Emigración

El Boletín Oficial del Principáu d’Asturies publica na so edición de güei les resoluciones poles que se conceden ayudes econóniques a les comunidaes asturianes nel estranxeru, destinaes a fomentar la cultura del país ente les colonies d’emigrantes y a financiar obres y equipamientos pa los centros sociales qu’abelluguen les actividaes d’estes agrupaciones. La cuantía más importante de les subvenciones ye la dedicada a la reforma del Centru Asturianu de Caracas, apocayá inauguráu pol conseyeru d’Esteriores, Francisco Javier García Valledor.

En total repártense 200.000 euros nel programa de fomentu de la cultura asturiana y 153.890 euros más una partida estraordinaria de 60.000 euros destinada a la referida obra de reforma del centru asturianu de Caracas. Les ayudes tan concedíes a comunidaes d’emigrantes repartíes per tol mundu, sobremanera a les esistentes nel continente americanu qu’agospien el mayor númberu d’asturianos y fíos d’asturianos nel estranxeru.

Coles ayudes a les comunidaes asturianes el gobiernu del Principáu, al través de la so conseyería de Xusticia y Esteriores, quier contribuir a afitar los llazos de xuntura ente los emigrantes y la so tierra d’orixe, col fin de que nun pierdan el so vínculu col país y la so identidá propia.

“Non sólo un recintu prestixosu y respetuosu col patrimoniu, sinón tamién un actu de gratitú cola emigración asturiana a Bélxica”. Esi ye’l significáu que tien pal presidente autonómicu, Vicente Álvarez Areces, la inaguración de la sé permanente del Principáu en Bruseles, un inmueble qu’abre güei les sos puertes depués de dos años d’obres pa defender ‘in situ’ los intereses d’Asturies nel epicentru de la Unión Europea.

Nun concurríu actu al qu’asistió, ente otres autoridaes, el presidente’l Parlamentu Européu, el socialista Josep Borrell, Areces sorrayó esti mediudía na capital belga el simbolismu de la sé qu’agora abre les sos puertes y defendió la so utilidá pa mirar polos intereses d’Asturies dende un allugamientu privilexáu, nel corazón hestóricu de Bruseles.

L’edificiu, allugáu nuna ciudá na que viven unos 13.000 asturianos, tien una superficie útil de 2.800 metros cuadraos y, amás d’acoyer nel pasáu les instalaciones del emblemáticu periódicu ‘Le Peuple’, foi sé de la Cooperativa de la Prensa Socialista belga.

L’inmueble foi alquiríu pol Principáu por poco más d’un millón d’euros, pero les sos obres de remocicamientu y adaptación costáron-y les arques públiques asturianes otros 3,3 millones. L’envís del Gobiernu autonómicu ye emplegar la nueva instalación pa captar inversiones que beneficien a Asturies y promocionar la so imaxe con estremaes actividaes culturales.

La postergada sé del Principáu en Bruseles alquilará dependencies a otres comunidaes europees

Superar “controversies” pasaes. Esi yera l’envís central que’l Gobiernu’l Principáu quería asigna-y a la primer cellebración itinerante del Día d’Asturies nel esterior y llogróse dafechu cola participación d’unes quinientes persones que disfrutaron enforma del espectáculu preparáu pol Coleutivu Muyeres nel Atenéu de Madrid.

Nesi recital, que supuso la presentación en Madrid de la formación vocal asturiana -entamada en 1994 sobro una idega’l productor Lisardo Lombardía y a partir de grupos d’investigación etnográfica-, Muyeres fizo un recorríu musical a la xeografía asturiana con un repertoriu de 25 pieces, ente elles siete bailles tradicionales.

Darréu de l’actuación del grupu, los asistentes a la cellebración que pasaron de les 500 persones disfrutaron d’una espicha con sidra de nueva espresión, quesos y otros productos asturianos.

