Entrevista de la selmana

Marcos ye miembru de l’asociación Softastur, que trabaya pola puesta en marcha de software llibre n’asturianu. Esta selmana ficieron pública la versión nueva de Firefox n’asturianu, que sal a la rede dempués d’una primer versión espublizada en 2002 y falamos con él del procesu pol que se llegó a esti momentu, les xeres que tien en marcha softastur y la situación actual del software llibre n’asturianu.

-Dempués de munchu trabayu Firefox 4 sal n’asturianu, ¿cómo foi esi procesu?

-Fai unos años, solicitamos a Mozilla retomar Firefox n’asturianu; ‘retomar’ porque nel añu 2002 yá esistía Firefox 1.0, pero’l proyectu quedó abandonáu. Tres d’aceutar Mozilla la solicitú, entamamos el nuevu procesu de llocalización, coles tornes de l’aplicación, de les webs oficiales y cumplir tolos procesos que desixe l’equipu de Mozilla pa tener la versión n’asturianu.

Suel pensase que’l principal trabayu ye sólo traducción, pero esa ye la menor de les xeres. La mayor parte del trabayu va en testiar toles revisiones diaries qu’implementa Mozilla, tanto novedaes como de seguridá, o facer que funcionen los atayos de tecláu, les diferentes pantalles tean al tamañu esperáu, los motores de gueta (uiquipedia, diccionariu,..), etc.

Partíamos del trabayu fechu en Firefox 3.6, colo qu’esta vegada fízose too más curtio (pero non más cenciello) y pudimos centranos más n’otres coses. Asina y too, la versión n’asturianu ye una ‘beta’, porque tovía pue tener dalgún fallu.

Nesti puntu dalgún entrugaráse de cuántes traducciones tamos falando. N’aplicación, lo normal ye ver unes 200-300 traducciones, pero en realidá son más de 6.000 traducciones repartíes nunos 300 ficheros.

En tou esti procesu, contamos cola ayuda de Pascal Chevrel y Axel Hecht del equipu de Mozilla, ensin los sos gabitos, nun esistiría Firefox n’asturianu.

-¿Cuánta xente trabayó nel proyectu?

-Hai dos persones de Softastur responsables del caltenimientu del proyeutu y que diariamente tienen contactu con Mozilla y dempués ta’l trabayu del restu de la comunidá de Softastur, qu’aporta les traducciones, meyores, suxerencies ya idegues.

-¿Qué ventayes tien Firefox 4 frente a otros navegadores?

-Firefox ye’l que más complementos tien, el más personalizable, el más seguru, totalmente llibre y cola mayor comunidá d’usuarios. A eso súmase la ventaya de ser el navegador más usáu n’asturianu (nun hai qu’escaecer qu’en Linux hai dalgunos más como Epiphany, Arora, Chromium…). Nesta versión, yo destacaría la xestión de llingüetes ‘Panorama’, la sincronización de les preferencies del usuariu y la integración completa en tolos sistemes operativos.

-Óyese falar muncho de software llibre, pero sigue ensin conocese, ¿qué ye esactamente?

-La definición técnica ye “software que puedes usar, estudiar, meyorar y distribuyir ensin torgues”. Si’l software cumple estes llibertaes, ye software llibre.

Pero vamos poner un exemplu, imaxina que tenemos delantre dos botelles de sidra, la botella “A” pertenez a la empresa “A Ltd.” y tien tolos drechos sobre ella. Sólo pues prebala na so cadena de chigres, al preciu que-yos pete, nun pues compartila colos collacios y nun te dicen de qué ta fecha: sabe a sidra, pero naide sabe qué ingredientes lleva y la empresa prohíbe face-y un analís. La botella “B” pertenez a ún de los munchos llagares qu’hai na redolada. Por supuestu, ta fecho con mazana y si quies dícente con qué variedá de mazana ta fecho, nun lleva coses rares y eso pues comprobalo tu mesmu porque pues analizala cuantes vegaes quieras. Ye más, la receta qu’usa esi llagar ye la receta meyorada a lo llargo de los años col conocimientu de toos. Puedes compartila con tolos collacios que quieras y onde quieras.

¿Con qué botella quedes? Obviamente cola “B”, porque sales beneficiáu tu, la comunidá de llagareros y los consumidores de sidra. Podríemos dicir que ye una sidra del pueblu pal pueblu. Estrapolando: un software fechu pol pueblu, pal pueblu.

Vistu esti exemplu, vemos que se deriven aspectos éticos y entamamos a falar de llibertaes: La llibertá d’usalu: Por exemplu cuando mercamos Windows tamos mercando una llicencia d’usu, ye dicir, pa dos ordenadores deberíemos de mercar dos llicencies; la llibertá de camudalu: Podemos adaptalu ensin tener que pidir consentimientu a naide. Ye la que permite por exemplu, poder tornar el software a toles llingües del mundu o meyoralu faciéndolu más versátil. Tamién podemos distribuyir eses meyores; la llibertá d’estudialu: Deriva en tresparencia y seguridá: Un software que puen inspeccionar miles y miles de persones ye un software que nun pue contener elementos maliciosos; o la llibertá de distribuyilu: Como’l software pertenez a la comunidá, tamién te pertenez a ti y fai que’l so preciu tienda a cero.

– ¿Pero nun hai negociu detrás del software llibre?

-Sí, el software llibre ye un negociu que xenera perres, porque les grandes empreses o alministraciones públiques aforren munchos millones al evitar pagar llicencies, pero suelen necesitar contratar un caltenimientu (tanto col software llibre como non llibre) y abondes empreses pequeñes pueden ufrilu, polo que xenera trabayu na industria d’equí y les perres nun van toes pa una sola empresa americana. Si falamos de perres públiques como ye’l casu de l’Alministración, el software llibre ye claramente la opción a escoyer.

-¿Y ta ganando la batalla al software privativu?

-Ta ganando más aceptación, pero nun hai batalla o son batalles distintes: el privativu namás persigue’l porgüeyu económicu y el llibre ye responsable, fiable y xustu cola comunidá. Aparte de los principios que falamos nel puntu anterior, pa un asturfalante cuenta’l compromisu pa cola nuesa llingua.

-En cuantes al sistema Ubuntu, que permite que l’ordenador “fale” n’asturianu, ¿qué acoyida ta teniendo?

-L’acoyida ta siendo bien bona. Poder remanar un sistema operativu 100% na nuesa llingua ye un gran avance y asina lo vamos viendo cola xente nos diferentes talleres d’instalación qu’organizamos. Cada día gana usuarios y la xente sabe qué ye cuando siente la pallabra ‘Ubuntu’.

-¿Y na alministración asturiana, ta habiendo avances nel so usu?

-Anguaño, los famosos miniportátiles de primaria lleven Windows XP en castellán y Ubuntu 9.10 en castellán. Gracies al sindicatu SUATEA, esto va cambiar y Ubuntu tamién llevará preinstaláu l’asturianu. Pa nós ye perimportante l’usu de software llibre na educación. Primero, pol aforru económicu que supón l’usu de software llibre nes escueles (ehí ta l’exemplu de la Xunta d’Extremadura); segundo, pola ética del asuntu: tamos falando d’Educación y non d’intereses comerciales, la competencia dixital nun ta arreyada al usu de determináu productu sinón que tien de ser tresferible y xeneralizada y el software llibre cuadra dafechu nesi plantegamientu; terceru, el software llibre ye l’únicu software qu’amenorga la dixebra dixital ente los que puen acceder a la Era Dixital y los que non; y cuartu, porque al incluyir la llingua asturiana, garantízase un poco más la presencia del asturianu na estaya educativa y nuna área moderna dafechu.

-L’añu pasáu l’asturianu foi la novena llingua más tornada d’Ubuntu a nivel mundial con un 98% ¿supón una satisfación siendo un grupu pequeñu de tornadores, non?

-Por supuestu. Sobre too col calter internacional que tien Ubuntu, préstanos pola vida ver que nel Planet d’Ubuntu se fala del ‘asturian language’ o que’l comunity manager nos felicita dende California polos talleres d’instalación.

-¿Echáis en falta más xente que collabore?

