Educación

Antonio Cueto Espinar anunció esti miercoles la so dimisión del cargu de Vicerector d’ordenación academica y profesoráu que ocupaba anguaño pa concurrir a la carrera pol puestu de rector de la Universidá d’Uvieu. Cueto pidió’l sofitu de la comunidá universitaria pa siguir trabayando na modernización de la institución al travies d’un proyectu con marcáu calter continuista.

Cueto ye catedráticu de Medicina Preventiva y Salú Pública y, amás de Vicerector na institución academica asturiana tuvo al frente de la Conseyería de Servicios Sanitarios del Principáu nel gobiernu del Partíu Popular (y darreu cola URAS).

El restu de candidatos a suceder a Juan Vázquez son Paz Andres, Santos González, y Vicente Gotor, que ya se presentó nes anteriores elecciones saliendo derrotáu pol actual rector. Tanto Cueto como Paz Andres, primer muyer na hestoria que opta al cargu y Santos González, catedráticu de Álgebra pertenecieron nel so día al equipu de trabayu de Juan Vázquez mientres que Gotor un llinia dixebrada del proyectu d’anguaño.

Los músicos asturianos Xel Pereda y Nacho Vegas tornen el sádadu a les tables asturianes cola presentación d’un proyectu nuevo nel Teatru de la Llaboral de Xixón. A les 21:00 hores van estrenar “Lucas XV”, trabayu conxuntu alredor de la tradición del romanceru asturianu, les añaes, los villancicos, la tonada y los cantares de ciegu remocicaes al formatu rock. El discu que va recoyer estes investigaciones sonores va salir a la cai a lo cimeru de 2008.

Esti actu, que ta organizáu pola Universidá d’Uvieu con motivu del so 400 aniversariu, axunta a dos de los músicos más prolíficos de la escena asturiana. Xunto al guitarrista de Llan de Cubel ya’l ex-componente de Manta Ray van subir a l’escenariu de la Llaboral Chus Naves, coll órganu Hammond ya’l pianu: Manu Molina, a la batería y les percusiones y Luis Rodríguez al baxu ellectricu.

La Universidá d’Uvieu va ufiertar, nel cursu 2008-2009, un total de 1.216 plazes del programa Erasmus pa favorecer l’intercambiu ente universitarios asturianos y los sos homólogos del restu de centros educativos superiores d’Europa. Les beques pa cada beneficiariu serán de 350 euros al mes durante los nueve meses que dura la estancia como estudiante d’intercambiu, nun de los 25 países participantes nesti programa.

El plazu de presentación de solicitudes fina’l prósimu 10 de xineru y les llistes de elexíos va asoleyase n’Abril. Nel procesu d’asbilla tienense en cuenta l’espediente acadámicu del alumnu y los sos conocimientos de la llingua oficial, y d’otros idiomes, del país al que se tresllade. De todos modos según esplico’l vicerector d’Estensión Universitaria, Francisco Javier Mato “ye fácil algamar una beca Erasmus , pero nun lo ye tanto’l poder viaxar al país que se quiera”. Ente los destinos más solicitaos polos asturianos tan Inglaterra, Italia y Francia.

Asimesmu’l vicerector tamien anunció que la posibilidá de llevar al cabu xeres d’intercambiu academicu en países que nun pertenezan a la Unión Europa va ser posible al travies de 100 beques, convocaas pola Universidá en collaboración con Bancaja. Los destinos son ente otros: Estados Xunidos, Arxentina o Mexico. La beca dura un añu nesti casu y supondrá un sofitu económicu de 2000 euros (14 beques), 1000 (30 beques) y 500 (14 beques). Amás incluí la matriculación de baldre y una ayuda económica pa facer el viaxe.

Los estudiantes asturianos algamen una competencia científica de 508 puntos, lo que los asitia 30 puntos penriba de la estatal, y ocho penriba de la media de la Organización pa la Cooperación y el Desarrollu Económicu (OCDE) y, según l’informe ellaboráu nel 2006 pol Programa pa la Evaluación Internacional de los Alumnos (PISA).

La puntuación algamada por Asturies en ciencies ye más alta que la media de los países como Dinamarca, Francia, Islandia, Estaos Uníos, España, Eslovaquia, Noruega, Luxemburgo, Italia, Portugal, Grecia, Turquía y México. Sólo superen a Asturies, Finlandia, Países Baxos, Canadá, Xapón, Nueva Zelanda, Australia y Corea.

Los resultaos algamaos coloquen al Principáu nuna situación asemeyada a la de Bélxica, Irlanda, Suecia o Suiza, que tien un PIB per cápita hasta un 60 por cientu mayor qu’Asturies.

La Conseyería d’Educación y Ciencia del Principáu d’Asturies ta acabante d’asoleyar cinco nuevos materiales pedagóxicos empobinaos a facilitar el deprendizaxe a escolinos ya escolines discapacitaos. El titular de la Conseyería, Jose Luis Iglesias Riopedre destacó na presentación d’esti nuevu material que “nos últimos 20 años los discacitaos pasaron de tar separtaos del sistema educativu a tar integraos dafechu”.

