Gastronomía

El vinu de Cangas de Narcea salta fronteres. Productores, llagareros y hosteleros del conceyu participen nun proyectu européu que quier da-yos puxu a los vinos más desconocíos d’España, Francia y Portugal, col envís declaráu de saca-y partíu turísticu a la promoción de la cultura vinícola. Cangas acoyerá la primer xuntanza de trabayu de los miembros del proyectu, denomináu ‘Rutes inédites del vinu nel Sudoeste d’Europa’.

Amás del principal conceyu productor de vinu n’Asturies, formen parte del proyectu les rexones franceses d’Aquitania, Midi-Pyrénées y Languedoc-Roussillion; zones del centru y norte de Portugal, como Coimbra y Vale do Ave; y territorios vinícoles de Baleares, Cantabria y Canarias.

Toos ellos busquen axuntar esfuerzos pa facer un vinu meyor y más rentable, dientro d’un plan ampliu qu’afita como horizonte de trabayu los prósimos dos años y prevé la esplotación turística de llagares y otros elementos del patrimoniu etnográficu, la edición de cartafueyos p’atrayer a visitantes y la cellebración de conferencies especializaes.

El preste de Cangas de Narcea a la participación del conceyu na iniciativa europea ta acabante dalu la Comisión de Desarrollu Llocal y Turismu del Ayuntamientu, que lidera la involucración nel proyectu de l’Asociación de Productores del Vino de Cangas, l’asociación Vino de la Tierra de Cangas, la Cofradía del Vino, l’Asociación Llocal d’Hostelería y les empreses Bodegas del Narcea, Vinos Cangas, Antón Chicote y La Muriella.

Aporta’l veranu, xube la sidra. Chigreros de la zona central d’Asturies apliquen dende primeros de mes aumentos nel preciu de la bebida que n’ocasiones lleguen a los 30 céntimos y que dexen el preciu final de la botella de sidra ente 2,10 y 2,30 euros, coincidiendo cola xubida del consumu alitada pola temporada de vacaciones estivales.

L’argumentu del sector chigreru pa xustificar l’aumentu de les tarifes pasa por dos puntos: Por un llau, los titulares d’establecimientos hosteleros sostienen que’l coste d’ellaboración y distribución de la sidra ye cada vegada mayor y oblígalos a xubir los precios pa mantener los sos beneficios; en segundu llugar, los chigreros aseguren que’l preciu de la botella de sidra permanecía allamuergáu hai tres años.

Magar d’ello, la incorporación del Estáu español al Sistema Monetariu Européu, que se traduxo nel cambiu de la peseta al euro el 1 de xineru de 2002, propició yá neses feches una xubida nes tarifes de la sidra n’hostelería, al pasar entós a costar una botella de 250 pesetes a 2 euros (al cambiu, 333 pesetes).

El sector de la sidra natural asturiana, qu’enfila la temporada de veranu col envís d’aumentar no posible los beneficios d’años anteriores, abrió el xueves pasáu una decisiva etapa nel afitamientu de la denominación d’orixen, al quedar constituyíu el primer Conseyu Regulador elixíu en votación abierta por llagareros y collecheros.

Presidíu pol xerente de la firma El Gaitero, José Cardín, el nuevu Conseyu echa a andar col retu d’espardir la denominación d’orixen -a la qu’esta temporada namás s’acueye un 2 por cientu de la sidra producida n’Asturies- y ameyorar la so comercialización internacional.

José Cardín liderará la xestión de la denominación d’orixen de la sidra nos prósimos cuatro años. El xerente de la empresa El Gaitero convirtióse ayeri nel primer presidente del Conseyu Regulador de la sidra elixíu por votación, col sofitu de los seis vocales correspondientes a los llagareros -ente los que ta él mesmu- pero cola abstención de los seis representantes de los collecheros, qu’asumirán la vicepresidencia.

Nuna votación abierta a los doce miembros del Conseyu Regulador, que quedó constituyíu ayeri depués de les elecciones cellebraes el pasáu 24 de xunu, Cardín ‘collechó’ la rocea de los productores de mazana, qu’evitaron apoyar de mou esplícitu la so candidatura pero nun votaron en contra, aparcando asina l’enfrentamientu ente llagareros y atropadores que marcó’l primer procesu ellectoral internu del Conseyu.

