríguez Guillón.

El xuráu d’esta XVIII edición taba formáu pol académicu de la llingua Vicente García Oliva, pol escritor y ganador de la cabera edición José Luis Rendueles y pol escritor Milio Rodríguez Cueto, cuntando col sofitu de la Conseyería de Cultura y de la Fundación Municipal de Cultura, Educación y Universidá Popular del Ayuntamientu de Xixón.

Los autores:

Sergio Buelga (Xixón, 1979) ye miembru del Conceyu Nacional del Liriu, xugando nel grupu Espor(a), amás d’actor, participando nos montaxes de la Compañía Asturiana de Comedies.

Mª Xesús Rodríguez Guillón fízose yá nel pasáu col primer premiu nel III Concursu de Narraciones Curties “Conceyu de Piloña”, col rellatu “El Zapatu”.

El martes 2 de payares, a les 19:00 hores, n’Espaciu Abiertu de la Llibrería Cervantes d’Uviéu (C/ Doctor Casal esquina Campoamor), va presentase’l llibru de Xuan Bello “Ambos mundos. Poesía 1988-2009”. En versión billingüe asturianu-castellanu, “Ambos mundos” recueye lo esencial de la so obra poética, xunta dellos inéditos de recién.

La escritora Montserrat Garnacho ye la ganadora de la tercer edición del Premiu de lliteratura infantil y xuvenil en llingua asturiana “María Josefa Canellada”, que concede la Conseyería de Cultura y Turismu del Principáu d’Asturies. La so obra “A pespunte”, encuadrada nel xéneru teatral, fízose col premiu, dotáu con 7.000 euros, penriba de los otros cinco trabayos más que se presentaron esti añu.

El xuráu que concedió esti gallardón aconceyó a les 11.00 hores na Casa de Cultura “María Josefa Canellada” (Santolaya de Cabranes) cola presidencia de la Directora Xeneral de Política Llingüística, Consuelo Vega Díaz, y cola participación del alcalde de Cabranes, Alejandro Vega Riego, y de los escritores Ismael González Arias, Maite González Iglesias y Miguel Rojo. El xuráu contó tamién cola participación d’Alonso Zamora Canellada, fíu de la filóloga y escritora María Josefa Canellada que da nome al gallardón.

Ente les obres presentaes, el xuráu decidió por unanimidá conceder el Premiu al testu entituláu “A pespunte”, al valorar que se trata d’una obra teatral onde se recupera, revisa y actualiza la tradición oral de manera que ye p’averala a neños y neñes d’anguaño. Una obra, d’otra banda, que cuenta con gran aplicación didáctica nes aules, escrita con voluntá d’estilu y nun asturianu mui prestosu.

El testu presentóse col alcuñu “Petra Molaguero”.

Montserrat Garnacho Escayo nació en Mieres del Camín nel 1952. Llicenciada en Filoloxía Románica, ye profesora de Llingua y lliteratura española mesmo que de Llingua asturiana. A ello añédese la so trayectoria como escritora y cuentacuentos, con participación en bien d’actividaes venceyaes col fomentu de la llectura fuera y dientro de les escueles. A ello hai qu’axuntar trabayos de calter etnográficu y la collaboración como articulista en periódicos y revistes de toa mena.

L’autora fizo tamién trabayos de recuperación de tradición oral, cómic, narrativa p’adultos, monólogos, cuentos infantiles y nel xéneru teatral col que ganó la tercer edición del Premiu “María Josefa Canellada”, nesti casu col títulu A pespunte.