Escéniques

La estaya de cultura del Conceyu de Villaviciosa, a comuña cola Conseyería de Cultura y Turismu y el Serviciu comarcal de Normalización Llingüística, súmase a la celebración de la Selmana de les Lletres Asturianes cola programación de la obra Tuxa, a cargu del grupu de teatro maliayu Teatru Contraste. La obra va facese’l miércoles 4 a les ocho la tarde, nel Teatru Riera de La Villa.

Amás, el xueves, a les ocho la tarde, va celebrase un recital de poesía n’asturianu, a les ocho la tarde nesi mesmu espaciu. Nel recital poéticu van participar J. I. Pidal Montes, Sofía Castañón y Rubén d’Areñes, acompañaos por Dani García de la Cuesta poniéndo-yos música.

El pasáu 28 d’abril estrenábase nel Teatru Prendes de Candás “Los amorinos de Bastián y Bastiana”. La obra, una ópera de Mozart, adaptóse al públicu infantil y fízose n’asturianu, per parte de la compañía profesional de teatru Producciones Nun Tris. Los próximos pases de la ópera van ser el 4 de mayu, a les 12:30, na Casa Cultura de Llaviana, y el vienres 6, nel Vital Aza de La Pola L.lena.

Dambes funciones tán dientro les actividaes programaes na Axenda Didáctica del Serviciu de Política Llingüística.

La obra ta adaptada y dirixida por Antón Caamaño, y nella participen Vanessa del Riego, como Bastiana; Pablo Romero, como Bastián y Antón Caamaño, como Colás. Al pianu va tar Manuel Burgueras y al cargu de la escenografía, Pablo Maojo. Amás, como ayudante de direción participa na obra Inma Rodríguez.

La Universidá d’Uviéu empecipia una xira de teatru de la mano de les meyores compañíes asturianes pa llevar les sos últimes producciones por llocalidaes a onde nun llega’l circuitu asturianu. Teatro Margen, Higiénico Papel, Teatro del Norte y Zig-Zag Danza van percorrer esta primavera colos sos montaxes Villaviciosa, La Pola L.lena, Llanes, Ribesella, L.luarca , Cuideiru, A Veiga y La Felguera.

El vicerrector d’Estensión Universitaria, Vicente Domínguez, acaba de presentar la xira `La Escena Ambulante’, cola que la institución académica da un nuevu pasu nel so enfotu por llevar la cultura a tolos rincones de la rexón. “Tenemos de devolver a la sociedá lo que de cutio nos ta dando. Somos la única institución n’Asturies que programa en cualesquier parte”, indicó Domínguez n’alusión a la idea de llegar a toles localidaes y a tolos públicos. Añedió qu’el so suañu sería tener presupuestu pa programar tolos díes teatru, música y cine por toa Asturies.

El vicerrector tuvo acompañáu por representantes de les compañíes que participen nesta xira: Etelvino Vázquez (Teatro del Norte), Arturo Castro (Margen), Estrella García ( Zig-Zag Danza ) y Carlos Dávila (Higiénico Papel). Los directores y artistes dieron les gracies a la Universidá d’Uviéu “por alcordase del teatru asturianu” y consideraron qu’esta iniciativa ye “un exemplu” a siguir pal restu d’instituciones de la Comunidad.

Va llevantar el telón d’esti ciclu Teatro Margen cola representación de la obra de Jean Paul Sartre “A puerta zarrada” el 20 de mayu, en Llanes) Higiénico Papel va poner n’escena l’espectáculu “Una hora na cocina”. Los díes 5 y 6 de mayu, en L.luarca y Cuideiru , respectivamente, va ser Teatro del Norte quien lleve a les tables la farsa lorquiana “La Zapatera prodixosa”. A lo último, La Felguera (11 de mayu) y A Veiga (12 de mayu) van ser les localidaes qu’acueyan la representación de “Disonancies”, que va correr al cargu de Zig-Zag Danza.

