Escéniques

Esti prósimu vienres, día 6 de marzu, el grupu teatral Syntexto estrenará la obra dramática Oh 36!, de Lluís Portal -galardonada nel añu 2007 col Premiu Uviéu, que convoca’l consistorio uvieín-, nel Teatru Riera de Villaviciosa. La obra, escrita n’asturianu, inspírase na esperiencia vivida pol médicu y escritor maliayés Carlos de la Concha García-Ciaño (Villaviciosa 1887 – Xixón 1965) nel trescursu de la guerra civil española.

Home conservador, monárquicu, católicu…, durante la dictadura de Miguel Primo de Rivera, De la Concha formó parte de la formación política creada por ésti, la Unión Patriótica. Foi diputáu provincial, y fundador de los ateneos de Villaviciosa y Xixón. Fundó en 1929 -y dirixó- el periódicu local Orientaciones, d’ideoloxía conservadora, que siguió publicándose hasta l’españíu de la guerra. Escribió en castellanu y asturianu. En rima bable dio a la imprenta Ensueños y añoranzas (1923) y Cuentos perreros (1953).

Nel trescursu del conflictu bélicu, el doctor escondióse nun zulo realizáu na so propia casa -l’edificiu, de tres plantes, aínda esiste na Plaza de Carlos I de Villaviciosa-, perfeutamente disimuláu, cola fin de protexese de la persecución a que lu sometió de forma personal y concienzuda -pero infructuosa- el dirixente anarquista y masón Cristóbal Cano Servet, empleáu de la fábrica El Gaitero, y presidente del Atenéu Obreru de Villaviciosa, hasta que partiera al esiliu. Durante los 15 meses que permaneció abellugáu nel so propiu domiciliu, el doctor escribió un interesante diariu rimáu que, aínda anguaño, permanez inéditu (sacando les revelaciones recientes efectuaes por Etelvino González López na so obra Ni cautivos ni desarmados. Asturianos refugiados en Cataluña 1937-1939, de Krk edidiciones, 2008), nel que cuenta de forma detallada los acontecimientos de la guerra a los que tenía accesu, refiriéndose tanto a cuestiones locales, como a otres más xenerales.

Hasta equí los datos nos que s’inspira la obra teatral. La hestoria puede ampliase así: Cuando’l 19 d’ochobre de 1937, les tropes franquistes alcancen la ría de Villaviciosa procedentes del oriente, un grupu de republicanos, ente ellos Cristóbal Cano, preparen la so evacuación dende la dársena de El Puntal; pa ello echen mano d’un pequeñu barcu de 50 tonelaes, atracáuo nel cercanu muelle de la fábrica El Gaiteru, que llevaba por nome El Rubio. Según Etelvino, sobre las caxes de sidra yá cargaes instálense “124 milicianos y una miliciana”, citando como fonte al periódicu La Petite Gironde de Burdeos, hasta onde llegó la embarcación dos díes dempués; “toos ellos superarmaos”, ampliaba La France de Bordeaux. Nel cai confiscaríen-yos: 3 fusiles ametralladores, dos metralletes, y cincuenta fusiles automáticos perfeccionaos. La mayoría volvería a entrar a España por Cataluña pa siguir lluchando pola República. Al finar la guerra n’Asturies, Carlos de la Concha renuncia a la idea de venganza, y critica a los que la exercen, llegando a ausentase inclusu temporalmente d’Asturies cuando comprueba que nun puede facer nada por evitala.

Esti sábadu, 26 de xineru, el café La Palmera, asitiáu na Avenida de la Constitución, 2, de La Pola (L.lena), van actuar los monologuistes Silvino Torre, Carlos Alba “El Pola” y Lluis Antón González, col so espectáculu “Tres pates pa un bancu”. El nuevu monólogu asturianu con trés propuestes distintes pero con un mesmu enfotu, el facer rir. La hora comienzu les 12 la nueche.

Esti vienres 5 nel Teatru Xovellanos de Xixón, a les 20,30 hores, la lexendaria compañía de payasos Licedei, de San Petesburgu ufrirá’l so espectáculu de furia creativa y humor corrososivu. “Semianyki” ye l’espectáuculu qu’aporta a Xixón dempues de dar la vuelta al mundu.

El personaxe “El Pola”, del monologuista Carlos Alba, actúa nel auditoriu de la Casa Cultura Teodoro Cuesta, de Mieres, esti martes que vien, 25, a les 20 hores. Fadrá les sos “Memories d´un kinki”, colos meyores gags y les meyores hestories d’esti kinki reconvertíu.

El perconocíu monologuista Carlos Alba, va tar col so personaxe Cellero’l Monologuista nun amagüestu que va celebrase nel chigre La Picota de La Felguera, esti sábadu 22 a partir de les dos de la tarde.

El sábadu, día 15 de payares, va celebráse’l II MARATHON DE TEATRU, entamáu por FETEAS (Federación de Grupos de Teatru Amateur del Principáu d´Asturies) nel nuevu Centru Municipal del Llanu de Xixón. Ente les ocho la tarde y les dos de la mañana dirán representando pieces cortes les distintes compañies que formen la federación. La entrada hasta llenar el aforu ye de baldre y l´actu cuenta además del sofitu del Ayuntamientu Xixón, el del Princiáu d´Asturies, Caxastur y la ESAD Asturies.

Lluis Antón González, de Telón de Fondo, va echar dellos monólogos d’Inaciu Galán y Isaac G. de l’Arada.

