Educación

La comunidá escolar de la escuela de Xove ta acabante algamar el cambiu de denominación pal centenariu equipamientu educativu del barriu del oeste de Xixón. L’Ayuntamientu de Xixón aprobó la denominación n’asturianu de la escuela y sólo falta l’aprobación de la Conseyería d’Educación pa que la denominación Colexu de Xove seya la oficial. La parroquia de Xove ye una de les que depués de l’aprobación de l’aprobación del espediente toponímicu de Xixón tien doble denominación Jove/Xove.

Dende la dirección del centru educativu dizse qu’esti pasu yera necesariu teniendo en cuenta que la denominación popular del barriu ye Xove, y qu’el colexu yá venía utilizando la denominación n’asturianu con normalidá, polo que camienta nun va haber polémica pola decisión.

Tres de la xunta caltenida ayeri ente’l Coseyeru d’Educación y los sindicatos paez afitase la posibilidá d’una rectificación del borrador que colocaba la optatividá de la llingua asturiana nuna situación de dsesaniciu. Poro, nun hai dengún testu nuevu nin cambios oficiales nos plazos de alegación que los sindicatos reclamaben como enforma curtios.

Tres de la mentada xunta na que’l Conseyeru presentaba a los sindicatos el borrador del Decretu queda ver si de verdá camuda daqué con rapidez nun conflictu que dexa bien a les clares que puen tar en peligru munchos pasos daos alantre nos caberos venti años nel procesu de normalización social del asturianu, como perfitaba ayeri SUATEA nun comunicáu que se reproduz nesta mesma web.

El Conseyeru d’Educación del Principáu José Luis Iglesias Riopedre declarose ayer tres de los actos de Santo Tomás d’Aquino celebraos na Universidá, dafechamente partidariu de suprimir les titulaciones de la que tengan con menos alumnos. Na Universidá asturiana hai cinco titulaciones qu’esti curso nun fueron a algamar los 10 alumnos de nuevu ingresu. El datu asoleyábase esti día nel Atlas de la España Universitaria.

El Conseyeru fizo estes manifestaciones entendiendo que delles carreres podrían salvase, casu nel que taríen les “árees de conocimientu con relevancia pala marcha de la rexón”. En tou casu, los cambios nun se fadrán hasta que fine la reforma de la ley Orgánica de Universidades (LOU), depués de les eleiciones de mayu.

El Conseyeru d’Educación dio anuncia ayeri de los conteníos del futuru currículu d’Educación Primaria y ente les principales novedaes d’esti nuevu currículu alcuéntranse la de la optatividá de la enseñanza del asturianu, col agravante de que tendrá d’enfrentase con materies relacionaes cola informática y l’alfabetización dixital no que se considera una condena de muerte pala enseñanza de la llingua na primaria. El borrador de currículu que pue descargase de la páxina d’Educastur afita amás la medra de les hores de castellanu y matemátiques.

Lliteralmente, el borrador de Decretu diz en castellán que “Quienes no deseen cursar Lengua asturiana realizarán actividades que contribuyan al desarrollo de competencias básicas fundamentalmente con la competencia en comunicación lingüística, la competencia en el conocimiento y la interacción con el mundo físico, la competencia en el tratamiento de la información y competencia digital, y la competencia cultural y artística”.

La redacción de los nuevos currículos educativos encuádrase nel marcu del 35% de la enseñanza na qu’el gobiernu asturianu puede iguar a la so conveniencia. Les comunidaes nes que la so llingua ta declarada oficial el porcentaxe horariu sobre’l qu’actuen los gobiernos autónomicos ye del 45%. Una de les preocupaciones de Riopedre ye aumentar les hores de castellano que de 870 hores, ente los tres ciclos educativos, pasarán a ser 1.100 hores darréu s’apruebe’l futuru currículu. Otres de les asignatures que verán incrementáu’l so horariu llectivu son les matemátiques, l’ingles o conocimientu del mediu.

Borrador del decreto

SUATEA, el sindicatu mayoritariu de la escuela pública n’Asturies, ta acabante d’espublizar un comunicáu col que quier manifestar la so indignación y sorpresa ante l’agresiva y malintencionada propuesta del proyectu del decretu por que se regula’l currículu de la Educación Primaria n’Asturies no tocante al tratamientu que tien pa cola asignatura de llingua asturiana. Nesi comunicáu afirma que “de nun s’eliminar esta propuesta con respecto a l’asignatura d’asturianu, pide la dimisión del conseyeru d’educación por ser el responsable últimu d’esta situación”.

