Educación

Güei, a la una de la tarde, van inaugurase los XXVI Cursos de Branu de l’Academia de la Llingua Asturiana nel Salón d’Actos de la Escuela-Hogar de Santantolín (Ibias). Nel actu intervendrán, amás de la Presidenta de l’Academia, Dra. Ana Mª Cano González; el Director de los Cursos, Xosé Antón González Riaño; el Coordinador d’Enseñanza de la Llingua Asturiana de la Conseyería d’Educación del Principáu d’Asturies, Fernando Padilla Palicio; el Vicerrector d’Estensión Universitaria, Cultura y Deportes, D. José Antonio Cecchini Estrada y l’Alcaldesa del Conceyu d’Ibias, Dª Nélida Barrero Pantiga. Los XXVI Cursos de Branu de l’Academia de la Llingua Asturiana tán conformaos por Cursos Elemental y Avanzáu de Llingua Asturiana, Cursos d’Afondamientu Cultural y Llingüísticu y 2ª Fase del Cursu de Capacitación en Gallego-Asturianu.

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

Esti llunes, 4 d’agostu, a la una de la tarde van inaugurase los XXVI Cursos de Branu de l’Academia de la Llingua asturiana que van desendolcase na Escuela-Llar de Santantolín, nel Conceyu d’Ibias. L’Alcaldesa d’Ibias, la presidenta l’Academia, Ana Cano y el direutor de los Cursos, Xosé Antón González Riaño inaugurarán estos cursos que van desendolcase hasta’l vienres 15 d’agostu cola participación de más de 150 alumnos.

Los cursos de Branu de l’Academia inclúin un Cursu Elemental de Llingua Asturiana, un Cursu Avanzáu de Llingua Asturiana, dellos Cursos d’Afondamientu Cultural y Llingüísticu y la segunda fase del Cursu de Gallego-Asturianu, dellos en collaboración cola Universidá d’Uviéu.

Estos Cursos tienen reconocencia oficial per parte de la Conseyería d’Educación del Principáu d’Asturies, darréu de l’acreitación de l’ALLA como “Entidá Organizadora d’Actividaes de Formación Permanente del Profesoráu”. Ello afita a tolos efeutos la reconocencia d’estos Programes Formativos dende’l puntu de vista alministrativu (currículum, méritos, sexenios, etc.) pal profesoráu d’Educación Primaria y Secundaria del Principáu d’Asturies.

La Universidá de Valladolid, al traviés del Centru Buendía, recueye esti añu’l testigu de la Universidá d’Uviéu al incluyir dientru la so programación de verano un cursu qu’ufierta de baldre siguir el Festival de Lorient con abellugu y gastos pagos, faciendo práctiques periodístiques nel Festival Bretón. “La crónica cultural” ye’l títulu d’un taller nel que s’inclúin les práctiques nel Festival bretón del 31 de xunetu al 10 d’agostu.

Pa inscribise nel cursu, como ya asocediera l’áñu pasáu ye requerimientu tener conocimientos d’inglés o de francés, pero por 350 euros de matrícula palos alumnos dela UVA y 380 palos que nun lo seyan inclúi 10 díes en Lorient, colos gastos pagos, coincidiendo col Festival Intercélticu que dirixe l’asturianu Lisardo Lombardía, anmás del tresporte hasta la ciudá bretona. El Festival bretón ye l’abellugu de les práctiques de crónica periodística cultural del cursu nuna experiencia pionera qu’entamó l’añu pasáu’l Festival en collaboración cola Universidá d’Uviéu y qu’esti añu desendolca cola UVA.

Pa inscribise nel cursu hai de plazu hasta’l martes 29 de xunetu y la inscripción tien de solicitase na direición taller@festivaldelorient.com.

Los requisitos, amás d’un conocimientu oral del inglés o del francés son disponer de cámara dixital y/o ordenador portatil.

Los asturianos tan ente’l grupu de los que menos saben idiomes del Estáu según un estudiu de les Caxes d’Aforros que coloque a castellanos manchegos, andaluces, cántabros y asturianos como los piores d’España.

El castellán ye l’únicu idioma que conoz la metá (49,7 %) de los españoles. Un estudiu de la Fundación de las Caxes d’Aforros (FUNCAS) dexalo afitao. Tamién apunta que nun conocen dengún idioma estranxeru el 67 % de los castellano-manchegos, el 64,4% de los andaluces y el 63,7 % de los cántabros. Los datos de los catalanes y los baleares son, en cambiu, más baxos (23,7% los primeros y el 24,6% los segundos). De les 8 comunidaes con mayor índiz de conocimientu d’idiomes estranxeros, 6 tienen una llingua propia diferente al castellán y les otres dos son Madrid y Canaries.

