Fiestes

Iniciativa pol Asturianu fizo llegar al conceyal responsable de les competencies de política llingüística en Xixón, el Conceyal de Cultura, Educación y Fiestes, Carlos Rubiera, el so descontentu por delles cuestiones específiques alredor del usu del asturianu per parte del Conceyu de Xixón. Ente les cuestiones destacaes, y espuestes énte’l Conceyal nel caberu Conseyu Asesor de la Llingua Asturiana, tán la marcha atrás n’EMTUSA nel usu de la toponimia oficial nes cabeceres de los autobuses y paraes de los mesmos, onde topónimos oficiales como “El Cerilleru” o “Xove” y formes como “Feria Muestres” desapaecieron volviendo a apaecer les formes castellanizaes que yá nun son oficiales.

Iniciativa pol Asturianu presentó una protesta énte EMTUSA esplicando esta cuestión na que soliciten a la empresa que se recupere l’usu normal de la toponimia oficial y onde se recuerda qu’esta empresa pública foi puntera siempres nel usu del asturianu, apaeciendo dientro de los autobuses tola cartelería billingüe dende va años, y esperando que nun se dean pasos atrás nesi sen.

Per otru llau, Iniciativa pol Asturianu atopó otru casu llamativu de pasos atrás pal usu del asturianu y la toponimia. El certame “Xixón de sidra”, qu’esti añu dexa nel so llogotipu nun tamañu ínfimu la forma “Xixón”, a favor de “Gijón”, cuando non la fai desapaecer, como ocurre nos toneles instalaos en tola ciudá. L’usu del asturianu nun campu siempres tan apegáu al nuesu idioma ye “inesplicable” pa la organización de reivindicación llingüística. Y soliciten a les conceyalíes responsables, la de Turismu y la de Cultura, qu’organicen esti eventu, amás de la empresa contratada, Fenicia Marketing Gourmet, “que tengan en cuenta l’usu del asturianu nesta y en futures ediciones, poniéndonos a la so disposición pal asesoramientu nesta cuestión”.

Son estos dos exemplos cercanos qu’amuesen lo que pa Iniciativa pol Asturianu ye “un xeneral ya importante pasu atrás en tola actividá del Conceyu de Xixón” que valoren de forma mui negativa, “pues yá cola anterior alministración veníen produciéndose munches deficiencies nel usu de la toponimia oficial de Xixón, aprobada yá en 2006, y del asturianu, que ta estancáu, cuando non cada vegada más marxináu”.

Soliciten al Conceyu de Xixón “qu’efectúen un usu continuu del asturianu nes sos actividaes”. “L’usu del asturianu nos cartelos de toles actividaes del conceyu, na publicidá, etc. nun supón gastu estra nengún pa les arques del Conceyu, yá que la torna pue facese na so propia Oficina de Normalización Llingüística, y la impresión d’una sola versión billingüe nun xenera gastu estra”, espliquen. Amás recuerden qu'”usar l’asturianu xenera un arrequecimientu social y cultural pa una ciudá onde ye la llingua d’una parte importante de la población y seña d’identidá de tolos xixoneses y asturianos”.

Esti añu, el Día d’Asturies celébrase’l sábadu 8 de setiembre en Tinéu. A lo llargo de tola xornada va celebrase un mercáu tradicional asturianu, onde va ufiertase una amuesa de los oficios artesanales más característicos del país, distribuyíos en 90 puestos peles cais de Tinéu. Ente los conteníos, van vese producciones de quesos, embutíos, repostería, llicores, xoyería y cerámica. Amás, habrá talleres, conciertos, deportes tradicionales, tonada, teatru…

De 12.00 a 20.30 hores habilitaráse una zona lúdica infantil, onde los más pequeños van poder esfrutar nun espaciu pensáu pal so ociu con talleres temáticos. De 12 a 2 de la tarde, celebraráse una exhibición de deporte tradicional asturianu, con delles disciplines deportives tradicionales como la carrera de “llecheres”, el llanzamientu d’altor de “fardu,” corta de tueros con hachu y tronzón, tiru de cuerda, “tiru al palu” o carrera de molienda per relevos.

A les doce la mañana, un pasacais del grupu de teatru Margen, va amenizar les cais del pueblu col so Barcu Pirata. A les 12:30 entama un conciertu de tonada, al cargu de l’Asociación de la Canción y el Folclore Abargane del Nalón, amás d’AICA. Darréu, a eso de les 14:30, la Bandina Los Eólicos va facer animación con música tradicional asturiana peles cais de Tinéu.