El director de teatru asturianu y representante n’Asturies de l’Asociación de Directores d’Escena (ADE), Arturo Castro, pidió estos díes “una mayor presencia de compañíes asturianes nos grandes espacios escénicos de la comunidá”, tales como’l Campoamor d’Uviéu, el Xovellanos de Xixón o’l Palacio Valdés d’Avilés.

Nesti sen, espresóse demientres la rueda prensa convocada pola Directora Xeneral de Promoción Cultural y Política Llingüística, Consuelo Vega y ADE p’anunciar la celebración esta fin de selmana en La Llaboral de Xixón del decimocuartu congresu estatal d’esti colectivu.

Faciendo un añadíu a les declaraciones del tamién director y miembru d’ADE, Etelvino Vázquez, sobre’l progresu del teatru asturianu, Castro comentó que “entama a haber espacios teatrales d’importancia (Palacio Valdés, Campoamor y Jovellanos), teatros d’envergadura escénica, onde puen facese representaciones de gran formatu”. “Y ta l’espaciu de La Llaboral”, añadió. “Los creadores asturianos echamos en falta la presencia del teatru asturianu nestos ámbitos, porque paez que tán lligaos más a los foriatos”, añadió.

“Les autoridaes que xestionen estos teatros, que nunca somos los directores d’escena, son cargos de confianza política y non necesariamente creativos, deberíen abrir esos espacios al teatru asturianu (…) que tamién tien derechu”, sentenció.

En respuesta, Consuelo Vega, recordó’l Circuitu Asturianu de Teatru del Principáu, “nel que participen 24 conceyos, que tienen programaes 284 funciones, en collaboración cola conseyería”.

“Nos otros espacios”, en referencia a los grandes centros teatrales, “hai una presencia importante d’obres que mos traen lo que nun tenemos n’Asturies. Pero tamién hai una presencia d’obres y compañíes asturianes”, esplicó, pa recordar que “esti mesmu miércoles se presenta una obra d’Etelvino Vázquez nel Palacio Valdés”. Sobre l’espaciu de La Llaboral, recordó que “sólo tien un añu de vida, y la selmana pasada la conseyera de Cultura calcó na voluntá del Gobiernu d’estrechar y aumentar la implicación y participación del mundu del teatru asturianu nesti centru”.

Güei, miércoles día 8, el grupu Telón de Fondo actuará na Colexata San Xuan Bautista de Xixón, cola obra “Antón (el cantu´l cisne)”.

Esta obra, dirixida por Xulio Vigil , cuenta la hestoria d´un vieyu actor que queda dormíu nel teatru depués d´una función homenaxe. Na soledá del escenariu dirá repasando la so vida y solamente l´apuntador del teatru escuchará la so cabera representación.

El repartu componenlu José Luis Fernández y Lluis Antón González. La escenografía y diseñu de lluces ye de Beni García.

La representación tá organizada pol Area Cultural de Caxastur y la hora de comienzu ye les ocho la tarde, con entrada llibre.

“Teatro el puente de cuba” de Madrid representando “las Forasteras” abre esti domingu 21 nel Nuevu Teatru de La Felguera les representaciones teatrales seleccionaes nel certame Art Nalón, que van siguir tolos domingos hasta’l 23 de Payares con entrada de baldre y representaciones a partir de les 20 hores.

Darréu de la representación d’esti primer domingu tan previstes toes estes: -El domingu 28, “La Garnacha Teatro” de Logroño representa “Los cuernos de Don Friolera” de Valle Inclán. -El domingu, 5 d’ochobre “Refugiartes Teatro de Oviedo representa “Tango de la palabra” -El domingu 12 5 d’ochobre, “Las Bernardas” de Valladolid representa “Dejadme volar” -El domingu 19 5 d’ochobre, “Pantoteatro” de Ciudad Real representa “Cascorro manoslargas” -El domingu 26 5 d’ochobre, “Corocotta Teatro” de Reinosa representa “¡Ay Carmela!” -El domingu 2 de payares, “Laescenaquetemata” de Málaga representa “El manual del vago”. -El domingu 9 de payares, “Teatro Vuelta de Tuerca” de Madrid representa “Báthory contra la 613”. -El domingu 16 de payares, “Juruju jaja Teatro” compañía argentina de Madrid representa “Dinosaurios” de Santiago Serrano. -El domingu 23 de payares, “Carasses Teatro” de Elda, Alicante.

El grupu llangreanu Teatru Kumen estrenó esti xueves nel Salón de Teatru Costumista Asturianu de Candás la obra “Jacinto y Monchina” de José Ramón López, nun montaxe preparáu especialmente pa esti XVIII Salón candasín.

La obra estrenada por Kumen na nuechi del xueves presenta a Jacinto de Fresnedo, ún de los personaxes principales de “La Aldea Pérdida” d’Armando Palacio Valdés, que Teatru Kumen alluguen dientro d’una nueva hestoria, sofitada en testos de Pachín de Melás, García Lado, Cellero, Shakespeare y José Ramón López.

Jacinto ye un illustráu encerráu nun pueblu asturianu, economista, qu’escribe poesía y llee tolo que se-y pon delantre, pero que fuxe del trabayu: la güerta, segar los praos. Fuxe de los llabores de la tierra. Tien una moza llamada Monchina cola que ta a nada de casar contra los deseos de so suegra, que piensa que nun ye l’home afayadizu pa facer medrar les sos propiedaes. Jacinto tendrá que pasar les pruebes que la so futura sega-y ponga.

El programa d’esti vienres del Salón inclúi la representción de “Dalgo mui Gordo” de Cristina Muñiz pol Grupu “La páxara Pinta de Xixón”. Y el sábadu ta previstu otru estrenu pola Compañía Asturiana de Comedias cola obra d’Eladio Verde “Pachina y la parentela”.