-Siempre. Llingües como’l castellán, o’l francés, tienen miles y miles de traductores y en cuestión de selmanes completen el 100% de les traducciones de los proyectos. Nosotros siempre vamos per detrás y cuéstanos un migayín más, pero tamos ehí arriba. Les ferramientes de traducción de les que disponemos agora son numberoses y la mano d’obra nun ye tanta anque por suerte vamos teniendo nuevos collaboradores. Asina y too quien quiera echanos un gabitu va ser bienveníu 😉 Pa collaborar: http://softastur.org/contautu.php

-¿Qué otros proyectos tien en marcha nesti momentu Softastur?

-Aparte d’Ubuntu, caltenemos los sistemes operativos Debian, Fedora y OpenSuse y los sos entornos d’escritoriu: GNOME y KDE. Tamién les suites ofimátiques llibres OpenOffice y LibreOffice, asina como mediaWiki, motor de la Wikipedia. Nel aspeutu educativu tán los proyeutos TuxPaint, TuxType, TuxMath o GCompris. Y tamos trabayando n’Aspell, un correutor ortográficu livianu integráu en tol sistema.

Sicasí, agora mesmo el proyeutu que más nos prestaría ver p’alantre ye MeeGo, una alternativa llibre cola que l’usuariu podría disponer d’un teléfonu móvil (smartphone) na so llingua. El trabayu yá ta fechu y habrá qu’esperar a finales d’añu, pero entá nun hai nada seguro… ye un proyeutu mui xoven.

Enllaz oficial de descarga de Firefox 4

Serxu Solarez (Xixón, 1975) ye un espertu en gastronomía y un investigador de la nueva cocina. Trabayó en cásique tolos campos de la profesión, como prebador, hosteleru, creador de guíes gastronómiques, organizador d’eventos alredor de la comida y la bebida… Nos tiempos últimos ta mui venceyáu al mundu de les bebíes espirituoses, creando cócteles y participando con ellos en certámenes internacionales. Agora acaba de representar a Asturies nel Foru Gastronómicu de Girona y falamos con él na Entrevista de la selmana pa conocer cómo foi la so esperiencia en tierres catalanes y qué momentu vive la gastronomía asturiana.

-¿Qué balance fai de la so presencia nel Foru Gastronómicu de Girona?

-Perpositivu, foi una esperiencia única que nun podía despreciase, tener la oportunidá de presentar les tos creaciones nun de los foros mas importantes del mundu ye daqué que fai que sigas trabayando con ilusión.

-¿Yera l’únicu asturianu?

-Non, taba tambien Jose Antonio Campoviejo, pa min el meyor cocineru d’Asturies, reconocíu inxustamente namás que con una estrella Michelin, pa min merez polo menos dos. Había tamién un están del plan de Turismu Gastronómicu d’Asturies. Creo que ye llamentable que temos dos asturianos ellí y que mos enteremos porque lo vemos nel programa o porque mos alcontramos per ellí. Estes coses tendría de coordinales el Gobiernu Asturianu y más tando presente nel salón.

-Vascos y catalanes lleven la delantera no que cinca a grandes nomes de la gastronomía, ¿entama la gastronomía asturiana a dase a conocer fuera d’Asturies?

-Yá lleva tiempu, hai muchu tiempu que la gastronomía asturiana ta más valorada fuera qu’equí. Yo llevo los cinco años últimos faciendo conferencies y collaborando pa empreses de fuera d’Asturies que reconocen les mios creaciones, equí tienes que peleate muncho pa facer poco y sois pocos los medios que facéis casu a les noticies que xeneramos la xente creativo. Paezme que tenemos que tar arguyosos de que dende Asturies teamos creando formes diferentes d’esfrutar una bebida tan estremao d’Asturies comu ye la xinebra.

-No que cinca a la sidra, vien falándose d’un conflictu ente la sidra asturiana y la vasca…

-Los vascos faen una sidre bastante mediocre en cuanto a calidá pelo xeneral. Prebé dalgunes interesantes, pero nun tienen un res que ver colo nueso.

-¿Qué nivel de conocencia tien la sidra asturiana fuera’l país?

-Fuera d’Asturies la mayor parte la xente camienta que la nuesa sidra ye “El Gaitero”. Quédanos un llabor importante nesti sen. Lo que ta claro ye que nun hai un país nel mundu con una cultura sidrera como la nuesa.

-¿Que tendría de facese pa meyorar esos niveles de conocimientu?

-Una promoción real. Hai que gastar les perres en vendese en xeneral. Ye una asignatura pendiente. Somo pésimos comerciales de lo nueso. Creo que Xixón ta faciendo un llabor importante y apostando en seriu pola gastronomía. Pero ye un pasín pequeñu. Nun se pue facer un actu de promoción d’Asturies y contratar a xente de Madrid pa que faigan conctelería. El gobiernu asturianu tien que tirar de los asturianos pa estes coses. Equí hai una Asociación de Barmans de la que yo soi secretariu, paezme que la lóxica ye que se mos tenga en cuenta pa los planes de promoción turística gastronómica.

-Y el vinu de Cangas, ¿por qué nunca nun apaez nes guíes de zones vinícoles?

-Quiciabes ye necesario que pongamos los pies nel suelu con esti tema. Creo qu’hai que reconocer el llabor que lleven fechu nestos años, pero nun ye suficiente. Yo apostaría por vinos blancos más que por tintos. Nun tenemos clima.

-Dende 2007 sacó al mercáu dellos vinos, ente ellos “Un Vinu Curiosu”, vinu d’autor con uves de delles zones, ¿pa cuándo una de les sos creaciones con uves asturianes?

– Pues la verdá ye que me prestaría pero nun ye un tema que naide me propunxere. Agora toi metíu nun nuevu proyectu vinícola que llevará tamién nome n’asturianu como los anteriores: Gotes, Un Vinu Curiosu y el de la mio fía Maeve. Lo que ta claro ye que si ficiera daqué con uves asturianes, nun sedría con uves tintes, sinón con blanques. A lo meyor un espumosu de segunda fermentación en botella ye dicir un cava o xampán, pa que la xente m’entienda.

-A lo cabero anda trabayando en temes venceyaos a les bebíes espirituoses, ¿como ta esta industria n’Asturies?

-Hai coses interesantes pero perpoco. Los Serranos fai un aguardiente de sidra perbono y la xente de San Juan del Obispo ta faciendo coses perinteresantes. Yá taba bien l’aguardiente L’Alquitara pero agora sacaron unu vieyo que ye la bomba. Olegario díaz fizo una xinebra que presentó va poco. La verdá ye que me prestaría facer daqué n’Asturies con esti tema.

-¿Promociónase la nuesa gastronomía, les nueses bébores… dende les insitituciones?

-Faese muncho mas de lo que se facía pero la verdá ye que yo creo que les fórmules nun son les meyores. Hai munches coses que meyorar, sobre too paez que tenemos mieu a usar la llingua pa promocionanos. Pa exemplu val el Gamonéu, la denomación nómase asina, n’asturianu, y la web ye “quesogamonedo”, ya incompresible.

-En Xixón, el turismu gastronómicu ta centrando una parte bien importante de la ufierta turística, ¿qué queda por esplotar nesti campu?

-Ye un pasu, ye más creo que ye un llabor importante, nun hai otra ciudá qu’ufierte dos actividaes mensuales al rodiu la gastronomía. Yo toi agora implicau en “+ que quesu 2011” que se celebra del 21 al 27 de marzu y sedrán unes xornaes de maridaxe de quesos asturianos con bebíes.

-Como cuntaba, pertenez a l’Asociación de Barmans Profesionales d’Asturies y perconoz el mundu de la hostelería asturiana, ¿qué nivel de profesionalidá esiste nel país?

-Bono, cada vegada meyor, anque creo que tendría esixise profesionales titulaos pa dar llicencies o qu’esistiere un sistema de clasificación que distinguiere aquellos que tienen contrataos o tán abiertos por profesionales titulaos. Pa montar una axencia de viaxes hai que tener a un llicenciáu en Turismu, pa montar una farmacia un farmacéuticu. Un chigre pue abrilu cualquiera y eso nun ye xusto. Con tol respetu del mundu pa los quiosqueros, pero tener un bar nun ye montar un quioscu.

-¿Qué proyectos tien en mente nesti momentu?

