Educación

La comprensión de la cultura árabe como mediu d’integración y frenu a radicalismos. La Universidá d’Uviéu inclúi un cursu d’aniciu al arabismu y otros cuatro de llingua árabe dientro la so ufierta d’Estensión Universitaria pal prósimu cursu académicu, nel que la institución docente programa más de 50 monográficos pa deprender o perfeccionar idiomes n’Uviéu, Xixón y Llangréu.

Dirixíu por María Luisa Donaire, el cursu ‘Llingua y cultura árabe pa la demanda social’ pretende facilitar la comprensión de la realidá’l mundu árabe, especialmente a profesores y mediadores sociales implicaos de mou directu na integración d’inmigrantes procedentes d’esa cultura. Les 90 hores llectives del monográficu impartiránse n’Uviéu ente ochobre prósimu y mayu de 2005, con un preciu de matrícula de 243 euros.

A esa opción formativa hai que-y amestar otros cuatro cursos específicos d’idioma árabe que la Universidá plantega n’Uviéu y Xixón, nes mesmes feches y con idéntiques tases d’inscripción, pero centraos en conteníos llingüísticos. Con calter xeneral, los alumnos recibirán un certificáu d’aprovechamientu si acrediten una asistencia de polo menos el 75 por cientu, y algamarán un diploma si asisten a lo menos al 85 por cientu de les clases y amás superen un esamen.

La convocatoria de cursos d’arabismu enmárcase na ufierta de monográficos d’idiomes de la Universidá pal prósimu cursu, un programa nel que s’inclúin les enseñances d’inglés, alemán, italianu, portugués y francés aplicáu al turismu.

Web oficial de la Universidá d’Uviéu

Los estudiantes preuniversitarios superen por primer vegada el 90 por cientu d’aprobaos nes prebes de selectividá. Un total de 3.695 de los 4.087 alumnos que concurríen a los esámenes d’accesu a la Universidá -cuyes notes oficiales asoléyense güei- algamaron una nota superior al 5, con bonos resultaos en Bioloxía, Matemátiques y Llingua Castellana y peores calificaciones n’Inglés.

Según los cálculos de la Universidá d’Uviéu, institución encargada de la convocatoria, cordinación y corrección de les prebes, el porcentaxe d’aprobaos allúgase esti añu nel 90,4 por cientu, lo que supón el ‘techu’ algamáu na hestoria de la selectividá n’Asturies y facilitará-yos a los estudiantes l’accesu en primer instancia a la carrera que nagüen estudiar.

La nota media de los esámenes, magar del ascensu porcentual d’aprobaos -un 1,5 por cientu respecto a 2003-, asítiase poco más arriba de la calificación de suficiente: Un 5,85, pero con variaciones sustanciales ente unes y otres asignatures. Asina, los alumnos esaminaos superaron nun 86 por cientu la preba de Bioloxía, un 82,5 por cientu aprobó Llingua Castellana, un 79 por cientu sacó más d’un 5 en Matemátiques y alpenes un 55 por cientu fue quien a aprobar l’esamen d’Inglés.

Con resultaos talos, les previsiones de la Universidá pasen por poder asigna-yos un pupitre nes sos aules a nueve de cada diez estudiantes asturianos coles prebes superaes, anque abondos de los alumnos optarán por titulaciones non impartíes n’Asturies y tramitarán la so matrícula n’Universidaes ayenes a la d’Uviéu.

Los esámenes de selectividá, qu’en principiu diben cellebrase por última vegada pero qu’agora tendrán continuidá al paralizar el nuevu Gobiernu central l’aplicación de la Llei orgánica de Calidá de la Enseñanza, movilizaron a más de 4.000 estudiantes preuniversitarios del Principáu ente los pasaos 15 y 17 de xunu.

