Emigración

El prósimu 1 de setiembre, a les ocho la tarde, la se social del Centru Asturianu de Rosario, en L’Arxentina, va acoyer la presentación de l’Agrupación Coral La Flor de La Pola L.lena que, dirixida dende l’añu 2002 pol maestru Marco Antonio Cuiñas González, ta estos díes faciendo una xira pel país americanu.

Nel actu de presentación, que ye d’entrada llibre y de baldre, la coral lleniza va ser recibida polos integrantes del Coru Cantoamigo de la ciudá de Rosario, dirixíu pol Maestru Augusto Gilli, xunto a los que van interpretar parte del so repertoriu.

Páxina sobre’l Coru La Flor

Depues de participar nel III Congresu Mundial d’Asturianía, celebráu en Xixón ente los díes 1 y 3 d’agostu, los mozos asturianos de Mendoza y de Rosario, l’Arxentina, integrantes de l’asociación ‘Joven Asturianía Americana’, formada tamien por mozos de Chile y l’Uruguay, presentaron les sos reivindicaciones ente la prósima reforma de la Llei d’Asturianía col apoyu d’una resolución de l’Asamblea Xeneral del Conseyu de la Mocedá del Principáu d’Asturies. Acompañaos por Paulino Feito, presidente del CMPA, los representantes de la ‘Joven Asturianía Americana’ pidieron ayeri’l reconocimientu de l’asturianía ‘non como dalgo esclusivo de los que descienden d’asturianos, sinón como un distintitivu de tolos que creen y trabayen por ella, manteniendola viva’.

‘En venti años, la supervivencia de los centros asturianos va pasar por que se faigan cargu d’ellos persones que yá nun tendrán dengún vínculu de sangre con Asturies’, afirmó’l mendocín Leonardo Quercetti na rueda de prensa celebrada ayeri na se del Conseyu de la Mocedá del Principáu d’Asturies.

Atrayíos pola cultura asturiana, estos mozos residentes nel Conu Sur, fixeronse partícipes d’ella, allegándose a los centros asturianos del continente americanu y participando activamente na so vida. ‘Ente un 60 y 80 por ciertu d’estos mozos nun tienen ascendencia asturiana’, siñaló Gabriel Quintero, miembru tamien d’esta asociación formada por rapazos de l’Arxentina, Chile y l’Uruguay.

‘Esta asociación’, desplicó Quercetti, ‘formóse pa dar respuesta a ciertes realidaes que tocaben a la participación de los mozos y les muyeres nos centros asturianos, ente les que se foi formando una rede de mozos que fraguó en xineru de 2005 col I Alcuentru de Mozos pola Asturianía del Conu Sur’. Reivindicando que l’asturianía nun ye dalgo esclusivo de los descendientes d’asturianos, sinón un distintivu de tolos que trabayen por ella, l’asociación quier posicionase ente la prósima Llei d’Asturianía ‘porque nos afecta’, despicó Quintero, pal que ‘los centros asturianos son una rede qu’Asturies puede rentabilizar’. En primer llugar, estos mozos piden un control de l’asturianía per parte del Principáu, pudiendo da-yla non sólo a los centros y comunidaes, sinón tamien ‘quitá-yla cuando estes instituciones nun funcionen de manera democrática’, ya que ‘hai clares faltes no que se refier a la participación de les muyeres en dalgunos centros’, por eso, otra de les piticiones de l’asociación ye la garantía de la so igualdá dientro de les comunidaes asturianes del esterior.

L’asociación trabaya agora nel que va ser el II Alcuentru de Mozos pola Asturianía del Conu Sur que se va celebrar en xineru de 2007 en Viña del Mar, Chile, nel que s’espera doblar la participación del anterior y onde amás van constituyir una Asamblea que recueya les inquietúes y les propuestes de los mozos a l’asociación.

El director de l’Axencia Asturiana d’Emigración, Luis Miguel Fernández Romero, reunióse la pasada semana col presidente del Centru Asturianu de Mexico, Rafael Segura, pa estudiar la posibilidá de dar cobertura sanitaria a los asturianos residentes en Mexico, mediante un programa asomeyáu al qu’esti Gobiernu ta desarrollando dende hai dalgún tiempu en Venezuela y l’Arxentina.

