Fiestes

L’Ayuntamientu de Llangréu, en collaboración cola Asociación de Vecinos S. Antonio de Ciañu, la Bandina Tradicional Valle del Nalón y les agrupaciones corales José León Delestal, Coru Nuevu Atardecer de Garciotun (Toledo), Polifónica L’Entregu y Santa Apolonia de Pañeda organicen esta sesta fiesta de primavera que va tener llugar en Ciañu esti sábadu 30 de mayu y el domingu 31 de mayu.

La Romería presenta una montonera actos que, dende la mañana’l sábadu, van llevar folixa y cultura tradicional per tol distritu llangreanu de Ciañu. El sábadu a les 11:30 hores, el disparu morteros va anunciar l’empiezu de la VI Romería de Primavera en Ciañu pa siguir cola inauguración y apertura 2u Mercáu Tradicional Romería de Primavera.

A les 13:00 hores empieza’l VI Certame Cantando pelos chigres cola entrega llibros de cantares y rondes pelos chigres de Ciañu colos coros y pareyes de gaita y tambor. Yá de tarde, a les 18:00 hores va tener llugar una sesión de canción asturiana y l’actuación de la Bandina Tradicional Valle del Nalón nel quioscu’l parque Rosario Felgueroso de Ciañu.

La tarde’l sábadu va rematase con un conciertu del Tríu Odón García, Pepín de Muñalén y Nel Suárez nel quioscu’l parque Rosario Felgueroso de Ciañu.

Pal domingu, amás de siguir col Mercáu Tradicional de Primavera, a les 11:00 va haber diana floriada con gaita y tambor, desfile de xigantes y cabezudos y disparu de morteros.

A les 12:30 hores, la Banda Música de Llangréu va poner conciertu nel quioscu’l parque de Ciañu. Dempués, a les 13:00 hores va tener llugar la segunda parte del VI Certame Cantando pelos chigres. A les 13:30 hores, el quioscu’l parque va acoyer la puya’l ramu y l’actuación del Coru Nuevo Atardecer de Garciotun (Toledo) y del Colectivu Musica Tradicional y de Baille L’Enguedeyu.

Yá de tarde, a les 17:00h, el parque de Ciañu va ser escenariu d’actividaes pa tolos públicos: xuegos y deportes tradicionales, atracciones pa neños y neñes y actuaciones de bandines tradicionales y pareyes de gaita y tambor. A les 18:00 hores va tener llugar la VI ROMERÍA DE PRIMAVERA nel quioscu’l parque Rosario Felgueroso de Ciañu con canción asturiana y l’actuación bandines tradicionales, agrupaciones corales y el Colectivu Musica Tradicional y de Baille L’Enguedeyu, too esto con escenariu llibre.

Va poner el ramu a esta romería’l conciertu de Los Foolanos a les 19:00 hores nel quioscu’l parque Rosario Felgueroso de Ciañu. Demientres estos dos díes y hasta’l 30 de xunu, el Centru de Referencia de la Cultura y la Llingua Asturiana Casa de los Alberti va acoyer la esposición Yérase una vez n’Asturies del fotógrafu llangreanu Rubén Pantiga.

Dende mañana vienres y hasta el martes d’Antroxu en 30 restoranes de Xixón podrá tastiase el tradicional menú del Antroxu dende 12,50 euros. Touo ta preparao yá pa que l’Antroxu d’esti 2015 dea’l pistoletazu de salida y arranque con más fuerza que dengún añu, tres de la celebración de la Fiesta de les Comadres esti xueves.

Al pie d’un completu programa d’actividaes nun podía faltar el complementu gastronómicu: un ensundiosu menú d’Antroxu en 30 de los meyores restoranes de la ciudá que van faer recargar piles a xixoneses y visitantes y poder siguir asina la fiesta.

En gran midida, l’ésitu del Antroxu gastronómicu débese xuntu cola calidá del menú, a un preciu anticrisis yá que dende 12,50 euros (bebida non incluyida) vamos poder esfrutar d’un primer platu: Pote Asturianu; un segundu: Picadiellu de Matanza y de postre Frixuelos o Picatostes.

Los restoranes que participen nestes xornaes son:

A Caldeira, L’Antiguu, Casa Arturo, As de Piques, Bellavista, Cabranes, Canteli, Ciudadela, La Mariña, Dindurra, Faru del Piles, La Guinda, Jamonar, Johy- El Pumares, El llagar de Begoña, Nava, Pasaxe, Les Peñes, Plaza, La Pondala (namá’l martes), Poniente (sacante’l sábadu 14), Casa Rober, Casa Suncia, La Terraza de Viesques, Tinu, Tropical, Uría, Viñao, La Xuanina y la Zamorana.