Llistáu de calificaciones oficiales

Más de 4.000 estudiantes d’Enseñanza Secundaria afronten a partir de güei n’Asturies les que diben ser les caberes prebes d’accesu a la Universidá, agora manteníes depués que’l nuevu Gobiernu central paralizare l’aplicación de la Llei orgánica de Calidá de la Enseñanza. Los esámenes prollongaránse hasta’l xueves en 15 sedes allugaes en Xixón, Uviéu, Avilés, Llangréu, Mieres, Ribesella, Tapia de Casariego y Cangas de Narcea.

Nesta ocasión, los correctores de los exercicios tendrán que revisar 230 esámenes menos que na pasada edición de la selectividá, porque la baxada demográfica qu’afecta a les xeneraciones más moces d’estudiantes provocó qu’esti añu se presenten a les prebes un total de 230 alumnos menos qu’en 2003.

Les calificaciones algamaes nos esámenes d’accesu a la Universidá determinen, xunta les notes medies del Bachilleratu, la calificación cola que cada estudiante podrá optar a estudiar una carrera universitaria qu’esixe una determinada puntuación mínima p’acceder a los sos estudios.

N’Asturies, ensin embargu, la nota de corte alpenes va impedi-yos a los alumnos cursar la carrera que-yos pete, yá que’l descensu nel númberu d’estudiantes que concurren a la selectividá fai baxar la competencia ente los nuevos universitarios a la hora d’acceder a unos estudios superiores.

Xenerar “complicidá” col llibru nos neños porque si s’algama esa rellación de críu, nun s’escaez de mayor. El director xeneral de Promoción Cultural del Principáu, Carlos Madera, resumió esta mañana con esos términos l’envís del programa ‘Medrar lleendo’, que’l Principáu puso en marcha ente febreru y mayu pa fomentar la llectura ente los escolinos y pol que pasaron más de dos mil estudiantes en 30 biblioteques públiques.

“La meyor inversión en cultura nun ye la del lladriyu”, apuntó Madera nuna comparecencia na biblioteca uvieína d’El Fontán, “sinón la que se fai nel valor de lo pequeño”, n’alusión a la familizarización de los asturianos de menor edá col hábitu de la llectura. Y el balance de la iniciativa ‘Medrar lleendo’ nel cursu escolar qu’agora acaba demuestra, según l’altu cargu, que la iniciativa tien una mui bona acoyida y ta dafechu consolidada.

Nos cuatro meses que se prollongó’l programa, con un presupuestu global de 58.000 euros, los 23 talleres de llectura y creación lliteraria programaos atroparon l’interés de más de 600 escolinos, mmientres que polos 30 alcuentros con autores pasaron unos 1.500 estudiantes.

Pa participar como ponentes na edición de 2004, el Principáu escoyó a los escritores asturianos Antón García, Ricardo Menéndez Salmón, Miguel Rodríguez Muñoz, Susana Pérez Alonso, Pedro de Silva y Manuel Herrero Montouto.

Les actividaes, qu’incluyeron cuentacuentos y formación a mediadores de la llectura y cuyos organizadores quieren facer llegar na prósima edición a “más xente y más puntos”, desendolcáronse tanto n’asturianu como en llingua castellana.

Mil places y 19 cursos más qu’hai un añu. La Universidá d’Uviéu amplía la so ufierta de cursos de veranu, que na so mayor parte cellebraránse n’Uviéu y Xixón pero que tamién s’espardírán pero otros quince conceyos d’Asturies, con una atención especial a la Tecnoloxía, la Informática y les Humanidaes.

Eses tres estayes contarán, respectivamente, con 38, 36 y 22 cursos, mientres qu’otros 22 monográficos tarán englobaos na estaya de Ciencies de la Salú, 20 tendrán que ver cola Economía y 19 más pertenecerán a otres árees de les Ciencies Sociales.

Pa tomar parte de toos esos cursos, la Universidá habilita un total de 7.288 places y tien previsto espardir la so actividá per Avilés, Cangas d’Onís, Castropol, Llangréu, Llanes, L.luarca, Mieres, Ayer, Noreña, Salas, Santolín d’Ibias, Tapia, Tinéu, A Veiga d’Eo y La Villa.