Fernández Romero desplicó que pel momentu tán estudiando les diferentes alternatives y que nun hai nada definío. “Queremos poner en marcha un programa asomeyáu al que yá ta funcionando en l’Arxentina y Venezuela, pero tovía nun tenemos claro si les ayudes económiques se van dar directamente o se van pagar la cuota de dalguna institución qu’ufierte cobertura sanitaria”, desplicó’l responsable de l’Axencia Asturiana de la emigración, qu’aseguró que “se tán estudiando toles alternativas posibles pa ufiertar la meyor cobertura sanitaria”, probablemente al traves d’un centru de beneficencia de orixe español.

La comunidá asturiana nesi país consta d’unes 7.000 persones. Anque en xeneral trátase de families con una situación económica más acomodada que les de l’Arxentina y Venezuela, Fernández Romero indicó que tamien hai persones con graves problemes que necesiten del apoyu del Principáu. Anguaño’l Gobiernu ta dando ayuda a 34 asturianos residentes na zona y que tienen problemes económicos.

L’etnógrafu y folclorista Fernando de La Puente, profesor de la Escuela d’Asturianía, va ser l’encargáu de dar el pregón qu’inaugure’l prósimu 23 de setiembre’l Día d’Asturies nel Centru Asturianu de Málaga. Nel actu va cuntase cola presencia del conseyeru de Xusticia, Francisco Javier García Valledor, el director de l’Axencia Asturiana d’Emigración, Luis Miguel Fernández Romero, dalgún representante del Conseyu de Comunidaes Asturianes y de la Fica, asina como l’alcaldesa de Llangreu, Maria Esther Díaz.

Fernando de la Puente espunxo hai unos díes nel recien III Congresu Mundial d’Asturianía la so conferencia ‘Tras la huella del Asturias Patria Querida’, na que desvelaba los pasos de la so investigación na busca del orixe cubano-polacu del famosu himnu asturianu.

Ente los díes 8 y 10 de setiembre, el Centru Asturianu de Bruseles remembra’l Día d’Asturies, ocasión na que se va facer entrega del galardón del centru, conocíu como l’Horru d’Oro, al alcalde de la capital belga, Freddy Thielemans, y al conseyeru de Xusticia, Francisco Javier García Valledor. Los actos de celebración de la fiesta asturiana van terminar con un conciertu a cargu del grupu Deua Dubra y del maestru gaiteru Xuacu Amieva.

L’actu d’entrega del Horru d’Oro al alcalde de Bruseles, Freddy Thielemans, y al conseyeru de Xusticia, Seguridá Pública y Rellaciones Esteriores, Francisco Javier García Valledor va tener llugar el día 8 de setiembre, festividá de la Santina, nel ayuntamientu de la capital belga. Pero los festeyos que remembren el Día d’Asturies van allargase hasta’l domingu, 10 de setiembre.

Nel programa previstu pol Centru Asturianu nun falten los tradicionales desfiles de grupos y bandes de gaites pela capital de Belxica, asina como la espicha que tolos años celebren nel MannekenPis, que pa la ocasión va volver vistise col traxe rexonal asturianu.

Tres d’una misa en Nuestra Señora Inmaculada y la procesión cola Santina peles cais de Bruseles, el centru va organizar la tradicinal puya’l ramu, a la que van seguir un torneu de bolos y un mercáu astur na Plaza d’España, que va cuntar con puestos de música, llibros, indumentaria popular, gastronomía asturiana, y muestres de xoyería y cerámica de la tierra.

Les xornaes van piesllar con un conciertu a cargu del grupu Deua Dubra y del gaiteru Xuacu Amieva.

Per otra parte, los díes 16 y 17 de setiembre, el Centru Asturianu va sumase a la Fiesta del folklore de Bruseles, que va tener llugar na Plaza Mayor de la ciudá. Encargaos de representar el folclore asturianu, el Centru Asturianu va llevar al so propiu grupu, que fadrá demostración de los bailles asturianos, xunta la Banda de Gaites Naranco, convidaos especialmente pola entidá asturiana pa la ocasión.

El conseyeru responsable de los temes d’Emigración nel Gobiernu Asturianu, Francisco Javier García Valledor -ún de los representantes d’IX nel gabinete-, entiende que los asturianos del esterior han de tener reconocíos los sos derechos individuales básicos en condiciones asomeyaes a los que residen na tierra. Nel so analís del III Congresu Mundial d’Asturianía, Valledor echó en falta un debate fondu sobre’l borrador de la prósima Llei d’Asturianía asina como una puesta en común colos propios emigrantes de les polítiques actuales d’emigración.

