Emigración

Afganistán, Palestina, Colombia, el Sahara y Cuba sedrán dellos de los países protagonistes de les Xornaes que van celebrase los díes19, 20 y 21 d’esti mes de Payares nel Albergue de La Carrera, en conceyu Siero. Estes Xornaes Interculturales pola paz ente los pueblos van entamar a les 17 hores del vienres y nun van finar hasta la tarde del domingu. La organización de les Xornaes, abiertes al públicu, ufierta tamién la posibilidá d’agospiu nel mesmu albergue, palo que se tien de llamar al teléfonu 984080917.

Les Xornaes van ser inauguráes por Rafael Palacios, Direutor de l’Axencia Asturiana de Cooperación al Desarrollu, Nicolás Fernández Palicio, Conceyal d’IU en Siero, y Arantxa Álvarez, Coordinadora del Área de Mocedá d’IU d’Asturies.

Dende les seis a les ocho la tarde la tema de les Xornaes sedrá “Colombia en lucha” y proyectaráse’l cortu “Perseguidos”, de Manu Castro. Darréu d’ello van intervenir Luciano Romero, miembro del Comité de Solidaridá con presos políticos de Colombia, Javier Orozco, del Programa de Derechos Humanos, y Aristides Oime, Defensor de los Derechos Humanos de la Xuventú Comunista de Colombia.

El sábado, de 10 a 12 de la mañana van falar sobro “Sahara llibre” Ahmed Mohamed Ahmed, Estudiante universitariu saharaui, y Bachir Salek, Delegáu del Frente Polisariu n’Asturies.

Dende les 12 a les 14 hores va ser “Cuba: camín al socialismo” la tema sobro la que fale José Antonio Fernández Martínez, Director de la Fundación Paz y Solidaridad de CC.OO. Asturias, y pela tarde, ente les 16 y les 18 hores falara sobro la tema “Refugiadas por causa de género” Leticia Silvela, Responsable del Área Psicológica y de Género del Comité Español de Ayuda al Refugiado en Madrid.

La causa de Palestina tra-yla a les Xornaes Mohamed Safa, médicu oftalmólogu, miembru de la OLP y autor del llibru “Palestina, grito por la libertad” y a les 10 de la nueche celebraráse una Fiesta intercultural “Por la paz entre los pueblos”.

Les Xornaes van finar el domingu 21 falando alrodiu de la “Casa de la Memoria: Derechos Humanos en Argentina”, cola participación d’Ernesto Álvarez Ortíz, Responsable Internacional de la Casa de la Memoria. Y darréu d’esta charra ellaboraráse ente les 12 y les 14 hores un mural “Por la paz entre los pueblos”.

Lausana y Xinebra piesllen la visita institucional del Conseyeru de Xusticia, Francisco Javier García Valledo, y el direutor de l’ Axencia Asturiana de Emigración del Principáu d’Asturies, Luis Miguel fernández, a Suiza qu’entamaren el vienres inaugurando les nueves instalaciones del Centru Asturianu de Berna. Esti sábadu, día 13, la comitiva’l Principáu desplazóse a Lausana, ciudá na que permaneció hasta les 21 hores de la nueche, momentu nel que dio por finada la so visita a los emigrantes d’esa llocalidá y partió pa Xinebra. Nesta ciudá trescurrirá la xornada’l domingu 14, día caberu de la visita que la representación institucional asturiana col conseyeru de Xusticia, Francisco Javier García Valledor, a la testa ta faciendo esti mes de Payares a Suiza. Pa esti domingu 14 ta previstu un alcuentru al mediudía cola colonia asturiana afitada en Xinebra.

La colonia asturiana en Suiza inaguraba con esta visita y de forma oficial nueves dependencies en Berna y conocía de primer mano los planes del Gobiernu’l Principáu pal collectivu emigrante. Una representación institucional del Executivu, encabezada pol conseyeru de Xusticia, Francisco Javier García Valledor, aniciaba nesa ciudá una visita de tres díes al país helvéticu qu’incluyía alcuentros nos Centros Asturianos de Xinebra y Lausana.