-Toi preparando un vinu en La Rioxa y ta a piques de ponese en marcha “Morgana Le Fay Aula Gastronómica by Serxu Solares” onde tendré’l mio llaboratoriu pa siguir creando formes d’esfrutar la gastronomía. Amás en breve va ñacer una nueva revista gastronómica dixital. La mixoloxía molecular ye lo que me trai alloriáu, quiero proponer nueves maneres de tomar les copes, tengo yá desenrrolláu un Gin & Tonic Food, y dellos cócteles yá preparaos con caviares, aires, esplumes… La verdá ye que ye apasionante.

Serxu Solares acaba estrenar páxina web sobre’l so llabor

Rubén Martín-Llames (Xixón, 1976) ye periodista. La so trayectoria profesional entama nel departamentu de comunicación de la consultora madrilana Makeateam. Años dempués, traslladase a Palma onde trabayó na Dirección Xeneral de Comunicación del Gobiernu de Baleares, siendo dempués xefe d’informativos d’Onda Cero y direutor de l’axencia Seguired Baleares, amás de presidente del Centru Asturianu de Mallorca.

A principios de 2010 tornó a Asturies onde dirixe’l departamentu 2.0 de la axencia Comunicación Profesional, amás d’impartir talleres na Universidá Internacional SEK y clases nel Máster de comunicación y nueves tecnoloxíes de la Universidá d’Uviéu y na UABRA, de l’ALLA. Nestos momentos ta enfrascáu na redacción de la so tesis sobre la comunicación en redes sociales y la preparación, como Direutor Académicu, del I Cursu Especialista en Management de Redes Sociales, del que falamos con él.

-¿Qué se va deprender nesti cursu?

-Ye un cursu con un marcáu calter prácticu, asina que l’oxetivu ye dotar al alumnu de toles conocencies necesaries que demanden les empreses a la hora de buscar perfiles profesionales capaces d’ufiertar soluciones a la Xestión de Comunidaes y Web 2.0. Pretendemos formar a persones que puedan desenvolvese como Community Managers, Social Media Strategist, Chief Blogging Officer…

-¿Ye la primer vegada que se fai un cursu d’estes característiques n’Asturies?

-Sí, tenemos l’arguyu d’entamar el primer cursu sobre redes sociales qu’apurre un títulu d’especialista sofitáu por una institución como ESNE Asturies. Hubo dalgún cursu de corta duración o conferencia sobre’l tema, pero nada tan ambicioso como’l programa de 200 hores llectives y 100 de práctiques n’empreses que presentamos.

-¿Qué profesores van participar nel mesmu?

-Cuntamos con una base de profesoráu formáu por profesionales de distintos campos: Dende’l periodismu dixital a la inxeniería informática pasando pel marquetin en llinia o la creación de vidios 2.0. Tamos falando de xente como Próspero Morán, César Cajete o Andrés de la Torre. Completamos esta sólida base cola presencia, en formatu Masterclass, de “gurus” na matería que vamos dir afayando enantes del 18 de marzu que ye cuando entama’l cursu

-El componente prácticu ye bien importante nel cursu, ¿ye la meyor manera de deprender a trabayar con redes sociales?

-Ésti ye un campu con pocos años de vida y la teoría inda nun tien unos cimientos abondo sólidos como pa ser decisiva. Obviamente precísase una base teórica, pero ye la práctica l’elementu fundamental pa esplotar y afayar nuevos caminos pa desenvolver les funciones que, cada vegada, precisen más les empreses ya instituciones.

-¿Nun son les redes sociales una moda pasaxera más de tantes qu’hai n’internet?

-La meyor respuesta a esta entruga son los datos. España ye’l segundu país européu nel usu de redes sociales con más de 17 millones de usuarios, amás l’espoxigue ye esponencial del 2% de internautas usuarios de redes de 2004 pasamos al 65% en 2009 y sigue espoxigando. Agora mesmo superamos yá’l 70%. Como dicíen n’aquel anunciu de televisión los más de 500 millones de usuario de Facebook y los 120 millones de Twitter nun pueden tar toos enquivocaos.

Creo que les redes sociales llegaron pa quedase y formar parte de la nuesa vida diaria como lo ficieron la radio y la televisión nel so momentu.

-¿Esiste demanda de profesionales nel usu de les redes sociales?

-Abondo, namás hai que echar una güeyada a les ufiertes llaborales. Si entres na principal web de búsqueda de trabayu, güei mesmu, pues atopar qu’hai 89 vacantes nel sector 2.0 sólo nesa web. Y esperamos que esta cantidá espoxigue yá que la Fundación Telefónica diz que pal 2014 toes les empreses contarán con un profesional 2.0 na so plantiya.

-¿Qué utilidá tienen les redes sociales pa les empreses?

-Principalmente que tienes accesu a una audiencia de más de 1.500 millones de persones y que lo que faigas n’elles (branding, fidelización, comunicación, marquetin…) sedrá siempres meyor recibío que nes otres formes tradicionales (medios de comunicación y publicidá) porque tas falando cola xente d’una manera más cercana y más personalizada.

Lo que ta bien nidio ye que dalguna utilidá tien que tener cuando’l 60% de les empreses españoles empleguen el Facebook y’l 56% de les Pymes faen marquetin nes redes sociales.

-¿Y pa les instituciones?

– Les instituciones puen averase a los ciudadanos gracies a les redes sociales y al buen usu de les posibilidaes de la web 2.0. Ya hai dalgunes que tan trabayando nesi sen, como l’Ayuntamientu de Xixón.

-Claro que son los particulares los principales usuarios, ¿qué utilidaes tien pa ellos?

Los particulares, dexando l’aspectu lúdicu aparte, puen utilizales p’alcontrar trabayu, pa conseguir una rempuesta más rápida de una compañía o institución, pa resolver duldes, pa informase… y pa delles coses que seyos van ocurriendo y que naide entovía pensare. Los particulares son el motor de les redes sociales.

Información del cursu sobre redes sociales

Vítor Suárez ‘Viti’ ye estudiante de maxisteriu y conxuga los sos estudios col so papel como activista en favor de la llingua asturiana y la so militancia política. Dende’l so blogue “Fueya en blanco” trata l’actualidá asturiana, con especial interés nes cuestiones llingüístiques y nacionales. La so bitácora foi escoyida como la que tuvo Meyor Conteníu en 2010 per parte de los blogueros y esti sábadu recibe’l premiu en La Pola Siero, dientro del III Sidra y Blogues. Falamos con él del momentu que vive la blogosfera asturiana y d’otres cuestiones venceyaes cola so actividá como blogueru.

-La votación tuvo reñida, ¿esperaba facese con esti premiu?

-La verdá ye que Fueya en blanco tuvo bien de tiempu a lo cimero en dos votaciones (públicu y conteníu) asina que yera d’esperar que pudiera caltener el primer puestu nuna d’elles. Pero de toles formes, lo importante d’esta convocatoria de Premios al meyor blogue nun ye tanto quien gane, sinón da-y movimientu y repercusión a la bloguesfera n’asturianu. Dalgo que, per otru llau, necesita.

-¿Ye un sofitu, anque seya moral, pa siguir actualizando’l blogue?

-Home, cualesquier amuesa de reconocencia o d’apoyu a lo qu’unu fai siempres s’agradez pero l’actualización va depender siempre del tiempu y de que considere o non que tengo dalgo interesante qu’asoleyar. L’actualización a lo llargo d’estos cuatro años d’actividá foi más bien irregular y les muestres d’apoyu y l’aporte de material fueron continuos, dalgo qu’ensin dulda aprecio.

-¿Qué oxetivos tien “Fueya en blanco”?

-Nun ye que tenga unos oxetivos definíos. Yo trato al blogue como una fueya onde asoleyar les mios esmoliciones pa col mundu, crítiques pa col sistema y soluciones pa camudalu. Últimamente tamién intenté disponer d’artículos d’opinión o distintos materiales didáuticos en llingua asturiana, pero la falta de tiempu impídeme qu’esta estaya medre. Pero si entramos a falar de les estayes que se trataron últimamente en Fueya en blanco puedo enumberate delles: Normalización Toponímica, Corrupción, Solidaridá con despidíos d’empreses asturianes, Antitauromaquia, semeyes que considero interesantes por valir hestóricu o de normalización llingüística y analís de les sovenciones o del asturianu nes webs de los ayuntamientos.