Según informó’l CUPA al traviés d’un comunicáu de prensa, representantes de la organización asturianista y universitaria, que cunta con representación nel Claustru de la Universidá d’Uviéu, aconceyó esti martes 8 de xunetu col Rector de la Universidá, Vicente Gotor.

L’alcuentru celebróse na sede del Rectoráu y ye parte, según comenten nel CUPA, “d’una serie de contactos de trabayu pal entamu de les polítiques de normalización llingüística na Universidá d’Uviéu”.

El primer tema tratáu, sigue’l comunicáu, “foi la crisis creada na Facultá de Filoloxía por mor de la enmienda del profesor Félix Fernández de Castro”. El Rector aseguró a los representantes del CUPA “que tán tomándose los pasos necesarios pa que l’asturianu tea, como Vicente Gotor comprometió nel so programa electoral, nos futuros planes europeos”. Representantes y Rector coincidieron según el CUPA “na necesidá de buscar el consensu perdíu alredor del tema”.

En cuantes a los problemes xeneraos pol refugu de documentos n’asturianu nel Rexistru de la Universidá d’Uviéu, el Rector comprometióse a solucionar el problema al traviés de la firma d’un conveniu col Gobiernu d’Asturies, que permita la esistencia d’un muérganu traductor na Universidá d’Uviéu. Los representantes del CUPA ficieron referencies a la Llei d’Usu del bable/asturianu de 1998 y recalcaron la importancia de solucionar un problema qu’afecta directamente a los drechos básicos de los asturfalantes de la comunidá universitaria.

En cuantes a la normalización del asturianu na Universidá, al traviés de la visibilización del idioma nes dependencies y documentos universitarios y de la promoción del mesmu, comenta’l CUPA que “siguen dándose pasos nel camín positivu nel que se vienen produciendo nos contactos anteriores con D. Vicente Gotor dende la campaña de les elecciones a Rector y van siguir dándose en conceyos posteriores nos que van dir afitándose los puntos a siguir nesi procesu, d’una forma ordenada, progresiva y dialogada”.

El CUPA fai un balance positivu d’esti alcuentru y de los contactos calteníos con esti equipu rectoral nos dos meses que cumplía Gotor nel cargu, el día del alcuentru con representantes del Conceyu Universitariu pol Asturianu.

Pal CUPA agora “ye’l momentu de facer visible qu’Asturies, la so cultura y la so llingua, son una prioridá pa los miembros de la comununidá universitaria y esto tien de facese buscando’l consensu y dexando les discusiones que nun conducen a nengún camín constructivu”.

Nun comunicáu ende la Xunta pola Defensa de la Llingua Asturiana recuérdase a la Conseyería d’Educación que nel procesu de matriculación abiertu hasta’l día 11 d’esti mes pal cursu escolar 2008/09 n’Educación Secundaria y Bachilleratu tien la obligación de garantizar por mandatu llegal el derechu de los/es estudiantes a escoyer l’asignatura de Llingua Asturiana.

Como tolos años, dende la Xunta quier facese un llamáu pa qu’esti procesu vaiga pelos calces llegales amañosos y nun se repitan los casos de discriminación que yá se vio obligada a denunciar n’otros cursos pasaos.

La enseñanza d’asturianu en Secundaria ta reglada por llei de manera que los alumnos tienen el derechu a escoyer l’asignatura optativa y ésta ha ser ufiertada en tolos centros, tanto de la enseñanza pública como de la concertada.

La marxinación na que s’atopa la llingua asturiana na enseñanza secundaria ye entovía mayor que la que se da en Primaria, al tener que competir con otres asignatures y al impedise que los alumnos que se matriculen en Llingua Asturiana tienen que renunciar a otres materies. Según la Xunta “tampoco nun se respeta’l derechu individual a estudiar Asturianu por culpa de la ratio, que s’usa como disculpa por delles direcciones de centru pa nun facer grupos. Tamién se da’l casu d’esviar matrícules a otres asignatures optatives pa conseguir les ratios pa elles en detrimentu del enseñu d’Asturianu”.

La montonera de denuncies d’estos años d’atrás nun se puede volver a repetir pala Xunta: “L’alministración asturiana ye la responsable final d’asegurar el derechu a la llibre elección de les families y estudiantes qu’asina lo quieran”. D’esta manera la Xunta va siguir sollerte a los acontecimientos denunciando y quedando a disposición de les families que, como yá pasare n’otros años, se movilizaron pa nun ver conculcaos los sos derechos ciudadanos.