El personaxe El Pola, interpretáu pol actor Carlos Alba, llega esti xueves al Pub La Galería d’Avilés, de magar les onde la nueche. El vienres, a les 20:15, va tar en compañía de Rafa Kras y el so monólogu rock nel Teatru de Sotu’l Barcu.

El Conceyu de Cangues d’Onís celebra dende esti domingu la X Selmana de Teatru, y güei, llunes 11, la compañía de Sevares «Ensin reparu» va ufrir la obra costumista «La última Rosa», escrita na variedá centro-oriental del asturianu. Mañana martes la compañía «A. C. Padre Coll», de La Felguera, sedrá la encargada de representar la obra «Toi permala».

El miércoles 13, la compañía parraguesa «Producciones La Binocle» representará «Antoine y Tikis Mikis», que cuenta la vida d’unos payasos; mientres el xueves, la compañía «A. C. CIMA», tamién de Parres, va ufrir la obra «Les fartures de Servando», pesllando’l vienres la selmana «Teatro Kumen», de La Felguera, con «Actu imprevistu».

La Tertulia Enrique García Rendueles va aldericar, esti xueves 7 d’abril alredor de la situación actual del monólogu asturianu, un xéneru lliterariu y teatral con gran vitalidá n’Asturies y que nos años últimos vive un momentu de renovación, con esperiencies como los certámenes de monólogu modernu o’l programa de la TPA, “Al aldu: la risión”, nel que s’echaron yá más d’un cientu de monólogos de nueva creación. La Tertulia celébrase como cada xueves, de magar les ocho la tarde, nel llar social L’Ayalga, nel 11 de la cai Prendes Pando de Xixón.

Según da anuncia’l Teatru Xovellanos de Xixón y por cuenta de l’amplia demanda de públicu pal espectáculo últimu del dúu cómicu Faemino y Cansado, que va aportar al espaciu escénicu xixonés en mayu, habilitóse una función más. Los cómicos van arribar a Asturies los díes 5, 6 y 7 de mayu, con función a les 20:30 hores, amás del día añadíu, el domingu 8 de mayu, a la mesma hora. Yá s’atopen disponibles les llocalidaes nes taquilles del teatru y al traviés del serviciu TickExpress de Caxastur.

L’espectáculu “Parecido no es lo mismo” ye una nueva vuelta de tuerca (son munchos años apertando yá) a los plantegamientos estéticos ya ideolóxicos de Faemino y Cansado. Cuando unu va ver a Faemino y Cansado quier ver a Faemino y Cansado faciendo, non lo mesmo, pero si daqué asemeyao y esti espectáculo ye xustamente eso, el títulu nun llama a engañu, ye un espectáculu asemeyáu ensin ser lo mesmo. ¡Ah y vuelve El Gran Mimón!” Jorge Borges (Amigu de la pareya y sobrín del frutosequero).

Les Xornaes de Llingua y Cultura Asturiana lleguen a la so décimosesta edición, y per primer vegada les actividaes ábrense al públicu, con cine n’asturianu, monologuismu, teatru y música.

El xueves 5 de mayu, a les siete y media la tarde les actividaes siguen con “La Llei del cuchu”, espectáculu escénicu de Carlos Alba “Cellero”.

Yá la selmana que vien, el martes 10 de mayu, a les seis de la tarde, el grupu Asturmitomanía llega al Atenéu La Calzada con “Vamos a contar un cuentu”, una prestosa, tienra y orixinal historia, na que toos deprienden que, pa vivir en paz, ye obligao respetar yaceutar a los demás tal como son, por bien distintos que seyan.