Les xornaes tán entamaes pola Asociación d’Hostelería de Xixón nes que collabora la Sociedá Mista de Turismu. Los establecimientos participantes según el preciu de los menúes puen consultase nes páxines www.hosteleriagijon.es y www.gijon.info.

Los menúes puen consultase na web de Xixon

Pal próximo 21 de febreru, l’Asociación CUltural Llacín de Porrúa va celebrar, un añu más, un Antroxu especial con actividaes programaes dende les 18 hores cola lloquerada de los críos pllos barrios de Porrúa, y al acabar el tradicional repartu premios a tolos participantes. A continuación, a partir de las 21:30 hores, sedrá’l concursu de antroxos, con premios en diferentes categoríes, seguíu d’una espicha popular y baille , a lo que l’asociación anima a participar a tol mundu.

L’asocaición ta entamando a programar nueves actividaes pa esti mes de marzo, como una nueva clas de yoga que va desenvolvese los xueves pela tarde.

Esti vienres día 7 de noviembre, la seronda va ser la protagonista nes actividaes del C.S. La Semiente, con un amagüestu, que ye tradición viva entá anguaño y típica destes feches en tola cuenca del Nalón. La primer parte L’Amagüestu va ser a les 17,30 n’El Parque La Llaguna de L’Entregu y van repartise castañes y sidra dulce a los asistentes. Tamién va haber un mayu tradicional y un llagar, pa que los neños esfruten mayando y conozan un poco de la nuesa cultura tradicional y de ónde vien un productu tan natural y tan nuesu como ye la sidra.

Los más pequeños, van poder pasalo pipa colos xuegos tradicionales que se van faer pa toos ellos. Nel amagüestu de pela tarde vamos contar co l’actuación del Grupu Folclóricu El Castiellu, de Olloniego.

El platu fuerte, El Conciertu Amagüestu, nel que como na primer edición el pesu específicu va ser el de LA PARTICIPACIÓN DE TOES na folixa y l’espectáculu. Como l’añu pasáu, va ser nes istalaciones del Campu Fútbol del Unión Deportiva El Corvero col fin de poder allargar la fiesta ensín problemes.

Va empecipiar a les 21:00h. La nueche arrancará cola Badina L’Amagüestu, que realmente va ser una amagüestu improvisáu pa esa nueche de músicos de distintes formaciones, que al son de gaites, tambores, bombu y lo que salga… va dir caleciendo l’ambiente .

La fuerza, el rap, el soul y el funki van correr de la mano de Guaja D, un aire frescu na escena Hip Hop de la cuenca, que nun va dexar a naide indiferente.

Dempués va ser el momentu pal escenariu abiertu. HIP HOP, FOLK, CANCIÓN D’AUTOR, MONÓLOGOS… too eso y más tien sitiu nel escenariu. Ta confirmá la participación de dellos artistes n’esos campos y espérase que la participación espontania sía l’espíritu de la nueche.

Si la folixa que monten los asitentes dexa pasu a más…, otra parte sedrá la musica “enlatᔠcon Nochnepiche Esbilla, que soltará una esbilla de música balcánico, fusión, ska, electroswing…

Too esto nun sedría posible ensín la complicidá nin la collaboración de tolos artistes que van actuar desinteresadamente y del U.D. El Corvero, que dexa parte de les sos instalaciones pa poder cellebrar el Conciertu Amagüestu. La suma de too ello contribúi a dinamizar la vida cultural del conceyu y a echar una mano na propia autoxestión del Centru Social Autoxestionáu La Semiente.

Como non, aparte de castañes y sidra dulce… tamién se podrá esfrutar de les castañes acompañaes de Sidra L’Allume y de Cerveza Caleya, una nueva forma d’esfrutar del amagüestu con productos de calidá gracies al buen facer de xente de la cuenca compañeros y collaboraores de La Semiente.