Josefina Aldecoa pronunciará la conferencia inagural de los cursos de veranu, que versará sobro lliteratura, el 5 de xunetu na Cátedra Xovellanos de Xixón, mientres qu’un investigador de la Universidá de Seúl espertu na clonación de célules madre intervendrá a mediaos d’esi mesmu mes nuna conferencia nel Aula Magna.

Un total de 49 cursos p’aprovechar el tiempu llibre en veranu. La Universidá Popular de Xixón abre mañana el plazu de matrícula pa la so ufierta formativa estival, qu’inclúi monográficos de risoterapia, fotografía, botánica, informática y hip-hop, ente otres materies, a precios que van de los 9 a los 39 euros.

El pagu podrá formalizase tanto nes redes de caxeros ciudadanos y de Caxastur, como na páxina web del Ayuntamientu de Xixón, onde quedarán reservada la cuarta parte de les places disponibles pa los cursos, poco más d’ochocientes en total.

El plazu pa la matriculación permanecerá abiertu hasta’l prósimu 18 de xunu nel edificiu de la vieya pescadería municipal y nos centros municipales de Xixón-Sur, El Coto, L’Arena y La Calzada. Estos cuatro equipamientos acoyerán les actividaes de tolos cursos programaos, xunta l’Antiguu Institutu y los centros d’El Natahoyo, El Llano y Vega-La Camocha.

La Universidá Popular de Xixón añade 19 cursos de conteníos inéditos na so programación pal veranu de 2004, qu’ufren a los ciudadanos deprender dancia brasileña o caligrafía árabe; familiarizase col usu de la plastilina n’amimaciones audiovisuales; producir música ellectrónica; asimilar técniques pa contar cuentos, o saca-y partíu a una cámara fotogáfica dixital.

Web del Ayuntamientu de Xixón

L’ampliación del campus universitariu de Mieres da’l so primer gran pasu burocráticu. El Conseyu de Gobiernu’l Principáu d’Asturies aprobó, na so xuntanza de güei, autorizar un gastu de 3,6 millones d’euros colos que se-y pagará al Ayuntamientu la espropiación forzosa de terrenos nel recintu ferial municipal, nos que va edificase l’ampliación del campus.

El desembolsu del Executivu autonómicu, qu’afecta a bienes inmuebles incluyíos na Reserva Rexonal de Suelu nel Pozu Barreos, abrirá-y la puerta a la configuración d’un campus en sentíu estrictu, a partir del actual Edificiu Científicu Tecnolóxicu, colos güeyos puestos, según el Gobiernu asturianu, nel desendolcu y consolidación del potencial universitariu de Mieres.

La operación respuende a un alcuerdu previu ente’l Principáu y l’Ayuntamientu, y ensértase nel Plan de restructuración de la Minería’l Carbón col envís de da-y puxu a actividaes alternatives a esa industria nes cuenques mineres asturianes.

La Universidá d’Uviéu refuerza la so apuesta por internet como alternativa a les clases presenciales. La institución académica asturiana impartirá el prósimu cursu 15 asignatures más al traviés de la rede, nuna iniciativa en comuña con otres ocho universidaes españoles qu’inclúi amás la ufierta d’un cursu d’especialización en tecnoloxíes de la información y les comunicaciones.

Cola ampliación del catálogu de materies ‘on line’, qu’esti cursu tá en 41, la Universidá asturiana pasará a ufrir a partir de la seronda prósima un total de 56 asignatures per internet que tamién podrán cursase nes otro ocho instituciones académiques qu’integren el denomináu Grupu 9 d’Universidaes públiques, les de Navarra, La Rioja, Estremadura, País Vascu, Zaragoza, Baleares, Cantabria y Castiella-La Mancha.