Ente los nuevos elementos colos que maestros y escolinos van poder cuntar dende agora mesmo, tan dellos llibros pa la meyora de les torgues na llectura y la espresión, un conciertu lúdico-sensitivu, un concursu de rellatos y debuxu o llibros empobinaos al descubrimientu de les nueves tecnoloxíes. Exta iniciativa de los responsables d’educación del Principáu sigue una llínia de continuidá colo que se vien faciendo n’Europa al abellugu de les polítiques europees na materia.

La espublización d’esti material educativu, que va sirvir tanto pa centros públicos de calter ordinariu como pa los d’educación especial, va meyorar les posibilidaes de deprendizaxe d’un total de 2832 escolinos, escolarizaos en 8500 centros de tola comunidá.

El Centru de Cultura Antiguu Intitutu de Xixón esibe hasta’l prósimu domingu día 2 d’avientu l’amuesa “Pensad que esto ha sucedido. Lecciones sobre el holocausto” que cunta los oríxenes del odiu antisemita n’europa, les deportaciones de la población xudía a campos de concetración y l’esterminiu nazi al travies d’imáxenes y recursos didauticos.

La iniciativa ta organizada pol grupo “Eleuterio Quintanilla”, colectivu de docentes que nos dos últimos años vienen desendolcando una importante xera d’investigación sobre l’esterminiu xudíu na Alemania nazi. Esta amuesa ya’l propiu trabayu ñació col enfotu d’averar esti acontecimientu de la hestoria a los escolinos de 4º d’ESO y 1ºde Bachilleratu.

El trabaya tamien cuntó col sofitu del Centru del Profesoráu y de Recursos (CPR) de Xixón, de l’Axencia Asturiana de Cooperación al Desarrollu (Gobiernu del Principáu d’Asturies) y de la Conceyalía d’Educación del Ayuntamiento de Xixón.

Los asturianos algamen una puntuación en Ciencies de 508 puntos, 8 penriba del promediu de los países qu’integren la Organización pa la Cooperación y el Desarrollu Económicu (OCDE). El datu recuéyese nel informe PISA 2006, que foi adelantáu pola revista ‘Magisterio’ y recoyíu por Europa Press.

Según recueye l’Axencia de Noticies nesi informe dizse que los alumnos d’Asturies tán nesta materia al nivel de Suiza, Austria, Bélxica o Irlanda, y ocupen el quintu puestu en cuantes a los meyores resultaos algamaos nes diez comunidaes autónomes analizaes. La revista señala que los resultaos del informe confirmen “la existencia de delles velocidaes n’España con problemes de desequilibriu territorial en materia educativa”.

Castiella y Llión y La Rioxa encabecen los resultaos del informe na escala de Ciencies asitiándose dambes nos 520 puntos. Tán dalgo perbaxo de los Países Baxos (525), pero penriba d’Eslovenia (519) y de clásicos como Alemaña (516) o’l Reinu Uníu (515). Más p’alantre ta Aragón (513 puntos), Navarra (511), Cantabria (509), Asturies (508) y Galicia (505). Estes comunidaes tán al nivel de Suiza, Austria, Bélxica o Irlanda, y penriba tanto de Suecia (503) como’l promediu de la OCDE.

Ya perbaxo del promediu de la OCDE, pero penriba de la media española (488), tán País Vascu (495 puntos ) y Cataluña (491). El País Vascu “meyoró muncho” los sos resultaos en Ciencies con respecto al 2003, al ganar once puntos, mientres que Cataluña, que nesta escala taba a la cabeza d’España, per nueve puntos y sólo queda per delantre d’Andalucía.

Los sindicatos SUATEA, Federación d’Enseñanza de CC.OO. y CSI-CSIF tienen convocada pa esti miércoles 28 de payares una Concentración énte la Conseyería d’Educación, na Plaza España, n’Uviéu, a les 6 de la tarde. Nesta concentración quier desixise otra vuelta a la Conseyería y al Gobiernu asturianu l’apertura de negociaciones colos representantes llexítimos del profesoráu. Nesti sen, los sindicatos acaben pedir una entrevista urxente cola Conseyera d’Alministraciones Públiques y Portavoz del Gobiernu.

Sigún los sindicatos l’alministración asturiana vien negándose a abrir los calces negociadores sobre asuntos como’l Concursu de Tresllados y la plantilla de profesoráu, la Ufierta d’Emplegu Públicu o la propia “carrera profesional”. Esta situación contrasta cola de la inmensa mayoría de les CCAA onde tan funcionando Meses Sectoriales d’Educación con total normalidá.

El vienres, na Xunta Xeneral del Principáu, van presentase por parte de los grupos parlamentarios d’IX y PP iniciatives instando al gobiernu a la convocatoria uxgente de la Mesa Sectorial.