El xueves 12, a les siete y media la tarde, el grupu folk Gueta na fonte toca dientro de les Xornaes, zarrándoles el martes 17, un Festival de monólogos n’asturianu organizáu pola Asociación d’Intérpretes de la Canción Asturiana (AICA) cola participación de Ludivino Díaz “Pin de la Cotolla”, Marcelino Díaz Losada, Luz Mari del Sol, Armando Felgueroso “Min de les Pieces” y la presentación de Fernando Ruiz.

Amás, del 3 al 17 de mayu, na Biblioteca Municipal d’El Natahoyo ta celebrándose la esposición L’enigma del Palaciu Bao.

Programa completu d’actividaes de les Xornaes

El 27 de marzu tien llugar el Día Mundial del Teatru y el Xovellanos de Xixón súmase a la celebración con “La lección”, un vixente alegatu escénicu que cuestiona l’usu de la razón de la fuercia contra la fuercia de la razón. Joan María Gual dirixe a Manel Barceló, Itziar Miranda y Maica Barroso en “La lección” d’Eugene Ionesco, el dramaturgu por escelencia del Teatru del Absurdu, al pie de Beckett y y Pinter. La llección, segunda obra de Ionesco, foi la contestación del dramaturgu a la incomprensión que crítica y públicu demostraron a voces tres el so debú con “La cantante calva”, podía escribir una obra respetando les clásiques unidaes de llugar, tiempu y acción, pero dando al llinguaxe un camín absolutamente distintu al utilizáu pola mayor parte de los dramaturgos de los años 50.

La llección pon de manifiestu la rellación de poder ente un profesor y una alumna, rellación que transita per paraxes d’humildación y represión, de posesión y d’aniquilación de la personalidá del otru al traviés de la educación.

Una moza allega a un profesor particular con cuenta de qu’ampliar los sos estudios. La rellación ente ellos entérriase a midida qu’ella va perdiendo la so vitalidá, les sos ganes rebalbes de cuestionalo too, de contestalo too, mientres el profesor afita’l so poder, acurriéndose sobre l’alumna como un depredador dominante. Tres ellos, reparando esi xuegu de poder insanu, la criada de la casa, espectadora pasiva n’apariencia, namás n’apariencia…

El xueves 17 de febreru a les 20:30 hores nel Xovellanos la Fundación Contamíname presenta Mujer Frontera, un espectáculu onde imaxes, música y pallabres conflúin pa nun escaecer la estadística del horror de les muyeres de Ciudá Juárez. Mujer frontera enceta’l casu de Ciudá Juárez dende un enfoque multidisciplinar, con una investigación rigorosa y un proyectu artísticu musical y fotográficu, que remató na edición d’un discu-llibro que vio la lluz el pasáu 20 de xunu y qu’axunta doce canciones interpretaes por Pedro Guerra, Sara Van, Lila Downs, Lhasa, Lou Garx y BGP Tríu, Silvia Pérez Cruz, Julieta Venegas, Ely Guerra, Chiqui Pérez, Roxana Río con Javier Ojeda y Bebe. Les semeyes son obra de Yamila Jerez, y el trabayu d’investigación de Beatriz Marcos.

El trabayu denuncia los feminicidios de Ciudá Juárez, una situación qu’enceta señalando’l calter distintivu de les víctimes: muyeres de manos probes, obreres y moriques, cuerpos rotos, cosificados nuna frontera onde l’Estáu ye fallíu. “Esto ye lo qu’asocede en Ciudá Juárez”, dicir al empiezu de Mujer frontera: “Violencia, machismu, impunidá, neolliberalismu, narcotráficu, maquiles, migración, aculturación, mafia, probeza, frontera, neglixencia, poder, esplotación, mercancía, colonialismu, contaminación, racismu, corrupción. Muerte”.

Nel conciertu que vamos poder ver nel Xovellanos van actuar les cantantes Lou Garx, Chiqui Pérez, Roxana Ríu y Sara Van. Al pie de les sos voces va tar la música de BGP Tríu más el pianu de Luis Fernández y la proyección de 90 semeyes de Yamila Jerez.