Emigración

El Centru Sociocultural Asturianu de París cellebró ente los díes 31 de marzu y 3 d’abril les primeres Xornaes dedicaes a la Llingua y la Cultura d’Asturies. Repartíos en dos sesiones por día falóse del nuevu cine asturianu, viéndose darréu les proyecciones de los curtiometraxes “La neña de los mios güeyos” y “7337”; dióse un repasu a los venticinco años d’esistencia de l’Academia de la Llingua Asturiana; asina como a la lliteratura y les lleyendes populares.

Les sesiones foron siguíes con gran interés polos asturianos y non asturianos presentes nes xornaes, que participaron activamente nos coloquios posteriores a les intervenciones de los ponentes, Pablo Xuan Manzano y Ánxel Álvarez Llano, que tamién falaron de temes como’l procesu d’escolarización na llingua o la mitoloxía asturiana.

Cola asistencia de 45 comensales, cellebróse la primera de les xintes programaes pol Centru Asturianu de Málaga pa collaborar con “La Paz”, cola asistencia de socios y simpatizantes y El Presidente y Xunta Directiva de la Federacion de Cases de Comunidaes, de la Federacion de Peñes, Cases Culturales y Rexonales de Málaga, y La Presidenta del Centru Gallegu y los Presidentes de la Casa de Castiella y Lleón, La Rioja y Navarra. Tamien asistieron miembros de L’Asociacion de cocineros y Reposteros de la Costa del Sol.

Sigún asoleya güei el portal dixital de l’Axencia d’emigración, emigrastur.com, el menu, cola excepcion del vinu y del pan, foi de productos asturianos y a los postres fixéronse brindis pola amistá y “La Paz”.

Jose Perez Prieto, alcalde de Cabrales, pasó dos selmanes percorriendo diferentes provincides cubanes y visitando a los emigrantes asturianos y a los sos descendientes que viven na islla caribeña. Nesti viaxe, que suma’l númberu quince per parte del políticu cabraliegu, aprovechó pa repartir medecines y ayudes económiques de parte del so conceyu y de los de L’Infiestu, Piloña, Peñamellera Alta, Peñamellera Baxa y Ribedeva.

Perez Prieto foi acoyíu con entusiasmu pola colectividá asturiana dde Camagüey, na que dexó un paquete de medecines y 35 euros per cápita a emigraos y a descendientes mayores o n’estáu de necesidá. Un percorríu asomeyáu fíxolu peles provincies de Pinar del Río, Villa Clara y L’Habana, onde foi recibíu na se de la Federación d’Asociaciones Asturianes (FAAC).

Manolo Perez, presidente de la sociedá Fios del Partíu de Llanes qu’agrupa a la mayor parte de los nacíos nestos conceyos asturianos agradeció emocionáu esti xestu de solidaridá de la tierra d’orixe pa con aquellos descendientes que tanto lo necesiten al otru llau del Atlánticu.

Emigrastur

La Dirección Nacional del Bloque por Asturies manifestó’l so compromisu y el so apoyu a les demandes de los colectivos mozos Asturianos en Madrid y Joven Asturianía Americana ente la prósima reforma de la Llei d’Asturianía. El Bloque considera a entrambos colectivos un capital «del qu’Asturies nun puede prescindir, como elementu fundamental de vertebración social de los asturianos y asturianas emigrantes, los sos descendientes y les nueves “lleendes urbanes”».

El Bloque por Asturies entiende que la prósima reforma de la Llei d’Asturianía ye la oportunidá p’amosar l’apoyu d’Asturies a les nueves realidaes de la emigración asturiana y, especialmente, a les demandes de la emigración más moza. Poro, quier espresar el so apoyu cola asociación “Asturianos en Madrid” y al recien colectivu “Joven Asturianía Americana”, con presencia n’America Llatina.

L’Axencia Asturiana d’Emigración de la Conseyería de Xusticia, Seguridá Pública y Rellaciones Esteriores convoca les ayudes añales a la emigración, espublizaes nel Boletín Oficial del Principáu d’Asturies del pasáu 30 de marzu.

Tales ayudes inclúin tanto les ayudes individuales pa los residentes nel esterior, como p’aquellos que quieran retornar a Asturies o participar na conocida como Operación Señaldá, que subvenciona’l viaxe a España a aquellos emigrantes mayores de 65 años que nun pudieran tornar a la so tierra natal nes últimes dos decades.

