Fiestes

Uviéu y Mieres siguen la güelga de Don Carnal. La capital asturiana y la villa minera centren les cellebraciones d’antroxu del fin de selmana depués del pieslle de la folixa nes dos cites más multitudinaries, les de Xixón y Avilés. La Sardina d’eses dos ciudaes revive na ‘Truchona’l Caudal’ y nuna queimada popular p’animar la segunda fola de fiestes de mázcares n’Asturies.

Un conciertu de Los Berrones na plaza la Catedral a partir de la medianueche’l vienres protagoniza la primer xornada d’antroxu n’Uviéu, que vendrá precedida d’una queimada popular nel mesmu escenariu y el recitáu d’esconxuros d’antroxu. Nel Palaciu los Neños, con accesu llibre y de baldre, desencólquense a lo llargo de güei talleres de maquillaxe y concursos infantiles de mázcares.

El sábadu, la folixa tendrá continuidá na capital con pasucáis a partir de les 17,00 hores con llegada de toles charangues a la plaza la Catedral, onde se cellebrarán los estremaos concursos de mázcares y darréu tendrá llugar l’intierru de la Sardina, con participación d’una decena de compañíes teatrales d’Asturies, Cataluña, País Valencianu, Estremadura y Francia.

Sardina que nel casu de Mieres ye ‘Truchona’ y que dende esti mediudía ta siendo velada nes inmediaciones de la plaza l’Ayuntamientu, dientro d’un programa que centraliza nel vienres los festexos d’antroxu na villa minera y que prevé pasucáis, un desfile y l’intierru de la Truchona nel mesmu día, coles principales actividaes allugaes nel Parque Xovellanos.

Programa completu del antroxu n’Uviéu

Don Carnal resístese a morrer. Los primeros intierros de la Sardina marquen a partir d’esta tarde la recta final del antroxu, que mañana quedará oficialmente soterráu na cellebración del Miércoles de Ceniza. Xixón despide güei la folixa, Avilés cellebra’l so desfile de mázcares y Uviéu prepárase pa garrar el relevu.

A partir de les 17 hores quedará habilitáu na Plaza Mayor de Xixón el veloriu de ‘Molinuca’, la Sardina que poco depués sedrá despidida xunta un antroxu que sorrayó’l centenariu’l Real Sporting. A les 19 hores saldrá’l contexu mortuoriu dica la plaza’l Marqués, onde se lleerá’l testamentu de la Sardina pa da-y l’adiós caberu darréu nel Muelle.

Miles de persones presenciaron ayeri’l desfile central d’antroxu en Xixón, qu’axuntó a neños y mayores nun recorríu marcáu poles baxes temperatures. Les mesmes que soportaron na Plaza Mayor los ciudadanos que siguieron les actuaciones de Jerónimo Granda -“l’alcaldesa de Xixón quier meyorar esta villa, pero tien una obsesión: antes muerta que sencilla”, cantó- y de Mojinos Escozíos, que protagonizaron un espectáculu con continuos guiños a la participación del públicu.

N’Avilés, onde anueche actuaron Las Niñas, el desfile cellebraráse a partir de les 18,30 hores de güei dende la cai José Cueto a la plaza’l Parche, a cuyu escenariu xubirá’l cantante brasileñu Vaudí. L’intierru de la Sardina pospónse pal miércoles de Ceniza, festividá que marca l’aniciu de la sobria Cuaresma, mientres los avilesinos esfruten güei d’una xornada de fiesta llocal al coincidir esti añu en domingu’l día de San Agustín, patronu de la villa.

Uviéu y Mieres prepársense yá pa garrar el relevu de la folixa antroxera, qu’en dambos casos centraráse nel fin de selmana y desendólcase con un programa enforma más discretu que los d’Avilés y Xixón. Una queimada popular y un conciertu de Los Berrones, na nueche’l vienres, sedrán el platu fuerte del antroxu na capital.

Con ocasión de les cellebraciones d’antroxu, el Muséu Nicanor Piñole de Xixón amuesa’l cuadru d’esi pintor ‘Entierro de la Sardina en el Puerto de Gijón’, que ta acabante ser mercáu por Caxastur a un coleccionista priváu y que ye la pieza de reclamu de la esposición ‘Visiones del Carnaval’, una amuesa que permanecerá abierta nel Muséu Piñole hasta’l 6 de marzu con cuadros, cartafueyos, cartelos ya invitaciones al rodiu de les cellebraciones d’antroxu na España de la Restauración.

