L’Asturianía Moza Americana pide’l reconocimientu de los non descendientes d’asturianos

Depues de participar nel III Congresu Mundial d’Asturianía, celebráu en Xixón ente los díes 1 y 3 d’agostu, los mozos asturianos de Mendoza y de Rosario, l’Arxentina, integrantes de l’asociación ‘Joven Asturianía Americana’, formada tamien por mozos de Chile y l’Uruguay, presentaron les sos reivindicaciones ente la prósima reforma de la Llei d’Asturianía col apoyu d’una resolución de l’Asamblea Xeneral del Conseyu de la Mocedá del Principáu d’Asturies. Acompañaos por Paulino Feito, presidente del CMPA, los representantes de la ‘Joven Asturianía Americana’ pidieron ayeri’l reconocimientu de l’asturianía ‘non como dalgo esclusivo de los que descienden d’asturianos, sinón como un distintitivu de tolos que creen y trabayen por ella, manteniendola viva’.

‘En venti años, la supervivencia de los centros asturianos va pasar por que se faigan cargu d’ellos persones que yá nun tendrán dengún vínculu de sangre con Asturies’, afirmó’l mendocín Leonardo Quercetti na rueda de prensa celebrada ayeri na se del Conseyu de la Mocedá del Principáu d’Asturies.

Atrayíos pola cultura asturiana, estos mozos residentes nel Conu Sur, fixeronse partícipes d’ella, allegándose a los centros asturianos del continente americanu y participando activamente na so vida. ‘Ente un 60 y 80 por ciertu d’estos mozos nun tienen ascendencia asturiana’, siñaló Gabriel Quintero, miembru tamien d’esta asociación formada por rapazos de l’Arxentina, Chile y l’Uruguay.

‘Esta asociación’, desplicó Quercetti, ‘formóse pa dar respuesta a ciertes realidaes que tocaben a la participación de los mozos y les muyeres nos centros asturianos, ente les que se foi formando una rede de mozos que fraguó en xineru de 2005 col I Alcuentru de Mozos pola Asturianía del Conu Sur’. Reivindicando que l’asturianía nun ye dalgo esclusivo de los descendientes d’asturianos, sinón un distintivu de tolos que trabayen por ella, l’asociación quier posicionase ente la prósima Llei d’Asturianía ‘porque nos afecta’, despicó Quintero, pal que ‘los centros asturianos son una rede qu’Asturies puede rentabilizar’. En primer llugar, estos mozos piden un control de l’asturianía per parte del Principáu, pudiendo da-yla non sólo a los centros y comunidaes, sinón tamien ‘quitá-yla cuando estes instituciones nun funcionen de manera democrática’, ya que ‘hai clares faltes no que se refier a la participación de les muyeres en dalgunos centros’, por eso, otra de les piticiones de l’asociación ye la garantía de la so igualdá dientro de les comunidaes asturianes del esterior.

L’asociación trabaya agora nel que va ser el II Alcuentru de Mozos pola Asturianía del Conu Sur que se va celebrar en xineru de 2007 en Viña del Mar, Chile, nel que s’espera doblar la participación del anterior y onde amás van constituyir una Asamblea que recueya les inquietúes y les propuestes de los mozos a l’asociación.