Fiestes

Llanes vuelve ser dende esti viernes 28 y hasta’l domingu 31 la capital cultural de la seronda asturiana. Conciertos, cine, teatru y lliteratura espresaos en dalgunos de los nomes de la creación más actual centren la programación d’estos tres díes repletos d’actividaes.

Ente les novedaes que presenta la edición 2005 de Llanes al Cubo destaca la relevancia que’l cine cobra na programación. L’estrenu de la última película de Gonzalo Suárez: “El genio tranquilo” el sábadu 29 y la celebración de los Alcuentros de Cine, dedicaos a amosar la producción en cortometraxes d’autores mozos asturianos, son dos de les novedaes resaltables d’esti añu. Nel cursu de los Alcuentros va proyectase la serie “Cinco poemes” siguida d’un coloquiu col so director Ramón Lluis Bande, el realizador José Braña y la escritora Berta Piñán.

Los conciertos siguen centrando les principales cites d’esta Folixa del Tardíu. La gallega Mercedes Peón, los asturianos Llan de Cubel y los irlandeses Lunasa actúen na nueche del viernes 28. Al día siguiente, na nueche del sábadu 29 van ser los riosellanos Corquiéu, los canadienses Le Vent du Nord y el vigués Carlos Núñez los encargaos de poner sones al festival llaniscu. El domingu 30 va entamase la Nueche de Rock con Mala Reputación, Delincuentes y Pereza. Al empar celebraránse tres conciertos de baldre: Manuel Luna, el viernes 28; La Bandina’l Tombo y Mestura, el 29 y el 30 verbena popular con Trinchera, El Arca de los Sueños y Los Imposibles.

Teatru a cargu de Nun Tris y de La Sonrisa del Lagarto, presentación de llibros, títeres y maxa pa nenos, completen el restu d’actividaes d’esta edición de Llanes al Cubo, na que tien un protagonismu especial tamién la esposición fotográfica “Llanes Rojo y Verde” del artista Carlos Suárez.

Llanes al cubo

La fiesta de los Humanitarios de Morea va tener tastu folk un añu más cola celebración de la IX Muestra de Música Tradicional y les actuaciones aparte de La Bandina y el jazz con raigañu astur del Mapi Quintana Quartet. La folixa escomienza’l sábadu 5 de payares cola preba de la sidra.

El Cine Carmen de Moréa va ser el sitiu escoyíu pa la celebración de la novena amuesa de música tradicional qu’esti añu cuenta cola participación de los ayeranos Tarañu, el grupu andaluz La Jambre y los portugueses Andarilhos.

El xueves 10 ye’l pregón de la Fiesta de los Humanitarios, siguíu d’una actuación de Mapi Quintana Quartet. Al día siguiente va ser el Samartín con alborá y pasucais de gaiteros, misa y Puya’l Ramu, desfiles, xinta, la tradicional “chocolatá”, baile y xaréu con La Bandina y fueos artificiales pa rematar con una Danza.

Carlos Nuñez, xunta Corquiéu y Le Vent du Nord van protagonizar el conciertu cimeru de Llanes al Cubo 2005, la folixa del tardíu que como tolos años tien llugar na villa llanisca nos caberos díes d’Ochobre. Mercedes Peón, Lunasa y Llan de Cubel el vienres y los rockeros Delincuentes, Pureza y Mala Reputación el domingu completen la llista de conciertos d’esti evento llaniscu. A lo llargo de tres díes, dende’l vienres 28 d’esti mes d’ochobre, Llanes enllenaráse de conciertos, esposiciones, cine, lliteratura, teatru, conferencies, meses reondes y feries del discu y del llibru asturianos.

Les actividaes van entamar el vienres 28 con Pasacais al cargu del Grupo Nun Tris y con teatru a les siete la tardi cola representación de “GORSHEDD” pol mesmu grupo Nun Tris, en Plaza de Santa Ana. A les ocho proyectaránse curtiometraxes asturianos na Escuela de Música y a les ocho y media tendrá llugar el conciertu de Manuel Luna(RNE Radio 3), na carpa B, como prolegómenu del conciertu cimeru de la xornada que dende les diez dela nuechi axuntará na carpa principal a Mercedes Peón, Lunasa y Llan de Cubil.

El sábadu 29 les actividaes ta previsto qu’entamen a les 12 con más curtiometraxes asturianos na Escuela de Música y actuaciones máxiques pa los neños na carpa B. Y pa la una del meudía prográmase una visita guiada a la exposición de fotografíes de Carlos Suárez “Llanes Rojo y Verde”, en Casa la Cultura. A les cinco torna otra vuelta’l teatru con “Boneka” del grupi La Sonrisa del Lagarto, en Plaza de Santa Ana y a les seis y media presentaráse’l llibru “Noches de Incendio” de Berta Piñán, que llerá poemas na Casa la Cultura.