-Nel so pefil de Facebook dixo que nun yera mui amigu de les redes sociales, pero “Fueya en blanco” yá ta n’elles, ¿qué opina, son una forma de dar a conocer los blogues o tán acabando con ellos?

-He de reconocer qu’agora mesmo sí que-y tengo pilláu’l puntu al tema de les redes sociales. Nun tengo perfil personal nengún, porque camiento qu’esiste demasiada superficialidá nesti tipu de ferramientes qu’ufre la rede. Sicasí, considero que pue ser un bon preséu p’aldericar con xente con inquietúes asemeyaes y facer microblogging, por eso entamé cola cuenta de Facebook y la verdá ye que toi satisfechu. Paezme que les redes sociales, al traviés del microblogging, van ser el futuru, pero nun creo qu’acaben del too col formatu blogue igual que nun morrió’l foru, nin otros formatos que yá nun tán de moda.

-¿Cuánta xente llee’l so blogue?

-Los dos primeros años tenía un contador nel blog y algamara les 30.000 visites nesi tiempu, pero eso nun quier dicir nada, yá qu’una mesma persona pue entrar varies vegaes y facer medrar el númberu de visites. Acabé por quitalu. Yá nun ye un tema pol que tea interesáu. Agora mesmu nun sé con esactitú cuales sedrán les cifres nin ye un tema que me quite’l sueñu.

La xente que sigue’l blogue con regularidá, yo creo que yá ta afitao y la que non, suel ser dalgún despistáu qu’entra por dalguna de les etiquetes d’entraes anteriores dende “elecciones catalanas” a “llingua asturiana”. Siempre hai tamién dalgún qu’otru qu’entra a emporcar nos comentarios, pero son los menos.

-¿Qué momentu vive la blogosfera n’asturianu?

-Vive un momentu d’estancamientu. Tampoco ha de mos esmoler demasiao porque ye la tónica xeneral na rede. Internet evoluciona rápidamente ya igual que nel so día hebo’l boom de los foros y dempués de los blogues, agora ye’l momentu de les redes sociales.

-¿Sigue los blogues asturianos en castellán? ¿Qué diferencies atopa colos escritos n’asturianu, sacante la evidente?

-Sigo varios sí, principalmente d’oponión política, d’actualidá nel mundu del cine y divulgación científica, pero procuro lleer de too un poco. Obviamente nun mos podemos comparar con una comunidá llingüística como ye la castellanofalante. Como dixi enantes, la escayencia de la bloguesfera ye xeneral y nos blogues en castellán tamién se ta notando.

Les principales diferencies son temátiques, yá que pues alcontrar blogues en castellán que falen de cualquier tema, con una mayor participación de la xente nos comentarios y formando una verdadera comunidá, cosa qu’equí nun tenemos. D’otra banda, en defensa de la bloguesfera n’asturianu he de dicir, que tenemos una rede de blogues bien curiosa, que s’organiza polo menos una vegada al añu y que frente a les crítiques sobre’l “monotema” llingüísticu, hai de tener en cuenta que cuando emplegues una llingua que quieren dexar morrer y qu’oficialmente nun esiste pa naide, ye normal que, per dalgún llau, tenga que salir la rabia.

-Si nun tuviera ganao, ¿quién-y prestaría que fuera ganador del so premiu?

-Igual queda feo falar d’esti tema porque van enfadase los compañeros, pero si tuviera que moyame diría Frayando cadenes y Esti Home Allorió, yá que son los blogues colos que más soi a identificame dientro de la bloguesfera y colos que meyor se complementa Fueya en blanco.

-¿Qué-y paecen el restu de blogues premiaos?

-González y González merecen cualesquier reconocencia que se-y dean, vengo siguiéndolos cuasi dende’l so entamu y ye una pena qu’ultimamente nun actualicen tanto porque son perbonos. Sobre’l blogue del Conceyu Nacional del Liriu, nun ye unu de los que más siguiera como llector, pero la so actividá pola difusión y reconocencia d’esi deporte tradicional paezme encomiable y allégrome de que’l públicu lo valorare asina.

-¿Tendríen d’apoyase los blogues n’asturianu dende les instituciones?

-Home, nun creo que seya competencia de les instituciones metese en foros d’opinión onde nun pinten nada y onde les más de les vegaes son l’oxetu de la crítica. Pa caltener la independencia y nun mercar voluntaes, lo meyor sedría que non. Lo que sí habríen de facer ye desendolcar, de toes toes, una Política Llingüística afayadiza pa cola realidá del país, que permita reconocer los derechos llingüísticos de los falantes y qu’éstos los puedan exercer como ciudadanos asturianos que son. La política de la sovención pola sovención p’acallar boques y desactivar al movimientu de reivindicación llingüística habría d’acabar.

-¿Qué proyectos tien pa los conteníos del so blogue en 2011?

-Fueya en blanco ye l’espeyu de los mios proyeutos propios, de los proyeutos que comparto ideolóxicamente y de los que participo. Polo tanto, nel planu de los proyeutos propios, ente otres coses siguiré trabayando nel Informe sobre la discriminación llingüística n’Asturies, un tema pocu espardíu pero qu’entamara a trabayar l’añu pasáu con Xuristes pol Asturianu y que voi intentar retomar. Siguiré alministrando y editando na Uiquipedia y afalando a la xente a que trabaye n’ella. Siguiré espardiendo’l trabayu que se ta faciendo cola normalización toponímica y quexándome a los organismos oportunos pal so cumplimientu y más cosuques perhí.

Nel planu de los proyeutos nos que participo, nun hai qu’escaecer que 2011 ye añu eleutoral y la campaña política pa les eleiciones de mayu va tener un pesu mui importante nel conteníu de Fueya en blanco. El mio apueste como militante ye pola presencia de la xuntanza del nacionalismu d’izquierdes nes instituciones y el blogue va ser una de les mios ferramientes onde lo espeyar.

La Pola Siero acueye la entrega de los Premios al Meyor Blogue de 2010

Lourdes Álvarez (L’Agüeria d’Urbiés, Mieres, 1961) ye una de les poetes más conocíes y valoraes de la segunda xeneración del Surdimientu. La so obra ta espardida peles revistes más prestixoses de los venti años últimos y en dellos poemarios, polos qu’algamó en dos ocasiones el Premiu Teodoro Cuesta. A mediaos del mes de xineru presentó la so obra poética más nueva en Xixón y aprovechamos la ocasión pa falar con ella, coincidiendo col venti aniversariu de la espublización del so primer poemariu.

-Acaba d’adelantar la so obra poética nueva nun recital en Xixón, venti años dempués de la publicación del so primer poemariu, “Aldabes del olvidu”, ¿pagó la pena la dedicación d’estos años a la lliteratura?

-Sí, siéntome mui gratificada, quiciabes porque enxamás me plantegué denguna otra meta que nun fuera siguir escribiendo, esi ye’l mio enfotu caberu, lo demás bienllegao sea.

-El llabor d’escritor n’asturianu, dicen, ye poco agredecíu, ¿ta d’alcuerdu?

-Depende de les mires de cada quien; si nun se tien en cuenta qu’Asturies ye una Comunidá con pocos habitantes y amás la penosa situación del idioma… pue entrar el desaliendu.

-Entós, ¿nunca nun pensó en dexalo?

-Non, nunca pensé en dexalo, tolo contrario, ye lo poco que sé y puedo facer por recrear y difundir la llingua familiar cola qu’asenté la mio esistencia.

-Ente los sos premios tán dos Teodoro Cuesta, un Premiu de la Crítica, ¿son los premios amuesa de la calidá d’un autor o’l llistáu de ganadores d’un premiu ye’l que-y da prestixu al certame?

-De mano los premios tienen la finalidá de dar a conocer el nome y la obra de la persona premiada; dempués sí ye verdá que puede pasar que seya la nómina de los premiaos quien prestixe’l premiu.

-Apaez na mayoría de les antoloxíes poétiques de la so xeneración y de la Lliteratura Asturiana contemporanea, en xeneral, ¿da más seguridá a la hora d’escribir o ye una responsabilidá estra polo que s’espera d’unu?