Pela importancia de la tema, reproducimos darréu íntegramente’l comunicáu: “Ayeri pela tarde’l señor Riopedre y la cúpula de la Conseyería d’Educación presentaben a los sindicatos esti proyectu. Na disposición adicional segunda, nel apartáu 3 pon, testualmente, el siguiente párrafu: Quienes no deseen cursar Lengua asturiana realizarán actividades que contribuyan al desarrollo de competencias básicas fundamentalmente con la competencia en comunicación llingüística, la competencia en el conocimiento y la interacción con el mundo físico, la competencia en el tratamiento de la información y competencia digital, y la competencia cultural y artística.
Na redacción de la propuesta manifiéstase la intención de xenerar una asignatura alternativa a la de llingua asturiana na que se lexitima’l refuerzu en competencies básiques en comunicación llingüística y n’otres. La interpretación que damos con esto ye que los responsables de la redacción de la propuesta interpreten que nel estudiu de la llingua asturiana nun se desenrollen compentencies básiques llingüístiques, dalgo que nos paez sangrante y grave por demás.
Esto, de facese, supondría la lenta y paulatina desapaición de l’asignatura dientro del sistema educativu asturianu. Intenten, d’esta manera, que l’asturianu tenga que competir con una alternativa que, tal y como se manifiesta en borrador, va ser, inclusive, más potente que les que tien que sufrir la materia en secundaria. Con esti ataque a la débil situación del idioma muestren, una vez más, la falta de sensibilidá, de responsabilidá y de defensa del patrimoniu cultural y idiomáticu común de los asturianos. El despreciu col que traten el problema llingüísticu y la falta de conexón cola realidá ye indignante dende’l puntu de vista del nuestru sindicatu. Ye necesaria una rápida y axustada rectificación por parte d’esta conseyería, d’esti planteamientu enantes de que’l proyectu tea definitivamente configuráu. Pidimos y desiximos, per otra banda, que se garantice la dignificación de la situación de l’asignatura y que se dean pasos firmes pa buscar la so normalidá. De nun lo facer asina SUATEA va llamar a la movilización del profesoráu asturianu pola defensa d’un tratu dignu de l’asignatura, de la situación de los trabayadores y del idioma asturianu. Y hasta qu’eso nun se produza SUATEA pide la dimisión del conseyeru d’educación por nun tar a l’altura de les circunstancies, por nun saber defender y apoyar col rixu necesariu’l patrimoniu cultural asturianu, por provocar con esta situación la progresiva desapaición de l’asignatura. Pa ello SUATEA va ponese en contactu col restu de organizaciones sindicales, colectivos y instituciones asturianes p’abrir un frente común de defensa.
Llevamos 22 años d’escolarización precaria de l’asignatura. Y hasta agora nun se dio nengún pasu nin se buscó solucionar la situación. Yá valió d’abusos y de sectarismos propios d’otres dómines.
SUATEA, xunto con otros colectivos asturianos, cree que la única solución viable ye la declaración d’oficialidá de la llingua asturiana pa prevenir y desarmar estos ataques malintencionaos y amparar a los usuarios del idioma asturianu.”

El Director Xeneral de Rellaciones Esteriores y asuntos Europeos, Darío Díaz, va asistir mañana na Casa d’Asturies en Bruseles a la presentación de la publicación “Estudiu de les oportunidaes llaborales pa los universitarios nel contextu de la Unión Europea”, insertu dientro de les actuaciones del Añu Européu de la Movilidá cellebráu el pasáu 2006.
L’estudiu va mostrar les conclusiones d’un proyectu de movilidá llaboral co-financiáu pola Unión Europea y que tuvo iguáu pola Universidá y la Cámara de Comerciu d’Uviéu y nel que participó esta Dirección Xeneral nel marcu del “2006 Añu Europáu de la Movilidá de los Trabayadores”.
Con esti trabayu tartose de meyorar l’accesu al trabayu de los estudiantes universitarios de la Unión Europea proporcionando información a los demandantes sobre les característiques xenerales del mercáu de trabayu de la Unión Europea asina como de les oportunidaes llaborales de les fasteres académiques nos distintos países de la Unión.
Tamién se busca poner a disposición de los trabayadores les ferramientas necesaries p’algamar dafechu la so movilidá nel marcu de la Unión, prestando una atención diferenciada al colectivu de los universitarios.

La convocatoria d’estes tres beques respuende a la política de formación en materia de rellaciones internacionales y europees, que dende la Dirección Xeneral de Rellaciones Esteriores y Asuntos Europeos se vien desarrollando nos últimos años.