Yá de tarde, de 15:00 a 19:00 hores, la compañía Escena Apache va animar a los visitantes col so toque d’humor asturianu y animación constumista. A les 16:00 hores ta previstu un pasacais del grupu Margen, col mesmu espectáculu de la mañana.

A lo llargo de tola tarde va celebrase una escuela de xuegos tradicionales. El Club Deportivu 6 Conceyos va ufiertar una amuesa de deportes y xuegos tradicionales. Tolos públicos, tanto neños como adultos, van tener la posibilidá de participar.

La celebración va pesllase con un conciertu ente les seis de la tarde y les doce y media la nueche, nel que va participar, nesti orde, Destino 48, Roke, Rafa Lorenzo, Asturiana Minning Company y Doctor Explosión.

El próximu 1 de setiembre tendrá llugar na Plaza’l Güevu de Villaviciosa la Fiesta de la Sidre, qu’esti añu fai la so XV edición. Esta edición cunta cola collaboración de los llagares maliayos:Buznego, Castañón, Coro, Cortina, El Gobernador, El Traviesu, Frutos, Los Gemelos, M. Busto, J.Tomás, Vallina y Vigón, que darán de baldre la preba de la so sidre a los asistentes. La fiesta entamará a les 12 hores cola actuación de la Banda Gaites de Villaviciosa-El Gaitero. A les 13 hores fadráse entrega del Premiu “Etiqueta más guapina 2012” por Sidrastur (Grupu astur de coleccionismu sidreru). A les 17:30 tendrá llugar el Concursu d’Echaores y la fiesta finará a les 19:30 hores cola actuación del Cuartetu Torner.

Yá ta convocada la V Cena Asturmedieval de Tierra Ástur Águila. El vienres 7 de setiembre ye la fecha escoyida pa la celebración d’esta “pantagruélica” llacuada. Per quintu añu consecutivu Tierra Ástur Aguila va treslladar mientres esta velada a tiempos inmemoriales onde plebeyos y nobleza ástur van compartir mesa y manxares. Namás por 22 euros, y a partir de los diez de la nueche sopes, carnes, verduras y quesos, ente otros manxares, van desfilar peles meses corríes acompañaos de sidra y vinu “a mamplén”.

Gaudiosa, l’amada del princeps Pelayo, el caballeru Petiso y el Bardu Bernardu van ser los encargaos de anfitrionar y facer les delicies de los ellí presentes.

Pa esta ocasión Tierra Ástur va poner a disposición de los asistentes un bus gratuitu especial “Cena Asturmedieval” que va salir de la Cai Xovellanos d’Uviéu a les 21:15, pa volver hasta la capital a eso de la 1:00 de la madrugada.

L’animación correra al cargu de los actores y actrices Arancha Fernández (Gaudiosa), Carlos Mesa (Bardu Bernardu) y Pedro Durán (Caballeru Petiso).

Tolos interesaos pueden realizar yá la so reserva nel teléfonu 985791228 o al traviés de la páxina web de Tierra Astur.

Baíña acueye la celebración de la so Nueche Celta. Esti añu van actuar les bandines La Bandina la Coruxa, Degañan’s y Pingatara Folk Band. Folixa asegurada pa esti vienres 24 d’agostu.

El viniente vienres 13 de xunetu nel prau de la fiesta, la Comisión de fiestes La Rebollada -entamadora de les Fiestes del Carme de Caldones (Xixón)-, xunto a l’Asociación de Vecinos “El Carbayu” entamen l’aniciativa “Refaciendo Tradiciones”, que según despliquen tien l’enquiz de “promover la reflexón, aición y disfrute alrodiu la música y la cultura tradicional asturiana. Nesti sen, el desendolcu d’actividades comprometíes, nun ambiente festivu y d’inspiración llocal sedrán les principales ferramientes nes que nos sofitaremos p’algamar los oxetivos propuestos”.

Asina, anuncien qu’esti añu los dos puntos base sedrán el baille tradicional na música asturiana y la tradición de l’arbolón y la foguera nes Fiestes del Carme cellebraes na llocalidá xixonesa de Caldones. Nesti sen, anuncien les siguientes actividaes: “un taller de baille tradicional, impartíu por Ramsés Ilesies; un cursín y conxusta al rodiu la música folk y el baille tradicional, nel que participarán Xosé Antón Fernández Martínez «Ambás», Octavio Trapiella, Xuan Nel Expósito, Rubén Bada y Dolfu R. Fernández; y un baille entamáu pola bandina L’Andecha Turcipié –tamién con escenariu abiertu–”.