Bases de la convocatoria

La Casa d’Asturies de Bilbo va acoyer el prósimu mes de mayu una serie d’actos marcaos por dos exposiciones sobre los ritos de pasu y una visión d’Asturies per conceyos, y una serie de conferencies sobre les costumes asturianes, el desarrollu de les Cuenques mineres, les posibilidaes d’inversión n’Asturies asina como un repasu de la emigración asturiana. Pela so parte, la Compañía Asturiana de Comedies va representar la so obra “Pleitín de aldea”.

El prósimu 2 de mayu la Casa d’Asturies de Bilbo inaugura una exposición titulada “Ritos de paso”, perteneciente a la Obra Social y Cultural de Cajastur, que va ser introducida por una conferencia del periodista César Álvarez sobre les costumes asturianes. Pela so parte, el conceyal del Ayuntamientu de Llangreu, Francisco Torre, va analizar el desarrollu de les Cuenques mineres nuna charra prevista pal día 15 del mesmu mes.

El día 16 va ser la emigración asturiana quien centre la exposición del abogáu Guillermo Díaz Bermejo, demientres que’l día 17 Víctor González Marroquí, director del Institutu de Desarrollu Económicu del Principáu d’Asturies, va disertar sobre les posibilidaes d’inversión n’Asturies.

El 18 de mayu, la exposición fotográfica “Asturias por concejos” va ser inaugurada baxo la presentación del so autor, Paco Bercial. Mentes que los díes 19 y 20 van facese dos conferencies sobre “La comunicación en las familias: niños y adolescentes”, per parte de la psicóloga Ahinoa Pérez, y “El cáncer de colon rectal: su diagnóstico y tratamiento”, de la mano del médicu especialista dixestivu, Mario Apón.

El pieslle de les xornaes culturales del mes de mayu va facese’l día 27 cola actuación de les agrupaciones folclóriques Coral Santa María de Lieres, Grupu Corri-Corri de Llanes, grupu de gaites Mieres y Grupu de Salbatzaile Danza Taldea.

El Centru Asturianu de Bruseles ye’l destinatariu del premiu ‘Integración’ que promueve la revista Ecos, una publicación empobinada a los más de cien mil falantes d’español residentes en Bélxica y orixinarios de diversos países del estáu y de latinoamérica. La emisora Radio Sí, na que la comunidá asturiana tien una presencia importante, recibe otra de les distinciones de la revista belga.

L’Asociación Hispamedia, editora de la revista Ecos, Bélxica n’Español prepara la so ”Gala de Premios Ecos 2006″ , na que se van dar galardones a persones y asociaciones pol so llabor nel mundu hispánicu de Bélxica. L’actu d’entrega va tener llugar el día 23 de mayu a les 19.30 nel Hotel Husa President Park de Bruseles col sofitu de les representaciones diplomátiques españoles y latinoamericanes en Bélxica, asina como d’otres instituciones comunitaries. En tal actu, el Centru Asturianu de Bruseles va ser distinguíu col Premiu Ecos “Integración”.

La edición 2006 de la Gala de Premios Ecos va dar los sos galardones a les siguientes persones y asociaciones: Premiu Ecos “Honoríficu” otorgáu al Profesor Robin Lefère Premiu Ecos “Integración” ortogáu al Centru Asturianu de Bruselas Premiu Ecos “Cooperación” ortogáu a la Cámara de Comerciu Belgo Centroamericana Premiu Ecos “Difusion Cultural” ortogáu al Centru d’Estudios Mexicanos d’Amberes Premiu Ecos “ Idees” ortogáu a Radio Si pol so programa ‘De par en par’ Premiu Ecos “Solidaridᔠortogáu a ‘Femmes de l’Amerique Latine’ Premiu Ecos “Llabor Prefesional” ortogáu a l’Agrupación de Llingua y Cultura Española

La revista Ecos que ta dirixida a los más de cien mil hispanofalantes residentes en Bélxica y a tolos llectores interesaos na cultura hispana y en cuanto vincula a España, Bélxica y América latina ta formada d’un estensu grupu d’españoles, latinoamericanos, belgues y otres comunidaes internacionales ye una revista belga en llingua española qu’informa cada mes sobre los acontecimientos españoles y latinoamericanos que tienen llugar en Bélxica.