Toles actividaes son gratuites y convidase a tol mundu a participar nel Centru Social La Semiente, C/ Eladio Jove, 6, L´Entregu (lasemiente@hotmail.com)

El Día la Reciella, aventu qu’organiza l’asociación “Reciella: Families pol asturianu”. tuvo llugar esti domingu 5 d’ochobre nel Muséu del Pueblu d’Asturies con munchu ésitu y participación, gracies al soleyeru día del que disfrutaron les families que s’averaron al Muséu del Pueblu d’Asturies y a la perfecha organización del eventu. Lo mesmo que na primer edición, celebrada nel mes de setiembre del añu pasáu, la programación, entamó a les 11 la mañana y remató a les 7 la tarde cola danza prima, siempre col asturianu como idioma vehicular.

partir de les 11.00 la mañana les asociaciones Trebeyos y Esbilla, empobinaron dos espacios con xuegos medievales y tradicionales asturianos respectivamente. Un poco más alantre, a les 12.30 la mañana, fízose una exhibición infantil de Bolos organizada en collaboración cola Federación Asturiana.

Dempués de la xinta,que pudo facese nel mesmu recintu al instalase un puestu de comida y bébora, el programa de tarde entamaba cola participación de los promotores de“El cantar del vasu“, iniciativa que tien por oxetu, pente medies del xuegu del vasu, visibilizar la importancia de la tresmisión xeneracional del idioma.

Un taller d’instrumentos tradicionales dirixíu pol músicu David Varela, qu’entamó a les 17.00 hores de la tarde y el conciertu acústicu de Pop Piquiñín, presentando dellos temes de “Nun mos gusten los llunes“, el so segundu discu n’asturianu, punxeron puntu final a la xornada.

Esti día presentáronse nel Monumentu Mineru de Santuyanu, Bimenes, ¡Asturies en Pie! presentó los II Alcuentros Alternativos y Populares de Bimenes, que van tener llugar los próximos sábadu y domingu, 6 y 7 setiembre. Los y les voceres de ¡Asturies en Pie! denunciaron la farsa institucional que tien llugar tolos años, el 8 de setiembre, Día d’Asturies, na qu’una Xunta Xeneral inútil y un Gobiernu sumíu, pretenden festexar los sos privilexos y tapecer les penoses condiciones de vida que carez la mayor parte de la clas obrera asturiana, cuando nin siquier los alimentos tán garantizaos pa toes y toos.

Dende ¡Asturies en Pie! púnxose, tamién, de manifiestu que “el simple fechu de protestar puede llevanos direutamente a la cárcel. Nesti sen, dende ¡Asturies en Pie! yá se sufragaron les fiances y les multes de dellos compañeros y compañeres encausaes nel conflictu mineru, la fuelga xeneral del 14-N, la llucha contra’l paru, pol albuertu llibre, etc. Munchos d’estos xuicios van tener llugar, probatiblemente, a la fin de 2014 o l’empiezu de 2015 y, en total, atropen un pidimientu de cárcel de 25 años”.

Nesi sen, ¡Asturies en Pie! anunció que “el dineru que se recalde, va dedicase íntegramente al sofitu a les persones represaliaes por participar nes estremaes lluches llaborales y sociales que tán teniendo llugar n’Asturies”.

PROGRAMA DE LOS II ALCUENTROS ALTERNATIVOS Y POPULARES DE BIMENES

SÁBADU 6 DE SETIEMBRE 11:00. Entamu (Ayuntamientu Bimenes). Marcha al Pozu Funeres. Homenaxe a los y les lluchadores antifranquistes. Cuntaremos coles aportaciones de PABLO MARTÍNEZ CORRAL (mayestru ya investigador de la Memoria Hestórica), SAMUEL FERNÁNDEZ (Secretariu Xeneral de la Corriente Sindical d’Izquierda), RUBÉN VEGA (profesor d’Hestoria de la Universidá Asturiana) y ENRIQUE VILLARREAL, EL DROGAS/BARRICADA, que va interpretar dalgún de los sos temes. De 11:00 a 15:00. Mercáu Yerbatu. C/ La Pamplina en Santuyanu. Organización llocal. 15:30. Abrimos el chigre. 16:30. Deportes autóctonos y xuegos tradicionales con El Garrapiellu. Música y bailles del país con Los Yerbatos, de Bimenes. Primer Tornéu ¡Asturies en Pie! de tiru con gomeru. Mercáu de los Coleutivos Sociales. 19:00. Espectáculu circense: Circu na Lluna. 20:00. Actu reivindicativu, con representantes de Para@s y Precari@s d’Asturies, les Asamblees de Trabayadores en Llucha n’Asturies y ¡Asturies en Pie!. 21:30. CONCIERTU CON EL DROGUES & (DES) MEMORIA BAND, ARMA X & FRAN RUBIO, SKAMA LA REDE, LA TARRANCHA Y DANI ANTISTAILO. Entraes: 5€ anticipada / 7€ nel día. Entraes anticipaes en BIMENES Chigre Vigil y Chigre de La Campa S. Juan. XIXÓN Sidrería Canteli, Café Trisquel, Centru Social Sestaferia, llocal de la CSI. UVIÉU Llocal de la CSI. AVILÉS El Cafetón, llocal de la CSI. L’ENTREGU Chigre Ochobre, Centru Social La Semiente. MIERES El Ñeru, llocal de la CSI. LA POLA SIERO Cigre El diañu. Prau p’acampar. DOMINGU 7 SETIEMBRE. De 11:00 a 15:00. Mercáu Yerbatu. C/ La Pamplina en Santuyanu. Organización llocal. 12:30. Pasucais pel pueblu y culete vermutero o vermú post-folixeru. 15:00. Xinta Popular. 16:00. Conciertu semiacústico de baldre. Juanillous 2.0. Toles actividaes son nel polideportivu de Martimporra, nun siendo les especificaes. Toles actividaes son gratuítas, nun siendo’l conciertu’l sábadu.

