Educación

L’Institutu d’Enseñanza Secundaria de la Universidá Llaboral de Xixón incumple la llegalidá vixente en materia d’ufierta educativa de llingua asturiana al nun permitir a los alumnos estudiar esta asignatura optativa por falta de profesoráu. Nun comunicáu fechu públicu el Bloque por Asturies denuncia esta situación y la que carez otru centru xixonés, l’IES Fernández Vallín, y pide a la conseyería d’Educación qu’igue esti incumplimientu de la normativa llegal tocante a la enseñanza del idioma asturianu.

Talo denunció nes últimes selmanes l’Academia de la Llingua Asturiana y los sindicatos d’enseñanza l’empiezu del cursu escolar 2004-2005 presenta resaltables deficiencies en materia d’ufierta educativa de llingua asturiana. Son dellos los centros de Secundaria que nun cuenten con profesoráu específicu pa la enseñanza d’esta asignatura optativa y al pesar de lo dispuesto na normativa autonómica que compromete el que tolos centros dispongan de la ufierta d’esta asignatura y de les quexes de los propios alumnos, la Conseyería d’Educación inda nun s’amosó enfotada en solventar estes carencies.

Nel so comunicáu el Bloque por Asturies, sociu de gobiernu del tripartitu asturianu, amuesa’l so apoyu a los alumnos de la Universidá Llaboral y del Institutu Fernández Vallín y pide al conseyeru d’Educación “que ponga remediu a esta situación d’illegalidá” pa que los alumnos que lo quieran puedan recibir clases d’asturianu. Al empar el Bloque encamienta a los directores de los centros educativos pa que “tomen nota de lo asocedío esti cursu cola matriculación de Llingua Asturiana y que pal prósimu cursu 2005-2006 tomen les midíes necesaries pa garantizar que nos sos respectivos centrors l’alumnáu tenga la posibilidá d’escoyer esta asignatura”, y pídese a la Conseyería d’Educación que se disponga d’un númberu “afayadizu de mayestros pa garantizar qu’esta matriculación tenga dempués un correctu desarrolu durante’l cursu”.

La falta de profesoráu de Llingua Asturiana provodó al empiezu del cursu dellos actos de denuncia y protesta protagonizaos polos padres d’una alumna del IES del Naranco, d’Uviéu, a la que se-y ufiertaba como única solución pa recibir clases d’asturianu el so treslláu de centru.

La campaña entamada pola Confederación Católica Nacional de Padres de Familia y Padres d’Alumnos (CONCAPA) contra los planes educativos del gobiernu central en materia de relixón emprimó n’Asturies cola distribución nos oficios dominicales de fueyes informatives y de recoyida de firmes. Según coinciden delles fontes la so incidencia na nuestra comunidá foi escasa y el so apoyu más significativu foi l’espresáu pol arzobiespu Osoro, qu’afaló a los párrocos de la so diócesis a sofitar la campaña.

Nes últimes selmanes la Conferencia Episcopal d’España tentó distanciase formalmente de la campaña contra los planes educativos del gobiernu de Zapatero afirmando que la Ilesia, como tala institución, nun promueve campaña dala, sicasí reservándose el derechu a encamentar a los sos fieles que sofiten cualquier iniciativa empobinada a defender el tratamientu hasta agora dau a l’asignatura de relixón dientro la enseñanza pública. N’Asturies, l’Arzobispu Osoro aprovechó el so sermón dominical pa pidir a los párrocos de la so diócesis que favorezan el desenvolvimientu de la campaña de los padres católicos y criticó les intenciones del gobiernu. La incidencia de la campaña na nuestra comunidá nun foi importante de momento. Al pesar del calter conservador del actual titular de la diócesis asturiana, el cleru de la nuestra comunidá tradicionalmente enclináu a postures más progresistes dientro la Ilesia, nun paez ún de los más enfotaos na campaña entamada pola CONCAPA.