Programa íntegru del antroxu n’Avilés

Avilés, monstruosu. La villa cellebrará’l so antroxu de 2005 alredor del universu de les creatures pantástiques, nuna folixa qu’incorpora un día adicional de fiesta llocal y a la que-y pondrán música los artistes O’Funk’illo y Las Niñas. El Descensu de Galiana, concursos infantiles, murgues y charangues protagonizarán l’antroxu con un programa que s’abre el prósimu 28 de xineru.

Esi día quedará abierta al públicu, nel palaciu de Valdecarzana, una esposición de fotografíes sobro’l Descensu de la cai Galiana, que cumple esti añu la so edición númberu 28. Nos prolegómenos de la folixa entren tamién la presentación de la revista ‘La sardina arenque’ (31 de xineru), la entrega de distinciones al ‘Rei del Goxu y de la Faba’ (2 de febreru) y les tradicionales meriendes y cenes de comadres (xueves 3).

Formalmente, l’Antroxu d’Avilés empezará’l vienres 4 de febreru col pregón de les fiestes na plaza’l Parche y tendrá’l so episodiu principal al otru día, sábadu, nel Descensu Internacional de Galiana, que recorrerá tamién les cais San Francisco y La Cámara con final en Les Meanes. O’Funk’illo actuará esa nueche na plaza’l Parche.

Depués d’estremaos actos festivos el domingu, el llunes d’antroxu la música pondránla, tamién na plaza’l Parche, Las Niñas. Como novedá pa esta edición, los avilesinos esfrutarán de fiesta llocal el martes 8 de febreru, yá que’l día de San Agustín -patronu’l municipiu- cai esti añu de domingu. Un desfile de carroces y l’intierru de la sardina pesllarán el programa festivu.

Programa íntegru na web del Ayuntamientu d’Avilés

Los Reis Magos piesllen el ciclu. Más de 6.000 persones protagonicen les cabalgates que ponen fin al periodu navidiegu nes principales ciudaes d’Asturies, nuna folixa que cuenta n’Uviéu con carroces diseñaes pol decorador de cine Gil Parrondo y moviliza en Xixón y Avilés a cientos de figurantes, con presencia destacada d’agrupaciones musicales de mui estremada procedencia.

Según les previsiones meteorolóxiques, la lluvia tará ausente nos desfiles en tol Principáu y los participantes nes cabalgates tendrán que desfilar nes primeres hores d’una nueche con xelada, con temperatures previstes baxo cero nel interior del occidente y mínimes d’ente 2 y 5 graos centígrados na zona central.

N’Uviéu, carroces y figurantes saldrán a les 18,30 hores de la cai Independencia pa completar un recorríu poles cais Uría, San Francisco, plaza de la Catedral, Xovellanos, Argüelles, plaza’l Carbayón, García Conde, Cuadonga y Melquíades Álvarez. A esa mesma hora arrancará la cabalgata d’Avilés, con salida na Casa la Cultura y recorríu por La Cámara hasta la plaza’l Parche.

En Xixón, el desfile de Reis Magos tien la so salida prevista pa les 19 hores nel barriu de Pumarín, con itinerariu pola carretera Carbonera, l’avenida Schultz, carretera la Costa, San Bernardo, plaza’l Parchís, Xovellanos, Los Moros, plaza’l Carmen y final en Marqués de San Esteban.

Bandes de cornetes, gaites y tambores marcarán el ritmu de los desfiles en tol Principáu, énte los que les autoridaes municipales encamienten usar de forma preferente’l tresporte públicu pa evitar les alteraciones nel tráficu.

Cola presentación oficial güei n’Uviéu del programa de ‘Llanes al Cubo’ pola conseyera de Cultura Ana Rosa Migoya la villa oriental prepárase p’acoyer dende’l prósimu viernes la celebración d’esta importante cita cultural y festiva de la seronda asturiana. Col platu fuerte nos conciertos de músiques del arcu atlánticu, la ‘folixa del tardíu’ va ufiertar una amuesa de la cultura más viva y actual que se fai n’Asturies.

Tres escenarios, dos de baldre y ún con entraes al preciu casi simbólicu de 4 euros, van acoyer a lo llargo d’estos díes a grupos y artistes de toles latitúes del arcu atlánticu.