El prósimu Sábadu 24 de Payares el Conceyu Abiertu pola Oficialidá convoca Manifestación cola vindicación “Na reforma del estatutu l’asturianu llingua oficial”. Los sindicatos de docentes SUATEA, FETE-UXT y Federación d’Enseñanza de CC.OO. acaben de mandar una nota de prensa “pa denunciar les carencies na escolarización de la llingua asturiana al tiempu qu’animamos a la comunidá educativa asturiana a la participación nesta movilización”.

Nel comunicáu comenten como a pesar de que “la demanda d’escolarización na llingua asturiana volvió a medrar, la situación del coleutivu interín continua siendo de total precariedá”. Los sindicatos recuerden que “sólo un 30 % de los docentes trabayen a tiempu completu en Llingua Asturiana y nun únicu centru”. “La itinerancia domina en primaria (un 55 %) y la media xornada en secundaria (un 58%)” añaden.

Nel “Plan de normalización social del asturianu 2005 – 2007” el gobiernu asturianu comprometióse na so Acción 34 a “Realizar un estudiu xurídico so la posible especialidá del profesoráu de llingua asturiana” enantes que terminara l’añu 2006. Termina’l 2007 y pa los sindicatos “yá se pue ver que l’incumplimientu ye una mena intencionada d’aparcar la cuestión”.

En cuantes a les condiciones en que se desarrolla la escolarización, los sindicatos denuncien “que’l derechu al estudiu de la llingua asturiana nun ta garantizáu nel sistema educativu asturianu, al nun respetase la Llei d’Usu”. “Pa entamar –diz el comunicáu- na etapa d’Infantil la Conseyería d’Educación nun tien voluntá d’incorporar la enseñanza d’asturianu creando en munchos neños y neñes un conflictu ente lo que sienten nel so entornu y lo que-yos deprenden na escuela”. En Primaria, dicen “la situación ye más favorable dada la so presencia nel currículu. Sin embargu, el derechu a la escolarización establecíu na Llei d’usu entra en contradición cola esistencia de ratios mínimes (compárese col casu de la relixón que con un escolín, escolina ya se constituye grupu) de 10 alumnos”.

En Secundaria y Bachilleratu, “amás de la esistencia de ratios mínimes”, sigue’l comunicáu “la escolarización choca cola competencia con otres materies, fundamentalmente Segundu Idioma, lo que supon una discriminación p’aquellos qu’escueyen asturianu pos renuncien a una segunda llingua estranxera”.

Nos centros concertaos, denuncien, “nun esistía obligación d’ufiertar llingua asturiana en primaria fasta la publicación del Currículu de Primaria”. Asina, namái 3 centros concertaos teníen constituyíos grupos d’asturianu lo que representaba un 1% de los alumnos y alumnes d’esti tipu de centros. Nesti cursu’l númberu de centros que lu ufierten ye’l mesmu, y el númberu de profesores d’asturianu contrataos ye’l mesmu. Esto resulta difícil d’entender, dada la obligatoriedá de la so ufierta y la imposibilidá de da-y un conteníu curricular a la so optativa. Sabemos d’incumplimientos por diferentes víes. Algunos neños y neñes tán acudiendo a refuerzos de llingua castellana, taller de nueves tecnoloxíes… y otros tipos d’actividaes que refuerzen el currículu d’otres árees. Nun hai qu’escaecer “qu’estos centros funcionen coles perres públiques y nun cumplen cola normativa”.

Los sindicatos SUATEA, FETE-UXT y Federación de Enseñanza de CCOO “defendemos la oficialidá de la llingua asturiana y por ello participaremos na movilización del prósimu sábadu”. Dicho esto, los sindicatos “denunciamos que la escolarización de Llingua Asturiana nun se fai nes meyores condiciones, inda col marcu llexislativu actual”.

El comunicáu piésllase con un llistáu coles reivindicaciones más prioritaries: 1.Incorporación de la Llingua y la Cultura Asturiana nel currículu d’Infantil. Eliminación de les ratio mínimes en tolos niveles pa la constitución de grupos de llingua asturiana y gallego-asturianu. 2. Seguimiento efeutivu del cumplimientu la normativa por parte de tolos centros educativos (públicos y sobre too privados) estableciendo esta tarea como una de les prioridaes del Serviciu d’Inspección Educativa. 3. Creación de la Especialidá de Llingua Asturiana y Gallego-Asturiano nos Cuerpos de Maestros y Profesores d’Enseñanza Secundaria. Y 4.Negociación en Mesa Sectorial de Llingua Asturiana.

L’institutu d’Educación Secundaria Rosario de Acuña de Xixón presentó ayeri a los medios una nueve edición, la octava del so premiu d’investigación dotáu con 6000 euros. Al certame puen presentase escolinos de Secundaria, Bachilleratu y Ciclos Formativos y cualquier investigador interesáu con ntrabayos sobre Asturies y Xixón. El plazu pa entregar los trabayos fina’l 8 d’abril de 2008.

El concejal de Educación de Xixón, Justo Vilabrille, que tuvo participando nel actu de presentación destacó la llabor del centru ya’l sofitu que proporciona’l consistoriu xixones a xeres d’esti tipu pa permitir que la ciudá cunte con una amplia vida cultural.