“Aguadores de Madrid, asturianos que pasasteis El Puertu…, si en vez de tar nel añu 2004, toviéremos nel Madrid d’hai una centuria o pocu más, bien pudiera ser acertada, al dirixime a vós, esta frase del principiu que pertenez al acervu poéticu asturianu de la emigración, echu de señaldá y de pérdida”. Asina entamó la so intervención el Conseyeru de Xusticia, Seguridá Pública y Relaciones Esteriores, Francisco Javier García Valledor, al tiempu que dicía sentir un gran respetu por el pasáu asturianu, pero non empobinase a “echar en falta una época cargada de significación asturiana en la capital del nuestru Estáu. La xente asturiana en Madrid llegó siempre a esta tierra en busca de trabayu y de mejores perspectives de vida, dejando atrás una Asturies casi siempre tan probe económicamente, como rica en cultura. Madrid siempre foi tierra acoyedora pa la nuesa xente y los asturianos supieron responder aportando el so trabayu pa engrandecer esta Villa y Corte, hasta’l puntu de dar nomes asturianos a les sos cais. Asturianos de todos los llugares d’Asturies contribuyeron al espoxigue de les artes, de les ciencies, de la música, de la cultura en xeneral y tamién de la economía y de la política.”

Madrid dio y sigue dando abellugu a los asturianos más inquietos que busquen un futuru mejor y “ellos, vosotros, seguís dando-y a esta comunidá lo meyor que lleváis dentro”. Con un discursu emotivu y centráu nel sentir del asturianu que tien de dir lloñe d’Asturies a la güeta de llabor, el Conseyeru de Xusticia, Seguridá Pública y Relaciones Esteriores, Francisco Javier García Valledor fizo tamién alcordanza de que munches vegaes, los emigrantes asturianos son “ncomprendíos poles instituciones oficiales asturianes y con falta de atención pola galbana que suel dominar na nuesa tierra a muchos de los que nella tienen la suerte de vivir. Poro, pa Valledor, “los emigrantes asturianos en Madrid sois, por contra munches veces, la vanguardia más trabayadora y competente de Asturies. Allá donde hay un asturianu o una asturiana fuera de lo que algunos prefieren llamar tierrina, hai un cachu físicu y espiritual de la Asturies real que se compón de los que táis viviendo aquí más los que vivimos ellí na llende de los puertos astures”. El Conseyeru quixo dexar claro al mediu millar de persones qu’asistió al actu que de tien dende la Conseyería “serios enfotos de ser puente firme y útil ente los asturianos que vivís en Madrid y los que tan n’Asturies. Dende la Conseyería de Xusticia, Seguridá Pública y Relaciones Esteriores, dende el Gobiernu d’Asturies, tamos trabayando sin perder el pasu pa servir a los intereses reales de los emigrantes”. Valledor nun quiso escaecer “la reciente aprobación del Plan de Emigración, que marca un fitu na nueva concepción de les instituciones polítiques asturianes a la hora de concebir les relaciones con la Asturies exterior”.

Pa finar, Valledor fizo un repasu a los colectivos ellí representaos, dende los más mozos como ASMA, la Asociación d’Asturianos en Madrid a “los centros asturianos de Alcobendas, Alcalá de Henares, Tres Cantos, Toledo; los Asturianos en Madrid y la enseña asturiana en el exterior más antigua del mundu: el Centru Asturianu de Madrid”. Y marcó pa finar el camín que dende la Conseyería se quier caminar: “esti camín, ensín llamentos, de recuperar el pasáu y facelu presente y futuru cultural y, amás, exportable”.

Madrid será l’abellugu de la primer cellebración itinerante del 8 de Setiembre

Los emigrantes a l’Arxentina afítense como los más interesaos en regresar al Principáu, anque seya de forma temporal. Más de la mitá de los 87 asturianos que tornarán durante quince díes dientro de la denominada ‘operación Señaldá’, qu’entama l’Axencia Asturiana d’Emigración, proceden de les llocalidaes arxentines de Buenos Aires, Mendoza, Santa Fe y Mar del Plata. Emigrantes a Venezuela, Uruguay y -por primer vegada- a Cuba completen la llista.

El collectivu más numberosu llegará a Asturies dende la capital d’Arxentina -25 persones-, 12 saldrán de Mar del Plata, 10 de Santa Fe, 3 de Mendoza, 13 de Venezuela, 12 d’Uruguay y otros 15 emigrantes aportarán dende Cuba, una cifra que según los técnicos d’Emigración ta amenorgada poles dificultaes económiques qu’atraviesa la colonia asturiana nesi país caribeñu, yá que magar que’l viaxe ye de baldre, ye preciso abonar unes mínimes tases.

Ente los emigrantes acoyíos esti añu a la ‘operación Señaldá’ -que triplica les sos places respecto a 2002 y cellébrase depués de nun se desendolcar en 2003 por falta de presupuestu-, figuren persones orixinaries del Principáu d’hasta 94 años d’edá qu’en dalgunos casos lleven ausentes más de cinco décades.