Hasta agora, esi organismu taba presidíu por Ignacio Fuejo, nomáu pol Principáu pa dirixir los primeros pasos de la denominación d’orixen antes de la so aprobación efectiva por parte de les autoridaes europees, y qu’ayeri coló del cargu ente dalgunes crítiques al so llabor pola so condición d’ayenu a los sectores de collecheros y ellaboradores.

La etapa qu’agora abre el so sucesor quier afitar, según avanzó’l propiu Cardín, la comercialización internacional de la sidra acoyida a la denominación d’orixen, y pa ello, destacó’l nuevu presidente’l Conseyu Regulador, ye preciso que’l Gobiernu autonómicu demuestre que cree na marca de calidá de la sidra más allá “de lo folclórico” y refuercie’l so apoyu económicu.

Ente les amplies competencies que-y correspuenden por llei al Conseyu Regulador de la Sidra figuren el control de la calidá de la mazana nes pumaraes, el siguimientu de cada pasu de la ellaboración y la promoción publicitaria de la denominación d’orixen.

Nes elecciones del pasáu día de San Xuan, José Cardín algamó 19 votos d’un censu de 38 llagareros y sobro un total de 24 votos emitíos. Xunta él, representen a los ellaboradores nel Conseyu Regulador Herminio Alonso, Consuelo Busto, Eloy Cortina, Víctor Manuel Escalada y Francisco Martínez. Son vocales de los collecheros José Luis Rubiera, Álvaro Menéndez, Pablo Echanobe, José Madiedo, Antonio Muñoz y José María Díaz.

Web oficial del Conseyu Regulador de la Sidra

Los collecheros de mazana sidrera tendrán una representación dafechu autónoma, ensin presencia de llagareros, nel primer Conseyu Regulador de la sidra que s’elixe por votación. La candidatura ‘oficial’ de l’Asociación de Collecheros (Aacomasi) algamó’l 81 por cientu de los sufraxos nes elecciones de les que saldrán los xestores de la denominación d’orixe, ya impúsose a una segunda llista con presencia d’ellaboradores.

Un total de 152 atropadores de los 200 con drechu a votu acudieron ayeri a les urnes allugaes na sé del Conseyu, en La Villa, y decantáronse de forma mayoritaria pola candidatura avalada por Aacomasi: Esta llista algamó 123 apoyos, a gran distancia de los 29 votos qu’obtuvo la candidatura autodenominada independiente, que recibiera crítiques de los reponsables de l’Asociación de Collecheros por incluyir a dos llagareros de sonadía, los titulares de Sidra Menéndez y Sidra Quelo.

Dambos pudieron concurrir a les elecciones na estaya de collecheros al tar tamién daos d’alta como talos, pero la so presencia na llista nun animó al collectivu d’atropadores a ensayar fórmules de representación alternatives a Aacomasi, qu’agora asumirá les seis vocalíes correspondientes al sector de la collecha nel Conseyu Regulador.

Les seis restantes tarán ocupaes por los miembros de la candidatura única que los llagareros consensuaron pa concurrir a les elecciones, y que recibió 24 votos de los 38 que podíen emitise. Productores y collecheros tán llamaos a elixir el prósimu 1 de xunetu al presidente’l Conseyu Regulador en sucesión d’Ignacio Fuejo, designáu pola Conseyería de Mediu Rural antes que la Unión Europea avalara la denominación d’orixen de la sidra asturiana.

Dos llistes distintes pa decidir qué collecheros de mazana representarán al sector nel Conseyu Regulador de la sidra. Los 200 atropadores con drechu a votu nes elecciones de güei, de les que saldrán los primeros xestores de la denominación d’orixen elixíos en votación, podrán optar ente la candidatura de l’Asociación de Collecheros (Aacomasi) y una segunda llista autodenominada independiente.

La primer opción aválala’l presidente d’Aacomasi, José Luis Rubiera, opuestu a los ‘independientes’ al albidrar qu’éstos inclúin na so candidatura a renomaos llagareros, nos que Rubiera ve un peligru pa los intereses de los pequeños propietarios de pumaraes.