‘Ye hora de que se reconoza la deuda hestórica d’Asturies colos sos emigrantes’, dixo Valledor ente los medios de comunicación nel III Congresu Mundial d’Asturianía, celebráu va poco en Xixón. ‘El bienestar qu’anguaño esfrutamos en comparanza cola situación d’otros sitios del mundu debese a los qu’un día tuvieron que marchar porque n’Asturies nun teníen oportunidaes’, apuntó’l conseyeru.

Curiosamente, de los debates del congresu quedó fuera’l proyectu de llei d’Emigración, ellaboráu pola Conseyería de Xusticia, Seguridá Pública y Rellaciones Esteriores y qu’esta entregó hai meses a les autoridaes más importantes del Executivu nesta materia. Tamien a los responsables de la emigración organizada, como la Federación Internacional de Centros Asturianos o’l Conseyu de Comunidaes Asturianes. La Conseyería quería, de fechu, que’l congresu valiere pa que los representantes de los asturianos ausentes participaren nel discutiniu d’una llei clave pa regular la so situación. Los organizadores del alcuentru, sin embargo, nun vieron oportuno metela.

‘Creo qu’un elementu tan trescendente como esti merecía un ámbitu de reflexón más ampliu, nel Congresu d’Asturianía, con una ponencia concreta’, dixo Valledor ente los medios de comunicación a la puerta del salón d’actos. ‘Llamentablemente, los organizadores nun lo vieron asina y yo nun formo parte d’esa comisión organizadora, pero merecería un marcu de debate específicu, de la mesma manera que’l Plan d’Emigración que se ta executando, 2004-07, merecería tener un marcu de reflexón y evaluación per parte de los emigrantes porque tamos ente los representantes más cualificaos de la emigración asturiana. Gustaríame que la política que tamos desendolcando dende’l Gobiernu d’Asturies fuere contrastada, valorada, no bono y no malo, si lo hai, per parte de los emigrantes asturianos nel mundu’, declaró.

Tocante al borrador del testu, Valledor dio a conocer varios aspectos del reconocimientu que fai del derechu d’asturianes y asturianos del esterior: recibir prestaciones y ayudes económiques pa los que tean en situación d’emerxencia social; garantizar la salú al travies de programes que permitan la cobertura sanitaria y farmaceutica o atender les necesidaes específiques de les persones dependientes, ente otros.

Importancia especial dáse-yos a los retornaos, a los que se-yos reconocen una serie de derechos qu’inclúi, ente otros, el de recibir el salariu social básicu, el de tener cobertura residencial y el d’acceder a una vivienda digna, en función de les condiciones personales de cadún. Específicamente, el testu obliga al Principáu a poner programes d’ayuda que faciliten el viaxe de vuelta.

El conseyeru de Xusticia Francisco Javier García Valledor, responsable n’Asturies de los temes d’Emigración, “llamenta” que dengún home importante del PSOE asturianu fale de la necesidá de reconocer la nacionalidá a los nietos d’españoles nel esterior nel proyectu de llei que se ta discutiendo, tal y como ficieron los socialistes gallegos na so comunidá y como prometiere’l presidente del Gobiernu español nel so programa electoral.

‘Llamento que’l proyectu del Estatutu de los Españoles nel Esterior nun tuviere la valentía de reconoce-yos la nacionalidá a los nietos d’españoles, un problema de fondu de la emigración’ española y, por supuesto, asturiana, dixo’l conseyeru de Xusticia, Seguridá Pública y Rellaciones Esteriores del Principáu. ‘Trátase d’una cobardía impropia d’un gobiernu que se diz d’izquierdes’, añedió.

Énte los periodistes acreditaos nel III Congresu Mundial d’Asturianía, Valledor dixo tres de los discursos d’inauguración qu’echaba en falta n’ellos ‘un pronunciamientu asomeyáu al de Galicia’, onde’l so presidente, Emilio López Touriño, ‘espresó con claridá y rotundamente que l’Estatutu de los Ciudadanos Españoles nel Mundu ye un pasu alantre que va dar pasu incompletu si nun mete’l reconocimientu de la nacionalidá pa los nietos de los emigrantes españoles nel mundu, un elementu fundamental que, amás, foi una promesa ellectoral del actual presidente del Gobiernu d’España’.

