Gastronomía

La revista La Sidra dio anuncia del ganador del Premiu d’Ensayu Emilio Trabanco 2010, que nesta ocasión recayó nun trabayu d’Arantzazu Ortíz López, tituláu “La Sidra y la Manzana Asturiana. De la tradición al arte”, nel que fai un interesante repás a la presencia de la sidra y la mazana asturiana nel ámbitu pictóricu. En pallabres de l’autora ” al traviés d’estes páxines desfilarán ente los nuesos güeyos una riestra d’artistes y trabayos venceyaos a la sidra nel so más ampliu contestu: cultivu, pañada, mayada, tabiernes, chigres, romeríes, gastronomía…”.

El xuráu, compuestu por David M. Rivas (presidente), Inaciu Hevia Llavona, Antón Fernández, Antonio Martínez, y Roberto González-Quevedo, aconceyaos en Xixón, decidieren premiar esta obra, al empar qu’encamentaben a la espublización d’otru de los trabayos presentaos “Catálogo de Etiquetas de sidra”, del que ye autor Miguel Angel García Otero, al consideralu tamién d’especial interés.

L’actu d’entrega del premiu tendrá llugar el viniente 25 de febreru nes instalaciones del Llagar Trabanco en Llavandera (Xixón), de magar les 11:30 la mañana.

El premiu d’Ensayu Emilio Trabanco tien una dotación de 1.500 €, ye convocáu por LA SIDRA en collaboración col Llagar Trabanco, y na so primer edición resultó ganaor Fernán Gonzali Llechosa col so “Diccionariu Sidreru. Asturianu-Español”.

Yá se pue descargar na rede, la versión en pdf del númberu 85 de La Sidra, revista asoleyada pol Ensame Sidreru, correspondiente a xineru de 2011. Nesta nueva entrega mensual, tien como conteníos destacaos la entrega de premios de IV Concursu Semeyes La Sidra, la llei antitabacu y cómo afecta a los chigres y la denominación d’orixe Sidra d’Asturies.

Amás d’estos conteníos de portada nesti númberu podrán atopase les sieiciones avezaes, noticies d’actualidá sidrera, entrevistes y munchos conteníos interesantes.

Descarga de baldre una amuesa de la revista

Esti sábadu 15 de xineru, de magar les 12 hores nel chigre L’Ayalga, asitiáu nel 11 de la cai Prendes Pando de Xixón, va celebrase una preba de dellos palos de sidra inglesa. Pa participar ye imprescindible apuntase previamente, pues hai un númberu de places llimitáu. La inscripción ha facese nel corréu info@lasidra.as

Los medios lleven tiempu falando de la necesidá de meyorar la imaxe internacional de la sidra d’Asturies, yá que la so presencia ye mui pequeña en comparnza cola de la vasca. Sobre l’asuntu fala Marcos Abel Fernandi nel númberu 83 de La Sidra: “El problema nun ta en que la sidra vasco algamare una referencialidá internacional que podemos considerar más o menos sobredimensionada. Non, el problema ta en cómo ye posible que la sidra asturiano y la so cultura, cola so vitalidá única nel mundu, nun llograre superar les fronteres del desconocimientu internacional, cuanto menos el necesariu lideralgu que-y correspondería a esi nivel”.

Nel númberu apaecen artículos sobre la cuestón de José María Osoro (presidente de l’Asociación de Llagareros d’Asturies) con «Les grandes referencies históriques sobre la tradición sidrera n’Asturies»; y David Rivas (profesor titular d’Estructura Económica de la Universidá Autónoma de Madrid y autor del llibru La Sidra Asturiana. Bebida, ritual y símbolo) con «La sidra, algo más que la honrilla herida».

Nes más de cien páxines hai espaciu tamién pal Sidrocole’10 (programa de visites a llagares pa que los escolinos conozan cómo se fai la sidra), sobre’l Master Class DOP Sidra d’Asturies (entamáu pol Conseyu Regulador d’esa denominaciónd’orixe), la segunda edición del Xixón de Sidra, o la sidra más esotérico que s’ellaboraba antaño nel Palaciu Casona de Los Fueyos (ente los conceyos de L.lena y Quirós).

Descarga la revista de baldre

El Conceyu de Bimenes celebra na primer fin de selmana d’avientu les XIV Xornaes Gastronómiques del Gochu y la VI Feria Agroalimentaria y de Productos Artesanos. Ente los díes 4 y 6 d’avientu, Martimporra, capital del conceyu, acueye tamién la Feria agroalimentaria, que tien llugar nel colexu públicu.

Porgrama completu d’actividaes

La revista La Sidra entama pal sábadu 4 d’avientu de magar la una la tarde, la Primer Mayada y Espicha 2010, una de les tres celebraciones emblemátiques del Ensame Sidreru, na que los participantes tienen la oportunidá de mayar la sidra ellos mesmos, prebando los tinos y toneles del Llagar Frutos, asitiáu en Quintueles, Villaviciosa.

El llagareru, Gustavos, va enseñar en grupos reducíos, tinos y toneles cola sidra n’estremaes fases d’ellaboración, dende lo acabante de mayar hasta lo que yá ta cola formientación maleolláctica finada.

Según los organizadores ye “una ocasión única pa conocer a fondu esti perguapu llagar”, y de deprender “les diferentes carauterístiques de la nuesa bébora patria a lo llargo de la so evolución dende la sidre’l duernu hasta que yá ta pa corchar”.