Esta campaña quier consiguir que la situación de l’asignatura de relixón católica caltenga l’estatus conseñáu nos planes educativos del anterior gobiernu del Partíu Popular. Según datos facilitaos pol ministeriu d’Educación del gobiernu del PSOE pal prósimu añu l’aportación del estáu destinada a sufragar los gastos salariales de los profesores d’esta materia va ser de 101 millones d’euros, un aumentu del 18% respective a 2004. La ilesia católica benefíciase del 98’5% del presupuestu destináu a sofitar la enseñanza relixosa, según estos datos.

La reivindicación llingüística, nel xulgáu. Arturu Bermeyu, el pa que reclama clases d’asturianu pa la so fía nel institutu de Secundaria ‘Monte Naranco’ d’Uviéu, asumió esta mañana una multa de 90 euros por desobediencia y resistencia a l’autoridá depués que la Policía lu detuviera ayeri na sé d’Educación y Ciencia, onde permanecía a la espera d’una rempuesta personal del conseyeru, José Luis Iglesias Riopedre.

Bermeyu decidió, atendiendo’l conseyu del so asistente xurídicu, reconocer los fechos que se-y imputaben pa evitar una posible conderga mayor y pactó col ministeriu fiscal una multa de 90 euros antes d’entrar a la sala de vistes, onde’l xuez ratificó la sanción. “Ye triste que conderguen al qu’intenta facer cumplir la llei y que quede llibre quien la incumple”, señaló Bermeyu depués del xuiciu.

Los fechos que llevaron a Arturu Bermeyu énte’l xuez produxéronse ayeri, cuando l’agora condergáu foi deteníu na Conseyería d’Educación pola Policía depués d’esixi-y a Riopedre una cita pa iguar problemes d’escolarización n’asturianu nun momentu nel que’l conseyeru abandonaba’l so despachu.

Arturu Bermeyu, que reconoz qu’increpó al titular d’Educación llamándolu “cobarde”, pero que nun principiu asegura que se dirixó a él “con respetu”, foi treslladáu entós a dependencies policiales, onde permaneció varies hores ensin que se-y lleeren los sos drechos, y acudió esta mañana al xulgáu.

Enfotáu dende hai un añu en que la so fía, Catuxa Bermeyu, reciba clase de Llingua Asturiana nel so institutu pesie a nun haber quórum d’alumnos que soliciten esa asignatura, Arturu Bermeyu acudiera na mañana d’ayeri a la Conseyería d’Educación aprovechando una protesta de los pas d’estudiantes del centru xixonés de la Universidá Llaboral, y darréu finó esa movilización permaneció nel edificiu, sentáu en suelu, en demanda d’una rempuesta personal del conseyeru. “Pido-y que me dea día y hora dende hai un añu”, precisó Bermeyu.

Pesie a la sanción impuesta, Arturu Bermeyu aseguró güei que va persistir na demanda d’una escolarización n’asturianu afayadiza, acordies colos drechos que garanticen la Constitución española y la Llei d’Usu y Promoción del Asturianu.

La Universidá d’Uviéu quier dar un saltu nel so númberu de caderalgos. L’equipu lideráu pol rector, Juan Vázquez, plantega reforzar la escelencia’l so profesoráu con venti nueves cátedres, la primer convocatoria en seis años pa cubrir esti tipu de places. El rectoráu propón crear amás ocho nuevos puestos de profesores titulares.

Acordies con ún de los oxetivos prioritarios del equipu de Vázquez, que gobierna la institución académica asturiana nel so segundu mandatu rectoral, los responsables de la Universidá pretenden entamar places de caderalgu en disciplines nes qu’agora nun esisten, reordenar la plantiella’l profesoráu y atender a los méritos de dalgunos docentes, según publica na so edición de güei el diariu La Nueva España.

En tou casu, los planes del equipu rectoral necesiten entá el preste del Conseyu de Gobiernu na so última xuntanza del mes de setiembre, y queden pendientes asinamesmo de la so tramitación posterior nel Conseyu de Coordinación Universitaria.

El rector quier da-y puxu a la convocatoria de places de profesoráu estable, ralentizada nos últimos años, al traviés de procesos añales que permitan dir completando la plantiella de caderalgos y docentes titulares. L’equipu de Vázquez habrá iguar inda la situación de los profesores asociaos, na que’l rector demanda la implicación del Principáu.

