Educación

SUATEA va plantear nes sos desixencies pa meyorar les condiciones llaborales del profesoráu na mesa de negociación cola Conseyería d’Educación el derechu a disfrutar d’un añu sabáticu con permisu retribuiu, ente otres reivindicaciones profesionales. La propuesta ufierta la posibilidá de que los docentes puedan trabayar cuatro años con una reducción parcial del sueldu que habrá vali-yos pa disfrutarr d’un permisu retribuíu el quintu añu.

El sindicatu señala la esistencia d’esta posibilidá n’otres comunidaes y afirma que contribúi a favorecer la conciliación de la vida personal y llaborar, la dedicación al estudiu y la formación y a reducir delles enfermedaes profesionales como l’ansiedá y l’estrés.

La organización sindical autónoma va defender tamién nes sos negociaciones con Educación l’ampliación del permisu de maternidá y el cambiu de permisu de lactancia por incrementu del de maternidá, xunto a l’afitamientu del permisu por paternidá y l’ampliación d’entrambes modalidaes si la pareya tien fíos menores. Otres de les dispenses temporales que va reinvindicar SUATEA son los permisos por adopción, con tratamientu especial nel casu de l’adopción internacional; l’ampliación por guarda llegal; les escedencies pol tiempu necesariu pa cuidáu d’un familiar al so cargu y la llicenca ensin retribución de tres meses, escepcionalmente ampliada a otros tres, pa en casu d’atención a un familiar por enfermedá grave. El tercer bloque de reivindicaciones llaborales del sindicatu constitúilu la propuesta d’un sistema de permutes temporales dientro y fuera d’Asturies, col enfotu de conciliar vida llaboral y personal, asina como a meyorar les condiciones de salú llaboral del profesoráu.

La Conseyería d’Educación del Principáu cuelga dende esti miércoles 8 nel so portal Educastur les llistes definitives d’admitíos y escluíos de la bolsa d’interinos especialistes en llingua asturiana y gallego asturiano. La resolución de la Dirección Xeneral de Recuersos Humanos lleva fecha del 23 de febreru.

La Conseyería d’Educación del Principáu al través del portal ufierta agora la publicación d’una páxina web dedicada a la llingua asturiana col nome de Puertu Asturies y na que s’apurren diversos aperios y recursos relacionaos col idioma y la cultura propies de la nuestra comunidá.

Noticies, foros, un chat, galería de semeyes y enllaces a dellos sitios web n’asturiano, ente ellos Asturnews y Lliteratu , amás de la versión na nuestra llingua de Wikipedia y el diccionariu xeneral de la llingua asturiana de Xosé Lluis García Arias.

Más de cuatro mil neños y neñas, pertenecientes a veintisiete colexos ya institutos asturianos, participen a lo llargo de los meses de febreru y marzu na campaña “Una postal, una vida” entamada por Amnistía Internacional y qu’ esti añu cumple la so décima edición. La campaña tenta que los escolinos d’Asturies colaboren na defensa de menores que ven gravemente conculcaos los sos derechos humanos en diverses partes del mundu.

La campaña “Una postal, una vida” de 2006 quier llamar l’atención sobre la violencia que sufren les muyeres que defenden los derechos humanos en Colombia. En concreto, los escolinos van unviar postales al gobiernu colombianu solicitando protección pa una neña que recibió amenaces por mor del llabor de so madre, defensora de los derechos humanos nesi país.

L’asociación en defensa de los derechos llingüísticos catalanes Omnium Cultural denuncia nun informe recién el tratamientu que los llibros de testu vixentes fuera de Cataluña, el País Vascu y Galicia dan a la diversidá idiomática del estáu. Según esti informe la mayoría de los llibros analizaos parten de la base de que’l castellano ye la llingua de tolos ciudadanos del estáu y nun amuesen que n’España conviven comunidaes llingüístiques diferentes.

Omnium Cultural llegó a esta conclusión tres analizar el tratu que dan los llibros de testu de Secundaria a la llingua catalana y a la diversidá llingüística en xeneral. Los 160 volúmenes analizaos de 39 colecciones (21 en castellano y 18 en catalán) representen más del 90% de los llibros de testu esistentes y son utilizaos más o menos pola mayoá de lo estudiantes del conxuntu del estáu, a nun ser Cataluña, País Vascu y Galicia.

Los autores del estudiu, Ester Pascual y Toni Jaimez, aseguren qu’estos llibros faen ‘perdifícil’ que los estudiantes de fuera de les comunidaes con llingües oficiales tengan una visión clara de la realidad plurillingüe del Estáu.

L’estudiu conclúi que ‘resulta especialmente preocupante el fechu de que diversas editoriales nun presenten la realidá d’un estáu plurillingüe, sinón que parten de la base de que el castellano ye la llingua de toles comunidaes. En concreto, l’informe cita a Santillana y a SM, dos ‘casos claros’, al so xuiciu, de testos que ‘inciten o propicien la incomprensión hacia la diversidá llingüística del Estáu’. Dalgunos testos obvien los idiomes que se falen n’España amás del castellano y mesmo refiérense a llingües oficiales como’l gallego, el catalán o l’euskera como ‘modalidaes llingüístiques’, denuncia l’informe de l’asociación Omnium Cultural.

Sindicatos y organizaciones d’izquierda convoquen esti miércoles 22 en Xixón una manifestación en defensa de la escuela pública. El refugue a la LOE, a la privatización progresiva de la enseñanza y a favor d’una educación laica cola dignificación de los derechos llaborales de los docentes son los motivos que propicien esta movilización.