Amás, anuncien que recuperarán la tradición de facer la foguera y plantar l’arbolón, vezu desaniciáu dende finales del siglu XIX, y que tornará a la práutica gracies a esta aniciativa que, según anuncien, apurrirá nuevos detalles sobre les actividaes a lo llargo de los próximos díes.

Per segundu añu consecutivu y después de dellos años ensin una foguera curiosa nel pueblu, dende’l Centru Social La Semiente, entámase otra vegada la nueche de fueu esti 23 de xunu. N’ella van tener cabida munches más coses que l’añu pasau, entamando pol enrramáu de les fontes del pueblu, qu’amanecerán engalanaes pa la ocasión, cola participación de les muyeres entreguines.

Yá pela tarde, nel prau ensin construyir que ta pegáu al campu de fubol “Nuevu Nalón”, donde les llames fadran la so apaición, habrá actividaes dende les 18:00, onde los grupos de deportes autoctonos “Los guah.es”, “La Casaca” y “Perlora”, fadrán una esibición y un pequeñu torneu de xuegos tradicionales d’Asturies, que va tar abiertu pa grandes y pequeños.

A eso de les 21 la nueche, los cabezudos xunto con una pareya de música del país fadrán un pasacais pel pueblu pa dir llevando a la xente pal prau la fiesta, onde se podrá tomar un culete, una cañina de cerveza artesanal o un refrescu con precios populares.

A les 11 la nueche la maxa llegará a L’Entregu, cola actuación de la compañía de teatru “Tatata Chan” y el so espectáculu “El arca de las leyendas”, a lo que seguirá la irrupción de los personaxes mitolóxicos, que sedrán los encargaos de prender la mecha que traiga’l fueu y la maxa.

Pero col encendíu, la cosa nun fai más qu’entamar, espliquen dende la organización, “col fueu ya menos bravu, baillarase una danza prima como tien que ser, en comuña, faeremos una potá de queimad pa calentar el cuerpu y montaremos un micru abiertu, pa qu’al que-y apeteza, eche una cantará o nos deleite con un instrumentu de la so colección, y de xuru que muches más sorpreses”.

Un añu más Bimenes acueye la Fiesta de la Oficialidá de la Llingua Asturiana, folixa cola que conmemora la hestórica fecha del 5 de xunetu de 1997, día nel que’l Plenu municipal aprobó la oficialidá del asturianu nel conceyu yerbatu. Esti añu la cellebración presenta delles novedaes importantes, coles qu’espera garrar puxu: el cambiu de nome, pasando a llamase Romería de la Oficialidá; la organización, na qu’amás del Conceyu de Bimenes participen les asociaciones culturales Los Yerbatos y El Corriellu la Pandorga y el Palaciu del Marqués de Casa Estrada; y, por último, el cambiu de fecha y allugamientu, pasando a celebrase nel prau del Palaciu del Marqués de Casa Estrada (Martimporra) el sábadu 16 de xunu.

Los actos programaos entamen bien ceo, a les 11’00 h., con unpasacais de bandes de gaites. A les 11’30 h. la escritora y periodista Ana Vanessa Gutiérrez dará llectura al pregón. Dempués tendrán llugar les tradicionales misa, procesión, puya’l ramu y Danza de la Oficialidá, tres les qu’entamarán les actuaciones folklóriques, cola intervención de los más piquiñinos de los grupos de baille y bandes de gaites participantes na folixa. A les 14’30 h. va tener llugar la xinta popular, nesti casu na pista cubierta del C. P. Martimporra. A les 16’30 h. entamará’l XIII Concursu de Gaiteros y Gaiteres Mozos y a les 18’30 h. el Festival Folklóricu, cola participación de les bandes de gaites “Ciudad de Cangas de Onís”, “Villa y Condáu de Noreña” y “Los Yerbatos”, los grupos de baille “La Flor del Pumar” (Nava), “La Deva” (Xixón), “Los Yerbatos” (Bimenes) y “Asubío” (Vigo), amás del coriquín tradicional “El Corriellu la Pandorga”.