Músicos d’Asturies, de los países celtes y del sur van pasar peles tables de ‘Llanes al cubo’ nun programa qu’empieza el viernes 29 cola presencia de Xuacu Amieva, Acetre y Altan na carpa A, a partir de 22,00 hores; enantes van tar el grupu Tuenda nel escenariu de la Basílica de Santa María a les 20,30 y Tarañu na carpa B a les 21,00 hores. El sábadu 30 actúen Ivan Drever y Duncan Chisholm na carpa B a les 19,30; La Bandina’l Tombu, a les 20,30 na Basílica; y dientro l’apartáu novedosu d’esti añu titulá ‘Músicas del mundo’, na carpa A van tar a partir de les 20,00 hores Chambao, Raimundo Amador y El Bicho. Los últimos conciertos van ufiertar el domingu 31 les actuaciones de Deuvaduvra na carpa B a les 19, 00 hores y de La Galvana, na Basílica a les 20,30; l’escenariu central de la carpa A va acoyer a les 22,00 l’actuación d’Urban Trad, Floock y Felpeyu. Pa los conciertos de la carpa A hai puestes a la vienda entraes col preciu de 4 euros y bonos pa les tres nueches al preciu de 10 euros.

La programación de ‘Llanes al cubo’, amás de los conciertos, inclui diverses actividaes, ente elles resalta la esposición ‘La memoria de los artistas Agustín Ibarrola/Miguel Marinero’ una amuesa de creaciones en piel del diseñador Miguel Marinero que s’inspira na obra d’Ibarrola ‘Los cubos de la memoria’. Va poder vese na Casa la Cultura de Llanes dende’l día 28 d’ochobre. Otra esposición dedicada a grabaos alrodiu la indumentaria tradicional asturiana inaugúrase güei n’otra de les sales del centru cultural del conceyu llaniscu. Les actividaes con escolinos son otru de los puntos adelantraos del programa y van entamar esti xueves 28 con una visita guiada pol cascu hestóricu de Llanes y una charra sobro instrumentos populares asturianos. El programa completu inserta apartaos dedicaos al teatru, el cine, la lliteratura y la fotografía. Compañíes de teatru como Nun Tris y Margen van poner n’escena los sos espectáculos ‘Brenga’ y ‘Teatro War’ respectivamente. Dende’l vienres 29 va ufiertase na Casa de Música una amuesa de cortometraxes firmaos por diversos realizadores asturianos y la Casa Municipal de la Cultura va agospiar hasta’l domingu 31 delles presentaciones de novedaes editoriales. Charles, conferencies y ‘amagüestos’ con sidra y castañes toles nueches, completen la programación de la cuarta edición de ‘Llanes al cubo’. La páxina web del eventu ta en funcionamientu y puede visitase na dirección www.llanesalcubo.com pa completar la información respective a esta importante cita cultural de la seronda.

Los responsables de Cultura del Ayuntamientu llaniscu preparen los últimos detalles de la programación definitiva de la III edición del alcuentru ‘Llanes al cubo’, que va cellebrase ente los díes 29 d’ochobre al 1 de payares y qu’esti añu cuenta con resaltables novedaes. Una amuesa de folk asturianu y de los países del arcu atlánticu, a la que se-y va xuntar nesta ocasión una xornada dedicada a músiques del mundu, igüen el programa de la folixa, inda por cerrar dafechu.

La celebración d’esta tercera edición de l’amuesa de música en vivo va cuntar con otra novedá amás de la incorporación de los sones de fusión al eventu y ye l’espardimientu de les actividas entamaes alrodiu’l festival a los centros escolares del conceyu. Una d’estes actividaes programaes pa difundir l’eventu ente la comunidá educativa ye la organización de concursos lliterarios de poemes y relatos, asina como un certame de dibuxu. Los trabayos de los escolinos podrán vese espuestos nel recintu onde se celebra esta ‘folixa del tardíu’.

Nes anteriores ediciones la respuesta de públicu a la cita llanisca foi superior a la esperada polos sos organizadores y pal festival d’esta seronda inda s’espera un ésitu d’asistencia mayor. Hasta dar a conocer públicamente’l programa definitivu los responsables del conceyu prefieren nun adelantrar nomes d’artistes participantes por si a última hora del remate del cartel de grupos hai cambios bultables. El programa completu va difundise cerca ya del eventu, inda va poder tenese un adelantru del mesmu, probablemente, nos prósimos díes.