Educación

El cursu pa encuestadores de material oral entamáu pola Oficina de Política Llingüística en colaboración col Seminariu de Filoloxía Asturiana de la Universidá d’Uviéu superó les espectatives de matriculación previstes polos organizadores y énte’l curiosu númberu de solicitúes la Conseyeria vióse na necesidá d’aumentar el númberu de places. El cursu de llingua asturiana pa periodistes convocáu al empar que l’anterior inda nun cubrió les trenta y cinco places programaes.

Los responsables de Política Llingüística del Principáu manifestaron el so contentu pol ésitu de la convocatoria del cursu d’encuestadores de toponimia y patrimoniu oral programáu pa filólogos y que tuvo de ser ampliáu nes sos places p’atender la demanda recibida de solicitúes. Bona parte de los trabayos fechos por estos encuestadores va utilizase nos llabores de la Xunta de Toponimia a la hora d’entamar los nomenclátores de los espedientes por conceyos.El cursu va impartise en Xixón y n’Uvièu dende’l 25 d’ochobre al 15 d’avientu.

L’otru cursu programáu por Cultura en colaboración col Seminariu de Filoloxía Asturiana, empobináu a profesionales de los medios d’información inda tien abiertu’l plazu pa matriculase y les trenta y cinco places previstes ensin cubrir. El plazu va tar abiertu hasta’l prósimu 11 de payares y el cursu va desarrollase ente’l día de fin de la matrícula hasta’l 17 d’avientu.

El sindicatu SUATEA amuésase esmolecíu pola manera na que la Conseyería d’Educación ta cubriendo les places de llingua asturiana en Primaria. Fontes de la organización sindical manifestaron a esti mediu que’l sistema emplegáu anguañu pola administración educativa propicia’l que nun cubran les vacantes los candidatos cola másima puntuación como ocurre nel restu de les especialidaes.

La situación denunciada por SUATEA espárdese a otros niveles d’enseñanza nel casu de l’asignatura d’asturianu. La constatación d’esta situación que’l sindicatu califica de “inxusta” vieno peles quexes espresaes en feches recientes por docentes qu’al pesar de tener una puntuación superior a la d’otros candidatos nun fueron convocaos pa cubrir places.

Pa SUATEA la única manera d’acabar con esti tipu de situaciones diba ser l’apertura de nueves bolses dende les que se pudieran cubrir les places atendiendo al perfil más afayadizu de los candidatos pola so puntuación.Fontes del sindicatu manifestaron a ASTURNEWS que l’apertura d’estes bolses ye avezao n’otres asignatures: “el cursu pasáu abriéronse pa alemán, latín y griegu, por eso nun entendemos por qué nun se fai lo mesmo col asturianu”.

Anguaño l’asignatura de llingua asturiana impártase nun total de 213 centros de primaria, 66 d’E.S.O y 18 de Bachilleratu na enseñanza pública. El númberu d’alumnos que reciben esta asignatura ye de 14.999 en primaria y de 4.071 en secundaria, a los qu’imparten clase 149 profesores nel primer de los niveles y 71 nel segundu nivel. Los datos referentes a la enseñanza concertada amuesen que nos tres únicos centros onde s’imparte asturianu cursen l’asignatura 159 alumnos en primaria y 53 en secundaria.

La organización moza Darréu entamó una campaña empobinada a sensibilizar a los alumnos de los institutos de medies na necesidá de reivindicar el derechu a una escolarización n’asturianu. La formación nacionalista xuvenil denuncia na so campaña la política educativa del Principáu en materia llingüística y movilizar a los estudiantes por una enseñanza nel nuestru idioma.

La campaña titulada ‘Escolarización n’asturianu ya! Tenemos drechu’ va consistir na colocación de cartelos nos centros docentes onde la organización moza tien militantes y tamién nos IES onde pueda haber estudiantes interesaos en reivindicar el so derechu a escolarizase en llingua asturiana.

Darréu afirma que con esta campaña “la mocedá movilizaráse pa esparder dientru y fuera de los centros d’enseñanza esta vindicación nun contestu nel qu’el gobiernu del ‘Principado’ sigui reprimiendo’l nel siglu XXI, la oficialidá y el drechu los asturianos a estudiar la so llingua y nin garantiza siquiera la mísera optatividá de ‘Llingua Asturiana’ en tolos IES”. La organización moza ufierta na so páxina web la posibilidá de descargar el cartelu de la so campaña pol asturianu nos institutos.