Pol so llau, la llista independiente encabézala Gerardo Menéndez, del llagar Sidra Menéndez, quien diz concurrir a les elecciones precisamente pa representar a los collecheros de mazana de sidra que nun pertenecen a Aacomasi. Ente les sos propuestes figura en llugar destacáu, y col envís d’evitar enguedeyos al consumidor, l’amiestu de les dos marques de calidá de sidra asturiana qu’hai nel mercáu: La denominación d’orixen y la sidra de mazana seleccionada, producida por varios llagareros al marxe’l Conseyu Regulador.

La normativa d’esti órganu fixa la cellebración de la votación -a la que tán llamaos tamién 40 llagareros- pa la xornada de güei na sé del Conseyu, allugada en La Villa. Del resultáu qu’asoleyen les urnes saldrán doce vocales, repartíos proporcionalmente ente collecheros y llagareros, y ente esa docena de representantes electos nomaráse a un presidente que va sustituyir al actual responsable del organismu, Ignacio Fuejo, designáu pola Conseyería de Mediu Rural antes que la Unión Europea avalara la denominación d’orixen de la sidra asturiana.

Pesie a la importancia que’l procesu ellectoral tien en cuanto que va afitar les llinies mayestres del futuru de la sidra etiquetada, la representatividá del Conseyu Regulador inda ta determinada poles cifres de producción: Namás un 2 por cientu de la sidra de temporada que ta nel mercáu foi embotellada dientro de la denominación d’orixen.

Web oficial del Conseyu Regulador de la sidra

Unos 240 profesionales del sector sidreru -200 d’ellos collecheros de mazana y el restu, llagareros- dediden a partir de güei quién van ser los doce primeros miembros electos del Conseyu Regulador de la denominación d’orixen ‘Sidra d’Asturies’, que controlará tol procesu d’ellaboración de la sidra acoyida a esa marca de calidá, dende la collecha al trasiegu, la fermentación, l’embotelláu, l’etiquetáu y la distribución a los chigres.

Cola proclamación de candidatures, formalizada ayeri, aníciase la recta final d’un procesu que continúa nos prósimos cuatro díes cola pública esposición de les llistes, l’aniciu del votu per corréu el día 14 de xunu y la votación presencial, el xueves 24 de xunu, na sé del Conseyu Regulador, allugada en La Villa.

D’esos comicios saldrán doce vocales, repartíos proporcionalmente ente collecheros y llagareros, y ente esa docena de representantes electos nomaráse a un presidente que va sustituir al actual responsable del organismu, Ignacio Fuejo, designáu pola Conseyería de Mediu Rural antes que la Unión Europea avalara la denominación d’orixen de la sidra asturiana.

Pesie a la importancia que’l procesu ellectoral tien en cuanto que va afitar les llinies mayestres del futuru de la sidra etiquetada, la representatividá del Conseyu Regulador inda ta determinada poles cifres de producción: Namás un 2 por cientu de la sidra de temporada que ta nel mercáu foi embotellada dientro de la denominación d’orixen.

Web oficial del Conseyu Regulador

Col aportar de mayu, la cai Gascona d’Uviéu algama la categoría de capital de la Sidra d’Asturies cola so popular preba de la sidra que fai que los espertos sidreros y los que nun lo son tanto puean decidir cuala atalanten que ye la meyor sidra la temporada.

El domingu 9 de mayu ye la cita d’esti añu pa la que ye yá la quinta «preba» de la primer sidra de la temporada, na que van participar esta vuelta 16 de los más importantes llagares qu’ellaboren sidra n’Asturies.

La Preba entama tolos años con un pregón na mesma cai Gascona, qu’esti añu correpuendes al ex alcalde d’Uviéu Luis Riera Posada. Darréu d’esti pregón entamen a prebase la sidra d’esos dieciséis llagares participantes, que van vese calificaos pola xente que tendrá de dexar el so votu nuna urna allugada na mesma cai. En pasando les dos de la tarde cuntaránse los votos y esbillaráse a la sidra ganadora de la «preba» popular. Una “Preba” que va tar amenizada pol «Dúo Astur» y na que pa participar nun fai falta un res: namái que mercar un vasu sidra y dir pidiendo culines pola cai Gascona.

