Emigración

El Conseyu de la Mocedá del Principáu d’Asturies y l’Axencia Asturiana d’Emigración tán acabantes asoleyar el portal Planetastur. Dende esti espaciu van ufrir servicios a les y los mozos asturianos de la emigración. El portal enfocáu a la participación xuvenil dispón d’espacios de debate, asina como pa la creación de blogs personales.

Planetastur ye un elementu de comunicación qu’el Conseyu de la Mocedá del Principáu d’Asturies (CMPA) y l’Axencia d’Emigración llancen pa satisfacer les necesidaes de la emigración asturiana del sieglu XXI, que principalmente marcha pa Europa. Asina mesmo esti portal tien por aciu valir de ponte ente Asturies y la mocedá astur-americana pa qu’asina ésta caltenga los vinculos culturales con Asturies.
La páxina amás del apartáu de noticies, y de servicios vinculaos a la emigración, ufre la posibilidá d’utilizar bien d’elementos como foros, chats, crear un blog, asina como un corréu electrónicu gratuitu.

Dende esti xueves, día 18, al prósimu 22 de xineru va facese’l II Alcuentru de la Mocedá Asturiana d’América na ciudá de Viña del Mar, en Chile, col obxetivu de tratar temes venceyaos cola mocedá asturiano n’América y promover la so participación y compromisu colos distintos Centros Asturianos, reafirmando los llazos al rodiu del ideal d’asturianía. Al alcuentru va dir el Conseyeru de Xusticia, Francisco Javier García Valledor, a la tiesta d’una representación del mundu de la emigración y de la mocedá asturianes.

Nel marcu d’esti alcuentru desendolcaráse la I Asamblea de la JAA (Joven Asturianía Americana), asociación panamericana que tien como finxos estudiar y dar a conocer la realidá de la mocedá asturiano descendiente, y non descendiente, pertenenciente a les Comunidaes Asturianes del Conu Sur americanu; sofitar el fortalecimientu y la integración de la mocedá de les diferentes Comunidaes Asturianes del Conu Sur amuericanu; y desenvolver instrumentos que contribuyan al fomentu del alcuentru estable y periódicu énte les y los mozos que trabayen en pro de l’asturianía nel conu sur.

La representación asturiana nesti Alcuentru tará formada pola Axencia d’Emigración del Principáu d’Asturies, la Federación Internacional de Centros Asturianos, Universidá d’Uviéu y el Conseyu de la Mocedá del Principáu d’Asturies.

Jorge Domingo Cuadriello, ciudadanu cubanu, presentó un documentu analíticu de la emigración asturiana a la isla de Cuba durante’l sieglu XX.
“Asturianos en Cuba nel sieglu XX” presenta un estudiu sobre la influencia de la emigración asturiana na islla americana. Emigración favorecida por “les llimitaciones económiques d’estos individuos, la sobrepoblación, y una política gubernamental favorecedora d’esti desplazamientu”.

El domingu 29 d’ochobre, el Centru Asturianu de São Paulo (unificáu al Centru Hispanu-Brasileñu) echó’l pieslle al primer cursu de cultura y llingua asturiana desarrolláu durante tol mes d’ochobre, entamáu xunto cola Axencia d’Emigración del Gobiernu d’Asturies y La Academia de la Llingua Asturiana.
Dende’l Centru d’Asturies ficiéronse xeres paraleles al cursu ente les que destaquen la ponencia em rellación a la llingua, lliteratura, cultura y música d’Asturies na Facultad de São Bernardo al roidu d’Asturies con motivu de la Selmana Cultural de la mesma Facultá dedicada a les lletres hispano portugueses.
El cursu cuntó cola presencia de quince emigraos asturianos quienes aprovecharon pa deprender y conocer la llingua asturiana y la cultura de la so tierra d’orixe. Amás asisiteron al mesmu otres persones d’orixen non asturianu col envís de conocer les costumes, tradiciones y la llingua d’Asturies.
Pal cierre cuntóse cola presencia de El Pravianu, que fizo un conciertu-espectáculo el dia 29, presentando los sos caberos temes y cantares. Ye la segunda vegada que visita el Centru Asturianu en Brasil.