Los sindicatos d’enseñanza desixen la dimisión de Dolores Guerra, Directora d’Ordenación Académica de la Conseyería d’Educación, pol unvíu d’una circular non negociada cola Xunta de Personal Docente na que se camuden les condiciones de trabayu de los Equipos d’Orientación Educativa. Los representantes sindcales convoquen una concentración esti xueves 13 énte la Conseyería como protesta pola circular emitida.

La Xunta de Personal Docente denuncia nun comunicáu lo que considera “continua imposición” d’Educación n’enmitir circulares non negociaes colos sindicatos. La circular fechada 3n 4/2005 ye la que motiva la protesta de les organizaciones sindicales que desixen la so retirada y la apertura d’una negociación respective al papelu de los Equipos d’Orientación Educativa y Psicopedagóxica (EOEP’s).

Los sindicatos acusen a la Conseyería d’aumentar los horarios, funciones y llabores de los EOEP’s ensin aumentar les plantielles hasta niveles qu’estes organizaciones califiquen de “inadmisibles”.

Los representantes del profesoráu consideren a la Directora d’Ordenación Académica, Dolores Guerra, responsable de la circular 4/2005 y de los planes conteníos nella y esi ye’l motivu pol que piden la so dimisión. La concentración de los sindicatos ta prevista pa esta tarde a les 17.30 énte la sé de la Conseyería d’Educación.

El Tribunal Superior de Xusticia d’Asturies considera que dellos conceptos usaos pola Conseyería d’Educación pa calificar al profesoráu en situación provisional nun tienen validez llegal. La másima instancia xurídica del Principáu da-y asina la razón al sindicatu SUATEA que presentara delles reclamaciones al respective.

Pal Tribunal los conceptos de plantilles funcionales o provisionales y la posibilidá de declarar al profesoráu como “sobrante d’horariu” o según la fórmula alcuñada nes Instrucciones de 2 de xunu de 2004 de la Dirección Xeneral de Recursos Humanos “profesoráu afectáu por una circunstancia qu’implique la perda provisional del destín que venía desempeñando” nun son llegales.

Enantes d’esta resolución ya esistíen precedentes que-y daben la razón a los sindicatos, como la sentencia 209/R de 16 de marzu de 2004 qu’anuló la Resolución de la Conseyería (16/7/2001) reguladora de les plantilles funcionales de personal docente y la cobertura de places, que según la sentencia afectaba al réximen estatutariu del personal docente non universitariu porque los conceptos de “plantilles funcionales” y “sobrante d’horariu” , de gran trascendencia, vulneren el principiu de “reserva de llei”.

El Conceyal d’Educación del Ayuntamientu d’Aviles, Román Álvarez, presentó la exposición La casa tradicional asturiana, fecha en collaboración cola Asociación Cultural Maura-Xeva y que ta dirixida a los escolinos de la Comarca avilesina. Na presentación tuvo acompañáu pola presidenta y la vicepresidenta de Maura-Xeva, Paz González y Noelia Martínez.

Con esta exposición, que se fairá nel primer trimestre d’esti cursu escolar, quier enseñase a los neños la vivienda de los oss antepasaos, asina como la evolución que tienen sufrío dalgunes ferramientes d’uso diariu, como les planches o les navayes d’afeitar.

La exposición va consistir na reproducción d’una casa tradicional dientro de l’antigua escuela de Miranda centrada principalmente en tres partes: la cocina, el cuartu y los preseos. Pa ello, va exponese una replica d’una cocina lareira, típica del occidente, o d’un cuartu con un colchón de llana o maíz. Amás, la muestra va contar con oxetos antiguos.

SUATEA denuncia nun comunicáu que l’empiezu del cursu escolar tracamundió la situación d’abondes places algamaes pol profesoráu interín. La falta de garantíes nel procesu d’adxudicación en xunetu ye la causa de los problemes y erros detectaos agora, afirma’l sindicatu.

Ente los encontos detectaos por SUATEA tán los erros nes places ufiertaes, nes adxudicaciones, el cambiu de criterios nes convocatories y el problema de les medies xornaes llaborales.

El sindicatu d’enseñances afirma qu’en xunetu faltaben places que después s’ufiertaron na convocatoria de setiembre y a les que ya nun pudieron optar los que fueran adjudicaos enantes del veranu. Tamíen, asegura’l sindicatu, adxudicáronse places que nun esistíen o qu’en setiembre cambiaron de perfil (xornada completa a media jornada, itinerantes, etc.). La mayoría de los afectaos habríen firmao contratu pa una vacante de tol cursu y, inda asina, obligáranlos a optar a baxes y sustituciones que salieron en setiembre, según la organización sindical.