Los asistentes a la «preba» amás d’escoyer por votación la sidra popular disfrutarán de xuru d’otros alicientes del domingu, como la carrera de Fernando Alonso o la música qu’ufierta la programación d’esti conceyu festivu.

La hostelería de luxu de Madrid reconoz la bayura culinaria de la faba d’Asturies. A un preciu de 53 euros más IVA y dientro de les primeres xornaes gastronómiques qu’entama, l’Hotel Ritz madrilanu ufre hasta’l domingu que vien un menú de cinco platos basáu nel ingrediente esencial de la fabada, baxo la supervisión del xefe l’equipu de cocina del restaurante uvieín La Gruta, Adolfo León.

Les recetes, previstes pa ser servíes na comida o na cena, entemecen les fabes con estremaes carnes y pescaos y cambien cada día. El miércoles ye la xornada de les fabes con pitu golfu, mientres que’l fin de selmana, l’hotel madrilanu sirve nes sos meses fabes con xabalín y potarros del Cantábricu.

Los recursos de los responsables de les xornaes prevén tamién l’amiestu de fabes y pexe espada, llangosta y rau de güe, nuna iniciativa gastronómica inédita nel Hotel Ritz, inspiráu por Alfonso XIII, inauguráu en 1910 nel céntricu paséu’l Prado y frecuentáu pola realeza europea.

El preciu d’una habitación nel luxosu Ritz, homónimu d’otros dos hoteles en Londres y París, va de los 480 euros diarios d’una de les habitaciones más cencielles a los 4.500 euros que cuesta pasar una nueche na suite real.

El quesu ‘afuega’l pitu’, producíu na zona central d’Asturies, podrá recuperar parte’l so gustu tradicional gracies a la investigación que la bacterióloga Ana Rodríguez González fexo nos diez últimos años auspiciada pol Conseyu Superior d’Investigaciones Científiques (CSIC), y qu’agora cuaya na definición d’un formientu personalizáu que fai la producción más asemeyada a la vieya ellaboración con lleche crudo.

Nel añu 1992 prohibióse l’usu de lleche natural crudo pa facer quesu frescu de menos de dos meses de mauración, obligación que llevó a abondos queseros a emplegar formientos franceses na preceptiva producción cn lleche pasteurizao. Ana Rodríguez, investigadora l’Institutu de Productos Lácteos d’Asturies (IPLA), aislló entós bacteries de los quesos orixinales de lleche crudo y fexo una esbilla de les más adecuaes pa usales con lleche pasteurizao.

El resultáu del trabayu ye un formientu específicamente pensáu pal ‘afuega’l pitu’ que yá se probó con éxitu en dos queseríes de Grao y qu’agora empieza a producir una empresa valenciana dependiente’l CSIC.

Otres dos investigaciones asemeyaes busquen formientos lácticos pal quesu Cabrales y pal quesu de Vidiago, dambos ellaboraos nel oriente asturianu.

L’alta afluencia a la popular comida de les Fiestes del Bollu d’Avilés, qu’esti añu algamó axuntar a unes 10.500 persones nes meses asitiaes al aire llibre nel centru de la villa, espardió’l xaréu festivu a la cai de La Fruta pa poder agospiar a tolos comensales. La xinta, cola tortiella y la empanada como ingredientes principales, desendolcóse nun ambiente folixeru y abrió una tarde d’actos festivos n’estremaos escenarios.

La comida na cai, que se cellebra tradicionalmente el llunes de Pascua y tresforma por unes hores la fisonomía’l cascu vieyu d’Avilés, espardióse pel entornu peatonal de los viales qu’arrodien la Plaza d’España -conocida popularmente como la Plaza’l Parche- y propició l’habitual confraternización d’amigos y convecinos cola gastronomía como elementu central.

Tres de los postres, que foron consumíos, mesmo que’l restu de la comida, embaxo d’un cielu anubríu pero con una temperatura asequible, abrióse’l programa d’actos previstos pa la tarde. Ente ellos destaquen un desfile de carroces a les 18 hores ente la cai Jardines y la avenida Cervantes y dos cites musicales: Un alcuentru coral d’habaneres na Casa la Cultura a les 20 hores y un conciertu de Tejedor, una hora más tarde, na Plaza d’España.