-Escribo siempres cola tensión de quien entama, cada poema ye como si fuera’l primeru… La seguridá vien colos llectores.

-Otru de los grandes reconocimientos que recibió foi’l so nomamientu como miembru de l’Academia de la Llingua Asturiana, ¿cómo valora’l llabor que fai l’ALLA nel campu de la lliteratura?

-Valórolu positivamente. L’ALLA ye una institución que cuida del idioma en toles sos manifestaciones; la lliteraria ye una d’elles.

-¿Identíficase colos autores de la llamada segunda xeneración del Surdimientu, onde la asitien?

-Sí, polo menos a lo primero compartimos presupuestos estéticos asemeyaos y tamos marcaos por un entornu vital ya históricu próximos… Hai un aire de familia; dempués ta la singularidá y la personalidá de cada voz.

-¿Qué autores destaca anguaño na lliteratura asturiana según el so criteriu?

-Na lírica son abondos los autores que me presten, Berta Piñán, Xosé Bolado, Esther Prieto, Xuan Bello, Antón García, Pablo A. Marín Estrada, Vanessa Gutiérrez, Pablo Texón, Marta Mori, Xandru Fernández, etc.

-¿Ve garantizáu’l futuru de la lliteratura asturiana?

-Polos autores sí; otra cosa va ser si tendrá llectores…ehí ta la entruga del futuru del idioma. Ensin llectores nun hai lliteratura.

-Ye una de les poques poetes del Surdimientu que nun s’encaminó entovía pela sienda de la narrativa llarga, ¿nun entra nos sos planes?

-Francamente ye daqué que nun-y puedo contestar; pal futuru nun descarto nenguna posibilidá.

-Y otros proyectos, ¿en qué trabaya, cuándo vamos tener ente les manes un nuevu llibru de so?

-Toi trabayando nel llibru de poemas, P’anular los adioses , que ta terminando de conformase. Nunos meses espero que s’edite.

Lourdes Álvarez repasa la so obra poética en Xixón

Daniel Cueli ye’l director de la revista “N’ast, cartafueyos d’ensayu”, qu’espubliza l’asociación N’ast. El chigre L’Ayalga de Xixón recibió esti xueves la presentación del so númberu seis. Falamos con él de los conteníos de la revista, del so percorríu y de les actividaes de l’asociación que la edita, amás del momentu que vive’l movimientu de reivindicación llingüística n’Asturies.

-Acaben d’espublizar el númberu seis de la so revista “N’Ast. Cartafueyos d’ensayu”, ¿qué conteníos inclúi?.

-Los más de los conteníos d’esti númberu xiren al rodiu de la llingua y lliteratura asturianes. Asina, Xuan Porta Allende reflexona sobre la situación llegal de la llingua asturiana anguaño; nuna llinia asemeyada, David Gimeno i Ayuso espón la importancia que tien la oficialidá d’una llingua pa garantizar la so supervivencia; Inaciu Galán y González da a conocer la figura del escritor Antón Forascepi; Xaviel Vilareyo y Villamil ufre’l vocabulariu asturianu emplegáu pol escritor José María de Pereda na so obra lliteraria; y, pa rematar, asoléyase’l pregón de la Fiesta de la Oficialidá de la Llingua Asturiana de 2010, dau por Xulio Elipe Raposo “Xune”. Amás, inclúise un ensayu de calter hestóricu, de Javier Cubero de Vicente, col que viaxamos hasta’l Perú pa conocer el movimientu políticu Alianza Popular Revolucionaria Americana. Creyemos que mos quedó un númberu bien prestosu.

-La revista ye una de les d’ensayu más variaes, si la comparamos con “Lletres Asturianes”, “Cultures”, “Asturies, memoria encesa d’un país”, “Erada”, etc. ¿Yera necesario cubrir un güecu pa trabayos que nun encaxaben neses revistes?.

-“N’Ast. Cartafueyos d’ensayu” nun nació necesariamente con esi enfotu. Pero sí ye cierto que, col tiempu, vieno a asumir esa función. De les revistes citaes, “Cultures” y “Asturies, memoria encesa d’un país” céntrense, principalmente, na etnografía, “Lletres Asturianes” en llingua y lliteratura y “Erada” na hestoria. La nuesa revista abarca toes eses temátiques y dalguna más (yá s’asoleyaron artículos sobre otros munchos temes, dende l’actualidá político hasta la ecoloxía) y ye que pensamos nuna revista na que pueda escribir quien quiera y sobre lo que-y pete (de momentu, nunca nun refugamos nenguna collaboración). Pero bono, lo importante ye que, ente les citaes y dalguna más qu’hai per ehí, tenemos un bon garapiellu de revistes d’ensayu en llingua asturiana y toes se complementen mui bien.

-Nel entamu dicen que nesti númberu estrenen la collaboración del Conceyu de Bimenes, ¿en qué consiste?.

-La verdá ye qu’aprovechamos la circunstancia de que yo mesmu, director de la revista, trabayo ellí. Nel Ayuntamientu Bimenes llevaben tiempu cola idega d’espublizar un cartafueyu nel qu’apaeciesen los pregones de la Fiesta de la Oficialidá de la Llingua Asturiana, pero teníen dos problemes: l’económicu y l’ausencia de la trescripción de dalgunos de los que se dieron nos primeros años de la celebración. Poro, llegóse a un alcuerdu cola responsable de la Estaya de Cultura, Nati Canto, pa dir asoleyando en “N’Ast. Cartafueyos d’ensayu” los que sí se conservasen (eso sí, siempre que se cuntase tamién col vistu bonu del autor). D’esta manera, el beneficiu ye pa dambes partes: l’Ayuntamientu Bimenes consigue, en cierta midida, lo que quería y nós cuntamos con un material p’asoleyar na revista que mos paez perinteresante.

-¿Ye complicao consiguir collaboraciones?

-Magar lo que pueda paecer, yá que nos seis númberos espublizaos hasta’l momentu cuntamos cola collaboración de trenta autores estremaos, sí que ye complicao; anque, más que consiguir collaboraciones, lo difícil en munchos casos ye llograr que les persones que se comprometen a apurriles les entreguen en tiempu y forma. Pero bono, de momentu tampoco mos podemos quexar. Amás, hai una riestra d’autores, a los que podríemos llamar “fixos”, que yá escribieren delles vegaes na revista y colos que siempres podemos cuntar, dalgo polo que-yos tamos mui agradecíos.

-¿Y collaboraciones económiques pa que salga alantre la publicación?.

-Pa espublizar la revista cuntamos con trés fontes de financiación, que son: los ingresos xeneraos pola venta de la mesma; los fondos colos que cunta l’Asociación Cultural N’Ast (y que, como en cualesquier coleutivu d’esti tipu, salen de les cuotes de los socios y de la venta de material propagandísticu, principalmente); y, por último, la sovención que mos apurre la Conseyería de Cultura y Turismu. Home, hebo momentos d’apuru, nos que les perres nun llegaben, pero de momentu el proyeutu ta siendo económicamente vidable.

-Dempués de cuasi cuatro años saliendo, ¿qué balance faen?.

-Positivu. Per un llau, porque la revista sigue asoleyándose y eso, nos tiempos que cuerren, yá ye un trunfu y, per otru, porque cumplimos los oxetivos que mos marcamos nel Entamu del so primer númberu, principalmente’l de ser una espublización abierta a tou aquel/aquella que tuviere daqué que dicir y na que pudieren vese espeyaes opiniones y reflexones de tou tipu y sobre estremaos temes. Prueba d’ello ye la importante riestra de persones venceyaes al movimientu políticu, social y cultural asturianu que yá escribieren nes páxines d’estos cartafueyos y a les qu’esperamos sumar munches más qu’andechen con nós nesti proyeutu.

-¿Qué difusión tien la revista, ye complicao consiguir que llegue al públicu?