Según les previsiones de l’Axencia Asturiana d’Emigración, los 87 emigrantes comenzarán la so visita na última selmana de setiembre o bien nel prósimu mes d’ochobre. Toos ellos tarán agospiaos nun hotel d’Uviéu a lo llargo de los quince díes que durará’l so regresu transitoriu.

El Principáu destina 185.000 euros pa trayer a Asturies a emigrantes ausentes hai venti años

Superar “controversies” pasaes. Esi ye l’envís central que’l Gobiernu’l Principáu quier asigna-y a la primer cellebración itinerante del Día d’Asturies nel esterior, que va desendolcase en Madrid a partir del vienres y na que l’Executivu quier escenificar l’intierru de la llarga engarradiella ente los dos grandes collectivos d’asturianos na capital: el Centru Asturianu y l’asociación Asma.

Asina lo declaró güei n’Uviéu el conseyeru de Xusticia, Seguridá Pública y Relaciones Esteriores, Francisco Javier García Valledor, que presentó los actos previstos en Madrid como unes cellebraciones concebíes pa que “la comunidá asturiana proyecte una imaxen de xunidá” nel Ateneo de Madrid, un espaciu elixíu, según el conseyeru, porque permite acoyer a un mayor númberu d’asistentes. Les invitaciones difundíes son billingües n’asturianu y castellán.

Como ayeri adelantó Asturnews, l’Executivu autonómicu escoyó Madrid como sé del primer Día d’Asturies itinerante nel esterior n’atención al gran númberu d’emigraos asturianos residentes na capital y a la veteranía’l Centru Asturianu de Madrid, pero tamién, aseguró güei Valledor, como “un actu de solidaridá col pueblu de Madrid, que llogró convertir la conmoción n’acción” nos atentaos del pasáu 11 de marzu.

“Los nuesos emigrantes son un capital social y humanu imprescindible pa la construcción d’Asturies”, señaló’l conseyeru, que na so comparecencia tuvo flanqueáu pol director de l’Axencia Asturiana d’Emigración, Luis Miguel Fernández Romero; representantes de les empreses Alsa y Caxastur, que collaboren na organización de los actos; y Fe Santoveña, secretaria del collectivu Muyeres, cuyu conciertu abrirá’l vienres les cellebraciones.

Nesi recital, que supondrá la presentación en Madrid de la formación vocal asturiana -entamada en 1994 sobro una idega’l productor Lisardo Lombardía y a partir de grupos d’investigación etnográfica-, Muyeres fará un recorríu musical a la xeografía asturiana con un repertoriu de 25 pieces, ente elles siete bailles tradicionales.

Darréu de l’actuación del grupu, los asistentes a la cellebración -que’l Gobiernu’l Principáu calcula en más de 300 persones- participarán nuna espicha con sidra de mesa, quesos y otros productos asturianos.

Más de 300 persones participarán en Madrid na primer cellebración itinerante del 8 de Setiembre

Más de 300 persones. Esa ye la cifra d’asturianos emigraos a Madrid que’l Principáu espera reunir na primer cellebración itinerante del Día d’Asturies nel esterior, que se desendolcará’l prósimu sábadu y tendrá los sos actos centrales nun recital del grupu Muyeres y nuna espicha con sidra de mesa.

Na cellebración na distancia del 8 de Setiembre, que se treslladó al prósimu fin de selmana al nun ser festivu en Madrid el Día d’Asturies, participarán miembros de los centros asturianos de Madrid, Tres Cantos, Alcobendas, Alcalá de Henares y Toledo, amás de responsables del collectivu Asturianos en Madrid (Asma). El Gobiernu’l Principáu prevé, asinamesmo, qu’una representación d’artistes asturianos afincaos na capital s’axunten a la cellebración.

El primer Día d’Asturies nel esterior con calter itinerante, promovíu dende la Conseyería de Xusticia, Seguridá Pública y Relaciones Esteriores, tendrá como escenariu Madrid n’atención al altu númberu d’asturianos que residen nesa comunidá y a la veteranía’l Centru Asturianu de la capital, el más vieyu ente los sos homólogos.

El conciertu de Muyeres, previstu pa les 20 hores del sábadu nel Ateneo de Madrid, na cai d’El Prado, valdrá-y al grupu vocal como tarxeta de presentación na capital, y daqué asemeyao ocurrirá cola sidra de mesa que va servise de baldre darréu’l recital, una variedá poco áceda que nun requier escanciáu, sírvese en frío y caltién el sabor de la sidra natural, según defenden los sos ellaboradores.