Amás d’estos problemes detallaos por SUATEA, remémbrense otros como convocatories mui precipitaes, escasu tiempu de petición, cambios nos díes de la convocatoria, etc., y que tamién perxudicaron a los que tienen problemas p’acceder a la información de la Conseyería.

El sindicatu fai mención tamién de que’l profesoráu interín sigue escluíu de los complementos d’antigüedá, lo que supón una discriminación respective a otros trabayadores de la enseñanza. La situación de los interinos d’asturianu, sigue, al empar, ensin solventase nel empiezu del cursu.

La Universidá d’Uviéu acueye ente esti llunes 26 y esti martes 27 les XIV Xornaes de l’Asociación d’Economía de la Educación nes que diversos especialistes van xuntase a debatir alrodiu de los retos de la formación académica en relación al mercáu llaboral.

Educación y Equidá, Educaciòn y Mercáu de Trabayu o Producción Educativa son los títulos de delles de les comunicaciones sobre les que se van encadarmar estes xornaes d’estudiu.

Xixón encabeza los conceyos con más númberu d’alunnos de Llingua Asturiana na enseñanza Secundaria. Alrodiu de setecientos estudiantes cursen l’asignatura na rede pública del conceyu y ufiértase en tolos centros, a nun ser dos. Los datos féxolos públicos la conceyala d’Educación y Llingua, Carmen Rúa, qu’atribuyó a los responsables docentes de los institutos l’estímulu de fomentar l’asturianu como optativa.

La conceyala d’IX-Bloque aprovechó la presentación de l’Axenda Escolar 2005-2006 pa resaltar el llabor dsenvueltu pol profesoráu nos centros a la hora d’afalar a los alumnos na escoyeta de Llingua Asturiana y Lliteratura: “Hai institutos grandes como’l Xovellanos ensin alumnos y otros como’l Mata Xove que ye de los que más tién, ehí ye onde se nota los centros nos que se trabaya bien y los que no0n”, afirmó Rúa.

La responsable municipal d’Educación y Llingua presentó l’Axenda Escolar nel IES de la Universidá Llaboral, acompañada del representante del Bloque por Asturies nel Ayuntamientu de Xixón, Roberto Colunga, y del director del centru, Faustino García. L’actu valió pa remembrar el númberu d’estudiantes de Secundaria que cursen asturianu: setecientos en total. Na cabeza l’IES de la Llaboral con 98 alumnnos, síguenlu’l Mata Xove con 95 y el Montevil con 90; los que menos, l’IES Xovellanos, con 17 alumnos y el Nu.1 con 19.

La Escuela Municipal de Música de Cangas del Narcea abrió’l plazu pa matriculase nes clases de música y movimientu, dirixíes a menores de cuatro años, y de llinguaxe musical y instrumentu, pa menores de siete. El plazu de inscripción va tar abiertu hasta’l 27 de setiembre y los interesaos en participar nes clases, que van empezar el prósimu 3 d’ochobre deberán pasar pol Área de Cultura del Ayuntamientu de 9 a 14 h o de 16:30 a 18:30 h.

La Escuela Municipal de Música cuntó nel cursu pasáu con cerca de 100 alumnos y coles especialidaes de pianu, clarinete y guitarra. Pa esti nuevu cursu, si se consigue un númberu suficiente d’alumnos, va ampliase la ufierta instrumental con clases de trompeta.

La Escuela cellebró’l so Conciertu de Fin de Cursu’l pasáu mes de xunu nel Teatru Toreno. Pel escenariu pasaron los 97 alumnos onde interpretaron canciones tanto al pianu, como a la guitarra y al clarinete. Tamien los más pequeños tuvieron el so espaciu cola interpretación de varies coreografíes per parte de los diferentes grupos de música y movimientu. El conciertu pesllóse cola canción “Yá lleguen les vacaciones”, interpretada polos alumnos de Llinguaxe Musical.

La Escuela Municipal de Música de Cangas del Narcea nació hai cuatro años como un proyectu educativu integrador, innovador y únicu que quier dar rempuesta a una serie de necesidaes musicales detectaes nel nuesu territoriu. El primer oxetivu de la Escuela Municipal de Música ye ellevar el nivel musical de les persones en xeneral, y de los neños en particular.

La enseñanza musical na Escuela escomienza a edaes tempranes, a los cuatro años, y nun tien llímite d’edá pa matriculase. Les asignatures que se puen cursar son Música y Movimientu ( cuatro – ocho años ), Llinguaxe Musical y Instrumentu (pianu, clarinete y guitarra).