El preciu de la espicha “que tendrá’l so aquelli de mariscu pa que preste’l tragu”, ye de 25 €, de 22 € pa soscritores y collaboradores. Como davezu, el númberu de places ye llimitáu, y seguiráse un rigurosu orde d’iscripción, y por supuestu, recuerden, “nun faltará nin música asturiana, nin bon ánimu nos asistentes”.

P’apuntase ha llamase al teléfonu 652 594 983 o escribir al corréu lletrónicu info@lasidra.as

El númberu d’ochobre de 2010 de la revista La Sidra, publicación mensual del Ensame Sidreru ta yá disponible en llinia y nos llugares habituales de distribución. Los temes destacaos en portada d’esti exemplar son les nueves instalaciones de Trabanco en Sariegu, Xixón de Sidre y el 75 aniversariu de Sidra Muñiz.

Como ye vezu, la revista cunta coles seiciones d’actualidá sidrera, axenda, llibros, concursu semeyes, etiquetes,…

Descarga la revista de baldre

La segunda edición de Xixón de Sidra, que se celebra hasta’l domingu 24 d’ochobre, cuenta cola participación de 33 sidreríes y 33 llagares, y va terminar esti domingu, dempués de cuasi una selmana d’actividaes. Nesta selmana Xixón convirtióse na capital mundial de la sidra y xixoneses y visitantes vivieron intensamente’l mundu de la sidra y la so cultura. “Los asturianos vuelven tener la sidrería como centru d’actividá social y gastronómica, recuperando y enseñando a toos que les sidreríes son muncho más qu’un simple llugar d’alcuentru”, comenten los sos organizadores.

A lo llargo d’esta selmana, la ciudá vivió un acontecimientu gastronómicu y cultural que l’Ayuntamientu ve destináu “a convertise nun referente” nel estáu y nel ámbitu internaciona, “como atracción turística”.

Nesta segunda edición de Xixón de Sidra participen 33 sidreríes emblemátiques de la ciudá y 33 de los meyores llagares, nueve más que na edición del añu pasáu. Amás, anguaño recupérase la presencia de los coros nes sidreríes pa lo que se cunta colos grupos corales Cantábricu, Cimadevilla, Noega y Amanecer.

Mientres esta selmana cada sidrería ufierta palos escoyíos de la meyor sidra de cada llagar asignáu, estableciendo un preciu curiosu qu’inclúi una botella de la sidra acoyida pol establecimientu y una cazoleta de creación propia como acompañamientu. Cada sidrería namás acueye la sidra d’un llagar concretu escoyida por un comité de preba p’asegurar la óptima calidá.

Toles sidreríes participantes apaecen na ferramienta d’información oficial, el “sidromapa”. Trátase d’una guía qu’amuesa per un llau les rutes propuestes coles 33 sidreríes participantes y el tipu de sidra calidable qu’ufierten y, per otru, el mapa de los 33 llagares productores de les marques qu’acueye caúna (nome, localización, variedaes de sidra producida) pa que seya didáctica y s’alcuentro correctamente lo que se va a prebar.

El sábadu viniente, 30 d’ochobre, a les 12 del meudía, la revista La Sidra, va facer una preba guiada de sidra d’Alemaña en L’Ayalga (cai Prendes Pando 11, Xixón) na que podrán prebase un total de cuatro variedaes estreames de sidre alemana, de la mano d’Eduardo Coto, delegáu européu de la revista qu’organiza l’actividá.

L’actu cunta cola collaboración de Jens Becker d’Apfelweinhandlung, Andreas Schneider d’Obsthof am Steinberg y Jörg Stier col Llagar Jörg Stier, y nél van presentase les marques Sachsenhäuser Theobald´s de Hessiche Wirsthaus Kelterer; Schöner von Boskoop. (Llagar Röte-Pumpe); Goldpärmene. (Llagar Weidmann und Groh) y 2009 Bohnapfel Cuvée de Schneider.

El preciu de la preba sedrá de diez euros, ocho pa soscritores y collaboraores, y daráse un vasu alemán de sidra a caún de los participantes, que tán llendaos a númberu curtiu, pal que se respetaré un rigurosu orde d’inscripción.

El Conseyeru de Mediu Rural y Pesca esplicó ayeri nuna rueda de prensa qu’en 2009 la producción algamó a 71.248 llitros, un 9,4% más qu’en 2008, “lo que da una idea del grau d’afitamientu del sector”. Amás anuncióse que demientres los díes 8, 9 y 10 d’ochobre, la villa de Cangas va convertise na capital del vinu cola celebración de la Fiesta de la Vendimia. Les cais de la villa canguesa acueyen a tolos llagares productores del Vinu de la Tierra de Cangas amás d’una gran cantidá d’espositores tantu d’artesanía típico como d’agroalimentación.

Esta fiesta ta promovida pola Xunta Local d’Hostelería de Cangas y na so organización collaboren la IGP Vinu de la Tierra de Cangas, el Conceyu de Cangas, según otres entidaes y asociaciones rellacionaes cola hostelería y la gastronomía asturiana.

Na edición d’anguaño, el Presidente de Cantabria, Miguel Ángel Revilla, va recibir la Cepa d’oru” qu’añalmente concede la xunta d’hostelería local de Cangas a les persones distinguíes pa exercer d’embaxadores del Vinu de Cangas y de la cultura y tradiciones populares.