Cumpliendo’l programa previstu la primer etapa de la visita foi a la ciudá de Berna, onde Valledor inaguró les instalaciones del Centru Asturianu d’esa llocalidá a les 19 hores del vienres. L’axenda del conseyeru pa esa xornada axuntó amás un alcuentru col embaxador d’España.

El Director de l’Axencia asturiana de la emigración Luis Miguel Romero y el Conseyeru d’Asuntos Esteriores Javier Valledor protagonizaron l’actu central en Berna que cincaba a la inauguración d’esa sede del Centru Asturianu de Berna, sofitada con una ayuda económica de 24.000 euros de l’ Axencia Asturiana de Emigración del Principáu d’Asturies.

Na semeya que fai compaña a estes llínees pue vese a Luis Miguel Fernández, direutor de l’Axencia Asturiana d’Emigración; Joaquín Hernández, presidente del Centru Asturianu de Berna; el Conseyeru Francisco Javeir García Valledor y Rosario Iniesta de Bricio, de la Conseyería de Trabayu de Berna.

La colonia asturiana en Suiza inagurará de forma oficial nueves dependencies en Berna y conocerá de primer mano los planes del Gobiernu’l Principáu pal collectivu emigrante. Una representación institucional del Executivu, encabezada pol conseyeru de Xusticia, Francisco Javier García Valledor, anicia una visita de tres díes al país helvéticu qu’incluyirá alcuentros nos Centros Asturianos de Xinebra y Lausana.

Si se cumple’l programa previstu, la primer etapa de la visita sedrá la ciudá de Berna, onde Valledor inagurará les instalaciones del Centru Asturianu d’esa llocalidá a les 19 hores de mañana, vienres. L’axenda del conseyeru pa esa xornada prevé amás un alcuentru col embaxador d’España.

El sábadu, la comitiva’l Principáu desplazaráse a Lausana, ciudá na que permanecerá hasta la nueche, yá que a les 21 hores la delegación asturiana dará por finada la so visita a los emigrantes d’esa llocalidá y treslladaráse a Xinebra. Ehí trescurrirá la xornada’l domingu, día caberu de la visita a Suiza, con un alcuentru al mediudía cola colonia asturiana de la ciudá.

Valledor entamó’l so recorríu hacia Centroeuropa con una escala en Barcelona, onde mantuvo una xuntanza de trabayu col conseyeru de Relaciones Institucionales de la Generalitat, Joan Saura, na que dambos dirixentes conversaron sobro la inminente reforma de los Estatutos d’Autonomía, un procesu que quier liderar Cataluña.

Setenta persones deprenden asturianu a partir de güei en Madrid, Alcobendas y Valparaíso. La Conseyería de Xusticia, Seguridá Pública y Relaciones Esteriores y l’Academia de la Llingua espresaron esta mañana n’Uviéu la so previsión de qu’alumnos de Suiza, Uruguay, Bélxica, Canarias y Alicante se sumen nuna segunda fase al programa formativu, recoyíu nel Plan Integral d’Emigración del Principáu pa 2004-2007.

La capital del Estáu y el municipiu tamién madrilanu d’Alcobendas, onde güei empezarán les clases, axuntarán a 50 alumnos -25 en cada llocalidá-, mientres que’l cursu de Valparaíso (Chile) contará con venti escolinos y echará a andar el prósimu llunes. El Gobiernu autonómicu afitara un númberu mínimu de 15 alumnos por centru asturianu pa entamar un cursu de Llingua, cifra que nun s’algamó en delles de les solicitúes recibíes na Conseyería que dirixe Francisco Javier García Valledor.

Los monográficos formativos, que se desendolcarán hasta fin d’añu hasta completar les 90 hores llectives, atrayerán tanto a estudiantes universitarios como a persones d’edá avanzada con conocimientos fondos de la realidá cultural asturiana, según precisó esta mañana n’Uviéu Pablo Xuan Manzano, representante de l’Academia de la Llingua, na presentación pública de los cursos.

Nesa mesma comparecencia, García Valledor defendió la iniciativa como una rempuesta a la demanda de los emigrantes asturianos por caltener vives la so llingua y cultura, y eloxó a les comunidaes d’emigraos fuera’l Principáu como un “exemplu d’asturianismu y d’asturianía”.