Les beques tan empobinaes a los estudiantes d’últimu cursu de la Universidá d’Uviéu o del Centru Asociáu de la UNED n’Asturies que cursen les carreres de Derechu, Económiques, Polítiques, Socioloxía, Xeografía e Historia. La xera durante la duración de les beques va consistir na collaboración nel trabayu diariu que se fai na Dirección Xeneral de Rellaciones Esteriores y Asuntos Europeos.
Durante diez meses los becarios van tener la oportunidad de trabayar na Dirección Xeneral de Rellaciones Esteriores del Principáu y recibir formación específica rellacionada col so puestu .Los beneficiarios de la beca van recibir una ayuda mensual de 400 euros o la cantidá correspondiente nel casu de que por dalgún motivu la duración de la beca fuese inferior.
Todos aquellos estudiantes interesaos en optar a les beques deberán presentar la so solicitú conforme a los requerimientos publicaos nel Boletín Oficial del Principáu d’Asturies del 15 de xineru de 2007 nel Rexistru de la Conseyería de Xusticia, Seguridá Pública y Rellaciones Esteriores del Principáu d’Asturies (c/ Uría, 10, 8.ª planta, 33071 Uviéu) a l’atención del Ilmo. Sr. Conseyeru de Xusticia, Seguridá Pública y Rellaciones Esteriores del Principáu d’Asturiaes nel plazu de venti díes hábiles, contaos a partir del día siguiente a aquel nel que tenga llugar la publicación de la presente convocatoria nel BOPA.

Procedimientu solicitú de les Beques de Formación

El Muséu del Pueblu d’Asturies abrió’l plazu de matrícula pa dos cursos que van entamar el prósimu mes de febreru. El primer de los cursos tien por títulu “La música y el baille na tradición asturiana”, va tar puestu pol espertu Fernando Ornosa. El segundu cursu denomináu “D’ayeri a güei: la sociedá tradicional asturiana” va ponelu la etnógrafa y educadora social Fe Santoveña Zapatero.

El cursu “La música y el baille na tradición asturiana” va entamar el día 27 de febreru y se va facer los martes pela tarde, l’horariu lectivu ye de 10 hores y la matrícula pue facese hasta’l 26 de xineru.
“D’ayeri a güei: la sociedá tradicional asturiana” tendrá una duración de 20 hores lectives y se va desenvolver los miércoles y xueves. El plazu de matricula acaba, tamién, el 26 de xineru.
Pa más información sobre les matrícules a estos cursos se pue contactar col Muséu del Pueblu d’Asturies nel teléfonu 985182963

La Oficina de la Llingua del Ayuntamientu de Xixón ta cabante asoleyar la convocatoria pa dos beques de formación. Les beques empobínense a la formación especializada pa la traducción al asturianu y el desenvolvimientu d’actividaes de normalización llingüística. Pa optar a una de les dos beques que se conceden les y los interesaos han tar en posesión del títulu d’especialista o espertu n’asturianu que concede la Universidá d’Uviéu. El plazu de presentación de solicitues acaba’l 23 de xineru.

Anunciu de la Convocatoria

La iniciativa “Rompiendo Barreras” foi reconocida pol Plan de Fomentu de la Llectura del Ministeriu de Cultura y la Federación española de Municipios y Provincies. Esti poryectu tien por obxetivu averar la llectura a los vecinos de la zona rural que tien problemes de movilidá, col sofitu de los y les trabayadores del personal del Serviciu d’Ayuda a Domiciliu

El proyectu de dinamización llectora que desendolca la Biblioteca Municipal de L.lena, en collaboración colos Servicios Sociales del Conceyu, baxo’l lema “Superando barreres” foi premiáu na IX Campaña d’Animación a la llectura “María Moliner” venceyada al Plan de Fomentu de la Llectura, integráu pol Ministeriu de Cultura y la Federación Española de Municipios y Provincies. La iniciativa entamóse en 2005, cola coordinación de les conceyalíes de Cultura y de Servicios Sociales, cola fin de facilitar un serviciu de préstamu personalizáu de llibros y material audiovisual a aquellos habitantes de la zona rural del conceyu que tengan problemes de movilidá. L’acición alacanzaría a un total de 1.800 persones. L’aición premiada cuenta cola base de los fondos de la rede de biblioteques del conceyu, compuesta pola Biblioteca de La Pola, y los Centros de llectura de Campumanes y Vil.layana