Na so sección “Ecos de…”, ufierta un serviciu de distribución y divulgación reserváu a instituciones y organismos públicos y privaos, sedes diplomátiques, ONGs y asociaciones culturales que quieran espublizar les sos informaciones oficiales.

Un grupu d’emigrantes asturianos nos Estaos Uníos trabaya anguaño por xuntar nun mesmu colectivu a los sos compatriotes residentes nel país norteamericanu a semeyanza de dellos ya esistentes n’otros destinos de la nueva marea migratoria de la nuestra tierra, xeneralmente formada por xente mozo y bien capacitao profesionalmente. El fomentu de la unión ente los asturianos y de la cultura del país nos USA son oxetivos d’esta asociación.

La puesta en marcha d’una páxina web que valga de puntu d’alcuentru virtual ente los nuevos emigrantes y l’entamu d’actividaes relacionaes cola herencia asturiana nos Estaos Uníos y la cultura actual de la nación d’orixen son dellos de los oxetivos más inmediatos del colectivu ASUSA. L’asocación tamién quier sensibilizar a les instituciones del Principáu énte la realidá que representen los nuevos emigrantes asturianos nos Estaos Uníos y les estremaes posibilidaes de desenvolver colaboraciones de beneficiu mutuu ente ellos y la so tierra.

Más información

Una delegación asturiana encabezada pol conseyeru de Xusticia y Esteriores del Principáu Francisco Javier García Valledor sal esti llunes 13 rumbu a Santo Domingo pa siguir dende ellí el xueves 16 a Nueva York col fin de participar na celebración de San Patricio. Ye la segunda ocasión na que la nuestra comunidá desfila nel Día Nacional de los irlandeses de tol mundu.

La visita de la delegación del Principáu a Santo Domingo enmárcase dientro los viaxes avezaos de la Conseyería d’Esteriores pa contactar coles colonies d’emigrantes repartíes per diversos países. Nesta ocasión el conseyeru Valledor aconceyará tamién con autoridaes de la República Dominicana y conocerá nel sitiu dellos programes financiaos pola administración autonómica.

El viaxe a Nueva York tien otru calter nel que se consolida l’afitamientu d’una delegación asturiana permanente na celebración de los actos del Día de San Patricio, amás d’un alcuentru con miembros de la nuestra comunidá afincaos na ciudá de los rascacielos. Les bandes de gaites de Corvera y Villa de Xixón dirixíes por Bras Rodrigo van ser les encargaes de poner la nota musical na Gran Parada de la Quinta Avenida de Manhattan el prósimu viernes 17. Valledor encabeza la presencia asturiana nel desfile ataviáu col traxe tradicional del país. Na so estancia nos Estaos Uníos el conseyeru de Xusticia y Esteriores aconceyará con miembros destacaos de la colonia asturiana en Nueva York y New Jersey, amás d’asistir a una cena de gala nel Hotel Waldoff Astoria con personalidaes cimeres de la vida pública neoyorquina. Ente los alcuentros previstos de Valledor tán una atopada con Enrique Balbín, oficial de la policía de la ciudá de Nueva York supervivientes de los atentaos a les Torres Ximielgues y natural de Ribesella y tamién col senador Menéndez de New Jersey, d’orixe asturianu.

El Festival ‘La Huella de España’ que se va celebrar en L’Habana dende’l prósimu 22 d’abril va tar dedicáu esti añu a Asturies y la so cultura, anunció esti martes 7 el conseyeru de Xusticia y Esteriores del Principáu, Francisco Javier García Valledor. Escritores, músicos y representantes de l’actividá artística viva y tradicional del nuestru país van viaxar a Cuba col fin de participar nesti festival creáu pola bailarina Alicia Alonso pa estrechar los llazos ente l’estáu español y la isla.

La delegación asturiana va tar encabezada pol presidente del gobiernu asturianu Vicente Álvarez Areces y pol conseyeru García Valledor. Na última edición del festival la comunidá protagonista fue Galicia y n’anteriores ocasiones Canarias y Andalucía. Nesta ocasión va remembrase la presencia en Cuba de la güelga asturiana con una amplia y diversa representación del patrimoniu actual de la nuestra cultura.