Los cursos de llingua y cultura asturianes pa emigrantes qu’agora empiecen cuenten con precedentes en Montevideo y Gran Canaria, pero reactívense, según Manzano, “d’una manera más reglada y organizada”.

Noticia d’archivu: El nuevu Plan d’Emigración prevé cursos d’asturianu ‘on line’ ya un estudiu sobro l’éxodu de la mocedá

El conseyeru de Xusticia y Esteriores del gobiernu asturianu Francisco José García Valledor recibió güei nel salón d’actos del Edificiu Administrativu de Servicios Múltiples del Principáu a los 79 integrantes de la espedición nomada ‘Operación Señaldá’. La iniciativa institucional tenta allegar a Asturies a emigrantes con abondos años de residencia nel estranxeru y que poles sos condiciones económiques y sociales nun puen viaxar polos sos propios medios al nuestru país.

L’actu, cargáu d’emoción, celebróse na mañana de güei nel salón d’actos del EASMU presidíu pol conseyeru Valledor y el director xeneral d’Emigración del Principáu Luis Miguel García y né tuvieron presentes la totalidá de la espedición entamada esti añu pa treslladar dende los sos países d’acoyida hasta Asturies a un grupu d’emigrantes, la mayoría d’edá abondo avanzada y en precaries condiciones de vida, bien d’elles consecuencia de la tamién mala situación económica que se vive nos llugares onde residen dende hai décades.

Los miembros de la ‘Operación Señaldá’ llegaron el viernes a Asturies procedentes de los respectivos países a onde emigraron cuantayá. Nesta ocasión la iniciativa del gobiernu autonómicu trai de vuelta a la so tierra a un total de 79 emigrantes, la mayoría provinientes de países como Venezuela, Arxentina, Cuba y Uruguay. Pa cuasi tolos miembros d’esta espedición el viaxe yera’l primeru que facíen a Asturies dende abondos años, en dalgunos casos prácticamente dende’l momentu de la so marcha en busca d’un futuru alló del atlánticu.

La delegación institucional asturiana desenvuelve güei en Sao Paulo, una axenda marcada d’alcuentros con organismos empresariales y que va rematar con un alcuentu cola colonia asturiana na ciudá brasileira. Ente les contactos col mundu de la empresa nel país carioca destaca l’alcuentru del presidente Areces col másimu responsable de EDP (Enerxíes de Portugal) Brasil, el sociu mayoritariu de l’asturiana Hidroeléctrica del Cantábrico.

Ayer pela tarde el presidente de la República Luiz Inacio Lula da Silva recibió al presidente asturianu Vicente Álvarez Areces nun aconceyamientu que duró cuarenta y cinco minutos. Nel trescursu de la reunión Lula interesóse pola situación económica d’Asturies y por cómo diba afectar a la nuestra comunidá l’aplicación de los criterios contenios nel alcuerdu de Kioto. Al empar, el mandatariu brasileiru, espresó al presidente del Principáu la so intención d’asistir a dalgún de los eventos entamaos a lo llargo de 2005 pa celebrar el venticinco aniversariu de los Premios Príncipe d’Asturies, como otros de los disntiguíos pola Fundación.

La comitiva oficial asturiana siguía güei el so programa, enantes de volver mañana a Madrid. N’axenda del día hai sobretoo alcuentros del presidente Areces y del so conseyeru d’Industria y Empléu, Graciano Torres, con estremaos estamentos del ámbitu empresarial. El conceyu más importante ye’l que va xuntar al presidente del Principáu col cabezaleru en Brasil de la empresa que tien el 97% l’accionariáu de Hidroeléctrica del Cantábricu (HC),la portuguesa EDP. A esti conceyu Vicente Álvarez Areces va asistir acompañáu del presidente de HC, Manuel Menéndez, que va esponer los planes d’espansión de la so compañía.