Valledor señaló que ‘ye fundamental que se recueya na llei porque, rialmente, nun s’entiende por que los nietos de los españoles nel mundu tienen un tratu diferente de los nietos de los italianos o de los nietos d’otros ciudadanos de la Unión Europea’. El conseyeru espera qu’esta falta s’arregle nel trámite parlamentariu.

Unos 150 representantes de la emigración asturiana en tol mundu participaron na tercer edición del Congresu Mundial d’Asturianía, terminó ayeri nel centru Xixón Sur. De los bloques de debate, nos que destacó’l papel de les xeneraciones más moces dientro de la emigración, quedó fuera’l borrador de la nueva Llei d’Asturianía, pesie de qu’obraba en poder de los organizadores dende hai más d’un mes. L’actu de cierre cuntó con un discursu de l’alcaldesa de Xixón, Paz Fernández Felgueroso.

El Congresu, qu’axunta a los Centros Asturianos y Cases d’Asturies con reconocimientu d’Asturianía esperdigaos per tol mundu, cuntó con más de 150 participantes, llegaos de 25 Centros Asturianos d’España, 30 d’America, cinco d’Europa y ún centru asturianu d’Oceanía.

Los oxetivos del Congresu foron, per una parte, reflexonar sobre lo que ye l’Asturianía, lo que ye facer Asturies dientro y fuera de la propia Comunidá y, per otra, analizar les polítiques del Gobiernu del Principáu, refrendándoles o proponiendo cambios o iniciatives.

Nos tres díes tocáronse bloques temáticos de munchu interes pa la emigración. Un primer bloque, sobre la proyección de la cultura asturiana nel esterior, qu’incluyó una ponencia sobre l’himnu d’Asturies y un informe sobre la Escuela d’Asturianía, que prepara monitores de cultura tradicional asturiana pa los Centros Asturianos.

Un segundu bloque temáticu tuvo dedicáu al apartáu social, ún de los de mayor trescendencia pa los Centros Asturianos d’America, fíxose’l segundu día cola presentación y debate del Estatutu de los Ciudadanos Españoles nel Esterior y una mesa redonda na que s’analizaron les polítiques sociales hacia la emigración na Alministración central, autonómica y local. Nesti apartáu faise una mención especial a los emigrantes retornaos.

Hebo tamien un bloque dedicáu a los emprendedores y profesionales asturianos fuera de la Comunidá Autónoma, nel que tamien participó l’Institutu de Desarrollu Económicu del Principáu d’Asturies (IDEPA) y les Cámares de Comerciu d’Asturies.
El programa incluyó tamien un bloque dedicáu a les muyeres y a la mocedá nos centros asturianos, que va tratar d’analizar y treslladar los problemes tocantes a la so participación nos centros.

Presentáronse, amás, una serie de comunicaciones feches por socios de los centros asturianos y reuniones de trabayu (talleres) p’analizar la problemática d’estos oxetivos n’Europa y restu del mundu, America y España.

La sala d’esposiciones del Centru Municipal Integráu de Pumarín ‘Xixón-Sur’, se del Congresu, agospió, esos díes, una esposición organizada pol propiu Conseyu de Comunidaes Asturianes y fecha pola Asociación de Profesores de Música Tradicional, cola que se quier averar a los ciudadanos una amuesa representativa (más de 200 pieces) de los instrumentos musicales que fixeron la tradición musical asturiana a lo llargo de los sieglos XVIII, XIX y gran parte del XX.

L’Ayuntamientu de L.lena celebra esti sábadu, 5 d’agostu, un encuentru de Centros Asturianos, aprovechando la presencia n’Asturies d’abondos directivos de colectivos d’esti tipu pa participar nel III Congresu Mundial d’Asturianía, que se ta celebrando dende ayeri hasta’l prósimu xueves nel Centru Sur de Xixón.

L’encuentru va reunir nel Teatru Vital Aza a representantes de Centros Asturianos de tol mundu y tamien al grupu llegáu de Cuba na edición d’esti añu de la ‘Operación Señaldá’ (enantes Añoranza).