Dos llibros pa da-y continuidá al creciente interés de los escolinos de Primaria pola llingua asturiana. Les cases editoriales Vtp y Trabe tan acabante publicar los llibros de testu ‘Rede 1’ y ‘Llambrión’, respectivamente, dos materiales didácticos pioneros colos que quieren facilitar el deprendizaxe d’asturianu na Educación Secundaria Obligatoria (ESO).

No que cinca a la editorial xixonesa Vtp, el llibru asoleyáu ta ellaboráu en comuña poles autores Paz Fonticiella y María Esther García, y empobínase a alumnos del primer cursu de la ESO.

Pa esi nivel ta concebíu tamién el manual editáu pola casa uvieína Trabe, que se viende a un preciu de 14 euros ya incorpora un cd nel que se reproducen conversaciones cotidianes y llectures de testos lliterarios n’asturianu col envís de potenciar la enseñanza oral de la llingua, en cuenta d’afondar n’aspectos puramente mecánicos.

La fechura’l llibru de Trabe implicó a un equipu de persones cordinaes por Severino Antuña, profesor del institutu entreguín ‘Nuestra Señora de Covadonga’, ente les que figuren Alberto Cobreros, Elvira Laruelo, Nuria Campo y Antón García, responsable de la editorial. José Luis Atienza asumió l’asesoría didáctica y Xulio Viejo fízose cargu de la supervisión llingüística, mientres que los principales debuxantes son Carme Martínez y Alfonso Zapico.

L’asignatura ‘Lengua tradicional: bable/asturiano’ desapaez na Secundaria. El Gobiernu autonómicu aprobó na so xuntanza de güei la modificación del currículu d’esa materia na Educación Secundaria Obligatoria (ESO), que mantién no esencial el testu en vigor dende 2002 pero recupera la denominación xenérica ‘Llingua Asturiana y Lliteratura’.

Acaben asina más de dos años d’engarradiella terminolóxica ente l’asturianismu y sectores de la comunidá educativa, per un llau, y la Conseyería d’Educación y Ciencia, por otru, con una rectificación llegal que l’Executivu xustifica, nel decretu aprobáu güei, na necesidá de que l’asignatura de Llingua “reciba una única denominación en toles etapes educatives”.

De fechu, el cambiu resúmese nun artículu únicu desdobláu en dos puntos que desanicia la espresión ‘Lengua tradicional: bable/asturiano’ y camúdala pola de ‘Llingua Asturiana y Lliteratura’ nes 28 fueyes qu’integren el currículu, nuna modificación que respeta no esencial el testu orixinal del currículu -planificación de la educación con conteníos, plazos y oxetivos mui precisos- ya inclúi puntuales y pequeñes omisiones na introducción respectu a la norma qu’agora ta en vigor, tamién rellacionaes cola terminoloxía más que colos conteníos.

Amás de modificar el testu referíu a la Educación Secundaria Obligatoria, l’Executivu sacó alantre na so xuntanza de güei el currículu de Llingua Asturiana pal Bachilleratu. Dambes disposiciones cuenten col informe favoratible del Conseyu Escolar del Principáu d’Asturies.

El Gobiernu ultima la recuperación de la espresión ‘Llingua Asturiana’ nel currículu de Secundaria

Menos que l’añu pasáu. Los esámenes de les Prebes d’Accesu a la Universidá (PAU) na so convocatoria de setiembre arranquen güei con un 10 por cientu menos d’alumnos matriculaos qu’en 2003, por mor de l’alta cifra d’aprobaos rexistrada en xunu y de la baxada xeneralizada d’estudiantes nel Bachilleratu. Más de mil alumnos esaminaránse hasta’l vienres en 16 sés allugaes n’Uviéu, Xixón, Avilés, Llangréu, Mieres, Cangas, Tapia y Ribesella.