El Mercáu más antiguu d’Asturies el que se celebra na localidá llanisca de Porrúa va pesllar l’agostu festivu d’esi conceyu con un bon programa d’actividaes que va desenvolvese esti sábadu 23 y domingu 24. El Mercáu Tradicional de Porrúa lleva esta fin de selmana al públicu hasta esti llugar de Llanes, pa celebrar el primer Mercáu turísticu que se ficiere n’Asturies y que se convirtiere en modelu imitáu per tol país.

Porrúa quier brillar esti añu, con una programación d’actuaciones centrada en música tradicional, cola banda de gaites Llacín como animador principal d’esti Mercáu nel que nun faltaba artesanía, ecoloxía, mitoloxía y cultura tradicional de toa mena.

El “Conceyo de cantares III”, una actividá comarcal que se vieno desenvolviendo nel Parque Histórico del Navia, va celebrar una serie de conciertos musicales cantaos en gallego-asturiano esta próxima fin de selmana xunta delles otres actividaes empobinaes a los neños y neñes. Como fain anuncia nos cartelos espardíos pela comarca, “chégaye al turno al dúo Mestura, dentro da programación del “XVII Feirón de verano” que se vai amañar el prósimo domingo 10 d’agosto na Casa da Cultura de Grandas de Salime y tán programaos dous concertos: Ás doce da mañá pral público infantil y ás sete da tarde pra todos os públicos”.

Texedor, Corquiéu y N’Arba van ser les tres formaciones que compongan el programa de la nueche Folk “Llacín” y darréu d’ello les encargaes de pone-y música a la Romería del Llaciniegu que se celebra esti sábadu 12 de xunetu en Porrúa, enramada como tilos años polla asociación Llacín. El tradicional repartu del bollu, un concursu de recetes de cocina y xuegos tradicionales y talleres de baille tradicional van componer un programa nel que tamién va contase con conciertos a lo llargo de la tarde de la Banda de Gaites LLacín, los alumnos de la Escuela de Folk “Llacín” y la Bandina que lleva’l mesmu nome.

Les actividades enramará pela mañana cola repartida del Bollu Preñáu acompangáu d’una Casadiella y una Botella de Sidra ente les 13,00 y les 15,00 hores y de 19,00 a 21,00 hores. Un bollu que pa tenelu ye necesariu presentar el D.N.I o tarjeta d’invitación, dándose namái qu’unu por sociu.

El CONCURSU DE RECETES DE COCINA va entamar enantes de la xinta col apurre de los platos previstu de 13,00 a 14,00 hores y el Fallu del xuráu a les 14,30 hores. L’ingrediente imprescindible esti añu en tolos platos ye’lYOGUR.

Una COLCHONETA ENCHIBLE DE 12,00 a 14,00 hores va tar a la disposición de tolos neños y neñes que podrán esfrutar pela tarde de XUEGOS TRADICIONALES y un TALLER DE BAILLE TRADICIONAL, a partir de les 17:00 horas.

A partir de les 19:30 hores entamarán los conciertos de de la Banda de Gaites LLacín, los alumnos de la Escuela de Folk “Llacín” y la Bandina y a les 23,30 hores entamará la Nueche Folk.