La marcha va salir a les 19.30 de la tarde de la Plaza L’Humedal y ta sofitada polos sindicatos CSI, CCOO, SUATEA, UXT, CGT, S. d’Estudiantes, Aula Joven, Izquierda Xunida, PCPE, Bloque por Asturies, IAS, COAPA, JCA, CJC, MSEPA y Europa Laica. El lema de la manifestación ye “Non a la privatización de la enseñanza. Más aules públiques y menos concertaes.

Un total de 339 solicitúes son les qu’acueye la Conseyería d’Educación pa les llistes d’interinos na especialidá de llingua asturiana y gallego-asturiano. Les bolses específiques pa estes materies recibieron una curiosa acoyida ente los demandantes inda los sindicatos y los propios solicitantes observaron dellos erros na catalogación publicada por Educación.

Esta iniciativa tenta paliar asuntos pendientes na enseñanza del asturiano y de la fala al crear un rexistru independiente pa profesores especializaos neses materies y asina axilizar los mecanismos pa cubrir les vacantes después de que la última llista s’esgotara.

El colectivu d’interinos y los sindicatos llevaben de cuantayá reivindicando l’apertura d’estes bolses y darréu de les últimes negociaciones con Educación, les autoridaes del Principáu aceptaron la creación d’estes llistes pa les que ya hai cerca de 340 solicitúes.

La Conseyería d’Educación del Principáu, al través de la so web institucional educastur vien de publicar les bolses d’interinos de les especialidaes de llingua asturiana y de gallego asturiano. La contratación de docentes d’estes especialidaes pol sistema avezáu de llistes yera una reivindicación de colectivos d’interinos y sindicatos qu’agora vese algamada.

La resolución del departamentu de Recursos Humanos de la Conseyería lleva fecha de 30 de xineru y puede consultase ya xunta la llista d’admitíos ya escluíos bolsa tanto pa profesores d’Educación Secundaria como pal cuerpu de maestros, especialistes en llingua asturiana y en gallego asturiano.

Nos últimos cursos Educación discriminaba a los interinos d’estes especialidaes con un sistema distintu al siguíu pal restu de les contrataciones y un grupu d’interinos organizáu en colectivu llevo a fechu diverses protestes pa reivindicar l’apertura de llistes específiques.

Bolsa d’interinos de llingua asturiana y gallego asturiano

El director de Promoción Cultural y Política Llingüística, Carlos Madera, asiste esti martes 31 a la entrega de diplomes de los cursos d’asturiano básico pa profesionales de los medios d’información y d’encuestadores de dialectoloxía, toponimia y cultura popular qu’organizó la Conseyería de Cultura en colaboración col Seminariu de Filoloxía Asturiana de la Universidá d’Uviéu.

Los cursos fueron frutu de la colaboración d’entrambes entidaes y el so oxetivu yera formar a periodistes na conocencia básica de la llingua asturiana, nel primeru de los cursos, y nel segundu, formar a filólogos pa facer trabayos de campu de recoyida de material de toponimia, dialectoloxía y tradición oral.

L’actu d’entrega de los diplomes acredidativos de los cursos va celebrase nel patiu de la sé de la Conseyería de Cultura na Plaza del Sol a les 18.30 hores y amás de Carlos Madera, tamién va asistir el responsable de la Oficina de Política Llingüística del Principáu, Ramón d’Andrés.

Los cursos de doctoráu qu’imparte la Universidá d’Uviéu tán ente los meyores de toles universidaes del estáu, según el criteriu de l’Axencia Nacional d’Evaluación y Acreditación. La institución académica asturiana ocupa’l puestu númheru siete ente les qu’algamaron más porcentaxe en menciones de calidá polos sos doctoraos.

De los treinta y ocho programas de doctorao qu’imparte la Universidá d’Uviéu, un cuarenta y siete por ciento de los cursos tien la mención de calidá. L’esamen pol que se mide la cualificación de los programes académicos abarca distintes variables, ente elles el númberu d’artículos científicos publicaos en revistes internacionales polos doctorandos, les tesis publicaes y el grau de satisfacción del alumnu.

Los dieciocho programes de doctoráu distinguíos son: Integración económica, competitividá y entornu institucional de la empresa, del Departamentu d’Administración d’ Empresa. Bioloxía aplicada a la sostenibilidá de recursos naturales, de Bioloxía d’Organismos y Sistemes. Economía y socioloxía de la globalización, d’Economía Aplicada. Tecnoloxía, diversificación, calidá y aforru enerxéticu, d’Enerxía. Xénero y diversidÁ: mitoloxía, investigación y competencies, de Filoloxía Agloxermánica. Física de la materia condensada, de Física. Esploración, análisis y modelización de cuenques y sistemes orogénicos, de Xeología. Música de la España Contemporánea, de Historia del Arte y Musicoloxía. Inxeniería electromagnética, de Inxeniería Electromagnética y Sistemes. Inxeniería de procesos y ambiental, d’Inxeniería Química y Tecnoloxía del Mediu Ambiente. Química orgánica y organometálica, del Institutu Universitariu de Química Orgánica Enrique Moles. Investigación en cáncer, del Institutu Universitariu d’Oncoloxía. Neurociencia, de Psicoloxía. Análisis químicu, bioquímicu y estructural avanzaos, electroquímica. Ciencia y tecnoloxía, de Química Física y Analítica. Química Organometálica, del departamentu de Química Orgánica e Inorgánica.