El conseyeru de Xusticia, Seguridá Pública y Relaciones Esteriores, Francisco Javier García Valledor, anunció’l pasáu 3 de xunu n’Uviéu l’envís del Gobiernu’l Principáu d’entamar una cellebración adicional y rotativa del Día d’Asturies nel esterior a partir d’esta edición, cola idea de que cada añu seya una ciudá distinta la qu’acueya los actos conmemorativos, pa facilitar la participación de los asturianos emigraos a mui estremaos llugares.

Miles de persones acudieron a Mieres pa participar nos actos oficiales del 8 de Setiembre

Casi la mitá de los emigrantes mayores de 65 años que s’acueyen n’Arxentina a programes d’ayuda sanitaria del Principáu proceden del Occidente d’Asturies, con cifres que doblen a los emigraos orixinarios del centru y l’oriente. Un total de 427 ancianos benefíciense de les ayudes sociosanitaries del Gobiernu autonómicu nesi país sudamericanu, nel que reside una cuarta parte de los asturianos inscritos nel censu de residentes ausentes.

Nuna comparecencia pública cellebrada esta mañana n’Uviéu, el director de l’Axencia Asturiana d’Emigración, Luis Miguel Fernández Romero, precisó que 234 de los emigraos que gozarán de cobertura mélica estraordinaria en tornu al Centru Asturianu de Buenos Aires son nacíos nel Occidente’l Principáu, mientres que los procedentes de les zones central y oriental d’Asturies alpenes algamen, respectivamente, el cientu.

Asina, los conceyos d’Allande, Tinéu y Cangas de Narcea afítense como principales ‘esportadores’ a Arxentina d’asturianos qu’agora tienen más de 65 años d’edá y que s’alcuentren en situación de necesidá manifiesta. Por esa razón, afirmó Fernández Romero, “la primer batalla que tenemos ye la de facer llegar la información, yá qu’hai xente na indixencia que desconoz los nuesos programes”.

Según aseguró na mesma comparecencia Marta Rodríguez, técnica de l’Axencia d’Emigración, la pensión mínima cola que subsisten dalgunos asturianos emigraos a l’Arxentina nun algama los 150 euros mensuales, si bien parte del collectivu emigrante a esi país percibe una ayuda tamién mensual d’unos 235 euros, en conceptu de pensión asistencial.

El Serviciu d’Atención a los Asturianos residentes na Arxentina reanúdase’l llunes 13 de setiembre

El Serviciu d’Atención a los Asturianos residentes na Arxentina reanudarase a partir del llunes 13 de setiembre, depués del períodu vacaciones y coincidiendo cola parte final del plazu pa solicitar les Ayudes técniques a asturianos o descendientes de nueso discapacitaos que fina’l 30 de setiembre. L’Axencia Asturiana d’Emigración de la Conseyería de Xusticia, Seguridá Pública y Relaciones Esteriores del Gobiernu del Principáu d’Asturias ya punxera esti Serviciu d’Atención a los Asturianos residentes na Arxentina l’añu pasáu, poniendo al frente del mesmu a la trabayadora social Rosana Vega García.

Los servicios que se tan enxertando nesti Serviciu d’Atención a los Asturianos residentes na Arxentina y que van continuar ufiertándose dende llunes 13 de setiembre son los de sofitu y asesoramientu a los asturianos residentes na Arxentina, d’información y orientación sobro les problemátiques sociales, de desendolcu y execución de programes del gobiernu del

Principáu d’Asturies, de sofitu y asesoramientu sobro’l retornu, d’información sobro les ayudes qu’ufre’l gobiernu del Principáuo, y d’otros trámites de interés pala Comunidá Asturiana.

Los servicios ufrense, previa solicitú de entrevista nel Centru Asturianu allugáu na Cai Solis, 475 de Buenos Aires (teléfonu 43835122) de llunes a xueves y de 9 a 14 hores, y nel Campu Cuadonga del Centru Asturianu que s’alcuentra allugáu na Avenida del Libertador, 1081, tamién de Buenos Aires, los vienres a les mesmes hores.

Cuatro países en diez díes y una entrevista final col presidente de Brasil, Luis Inazio Lula da Silva. Esi ye’l plan de viaxe col que s’ultimen los detalles de la visita institucional que’l presidente autonómicu, Vicente Álvarez Areces, y el conseyeru de Xusticia y Rellaciones Esteriores, Francisco Javier García Valledor, prevén cursar nos diez primeros díes d’ochobre a Chile, Arxentina, Uruguay y Brasil.