Otros actos previstos n’axenda de la visita a Brasil son la degustación de productos asturianos ufiertada a reprentantes d’organismos empresariales carioques dientro’l marcu de les ‘Xornaes Gastronómiques del Principáu d’Asturies’ entamaes na ciudá de Sao Paulo. A les 15,00 hores el presidente de la comunidá autónoma asturiana aconcéyase col gobernador del Estáu de Sao Paulo, Geraldo Alckim Filho, acompañáu del cónsul xeneral d’España nesi estáu. Pela tarde va haber un alcuentru cola colonia d’emigrantes nel Centru Asturianu de Sao Paulo. Mañana, la delegación institucional tien previsto iniciar viaxe de vuelta a Asturies.

Creáu pola Llei d’Asturianía en 1994 el Centru Asturianu de Bruseles ye la segunda casa de los varios miles d’emigrantes del nuestru país residentes na capital comunitaria. Estos díes el Centru celebra’l venti aniversariu de la so fundación con diversos actos, el principal desenvuélve el sábadu con un aconceyamientu ente los directivos de l’agrupación y representantes del gobiernu del Principáu. Una xinta de confraternización y una actuación del grupu ‘Vezos astures’, completen el programa.

Bruseles ye la ciudá europea qu’axunta un númberu más grande d’asturianos residentes na Unión Europea. Los últimos cálculos cifren en varios miles los residentes d’orixe asturianu qu’anguaño viven y trabayen na ciudá belga. El Centru asturianu, que preside’l llangreanu Dionisio García, ye dende la so fundación en 1984 el principal catalizador de la vida social de los emigrantes y axunta a un númberu curiosu d’asociaciones, como la Casa d’Asturies en Bruseles o delles otres onde se xunten los residentes del nuestru país por llugares de procedencia xeográfica.

La emigración asturiana a Bruseles tuvo’l so momentu álxidu na década de los sesenta a los setenta del pasáu sieglu, inda hai documentación alrodiu de la presencia de trabayadores del país, principalmente mineros, nesa ciudá y otres de Bélxica, polo menos dende finales del sieglu XIX. Cola entrada del estáu español como miembru de plenu derechu na Unión Europea, Bruseles vio medrar el númberu de residentes españoles y asturianos desplazaos a la sé del parlamentu européu y la Unión comunitaria como funcionarios. A estos y a tolos emigrantes que viven en Bélxica dende hai varies décades hai que suma-yos les xeneraciones más moces, nacíes ende.

Un alcuentru de los responsables del Centru con representantes de l’administración del Principáu y un actu institucional nel que van intervenir voceros d’entrambes partes ye l’actu principal del aniversariu. Pela nueche va entamase una xinta de confraternización nun de los restaurantes más conocíos del centru la ciudá belga, el ‘Alexandre Le Grand’. Un desfile de traxes tradicionales y la interpretación de dances populares d’Asturies a cargu del grupu ‘Vecos astures’ completa’l programa de la celebración.

La delegación oficial del Gobiernu del Principáu per dellos países sudamericanos tien na so visita a Brasil la última escala enantes de volver a Asturies el prósimu sábadu. A lo llargo de güei y mañana los miembros de la comitiva institucional van tener ocasión d’alcontrase cola colonia asturiana y d’aconceyar con representantes de l’administración carioca y círculos empresariales d’esi país. El más resaltable de los alcuentros ya la entrevista del presidente Areces col mandatariu brasilairu Lula da Silva.

Sao Paulo y Brasilia son les dos ciudaes peles que va pasar la delegación asturiana na xornada de güei. Amás del alcuentru del presidente asturianu col presidente de la República, los conseyeros que lu acompañen nel viaxe, Graciano Torre, reponsable d’Industria y Empléu, y Francisco Javier García Valledor, titular de Xusticia y Esteriores, van caltener dellos alcuentros sectoriales. El conseyeru d’Industria tien na axenda de güei reuniones con representantes del Comerciu Español en Brasil y cola Federación d’Industries de Sao Paulo. Pel so llau, el responsable d’Esteriores del Principáu, entrevístase col Asesor Especial del presidente Lula y Coordinador del Programa ‘Fonme Zero'(Fame Cero), Frei Betto y tamién cola Secretaria d’Estáu de Desenvolvimientu Social del país carioca. García Valledor va tratar col coordinaor del programa ‘Fome Zero’ los compromisos que’l gobiernu asturianu tien entamaos en materia de cooperación referentes a proyectos sanitarios y d’erradicación de la fame y la probeza en Brasil. Un calter más emotivu va tener l’alcuentru del conseyeru d’Esteriores cola monxa misionera Dolores Muñiz.