Pa les siete y media entamará’l primer conciertu, na segunda carpa, con La Bandina’l Tombu y a les ocho proyectaráse la película “El Genio Tranquilo” de Gonzalo Suárez, nel Café Pinín. A la mesa hora tornarán otra vuelta a proyectase na Escuela de Música curtiometraxes asturianos.

Y a les ocho y media entamará el Conciertu de Mestura que fadrá de preparación pal conciertu más importante de les xornaes que tien de cellebrase a les diez na carpa cimera con Le Vent du Nord, Carlos Núñez y Corquiéu. El domingo 30 d’ochobre entamará con marionetas al meudía pa los más pequenos y cola proyección de curtiometraxes asturianos na Escuela de Música a la una, pa siguir pela tarde con cine pa neños na Escuela de Música a les cinco y el conciertu a les seis de El Arca de los Sueños, que va coincidir nel tiempo cola. Presentación de novedaes del Gremiu d’Editores Asturianos, na Casa la Cultura.

Un concierto de trinchera na carpa B y otru de los Imposibles nel mesmu llugar van dar pasu a les diez al caberu conciertu del programa col que finará Llanes al Cubo, el Conciertu de rock que tienen d’ufiertar Delincuentes, Pereza y Mala Reputación.

La folixa del tardíu, nomatu col que se conoz n’asturianu les xornaes de Llanes al cubo, ye una iniciativa puesta en marcha pol Ayuntamientu de Llanes que ta asitiada en dos conceptos: La importancia de la cultura asturiana propiamente dicha y el so afalagamientu al traviés de la industria cultural, que se ta faciendo un hueco nel competitiuo mercáu globalizáu tomando como base los nuestros elementos identitarios. Al mesmu tiempu, Llanes al cubo xurde como buque insignia de la propuesta del conceyu de Llanes na Serona Temática, con interesantes ufiertes deportives, culturales y festives nos fines de semana d’ochobre y payares.

La folixa entorno a la industria cultural asturiana faise realidá en Llanes al cubo con conciertos, esposiciones, cine, lliteratura, teatru, conferencies, meses reondes, feries del discu y del llibru asturianos, ect … como protagonistas exclusivos na Casa de Cultura, el recintu del Palaciu Duque de Estrada, la Basílica de Santa María, la Escuela de Música y les cais y places del casco vieyu de la Villa.

Páxina web de la Folixa

L’agrupación local del Bloque por Asturies de Xixón pide a les comisiones de fiestes del conceyu la sustitución de les actividaes lúdiques con animales por xuegos tradicionales, asina como l’usu del asturianu nos cartelos y rótulos de los festeyos.

El conceyu local de la formación nacionalista considera qu’agora, pasada la temporada de fiestes populares, ye bona ocasión pa remembra-yos a les asociaciones organizadores la necsidá d’entamar actividaes nes que nun se maltrate a los animales coles tradicionales ‘piesques’ y pa que la llingua asturiana tenga una presencia normal nes fiestes. El Bloque considera que “Tanto los xuegos y deportes tradicionales como la llingua asturiana formen parte del nuesu padremoñu cultural, y, especialmente dende estos ámbetos, zona rural y barrios, puede facese un bon llabor d’espardimientu de los citaos elementos”.

Melendi va ser la estrella indiscutible de la nueche de la viéspora del día grande de San Mateo. El rumberu carbayón va aprovechar el so conciertu en San Llázaro pa grabar un DVD en directu del so prósimu discu. Una banda de gaites y el cantautor Pablo Moro, como teloneru, van acompañar a Melendi nel escenariu.

El cantante uvieín ufiertó ayer nel complexu deportivu de San Llázaro un conciertu de baldre pa discapacitaos físicos y psíquicos d’ochenta asociaciones d’Asturies. Na rueda de prensa que celebró en xunto al cantautor Pablo Moro anunció el prósimu empiezu d’una xira per Latinoamérica y contestó a les preguntes nel so estilu: “Si me dan el Príncipe d’Asturies, ‘dabuti'”, afirmó énte una entruga nesi sen y respective al posible triunfu mundial del pilotu Fernando Alonso, l’autor de “Nano”, declaró que-y prestaba tar el prósimu domingu “Bañándome borrachu en La Gabinona”.

Melendi actúa esta nueche a les 22.30 nel escenariu de San Llázaron. Na Plaza la Catedral, los amigos de la música reaggue van tener ocasión de disfrutar d’una nueche dedicada a los ritmos xamaicanos y na que van pasar pel escenariu Kenny Knots, Afrikan Simba, Ruff Cut, Don Ricardo, Donna Marie, Don Campbell ya Irie Vibes Sound Systen Bdf.