-La revista repártese de baldre ente los socios de l’Asociación Cultural N’Ast y ente los autores que collaboren en cada númberu. Pal públicu en xeneral ta a la venta en delles llibreríes d’Uviéu y Xixón y, amás, pue consiguise por internet, al traviés de la páxina web de Llibros de Nós (iniciativa d’Espublizastur, que ye la que mos fai la xestión editorial de la revista) o del corréu lletrónicu de l’asociación: info@n-ast.org. Precisamente, gracies a internet nun ye complicao llegar al públicu. Pero la xente que tea avezao a mercar la revista nes llibreríes va alcontrase, por desgracia, con dos puntos de venta pesllaos, Trabe y Alborá, que yeren mui importantes pa nós. Asina qu’intentaremos distribuyir la revista per dalguna llibrería más, incluso d’otros puntos d’Asturies.

-¿Qué-yos queda por meyorar na revista?

-La verdá ye que la revista gústamos como ta. Pero bono, por dicir daqué, quiciabes mos prestaría la posibilidá de meter semeyes en color; dalgunos ensayos vienen acompañaos de semeyes, pero tienen que ser en blanco y prieto. Pero eso agora mesmo nun ye vidable, yá que tendríemos que camudar el tipu de papel que s’emplega y al meter fueyes en cuatricomía, saldría muncho más caro. En cuantes a los conteníos, echamos en falta más artículos d’analís políticu. Y tamién lo que comentábamos na rempuesta anterior, no tocante a la distribución, prestaríamos tar en más puntos de venta. Pero too esto por dicir dalgo, porque en llinies xenerales la revista gústamos como ta.

-La revista edítala l’Asociación Cultural N’Ast, que, sacante la publicación d’estos cartafueyos d’ensayu, llevaba dalgún tiempu inactiva. Agora tornen a sacar comunicacos, ¿qué-yos fai volver a apaecer nel movimientu de reivindicación llingüística?

-Siempres tuvimos ehí. Ye cierto que de la que s’entamó cola asociación, amás d’espublizar la revista, asoleyamos unos cuantos comunicaos y un montón de material propagandísticu ya incluso entamamos dalguna concentración ciudadana reivindicando la oficialidá del asturianu, pero les persones que tiramos d’esti carru tamos a milenta coses, sacar alantre la revista lleva munchu tiempu y desdexamos tolo demás. Volver a apaecer activamente nel terrén de la reivindicación llingüística nun foi premeditao, simplemente pensamos que como’l proyeutu editorial yá ta consolidáu, yera hora de retomar delles custiones, más agora qu’esti movimientu reivindicativu tien un nivel baxu d’actividá.

-¿Vive entós un mal momentu la reivindicación de los drechos llingüísticos n’Asturies?

-Nun ye que viva un mal momentu, pero como tolos movimientos tien altibaxos y, como dicíamos enantes, agora mesmo hai un nivel baxu d’actividá y eso que mos empobinamos a una dómina que pue ser importante pa la llingua asturiana: elecciones nacionales y de conceyu nel próximu mes de mayu que darán entamu a una llexislatura que quiciabes seya la de la reforma del Estatutu d’Autonomía. La reivindicación de los drechos llingüísticos tien que tar un día sí y otru tamién na cai, nes instituciones, nos medios de comunicación, na sociedá en definitiva, y nós tratamos d’aportar lo que podemos en función de les nueses posibilidaes.

-¿Tienen pensao entamar dalgún tipu d’acción más dende N’Ast?

-Amás de siguir trabayando na revista y retrucar públicamente a toos aquellos ataques que sufre la llingua asturiana, tamos dándo-y vueltes a la posibilidá de facer dalguna campaña coincidiendo col procesu electoral viniente, anque tovía nun lo tenemos mui definío.

Mar Martín (Castrillón, 1968) ye la responsable d’un de los proyectos más interesantes pa la promoción de la llingua asturiana, la Biblioteca Virtual María Josefa Canellada, que funciona dende 2008 col envís de dar a conocer la Lliteratura Infantil y Xuvenil que s’escribe n’asturianu. Falamos con ella del balance d’esti tiempu y de los proyectos de futuru d’esta biblioteca virtual enllena de biografíes, entrevistes, cuentos, poesíes…

-¿Con qué oxetivos ñaz nel so momentu la BVMJC?

-La Biblioteca Mª Josefa Canellada tien como oxetivos dende’l so entamu esparder per Interné la Lliteratura que se fizo y que se ta faciendo pa rapacinos y xente mozo en llingua asturiana; ser una ferramienta de trabayu pa la comunidá d’enseñantes; facer posible que los emigrantes alcuentren un abellugu nesti espaciu pa que nun escaezan nin la so llingua nin la so lliteratura; mostrar la importancia de los ilustradores y formar parte de los blogues de la xente que tien interés na llectura.

-Lleven col proyeutu dende 2008, ¿qué valoración faen d’esti tiempu?

-La Biblioteca ye pa nós como una fía, hai que cuidala, mimala y tar siempres atentos a les sos necesidaes. Ye mui guapo ver como pasu ente pasu foi medrando coles pallabres de muncha xente que quier formar parte d’ella. Disfrutamos faciéndola al empar que deprendemos, porque cada escritor, cada ilustrador, cada editor… tien muncho que mostrar.

-¿Reciben munches visites y peticiones d’información?

-Nun hai quexa del númberu de visites nin tampoco de les peticiones d’información, pero de forma sorprendente muestren más interés los navegantes del otru llau de la mar y d’otres comunidaes autónomes que los de la propia tierra. Voi ponete un exemplu que me prestó esgaya. El día ocho de payares Dolors, responsable de la Biblioteca Concentaina n’Alicante, mandóme un corréu que dicía: “Difundiendo tu lengua” y un enllaz al so blogue. Ellí escrito apaecía’l poema de García Rendueles “Nuechi d’otoño”. Unes hores más tarde María García Esperón, escritora y periodista mexicana mandábame otru. Gustó-y tanto’l poema que-y punxo voz ya imáxenes. Munchos mexicanos entren na Biblioteca gracies a un enllaz que María tien nel so blogue. Esto pa nós ye dalgo perimportante, porque ye la forma d’esparder la nuesa llingua, de comunicar la realidá llingüística que vivimos y d’enseñar una lliteratura de calidá. La Biblioteca ye de toos. (El vidiu del que fala puede vese en http://www.canellada.com/blogue/?p=141)

-Unu de los criterios de la BMJC ye da-y protagonismu lo mesmo a los escritores qu’a los ilustradores. ¿Son los dos oficios creadores de lliteratura?

-Los ilustradores tienen igual protagonismu porque los consideramos narradores visuales. La imaxe lo mesmo qu’asocede cola pallabra tamién debe interpretase. L’oxetivu d’una imaxe ye la d’ufiertar distintes posibilidaes de llectura. La ilustración ye una llingua con códigos, sintaxis y alfabeto visual. Munches vegaes pues garrar un llibru y ensin lleelu, namás mirando les ilustraciones, pues contar la historia. Otres tantes, l’escritor cuenta una hestoria y l’ilustrador otra añadiendo más información. Na escuela enseñen a lleer, pero ¿quién enseña a mirar?

-¿Quién la usen más, maestros, alumnos, estudiosos…?

-Prestaríamos más la participación de maestros pa que contaren cómo viven la situación del asturianu dientro la escuela, pa qu’opinaren de daqué llibru, pa que criticaren la Biblioteca (de les crítiques depréndese muncho), pa que formaren parte activa d’esti espaciu que vuelvo repetir ye de toos. Les estadístiques entamen a mostrar los blogues onde pue vese la Biblioteca y esto ye una satisfaición y esos blogues son de poetes, d’estudiosos y tamién de colexos.

-¿Cómo ye’l caltenimientu de la páxina BVMJC, cuánta xente collabora nel proyeutu?

-Somos dos persones. Jaime Gonzalo que s’ocupa de la parte informática y yo qu’apurro conteníos.

¿Qué proyectos de futuru tien pa la idea, qué nueves iniciatives?

-Queremos da-y más voz a la Biblioteca Canellada. Interné ye una ferramienta perimportante pa la comunicación y les cámares web una ventana abierta al mundu. Ún de los oxetivos agora mesmo ye facer que medre la estaya multimedia.