Acordies cola planificación afitada pola Universidá d’Uviéu, l’empiezu de les prebes ta previstu pa les 15 hores de güei con una esplicación previa a los primeros esámenes, los de Filosofía, Historia y Llingua Castellana. Na xornada de mañana, xueves, cellebraránse les prebes d’idioma estranxeru, Química, Llatín, Física, Economía, Matemátiques y Ciencies de la Tierra.

Los alrodiu de 1.060 alumnos que tan convocaos pa los esámenes finarán los sos exercicios el vienres, darréu completen les prebes d’Arte, Música, Griegu, Bioloxía, Xeografía, Debuxu y enseñances técniques aplicaes.

Los estudiantes qu’algamen l’aprobáu tendrán entá posibilidaes d’acceder a dalgunes carreres con places llimitaes na Universidá d’Uviéu, ente elles Turismu, Topografía, Bioloxía y Maxisteriu, y podrán solicitar asinamesmo l’almisión n’otres titulaciones ensin númberu másimu de places.

Web oficial de la Universidá d’Uviéu

L’asignatura de Llingua Asturiana vuelve a esistir como tala na Educación Secundaria. Un nuevu testu’l currículu d’esa materia que coincide no esencial col que yá ta en vigor dende 2002, pero que desanicia la denominación ‘Lengua tradicional: Bable/Asturiano’, algamará’l preste del Conseyu de Gobiernu na so prósima xuntanza, fixada pal xueves, según la previsión de la Conseyería d’Educación y Ciencia.

Al traviés d’un artículu únicu desdobláu en dos puntos, l’Executivu aprobará la modificación del decretu nel que, en mayu de 2002, s’estructuró con calter xeneral la Educación Secundaria Obligatoria (ESO) n’Asturies, de sutaque’l Principáu asumió les competencies nesa estaya.

Nesa disposición qu’agora se modifica afitábase un currículu -planificación de la educación con conteníos, plazos y oxetivos mui precisos- específicu pa l’asignatura ‘Lengua tradicional: Bable/Asturiano y Literatura’, denominación que desapaez dafechu y se sustitúi pola de ‘Llingua Asturiana y Lliteratura’. Acordies con esi cambiu, nes 28 fueyes qu’integren el currículu elimínense toles referencies al ‘bable/asturiano’ y empléguense les espresiones ‘llingua asturiana’ o ‘asturianu’ pa designar esi idioma.

En sustancia, esi ye l’únicu cambiu que’l Gobiernu prevé aprobar pasao mañana sobro’l testu orixinal de l’asignatura de Llingua en Secundaria, sacante pequeñes omisiones na introducción respectu a la norma qu’agora ta en vigor, tamién rellacionaes cola terminoloxía, más que colos conteníos.

Crítiques al testu orixinal

L’aprobación, hai agora más de dos años, d’un currículu específicu pa la materia de ‘Lengua tradicional: Bable/Asturiano’ collechó delles crítiques dende l’ámbitu del asturianismu qu’agora se quieren aplacar. Sectores del profesoráu censuraron amás lo que na so opinión foi l’ausencia d’un tratamientu del asturianu como llingua que sufre un procesu de minorización, en clara desventaxa respecto al castellán, y denunciaron una falta de correspondencia ente lo afitao nel testu y la práctica cotidiana de la enseñanaza de Llingua nos centros de Secundaria.

El Gobiernu autonómicu prevé asinamesmo aprobar darréu el currículu d’asturianu pal nivel de Primaria, qu’apuesta pola oralidá del idioma, llama a emplegar la informática na ellaboración de testos y plantégase formar ciudadanos que participen de mou “constructivu y respetuosu nos distintos foros de comunicación”.

El nuevu currículu de Llingua prioriza l’idioma faláu y prevé formar escolinos “constructivos y respetuosos”

Un pisu de baldre durante’l cursu a cambiu d’ufri-y compañía y collaboración a la persona mayor que vive nél. La Universidá d’Uviéu ultima la puesta en marcha del programa ‘Conviviendo y compartiendo’, una iniciativa que yá s’aplica con ésitu n’otres comunidaes autónomes y que quier alitar l’intercambiu y el respetu interxeneracional con dalgunos requisitos concretos: Compartir gastos de lluz, pagar la propia manutención y usar el teléfonu namás pa recibir llamaes, ente otros.

