Escéniques

El Teatru de la Llaboral de Xixón va acoyer esti fin del selmana l’actuación de los baillarinos Francisco Camacho y Kotomi Nishiwaki nel espectáculu de baille “Blessed”. La cita con esta coreografía orixinal de Meg Stuart va ser a les 20:30 hores del sábadu 8 de marzu. Camacho y Stuart, miembros de les compañíes Damaged Goods y EIRA ufren con “Blessed” el segundu de los sos trabayos conxuntos.

La obra d’Alejandro Casona llega na nueche del sábadu a les tables del Teatru Filarmónica d’Uvieu de la mano del grupu teatral Talía Astur. Rafael García Sánchez ye’l responsable d’esta versión de “El retablo jovial”, que recueye tres de les cinco farses que Casona pensó orixinalmenta pa la obra. La cita, emarcada nel festival de teatru amateur d’Uvieu, va entamar a les 20:30 hores.

La compañía teatral Margen va representar “La soldado Woyzeck” y “La guarda cuidadosa y la cueva de salamanca” nel entamu de la campaña “Jóvenes al Teatro”, cola que l’Ayuntamientu d’Uvieu quier averar el mundiu teatral a los estudiantes de secundaria y bachilleratu. En total van representase un total de 16 funciones, dos cada día a les 9:30 hores y a les 12:00.

“La soldado Woyzeck” va entamar a representase esti 5 de marzu y va siguir en cartel hasta’l día 10 del mesmu mes. “La guarda cuidadosa y la cueva de salamanca”, orixinal de Cervantes, llegará a les tables el 1 d’abril pa finar l’ultimu de los sos pases el 4 d’abril.

Teatru Kumen abre la I Muestra de Teatru Aficionáu de Samartín del Rei Aurelio cola representación de la obra “Actu Imprevistu” adaptación pal asturianu del orixinal “Acto Imprevisto” del autor malagueñu Miguel Gallego. La representación tendrá llugar nel Teatru L’Entregu a les 20:00 hores d’esti sábadu 1 de marzu. Dempués d’actuar en L’Entregu, Kumen volvera a poner Actu Imprevistu tamién en Posada Llanera (5 de marzu), Colunga (7 de marzu) y Sotu’l Barcu (8 de marzu).

“Actu Imprevistu” valse de la naturalidá, inocencia y sinceridá de dos llimpiadores pa llanzar una denuncia social acerca de la realidá cotidiana de munches muyeres a les que circunstancies vitales, problemátiques y conflictos les lleven a pervivir en condiciones sociales penoses. Les dos muyeres ponen sobre l’escenariu les sos frustraciones personales dende l’humor, realizando ensin querer una representación teatral y poniendo sobre les tables les aspiraciones de los trabayadores y de les muyeres en xeneral. Dos seres traxicómicos que, por un casual, permítense’l lluxu de soñar nun actu pasaxeru ya imprevistu. Esti montaxe pretende averanos a la realidá cotidiana, comprometenos con esa realidá social que nos arrodia por… “humor al arte”.

Nel escenariu van xuntase dos realidaes mui estremaes: d’un llau la frenética actividá que precede a una representación teatral: montaxe de les lluces, el soníu, los decoraos…, too ello tiñío d’un llinguaxe y rituales propios, que de sópitu s’interrumpe énte l’apaición de les trabayadores de la llimpieza, ayenas a too ello, y sorprendíes ante cada nuevu descubrimientu. Será, la intervención d’un tercer personaxe, lo que posibilitará que la maxa’l teatru raspie, per un instante, la triste vida de les dos muyeres.

Tamos énte una comedia con posu amargu, que llogra trescender los tópicos gracies a un argumentu bien preparáu, que nos avera a una realidá cercana con un llinguaxe atrayente nel que reinen l’humor y la tenrura.

La I Muestra de Teatru Aficionáu se celebrará en marzu nel Teatru de L’Entregu cola participación de cuatro grupos teatrales de la cuenca’l Nalón. Amás de Kumen, cola obra ‘Actu Imprevistu’ pal sábadu día 1 de marzu, tamién actuarán el grupu Padre Coll, cola obra ‘Toi permala’ el sábadu 8, el grupu El Refaxu cola obra ‘El gallu la quintana’, el 15 de marzu y yá, pa rematar, el sábadu día 22 actuará La Fumarea cola obra ‘El mélicu a palos’.

