Areces planea una entrevista con Lula da Silva como culminación d’una xira per Iberoamérica n’ochobre

Cuatro países en diez díes y una entrevista final col presidente de Brasil, Luis Inazio Lula da Silva. Esi ye’l plan de viaxe col que s’ultimen los detalles de la visita institucional que’l presidente autonómicu, Vicente Álvarez Areces, y el conseyeru de Xusticia y Rellaciones Esteriores, Francisco Javier García Valledor, prevén cursar nos diez primeros díes d’ochobre a Chile, Arxentina, Uruguay y Brasil.

Según pudo afitar Asturnews, el programa -entá oficiosu- de la xira iberoamericana de dambos miembros del Gobiernu asturianu marca’l viaxe d’ida pal vienres 1 d’ochobre y fixa’l regresu, dende la ciudá brasileña de Sao Paulo y vía Madrid, pal sábadu 9 d’ochobre.

El primer destín d’Areces y Valledor sedrá Chile, d’onde los integrantes de la comitiva asturiana partirán depués p’hacia les ciudaes arxentines de Buenos Aires y Rosario, y darréu a la capital del vecín Uruguay, Montevideo. La xira culminará en Brasil, onde’l presidente autonómicu prevé aconceyar cola primer autoridá’l país, Lula da Silva.

Magar que los contactos yá tan pesllaos pa garantizar la cellebración d’esi alcuentru al traviés del cuerpu diplomáticu español destacáu en Brasil, fontes de la Conseyería de Presidencia’l Principáu matizaron que la entrevista final con Lula dependerá a la fin de variaciones d’última hora na axenda’l presidente brasileñu.

Luis Inazio Lula da Silva, qu’accedió al poder hai agora dos años y abandera una nueva práctica política n’Iberoamérica con ciertu distanciamientu respectu al poderosu influxu d’Estaos Xuníos nos sos vecinos del Sur, viaxó a Uviéu n’ochobre de 2003 pa recibir el Premiu ‘Príncipe de Asturias’ de Cooperación Internacional, que’l xuráu -y concedió n’atención a la so trayectoria política y personal en defensa de los trabayadores y de la llucha contra la probitú, la corrupción y la desigualdá social.