Pala XUnta, “toos estos problemes tienen el so aniciu na situación de precariedá llegal que vive l’asturianu dientro’l sistema d’enseñanza, marcu amañosu pa que cualquiera con gana de que nun se cumplan les normatives tenga instrumentos de sobra p’arrequexar la llingua y con ello valtar los derechos de los estudiantes y les sos families. Si a esto sumamos la falta d’una norma superior qu’asegure categóricamente el derechu de los asturianos a vivir y educase na so llingua propia, quier dicise, la oficialidá, la conclusión ye que’l el tarrén ta preparáu pa que se sigan produciendo estes desigualdaes”.

El Director Xeneral de Polítiques Educatives y Ordenación Académica, Luis Enrique García-Riestra, peslló’l vienres a les 13:30 hores les xornaes de preparación pal cursu próximu de l’asignatura Ciencies pal Mundu Contemporánéu empobinaes al profesoráu de Bachilleratu. Dende’l llunes, sesenta profesores asturianos asistieron a clas nel Centru de Profesores d’Uviéu pa preparar esta asignatura que van impartir pel cursu 2008-2009.

N’horariu de mañana y tarde los participantes analizaron les característiques de l’asignatura nueva dende distintes perspectives y cola participación de numberosos especialistes.

Los conteníos refiérense a la nanotecnoloxía, la xestión sostenible del planeta, la evolución humana, la investigación xeolóxica y hebo alderiques sobre les necesidaes nueves de la enseñanza, los materiales y les meyores propuestes metodolóxiques pa satisfaceles.

Na xornada del vienres, de 09:00 a 11:15 hores, la periodista Ainhoa Goñi ofreció una conferencia titulada “Periodismu Científicu, ¿ye posible divulgar la Ciencia?” y el Doctor en Bioloxía pola Universidá de Barcelona, Jesús Purroy, ofrió, de 11:45 a 13:30 hores, una charra col nome “Avances en xenética y biotecnoloxía. Repercusiones sanitaries y sociales”.

Esta selmana de trabayu tien l’envís d’apurrir formación y recursos al profesoráu que-yos va valir de sofitu pa l’asignatura de Ciencies pal Mundu Contemporáneu que van impartir a los alumnos de 1u de Bachilleratu.

Los profesores participantes pertenecen a les rames de Bioloxía- Xeoloxía y de Física-Química. La metodoloxía de trabayu foi tola selmana activa y participativa col oxetu de propiciar la reflexón, el razonamientu y l’análisis críticu.

El Conseyu de Ministros viebo acabante d’aprobar 428 millones d’euros pa poer afitar nes comunidaes autónomes la Educación Infantil de los más de 1.300.000 neños d’ente tres y seis años. D’estos 428 millones, 8,7 van empobinaos al Principáu.

Dempués del nomamientu de José Antonio Martínez, como nuevu Decanu provisional de la Facultá de Filoloxía pol Rector Vicente Gotor, la ex decana, dimitida la selmana pasada, Ana Cano, recordó ayeri que “basándose nel ReglamentuElectoral de Centros, Departamentos ya Institutos, el nuevu Decanu ha convocar elecciones”.

Cano amosó les sos reserves sobre “el calter consensuáu del escoyíu” y recordó que “a min polo menos nun se me consultó nada sobre esti tema, asina que nun pueo facer valoraciones sobre esta persona”.

Cano recordó que “según l’artículu 26 párrafu primeru, del Reglamentu Electoral de Centros les elecciones han convocase dientro de los 20 díes siguientes al de conclusión de mandatu, cuando ésti s’estinga por dimisión o concurran les demás causes de cese previstes”.

“Nun ye qu’urxa o nun urxa la convocatoria electoral, ye que ta estipulado”, remató la Presidenta de l’Academia de la Llingua Asturiana, qu’albidra que “va tener que ser a partir de setiembre, por nun poder ser en tiempu d’elecciones nin de vacaciones”.

Ana Cano recordó que “va tar nes manes del nuevu decanu aceptar o non lo aprobao na última Xunta” y reconducir al situación.

Pa Ana Cano “el fechu d’aprobase la enmienda sobre l’asturianu nun quier dicir que nunca más se pueda volver a plantegar la cuestión, n’absolutu”. Cano añadió “Yo espero qu’esto se pueda volver a reconducir, sinceramente”, y dixo esperalo “porque unes vegaes gánense les votaciones y otres piérdense. Y el tema del asturianu ye la primer vegada que pierde la votación. Otru día’l resultáu pue ser otru porque depende de les persones qu’asistan a la votación”.