El programa, entamáu por Psicólogos Sin Fronteres, Cáritas, Caxastur, Caxa Rural, l’Ayuntamientu d’Uviéu y la propia Universidá, empobínase a estudiantes que se ven obligaos a residir fuera’l domiciliu familiar durante’l cursu académicu y a persones mayores de 65 años que viven soles. Los primeros queden obligaos a collaborar col anfitrión en xeres doméstiques y na fechura de pequeñes xestiones, mientres que los mayores deberán respetar en tou casu l’horariu de clases y l’actividá académica del estudiante agospiáu en so casa.

Pa pesllar el ‘pactu’ ente dambes partes, que-yos aforra’l pagu d’un alquiler a los alumnos y alívia-yos la soledá a les persones mayores, los responsables del programa entrevisten a cada estudiante y cada anfitrión, y presiden la firma d’un compromisu xenéricu de convivencia que pue ser ampliáu en cada casu con cláusules concretes que regulen la presencia d’animales de compañía o la posibilidá o non de fumar nel domiciliu elixíu.

Según precisaron los organizadores de la iniciativa, los técnicos que supervisen el programa alcuéntrense entá nel procesu de captación y evaluación d’aspirantes, col enfotu de proporciona-yos vivienda de baldre a un altu númberu d’alumnos y de facilita-yos la vida cotidiana al mayor númberu posible d’asturianos mayores de 65 años dispuestos a agospiar a un universitariu en so casa.

Web de la Universidá d’Uviéu

El nuevu cursu escolar arranca güei n’Asturies con atención especial al alumnáu inmigrante. Según afita nes circulares d’aniciu de cursu la Conseyería d’Educación y Ciencia, los escolinos que s’incorporen al sistema públicu d’enseñanza con conocimientos nulos o mui baxos de la llingua castellana podrán participar en dos aules intensives, n’Uviéu y Xixón, d’hasta 30 hores selmanales pa incorporase llueu con normalidá a les clases.

Los alumnos, preferentemente inmigrantes aportaos dende África y Asia, pero tamién d’Europa l’Este, podrán permanecer neses aules especiales un másimu d’ente 40 y 60 díes llectivos -en proporción a les hores que pasen n’elles cada selmana-, y recibirán enseñances llingüístiques a lo llargo d’un másimu de 30 hores selmanales.

Educación adscribirá a les dos aules intensives a los escolinos cuyos centros consideren especialmente necesitaos de deprender a espresase en castellán, pero los alumnos con baxa o nula capacitación llingüística n’español podrán tamién recibir clases especiales, de forma temporal, nos sos propios colexos ya institutos.

Asina, los inmigrantes que s’incorporen a los centros nel tercer ciclu de Primaria tendrán a la so disposición un programa d’ente 10 y 12 hores selmanales pa deprender castellán al marxe de los sos compañeros, compartiendo con ellos les clases d’Educación Física, Llingua Estranxera y Educación Artística.

Nel casu de los alumnos que lleguen a los institutos pa cursar la Enseñanza Secundaria Obligatoria (ESO), el másimu selmanal sedrá de tres hores al día, y les clases a les qu’acudirán con normalidá sedrán les de Música, Plástica, Tecnoloxía, Educación Física, Llingua Estranxera y Tutoría.

En dambos casos, el númberu másimu d’escolinos por aula establezse en 12 alumnos, y el tiempu de permanencia nes aules especiales condiciónase al mínimu imprescindible pa que los inmigrantes alquieran los conocimientos necesarios pa falar y escribir en castellán y poder asina incorporase con normalidá a les clases ordinaries.

Magar que’l cursu escolar 2004-2005 empieza güei en tolos niveles educativos non universitarios, l’aniciu de les clases produciráse’l xueves 9 de setiembre na Educación Infantil, Primaria y Especial, fecha que se retrasa al llunes 13 pa los alumnos de Secundaria.