Accesu a la Biblioteca Virtual María Josefa Canellada

L’escritor Xabiero Cayarga (Cangues d’Onís, 1967) ye un de los lliteratos que de forma discreta pero continua se van faciendo con un papel bien importante na lliteratura asturiana contemporánea. En 1994 espublizó’l so primer llibru “El boleru de Xabel”, dende entós vien trabayando la traducción, la poesía y ganando premios como’l Xuan María Acebal. Va poques selmanes fízose per segunda ocasión col Premiu Teodoro Cuesta y aprovechamos pa falar con él, dende la so residencia n’Alemaña, dándomos la so perspectiva de la lliteratura asturiana.

-Acaba de facese, per segunda vegada, col Premiu Teodoro Cuesta, y yá tien nel so haber un Xuan María Acebal, ¿siéntese confirmáu como ún de los poetes asturianos contemporaneos más importantes?

-Non, pa nada. Pámique entrambos los dos son premios de munchu prestixu, pero nun podemos confundir el ganar un premiu con pasar a ser un autor de mayor o menor importancia. El méritu de ganar un premiu reside más bien nel fechu de presentase y les razones pa ello puen ser de mui estremada frasca: acceder al mercáu editorial, publicar un poemariu col reclamu y la publicidá del premiu o l’interés económicu. Cualquiera d’elles xustifica’l presentase a un concursu y nenguna ye desdeñable, pero nun se pue establecer una relación ente premios ganaos y bonos poetes. Hai escritores que nun recibieren malapenes premios como Xuan Bello, Esther Prieto, Xosé Manuel Valdés, Álvarez Llano, Rendueles o Inaciu Llope, y que, sin embargu, díbemos a reconocer toos como grandes poetes.

-¿Qué vamos atopar nel poemariu ganador, “La ñeve del cuquiellu”?

-Posiblemente una continuación de los poemarios anteriores. En “La ñeve del cuquiellu” hai poemes que falen del pasu del tiempu, de la muerte, de la invisibilidá como seña d’identidá asturiana, de les falses esperances y les fuerces gastaes nuna llucha que, quiciabes, fuere innecesaria. Pero tamién de les vueltes de la vida, de la manera cómo nos vamos alloñando de nós mesmos, convirtiéndonos n’otros baxo una falsa piel, pa volver dacuando a reconocenos nel llugar d’onde somos, pues llevamos en llombu impresa la güelga dixital −güei acasu diríamos, el códigu de barres− del nuestru llugar de ñacencia.

-Diez años ente’l primer poemariu col que ganó un Teodoro Cuesta y esti, ¿cómo evolucionó la so poesía?

-Pámique hai una continuidá evidente. Los temes yá aparecieran nel primer poemariu publicáu, que, a dicir verdá, yera una mecedura de dos poemarios escritos a mediaos de los noventa. Naquellos poemes yá apaecía’l tema del estrañamientu delantre del mundu, la ironía como preséu pa pontonar la llueva de lo trescendente y la recreación de paisaxes y países a traviés de la memoria lliteraria, pues les llectures acaben configurando’l nuestru mundu, de manera que la xeografía de la nuestra biografía vien a ser una superposición de mapes de mundos reales y d’otros que solo recorrimos cola imaxinación. De toes maneres, si tuviera que mencionar una diferencia ente esti poemariu y “Pequeña Europa” sería’l pasu de lo sensual a un tonu más reflexivu, la reflexión gana terrenu a la esperiencia; cuido que lo qu’amena esti nuevu discursu o deriva son los estragos del tiempu.

-Recibió premios en tolos ámbitos lliterarios, como poeta, narrador y dramaturgu, ¿en qué xéneru ta más cómodu?

-Nun lo podría dicir. Cada vez que me pongo a escribir nún d’estos xéneros lliterarios, lo mesmo si ye un artículu periodísticu o un poema, fágolo col determín de dar lo meyor de min y de disfrutar, o sufrir, escribiendo. De cualquier manera, tento de fuxir de la impostura, daqué que, fradando y falsiando la propia biografía hasta convertila nun enxendru irreconocible, calistra tanto la poesía contemporánea, y busco nesi mediu d’espresión el conductu afayadizu pa espresar lo que nesi momentu mi ronda la cabeza. Al respective de los demás xéneros lliterarios, Borges allugaba la poesía, sobre manera la épica, nun puestu secundariu pues la vía como una forma lliteraria primitiva, la primer forma d’espresión lliteraria de cualquier pueblu, y refugaba’l periodismu porque xulgaba los fechos del presente como intrescendentes y perecederos, y da la sensación de que pa elli nun esiste’l teatru más allá de Shakespeare. Nun mi paez que la novela o’l cuentu tengan de por sí más relevancia. Hai bona y mala lliteratura independientemente del xéneru qu’escoyamos.

Conozo xente que confiesa nun ser quien a lleer poesía o teatru. Abúltami un daltonismu que los impide estremar y disfrutar del ampliu espectru de colores del arcu la vieya lliterariu. Yo reconózome como un afortunáu al poder estremalu y disfrutalu.

-Amás espublizó nos últimos años delles tornes del alemán al asturianu, ¿qué más proyectos trabaya nesti campu?

-Nun tengo nesti momentu un proyectu concretu, anque podría ser que foren saliendo nueves traducciones. Apocayá publiqué en llibru una selección mui amplia, que recueye obra nun publicada en castellán, de la obra lírica d’Hugo von Hofmannsthal. A curtiu plazu va apaecer una escoyeta de poetes en llingua alemana del sieglu venti na revista “Campo de los Patos” que dirixe Antón García. Y estos díes n’Estandoriu salen unos poemes de dos poetes alemanes mui estremaos: una muyer que muerre a los trenta años y ye prácticamente desconocida n’Alemaña, Maria Luise Weissmann, y otru poeta, Wulf Kirsten, que pa min ye ún de los grandes escritores contemporáneos alemanes, y que, hasta’l momentu, que yo sepa, nun ta traducíu al castellán.

-¿Plantégase dalguna torna del asturianu al alemán, podría tener interés n’Alemaña?

-De momentu, non. Asturies hai tiempu que dexó d’esistir, y n’Alemaña nun me paez que daquién amosare interés por daqué de lo que nunca sintió falar. Si dacuando se traduz obra asturiana al alemán será una vez que tenga ésitu en castellán y que se venda al autor como nueva promesa o talentu de la lliteratura española. Nos llibros de testu d’hai trenta años orientaos al públicu alemán, Asturies tovía apaecía como un país con una personalidá y cultura propies. Too eso desapaecío. Utilizo munchos llibros educativos y cientos de revistes dirixíos al estudiante d’español, y tengo que confesar qu’Asturies borróse dafechu apaeciendo solo en breves referencies a los Premios Príncipe d’Asturies o a les pintures rupestres. El Partíu Socialista fizo n’Asturies un trabayu de demolición impecable.

-Lleva años viviendo n’Alemaña, ¿cómo se ve la lliteratura asturiana dende la distancia?

-Yo creo que la lliteratura asturiana, pese a quien-y pese, ta viviendo una edá d’oru. ¿Cuándo pudimos suañar con narradores como Xandru Fernández, Miguel Rojo, Marín Estrada, Antón García, Adolfo Camilo o Xulio Viejo? Hai autores y llibros escelentes. Por poner un exemplu, yo creo que Milio R. Cueto ye ún de los grandes escritores europeos contemporáneos. Que naide lo sepa o lo valore ye una cuestión tanxencial, ye lo mesmo que si aquellos que dinamiten la Cámara Santa anecien en quita-y valor porque lo qu’ellos dexen ye una montonera d’escombriu. Asturies vive una talibanización o xibarización de la cultura propia, esbarrúmbase o arrequéxase lo propio y inviértese’l presupuestu cultural en construir edificios megalómanos que guarden el fumu que se nos quier vender como’l gran capital cultural del sieglu XXI. Los autores asturianos tán publicando coses bien guapes y prestoses, nun tienen un públicu llector y munches veces el llibru fai un viaxe de dida a les llibreríes y vuelta, ensin que daquién dea anuncia del ñacimientu de la nueva criatura. Nun dexa de ser paradóxico que dende dellos periódicos rexonales, que se quexen de la nula atención a Asturies, faigan lo mesmo coles obres culturales asturianes dexándoles nel limbu del olvidu.

-¿Cómo ve a les xeneraciones más nueves de la lliteratura asturiana?