Teatru Margen va llevar al Teatru Xovellanos de Xixón la obra “La soldado Woyzeck”, últimu de los montaxes de la compañía teatral asturiana. El director Jose Antonio Lobato y l’actor Arturo Castro son los responsables de la dramaturxia, demientres qu’Ángeles Arenas, Alfonso Aguirre, Patricia Perez, Juan Román, y Jose Luis San Martín componen l’elencu d’actores. La cita ye’l sábadu 1 de marzu a les 20:30 hores.

“La soldado Woyzeck” ye un espectáculu basáu na pieza mayestra de Georg Büchner, Woyzeck. Trátase del drama d’unsoldáu , nel casu d’esta reintrepretación de Margen una muyer, que trata de sacar la so familia p’alantre nun turbulentu periodu d’entreguerres.

La compañía madrileña “Orfeo y Eurídice” van ser los encargaos d’abrir oficialmente una nueva edición de la Feria Europea de Teatru pa Neños y Neñes (FETEN) esti domingu 24 de febreru nel Teatru Xovellanos de Xixón. La primer función llámase “La mar de marionetas” y va entamar a les 18:00 hores. Esta actividá quier promocionar l’actividá teatral empobionada a los neños y cunta col sofitu del conceyu de Xixón, el Principáu, Cajastur, y l’Institutu Nacional de les Artes Esceniques y de la Música del Ministeriu de Cultura.

FETEN, qu’esti cumple cinco años de vida, propón un piñu de xeres y representaciones a cellebrar en 5 díes y más de 500 profesionales del sector participando de la Feria. Pue consultar más información sobre les actividaes na páxina web del Conceyu de Xixón.

El baillarín Antonio Márquez y la so compañía tan en xira y tres pasar por dellos escenarios europeos llega esti finde de selmana a Asturies con dos actuaciones. La primera va tener llugar nel Teatru Palacio Valdes d’Aviles el vienres a les 20:15 hores y la segunda, el sábadu 16 de febreru Teatru Xovellanos de Xixón a les 20:30 hores. L’espectáculu ta encadarmáu en tres partes, “Fiesta Flamenca”, “La Vida Breve” y “Bolero”. Pa esta última pieza

Esti martes 12 de febreru entama n’Uvieu el Festival de Teatru Llíricu Español cola representación de dos zarzueles: “Las bribonas” y “La revoltosa”. La primer cita ye a les 20:00 hores nel Teatru Campoamor de la capital. Los díes 13, 15, y 16 d’esti mes de febreru van ser los siguientes nel programa de representaciones d’estes dos zarzueles.

Completen el programa “La bruja”, en marzu; “La generala”, nel mes d’abril; “Luisa Fernanda”, en mayu y “La leyenda del beso” nel mes de xunu. Les entraes sueltes tan disponibles dende 15 a 30 euros mientres que l’abonu completu va de 60 a 120 euros.

El públicu asturianu va tener dos cites, 7 y 8 de febreru, cola compañía francesa de danza Pockemon Crew Cie y con un montaxe de nueva creación que lleva por nome “C’est ça la vie!” y que tiene la música hip-hop como filu conductor del trabayu de los baillarines n’escena. Tantu’l pase del xueves como’l del vienres van entamar a les 20:30 hores.

“C’est ça la vie!” va traer ocho baillarines nes tables a les tables del teatru de la Llaboral nun espectáculu de danza orixinal cola escena hip-hop como referente. Pockemon Crew Cie entamó a abrise camín na escena francesa nos soportales de la Ópera de Lyon, más tarde crearon la compañía y en 2003 pasen a ser uno de les formaciones residentes d’este teatru.

El Teatru Xovellanos de Xixón va acoyer esti vienres 8 de febreru l’espectáculu de danza contemporanea “Minus One”, con pieces orixinales del baillarín y coreógrafu israelí Ohad Naharin. La compañía encargada de da-yos vida nes tables ye Les Grands Ballets Canadiens, una de les formaciones con más solera del panorama intenacional que cunta con una trayectoria de cásique cincuenta años enriba los escenarios y la dirección del gran maestru Gradimir Pankov.