A les 21’00 hores neños y mayores de Bimenes lleerán un Manifiestu pola Oficialidá de la Llingua Asturiana y pesllará la xornada, de magar les 21’30 hores, elconciertu d’Anabel Santiago, David Varela y Javi Álvarez “Pitu”, acompañaos polos escolinos del cursu de canción asturiana de Bimenes.

La organización Iniciativa pol Asturianu anunció la so presencia con un puestu informativu nes celebraciones que van tener llugar en Bimenes.

Un añu más Bimenes acueye la Fiesta de la Oficialidá de la Llingua Asturiana, folixa cola que conmemora la hestórica fecha del 5 de xunetu de 1997, día nel que’l Plenu municipal aprobó la oficialidá del asturianu nel conceyu yerbatu. Esti añu la cellebración presenta delles novedaes importantes, coles qu’espera garrar puxu: el cambiu de nome, pasando a llamase Romería de la Oficialidá; la organización, na qu’amás del Conceyu de Bimenes participen les asociaciones culturales Los Yerbatos y El Corriellu la Pandorga y el Palaciu del Marqués de Casa Estrada; y, por último, el cambiu de fecha y allugamientu, pasando a celebrase nel prau del Palaciu del Marqués de Casa Estrada (Martimporra) el sábadu 16 de xunu.

Los actos programaos entamen bien ceo, a les 11’00 h., con unpasacais de bandes de gaites. A les 11’30 h. la escritora y periodista Ana Vanessa Gutiérrez dará llectura al pregón. Dempués tendrán llugar les tradicionales misa, procesión, puya’l ramu y Danza de la Oficialidá, tres les qu’entamarán les actuaciones folklóriques, cola intervención de los más piquiñinos de los grupos de baille y bandes de gaites participantes na folixa. A les 14’30 h. va tener llugar la xinta popular, nesti casu na pista cubierta del C. P. Martimporra. A les 16’30 h. entamará’l XIII Concursu de Gaiteros y Gaiteres Mozos y a les 18’30 h. el Festival Folklóricu, cola participación de les bandes de gaites “Ciudad de Cangas de Onís”, “Villa y Condáu de Noreña” y “Los Yerbatos”, los grupos de baille “La Flor del Pumar” (Nava), “La Deva” (Xixón), “Los Yerbatos” (Bimenes) y “Asubío” (Vigo), amás del coriquín tradicional “El Corriellu la Pandorga”.

A les 21’00 hores neños y mayores de Bimenes lleerán un Manifiestu pola Oficialidá de la Llingua Asturiana y pesllará la xornada, de magar les 21’30 hores, elconciertu d’Anabel Santiago, David Varela y Javi Álvarez “Pitu”, acompañaos polos escolinos del cursu de canción asturiana de Bimenes.

L’Ayuntamientu de Llangréu, en collaboración cola Asociación de Vecinos S. Antonio de Ciañu, la Escuela de Música Tradicional del AMPA del Conservatoriu Valle del Nalón y les agrupaciones corales José León Delestal y Santa Apolonia organicen esta tercer fiesta de primavera que va tener llugar en Ciañu mañana sábadu 2 de xunu y el domingu 3 de xunu.

La Romería presenta una montonera actos que, dende la nueche’l sábadu, van llevar folixa y cultura tradicional per tol distritu llangreanu de Ciañu. El sábadu a les 21:00 hores va tener llugar l’empiezu’l tercer certame Cantando pelos chigres cola entrega llibros de canciones y la puesta en marcha de les rondes de cantares pelos chigres de Ciañu con pareyes de gaita y tambor, coros y artistes locales. Yá’l domingu, a les 11:00h. va haber Diana floriada con gaita y tambor, desfile de Xigantes y Cabezudos y disparu de morteros. Dempués, a les 13:30 va tener llugar la segunda parte del certame Cantando pelos chigres, cola entrega llibros de cantares y ronda pelos chigres de Ciañu. Yá de tarde, a les 17:00h, el parque de Ciañu va ser escenariu de la III ROMERÍA DE PRIMAVERA con actividaes pa tolos públicos: xuegos y deportes tradicionales, hinchables pa neños y neñes y actuaciones de bandines y pareyes de gaita y tambor. A les 18:00 hores, nel quioscu’l parque va tener llugar un gran conciertu a cargu de los alumnos y alumnes de la Escuela de Música Tradicional “Llangréu” y los sos profesores amás de Carlos Ronderos, Justino González, Xuan Nel Expósito y les agrupaciones corales José León Delestal y Santa Apolonia de Pañeda. Too esto con escenariu llibre y pipa de sidra.