Nel contestu de les declaraciones amables del rector d’estos díes asegurando “nun escatimar esfuerzos” pa garantizar que la Llingua y Lliteratura Asturiana tengan un espaciu “académicu y científicu” na institución, Xuristes pol asturianu acaba desenmascaritar la realidá: que l’asturianu marxínase na institución dende la matriculación mesma, acoyéndose a la llei de l’Alministración del Estáu cuando la Universidá d’Uviéu nun pertenez a l’Alministración Xeneral del Estáu, sinon a la del Principáu d’Asturies.

Nun escritu fechu públicu esti día y unviáu güei, per rexistru, al reutor de la Universidá d’Uviéu , Xuristes pol Asturianu llamenta que na documentación pa inscripción y matrícula nes estremaes carreres universitaries, el Vicerrectoráu d’Estudiantes y Emplegu tenga espardíes unes instrucciones qu’entamen cola fras: “La documentación deberá presentarse en castellano de conformidad con el Art. 36 de la Ley 30/1992, de 26 de noviembre, de Régimen Jurídico de las Administraciones Públicas y del Procedimiento Administrativo Común que establece que la lengua de los procedimientos tramitados por la Administración General del Estado será el castellano” (sic).

Al efeutu en Xuristes pol Asturianu camienten qu’hai que-y refiertar señor Rector que:

“

a) Por muncho que se solliñen, ennegrezan y cursiven, les pallabres que falten a la verdá seguirán faciéndolo.

b) La Universidá d’Uviéu nun pertenez a l’Alministración Xeneral del Estáu, sinon a la del Principáu d’Asturies.

c) El mentáu artículu, 36 de la Llei 30/1992, amás del so numberal primeru (que diz lo que trescribe el Vicerrectoráu), tien un segundu qu’ amiesta: “En los procedimientos tramitados por las Administraciones de las Comunidades Autónomas y de las Entidades Locales, el uso de la lengua se ajustará a lo previsto en la legislación autonómica correspondiente”.

d) La tala “llexisllación autonómica” a la que remite la Llei 30/1992 ye, n’Asturies, l’artículu 4.2 del Estatutu d’Autonomía (“Una llei del Principáu regulará’l sofitu, usu y promoción del bable”), complementáu pela Llei 1/1998, de 23 de marzu, d’usu y promoción del bable/asturianu, na que s’afita, artículu 4, que: “1. Tolos ciudadanos tienen el drechu a emplegar el bable/asturianu y a expresarse n’elli, de pallabra y per escritu. 2. Tendráse por válido a tolos efeutos l’usu del bable/asturianu nes comunicaciones orales o escrites col Principáu d’Asturies”.

e) Aplicando estes normes, una sentencia del Tribunal Superior de Xusticia d’Asturies, xustamente nun pleitu nel que la Universidá d’Uviéu foi parte (númberu d’apelación 83/06, con orixe nel Xulgáu de lo Contencioso-Alministrativo númberu 1 d’Uviéu, el conocíu como “vergoñosu casu Faustino Zapico”) refierta-y a la Universidá d’Uviéu que la “aplicación del artículo 4.2 (de la Llei 1/1998) a las relaciones administrativas entre administrados y Administración universitaria debe limitarse a… los aspectos burocráticos o administrativos de aquella relación”.

f) Difícilmente se pue atopar un trámite más burocráticu o alministrativu que un procesu d’inscripción y matriculación.

g) Pal qu’enta-y queden duldes, l’artículu 6.2, del Decretu del Principáu d’Asturies 233/2003, pol que s’aprueben los Estatutos de la Universidá d’Uviéu, esclaria: “La llingua asturiana sedrá oxetu d’estudiu, deprendizax ya investigación… Asina mesmo, el so uso tendrá’l tratamientu qu’estableza l’Estatutu d’Autonomía y la llexisllación complementaria, garantizándose la non discriminación de quien la emplegue”.

Poro, señor Rector, encamiento-y que n’acatamientu de les sentencies de los Tribunales, cumplimientu de la llei y respetu col drechu fundamental a emplegar la llingua materna, proclamáu nel artículu 2 de la Declaración Universal de los Drechos Humanos, y, como voluntá de la Ñación española, nel mesmu entamu de la Constitución, corte pela freba coles llamentables práutiques a la escontra del Vicerrectoráu d’Estudiantes y Emplegu, faciendo poner darréu a disposición de tolos estudiantes les instrucciones ya impresos de matrícula en llingua asturiana, arriendes d’en castellán, corrixendo disciplinariamente, al empar, al responsable de les declaraciones dafechamente falses, atropaes nel entamu del mentáu impresu de “Plazos (Inscripción y Matrícula)”.