Según pudo afitar Asturnews, el programa -entá oficiosu- de la xira iberoamericana de dambos miembros del Gobiernu asturianu marca’l viaxe d’ida pal vienres 1 d’ochobre y fixa’l regresu, dende la ciudá brasileña de Sao Paulo y vía Madrid, pal sábadu 9 d’ochobre.

El primer destín d’Areces y Valledor sedrá Chile, d’onde los integrantes de la comitiva asturiana partirán depués p’hacia les ciudaes arxentines de Buenos Aires y Rosario, y darréu a la capital del vecín Uruguay, Montevideo. La xira culminará en Brasil, onde’l presidente autonómicu prevé aconceyar cola primer autoridá’l país, Lula da Silva.

Magar que los contactos yá tan pesllaos pa garantizar la cellebración d’esi alcuentru al traviés del cuerpu diplomáticu español destacáu en Brasil, fontes de la Conseyería de Presidencia’l Principáu matizaron que la entrevista final con Lula dependerá a la fin de variaciones d’última hora na axenda’l presidente brasileñu.

Luis Inazio Lula da Silva, qu’accedió al poder hai agora dos años y abandera una nueva práctica política n’Iberoamérica con ciertu distanciamientu respectu al poderosu influxu d’Estaos Xuníos nos sos vecinos del Sur, viaxó a Uviéu n’ochobre de 2003 pa recibir el Premiu ‘Príncipe de Asturias’ de Cooperación Internacional, que’l xuráu -y concedió n’atención a la so trayectoria política y personal en defensa de los trabayadores y de la llucha contra la probitú, la corrupción y la desigualdá social.

La comunidá asturiana nel esterior prepárase pa cellebrar los actos del 8 de Setiembre, Día d’Asturies, a la lluz d’estadístiques que delaten l’éxodu a la gueta de trabayu: Más de 25.000 ciudadanos con estudios de bachiller o títulu universitariu emigraron del Principáu a otres comunidaes autónomes ente 1991 y 2001, una cifra que supón el 38,6 por cientu de los emigraos nesi periodu, según un documentu de la Sociedá Asturiana d’Estudios Económicos ya Industriales (Sadei).

En términos abolutos, l’estudiu de Sadei cifra en 65.524 el númberu d’asturianos qu’emigraron a otres comunidaes na década referida, nun procesu que se desbocó en tornu a 1997 y con especiales efectos nes grandes ciudaes del Principáu, que ganen población por mor de la llegada d’asturianos procedente d’otros conceyos o d’inmigrantes estranxeros, pero pierden cada añu más de 2.000 habitantes que cuelen d’Asturies p’afincase n’otres llocalidaes del Estáu.

Esi ye’l casu de Xixón y Uviéu, principales ‘esportadores’ d’asturianos a otres comunidaes autónomes, con 2.495 y 2.218 persones en 2001, respectivamente, y siguíes de cerca por Avilés, que nesi mesmu añu vio colar a otros 1.194 vecinos. De les cuenques del Nalón y el Caudal, pol so llau, salen cada añu unos mil emigrantes hacia fuera d’Asturies -si s’estrapola el datu de Sadei pal añu 2001-, mientres que les comarques d’oriente y occidente proporcionen un fluxu más discretu d’emigración, perbaxo les 600 persones.

Madrid, destín principal

Por destinos, los asturianos de la nueva emigración marchen preferentemente pa Galicia, Castiella y Lleón y la Comunidá Valenciana, con un puxu creciente de les islles Canaries dende mediaos de los años noventa y el llideralgu claru de Madrid, comunidá pa la que cuelen unos 1.200 asturianos cada añu y na que’l Principáu cellebrará los prósimos 18 y 19 de setiembre los actos del primer Día d’Asturies itinerante nel esterior.

Coles actividaes yá en marcha al rodiu les cellebraciones del 8 de Setiembre en comunidaes como la vecina Castiella y Lleón, y a una selmana de qu’entame el programa oficial d’actos con epicentru en Mieres, el Centru Asturianu de Bruseles ta acabante confirmar al conceyu de Llangréu como’l protagonista d’honor de les sos cellebraciones, que conmemoren amás el vixésimu aniversariu de la entidá y prollongaránse a partir del 11 de setiembre.

Datos íntegros del estudiu na web de Sadei