Habrá una recepción oficial de bienvenida, na que van tar presentes l’alcalde de L.lena, Hugo Alfonso Morán Fernández; y autoridaes d’otros municipios, asina como representantes del Gobiernu del Principáu d’Asturies; de siguío tendrá llugar un conciertou coles actuaciones musicales de la banda de gaites Güestia, el coru La Flor y el grupu de baille Xanzaina.

L’actu, con entrada llibre, ta organizáu pol Ayuntamientu de L.lena y pol coru La Flor, embaxador cultural del conceyu, que tien una estrencha rellación con abondos Centros Asturianos de tol mundu, nos qu’actuó.

Unos 150 representantes de la emigración asturiana de tol mundu van participar na tercer edición del Congresu Mundial d’Asturianía, qu’empieza güei nel centru Xixón Sur y que termina esti xueves. De los bloques de debate sacóse’l borrador de la nueva Llei d’Asturianía, pesie a que ta en poder de los organizadores dende hai más d’ún mes.

El Congresu, qu’axunta a los Centros Asturianos y Cases d’Asturies con reconocimientu d’Asturianía esperdigaos per tol mundu, va contar con más de 150 participantes, llegaos de 25 Centros Asturianos d’España, 30 d’America, cinco d’Europa y ún centru asturianu d’Oceanía.

Los oxetivos del Congresu son, per una parte, reflexonar sobre lo que ye l’Asturianía, lo que ye facer Asturies dientro y fuera de la propia Comunidá y, per otra, analizar les polítiques del Gobiernu del Principáu, refrendándoles o proponiendo cambios o iniciatives.

Nos tres díes van tocase bloques temáticos de munchu interes pa la emigración. Un primer bloque, sobre la proyección de la cultura asturiana nel esterior, qu’inclúi una ponencia sobre l’himnu d’Asturies y un informe sobre la Escuela d’Asturianía, que prepara monitores de cultura tradicional asturiana pa los Centros Asturianos.

Un segundu bloque temáticu va tar dedicáu al apartáu social, ún de los de mayor trescendencia pa los Centros Asturianos d’America, va facese’l segundu día cola presentación y debate del Estatutu de los Ciudadanos Españoles nel Esterior y una mesa redonda na que se van analizar les polítiques sociales hacia la emigración na Alministración central, autonómica y local. Nesti apartáu faise una mención especial a los emigrantes retornaos.

Habrá tamien un bloque dedicáu a los emprendedores y profesionales asturianos fuera de la Comunidá Autónoma, nel que tamien participó l’Institutu de Desarrollu Económicu del Principáu d’Asturies (IDEPA) y les Cámares de Comerciu d’Asturies.

El programa inclúi tamien un bloque dedicáu a les muyeres y a la mocedá nos centros asturianos, que va tratar d’analizar y treslladar los problemes tocantes a la so participación nos centros.

Van presentase, amás, una serie de comunicaciones feches por socios de los centros asturianos y reuniones de trabayu (talleres) p’analizar la problemática d’estos oxetivos n’Europa y restu del mundu, America y España.

La sala d’esposiciones del Centru Municipal Integráu de Pumarín ‘Xixón-Sur’, se del Congresu, va agospiar, esos díes, una esposición organizada pol propiu Conseyu de Comunidaes Asturianes y fecha pola Asociación de Profesores de Música Tradicional, cola que se quier averar a los ciudadanos una amuesa representativa (más de 200 pieces) de los instrumentos musicales que fixeron la tradición musical asturiana a lo llargo de los sieglos XVIII, XIX y gran parte del XX.

El Congresu completase con una serie d’actividaes culturales, como’l conciertu de Jose Manuel Fernández ‘Guti’ y Jesús Arevalo, l’actuación del grupu DRD y la participación de la banda de gaites formada polos alumnos de la Escuela d’Asturianía na propia se del Congresu. A esto hai qu’añedir un actu nel Centru Cultural Caxastur del Palaciu Revillagigedo, a les ocho la tarde, con esti programa:

• Representación de la obra ‘Un xuiciu de faltes’, d’Antón de la Braña, a cargu del Grupu Cultural Xana de Perlora.
• Actuación de los maestros gaiteros Flavio Rodríguez Benito y Pedro Pangua.
• Actuación de los cantantes de tonada Anabel Santiago y Luis Tuya.
• Actuación de los alumnos y alumnes de la especialidá de baille de la Escuela d’Asturianía.