-Demuestren que’l resurdimientu nun foi solo un asocesu coyuntural, aisláu nel tiempu, sinón qu’esiste un verdaderu relevu xeneracional. Y con ello nun quiero dicir qu’unos escritores de más edá dexen d’escribir pa dexar sitiu a los que vienen detrás, sinón que per primera vez conviven xeneraciones d’edaes mui diverses que publiquen al empar calteniendo unes cotes de calidá. Obsérvase nos escritores más mozos un empléu acertáu de la llingua, esto nun ye frutu de la casualidá. Hai trenta años faltaben modelos asturianos de referencia llingüística, los modelos lliterarios podíen garrase de cualquier otra lliteratura universal, pero un modelu de llingua lliteraria faltaba. Los escritores asturianos de los ochenta y los noventa, esperimentando, ofreciendo soluciones y alternatives foren construyendo un modelu que foi posando seliquino ensin mayores griesques. Nun me paez que podamos otorgar la paternidá del asturianu contemporaneu a una sola persona, abúltame que se foi imponiendo un consensu tácitu qu’axuntó propuestes de les postures enfrentaes. Esto refléxase nos autores mozos, que s’espresen nun asturianu reconocible, llibre d’estridencies, y que nun respuenden a una tendencia rupturista.

-N’entrevistes que dio nel pasáu, y nesta mesma, mostrábase mui pesimista sobre la situación d’Asturies, ¿cómo ve’l país cuando vien de visita?

-A min lo que más mi llama l’atención d’Asturies ye la so población avieyada. Igual si tas de visita nun pueblu o pasíes pela calle Uría o San Llorienzu, ún tien la sensación d’alcontrase nun balneariu nel que los xóvenes namás que tán de pasu pa visitar a los sos mayores. Ye yá un ritu topase en Navidá o en branu col grupu d’amigos del pueblu o de la facultá que ta dispersu pel mundu. Y dempués escuchar, de los queden, el rosariu de quexes d’aquellos qu’intenten abrise camín nun país en manes de caciques que convirtieron el sector públicu nuna empresa de contratación familiar onde impera la designación dactilar, l’amiguismu, el fomentu del parasitismu y la persecución de los capaces.

-¿Tien dalgún poemariu o novela en marcha?

-En marcha tengo una novela comprometida pa publicar nos próximos meses qu’escribí hai un par d’años “El sol negru de Wewelsburg”. El tema de la novela ye o yera’l papel de la terxiversación hestórica per aciu de la mentira interesada y les sos consecuencies nel ñacimientu y desarrollu d’ideoloxíes destructives, tomando como exemplu’l casu de los Sabios de Sión. La coincidencia de qu’Eco acabe de publicar una novela que toca’l mesmu tema faime replantear el reescribir la hestoria, a riesgu de que la mía vaya pasar por una consecuencia de la del italianu.

El grupu La Col.la Propinde cumple diez años y va celebralo con un conciertu el vienres 22 de xineru a les 22:00 na sala Acapulco del “Casinu de Xixón”, con una entrada simbólica de 3 euros, les collaboraciones de xente como Delfu de La Tarrancha, Lobo, de Falanoncaduca, Rodrigo Sturm y l’estrenu d’un vidioclip que tán grabando estos díes. Dempués d’una década de trabayu, trés discos al llombu y conciertos per tol país, falamos con David Suárez (más conocíu como “Cai”) que toca les xiblates, whistles y fai coros nel grupu, y que mos cuenta les sos sensaciones a pocos díes de celebrar esti aniversariu musical.

-¿Dempués de cuasi un añu con discu nuevu, qué balance faen del recibimientu que ta teniendo “A Teyavana”?

-En principiu tamos mui satisfechos col rendimientu de “A Teyavana”, un discu mui especial pal grupu, yá que pasaron milenta circustancies y paez que nun díbemos a publicalu hasta qu’apareció a Pablo Quiroga (Algamar Producciones) que ye quien nos dió la oportunidá de poder sacar alantre esti trabayu y al que tenimos muncho que-y agradecer. El discu pa nos significa un pasu más y del resultáu del mesmu tamos satisfechos, ficimos lo que queríamos facer. Les ventes ye otru cantar, que bono tampoco ye que nos preocupe muncho, anque la verdá ye’l discu del que menos exemplares vendimos, ensin dulda.

-¿Cómo foi’l procesu de grabación del vidioclip que remataron estos díes?

-El videoclip foi grabáu nel Cabu Peñes, en Turón y en La Pola L.lena (La Palmera). Escoyimos el cantar de “llárimes”, un tema de composición propia que diz muncho de como nos sentimos anguaño. Pablo Quiroga y la xente de Señor Paraguas son los que lu dirixeron.

-Na actual crisis de la música, ¿los vidioclips son una ferramienta más importante que nunca?

-Pa nosotros la música y les imáxenes son siempre una ferramienta importante pa poder esparder lo que facemos n’internet, televisión, radio,… y una esperiencia prestosa amás d’otra manera de poder imaxinar y ver una canción. Anque, sabemos que hai canales que marxinen a los grupos que canten en llingua asturiana. Nos nun vamos facelo n’inglés ¿non?. Ye una cuestión de gustos y prioridaes.

-¿Qué opinen nel grupu de la polémica actual sobre los drechos d’autor, la SGAE, etc.?

-Los derechos d’autor ta bien que se respeten anque nun compartimos les formes, creemos que la SGAE tien que se plural y con tases y cuotes más democrátiques amás de ser un ente públicu y tresparente.

-En 2011 van celebrar diez años de La Col.lá Propinde, ¿qué actos tán previstos?

-En principiu, vamos a festexar cola xente que-y apeteza dir a venos el prósimu 22 de xineru nel Casinu de Xixón, un conciertu con dalguna qu’otra sorpresa y convidaos pa cantar con nos. Esi va ser el puntu d’arranque de la xira de los diez años de La Col.lá Propinde. Aprovecharemos pa presentar el vidioclip y facer un repasu de los diez años. Dempués… pues lo que vaya viniendo.

-¿Qué balance faen d’esta década de música, pagó la pena l’esfuerciu?

-Diez años de La Col.lá Propinde con trés discos, más de un centenar de conciertos, un par de vidioclips, milenta hestories, un premiu al meyor cantar n’asturianu…. quien lo diba a imaxinar…. Gracies a tola xente que nos sigue y ta al nuestru llau. L’esfuerciu siempre merez la pena. Hai temes que dalguna vez pensábemos que dexaríamos de tocar pa reemplazalos con otros nuevos, pero diez años dempués, cantares como la foguera, o de Carabanzo al Sah.ara, tienen más sentíu que nunca…

-¿Sienten que la música asturiana ta apoyada poles instituciones?

-Podría haber munchu más del qu’hai, pero bastante más… menos formigón y más cultura.

-¿Qué ven necesario pa meyorar la situación de la música asturiana?

-La promoción, muncha más de la qu’esiste y más circutios pa poder tocar en directu, munchos más…sobre too nestos tiempos. Tamién un mercáu más xustu y más afayadizu pal públicu en xeneral.

-¿Faen los medios de comunicación pública’l so llabor na promoción de la música?

-Nos, nun nos quexamos pero echamos de memos más promoción como dicíamos enantes… Tamos mui agradecíos a Radio Sele, que d’aquella y a día de güei simepre tuvieron plenu contactu coles músicques d’esta tierra.

-Son un grupu folk, pero tamién escriben lletres propies, ¿ónde se sienten más cómodos?

-Nos facemos lo que nos presta. Gústamos mezclar cantares tradicionales con coses nuestres. Mira una de les coses que fuimos aprendiendo n ye que na composición, gústanos partir d’Asturies y depués… lo que venga. Nestos diez años aprendimos a respetar la música tradicional y popular asturiana y a la xente/instituciones que trabayen pa que nun se pierda. Tolo que ye la recuperación de la tración oral pa nos son fontes mui importantes de las que nos presta beber, llueu, vien el restu: les coses que nos pasen día a díe, milenta melodíes y acordes… too col procuru que nos gusta poner y que no presta depués cantar nos conciertos. La música ye una ferramienta de tresformaicón y participación social.

-Amás de les clebraciones del décimu aniversariu, ¿qué más proyectos tienen en marcha?

-Pues, tamos trabayando yá en coses nueves pa prósimu discu. Pero con calma.