La otra cara de l’apuesta poles nueves tecnoloxíes na actividá docente, la del estudiu específicu de la innovación tecnolóxica, promocionaránlu eses universidaes con un máster sobro entornos virtuales de comunicación que los responsables universitarios quieren echar a andar a primeros del añu prósimu y que tendrá una parte común a tolos centros y otra específica pa los estudiantes de cada Universidá.

Representantes del Grupu 9 d’Universidaes españoles, ente elles la d’Uviéu, analicen en Logroño la viabilidá de los sos proyectos comunes, n’especial el campus virtual compartíu -ufierta per internet d’asignatures comunes pa los alumnos de les nueve universidaes-, esperiencia única nel sistema universitariu español.

Dos mil d’ente 30.000. Los estudiantes de la Universidá d’Uviéu amosaron ayeri col so absentismu electoral una evidente falta d’interés pola elección del claustru, el másimu órganu de la institución académica asturiana, que depués de la entrada en vigor de la Llei Orgánica d’Universidaes vio amenorgaes les sos competencies al dexar de poder designar al rector. Sólo un 12,7 por cientu de los llamaos a votar participaron nos comicios.

El refalfiu foi especialmente sensible nel collectivu de los alumnos, nel que namás acudieron a votar 2017 estudiantes de los 29.688 con drechu a sufraxu, lo que supón una participación del 6 por cientu nunes elecciones que, con calter xeneral, quedaron dafechu desdibuxaes poles cifres globales: Votaron 4.293 docentes, alumnos y trabayadores d’alministración y servicios, cuando taben convocaos a les urnes un total de 33.785 electores.

En porcentaxes, los profesores doctores foron el collectivu con mayor índiz de participación (88 por cientu), siguíos del personal non docente (71 por cientu) y de los profesores funcionarios non doctores (55 por cientu). Los estudiantes de doctoráu foron los menos interesaos en participar nos comicios, con una tasa d’emisión del votu de namás el 2 por cientu.

A les elecciones d’ayeri concurríen 520 candidatos. El claustru ye l’órganu cimeru de gobiernu de la Universidá asturiana. Presidíu pol rector, la mayoría de los sos 300 puestos tán reservaos a los profesores, que nos sos distintos graos ocupen 195 places. Xunta estos casi doscientos docentes, nel claustru que salga de les inminentes elecciones sentaránse amás 75 representantes de los alumnos y 30 miembros del personal d’alministración y servicios.

Resultaos completos na web de la Universidá

La Universidá d’Uviéu vive una nueva xornada electoral. Selmanes depués de la ratificación de Juan Vázquez al frente’l rectoráu, unos 40.000 profesores, alumnos y emplegaos alministrativos elixen güei ente 520 candidatos a los 300 integrantes del nuevu claustru, l’órganu cimeru de gobiernu de la institución académica asturiana. De los comicios de güei saldrán tamién les xuntes de facultá, escuela y departamentu.

Les 73 meses electorales tán abiertes yá dende les 10 de la mañana y permanecerán a disposición de los votantes hasta el so pieslle, a les siete de la tarde, y sustenten un procesu electoral que completa el calendariu inmediatu de renovación interna de la Universidá dos selmanes depués de que Vázquez tomara posesión como rector nel so segundu mandatu, arrodiáu d’un equipu de signu continuista pero con dalgunos cambios.

El claustru que salga d’estes elecciones completará poro el camín de la renovación de los órganos decisorios de la Universidá d’Uviéu, qu’habrá culminar antes d’avientu de 2005 col nomamientu de decanos y directores de centros, departamentos ya institutos universitarios.

El claustru ye l’órganu cimeru de gobiernu de la Universidá asturiana. Presidíu pol rector, la mayoría de los sos 300 puestos tán reservaos a los profesores, que nos sos distintos graos ocupen 195 places. Xunta estos casi doscientos docentes, nel claustru que salga de les inminentes elecciones sentaránse amás 75 representantes de los alumnos y 30 miembros del personal d’alministración y servicios.