La delegación oficial del Gobiernu d’Asturies sigue’l so viaxe per dellos países sudamericanos cumpliendo los oxetivos previstos polos responsables del Principáu. Darréu la visita a Chile, na que s’algamó el primeru d’una serie d’alcuerdos de collaboración con empresarios d’orixe asturianu, la breve estancia n’Arxentina tuvo un calter eminentemente solidariu pa colos emigrantes asitiaos nun país que d’abenayá sufre una fonda crisis económica y social. Uruguay y Brasil son güei los siguientes destinos del viaxe institucional.

La delegación del Principáu pasó per Arxentina visitando dos de les principales ciudaes onde reside la colonia asturiana, la capital Bonos Aires y Rosario. Nesta última ciudá los representantes del gobiernu autonómicu celebraron colos emigrantes el centenariu de la fundación del centru asturianu, el más antigu de Sudamérica nun actu cargáu d’emotividá.Igual d’emotiva foi la cena entamada con cerca de quinientos emigrantes nes istalaciones del centru asturianu de Buenos Aires, amenizada con música tradicional del país y sones de la ciudá porteña.

Del viaxe a la República d’Arxentina lo más resaltable foi la firma d’un conveniu pol que’l Gobiernu del Principáu asume dafechu la cobertura sanitaria de los asturianos allugaos na capital arxentina.

La delegación viaxó güei a la vecina república d’Uruguay onde tien encamentao visitar a lo llargo la mañana les instalaciones del Hogar Español de Montevideo, presidíu pol asturianu Benito Granda y al meudía l’intendente municipal de la ciudá va entrega-y al presidente Areces el títulu de Ciudadanu Ilustre de Montevideo. A media tarde la embaxada del Principáu va treslladase n’avión dica Sao Paulo. Na ciudá brasileira van recibilos el cónsul xeneral d’España, José Antonio San Gil y el presidente del centru asturianu de Sao Paulo, José María Aldariz. Mientres la so estancia nel país carioca la comitiva asturiana va ufiertar una amuesa de los productos gastronómicos del nuestru país como seña de la importante industria agroalimentaria de calidá qu’ofrez Asturies.

La delegación institucional del Gobiernu del Principáu, encabezada pol so presidente, llogró na so visita a Chile la firma d’un alcuerdu con empresarios d’orixe asturianu, como primer pasu pa la creación d’una rede d’asociaciones asemeyaes n’otros países que facilite’l camín a los mercaos de los emprendores vinculaos a la tierra de los sos antepasaos. Nel viaxe al país andín consiguióse despertar l’interés del ministeriu d’Economía chilenu pa empobinar un preacuerdu con empreses nacionales que puedan usar los puertos de Xixón y Avilés pa desmbarcar los sos productos n’Europa.

La iniciativa de crear una rede internacional d’empresarios d’orixe asturianu ye considerada una manera eficaz de sondear nuevos mercaos tanto pol gobiernu autonómicu como polos representantes de la iniciativa privada na nuestra comunidá, agrupaos na FADE. El pasu siguiente va ser la constitución n’Uruguay d’un nuevu conceyu d’emprendedores enraigonaos con Asturies aprovechando la visita de la delegación del Principáu y l’enfotu ye que nos prósimos meses vayan iguándose otres asociaciones en diferentes países de Latinoamérica.

La embaxada del gobiernu presidíu por Vicente Álvarez Areces aportó gúei a Arxentina, onde participó en diversos actos coles autoridaes del país y la colonia asturiana residente na ciudá de Rosario. Pela tarde tenía previsto treslladase n’avión hasta Montevideo pa siguir desenvolviendo los propósitos del viaxe, ente ellos la firma del mencionáu alcuerdu colos emprendedores d’orixe asturianu.