La Banda de Gaites Noega de Xixón participó ayeri na celebración de la Fiesta de la Hispanidá nel Centru Asturianu de Miami con una actuación cola qu’esta entidá collaboraba na difusión de la cultura asturiana dientro del Mes de la Herencia Hispana nesta ciudá. La formación xixonesa desplazada a Miami tocaba tamien pasáu vienres pa los neños del colexu Ada Merritt, una escuela internacional d’idiomes que cuenta col apoyu de los gobiernos d’España y el Brasil. El viaxe foi promocionáu en collaboración cola Axencia Asturiana d’Emigración del gobiernu del Principáu d’Asturies.

La organización moza asturianista MIAS organiza una campaña d’apoyu a les llamaes ‘lleendes urbanes’ cola que quier amosar el so rechazu ‘al despotismu d’Areces y el so gobiernu ente’l drama social de la emigración moza masiva’. Con esta actividá MIAS critica ‘el problema xeneral coles sos repercusiones sociales y económiques’ y quier solizaridase con esti colectivu mozu emigrante, organizando una ‘despidida’ de les ‘lleendes urbanes’ el próximu domingu 15 d’ochobre a les 19 hores na estación d’autobuses d’Uvieu.

La campaña organizada por MIAS va tener como actu central una “despidida” de les “lleendes urbanes” el domingu 15 d’ochobre a les 19 hores na estación d’autobuses d’Uvieu, onde se va repartir ente otru material informativu’l “Manual de la Mocedá Emigrante d’Asturies”, un documentu que ‘busca la concienciación y la sensibilización cola fondura d’esti fechu social sangrín del nuesu tiempu’.

Según MIAS, ‘la meyor manera de tar al par de la mocedá qu’emigra ye, amás de tener una actitú constante de solidariedá, trabayar na información y concienciación del gran caláu d’esti problema qu’afecta en diferentes estayes na vida de moces y mozos’.

La banda de gaites del Centru Asturianu de Barcelona participó na fiesta Mayor de Sarriá, desfilando peles cais d’esti distritu barcelones. El recorríu al traves de la cai Mayor de Sarriá llevó la formación astur-catalana hasta la plaza del mesmu nome, onde abondu públicu siguió con allegría festiva esta participación. Depues na carpa situada na plaza de Sarría tuvo llugar el multitudinariu conciertu, pol que la rexidora de Sarriá-Sant Gervasi agradeció al presidente de la entidá, Enrique Delgado, la so participación nes fiestes del distritu catalán.

La Sociedá Asturiana Covadonda d’Holguín, en Cuba, celebró el Día d’Asturies con una gala cultural organizada nel patiu interior de la Casa d’Iberoamerica depues de desfilar peles principales cais de la localidá cola vistimenta típica asturiana. Na gala actuó’l Ballet Español d’Holguín mentes qu’Alberto Fernández Negret, vicepresidente de la Sociedá, dio una conferencia sobre la Historia d’Asturies asina como a la fecha alegórica al Día Nacional. A la fin, el conxuntu musical Mar y Son foi l’encargáu d’echar el pieslle a fiesta astur-cubana.

El Centru Asturianu de Rosariu presentó na ciudá santafesina d’Estación Díaz parte del so conxuntu de baille y gaites, dirixíu pola profesora Carmen Marianucci Llansa, convidaos pola Sociedá Española. Con esta presentación, el grupu participó nos festeyos de celebración del 101 aniversariu d’esta sociedá, pa la qu’interpretaron bailles como Ringo Rango, Les tres vueltes, Xota de Cadaveu, Xiringüelu de Naves, y tocáronse temes como l’himnu arxentín, l’español, la Guía y l’Arcu la Vieya.

Dase’l casu de que’l fundador d’esa localidá de Santa Fe y de la Sociedá Española de Socorros Mutuos de la que se celebraba l’aniversariu foi l’asturianu Mariano Díaz.

El Centru Asturianu de Madrí cumple güei, día 2 d’ochobre, los sos 125 años d’existencia, siendo la casa rexonal más antigua del mundu. A lo llargo de tol añu, la entidá astur-madrilana va programar una serie d’actividaes conmemoratives que va presentar esta tarde’l presidente del centru, Cosme Sordo, acompañáu d’un representante de la Conseyería de Presidencia del Principáu d’Asturies y l’alcaldesa de Villaviciosa d’Odón. Al terminar l’actu de presentación va ofrecese ente los presentes una degustación de productos asturianos.

Mañana, el centru tamien va tener un actu de les Peñes relativu a esti CXXV aniversariu nel que se van entregar los diplomes a dalgunos de los socios más vieyos.